Au Uianga a te Aronga Tatau

Eaa a Mose i riri ei i te nga tamariki a Aarona ia Eleazara raua ko Itimara i muri ake i te matenga o to raua nga tuakana ko Nadaba raua ko Abihu, e akapeea i maru mai ei tona riri?—Levi. 10:16-20.

Muri poto ake i te akanooia anga te taoonga kau taunga i ko i te tapenakara, kua tamateia e Iehova te nga tamariki a Aarona ko Nadaba raua ko Abihu no te mea kua oronga raua i te ai noa ki mua i Tona aroaro. (Levi. 10:1, 2) Kua akaue a Mose i te nga tamariki a Aarona e ora ra, auraka e eva i to raua nga tuakana i mate. Kare i roa i muri mai, kua riri a Mose ia Eleazara raua ko Itimara no te mea kare raua i kai i te puakanio no te tarangaara. (Levi. 9:3) Eaa ra a Mose i pera ra ei?

Akataka tika mai te au ture ta Iehova i oronga kia Mose e kia kai te taunga tei oronga i te tarangaara i tetai tuanga o te reira, i roto i te paepae o te are uipaanga. E manakoia ana te reira e e tapokianga ara na te aronga e oronga ra i te atinga. Inara me apaiia tetai manga o te toto ki roto i te Ngai Tapu, te pia mua o te nao, auraka te atinga kia kaiia. Mari ra kia tauia te reira.​—Levi. 6:24-26, 30.

I te akaraanga, i muri ake i te au tupuanga kino o taua ra ra, kua kite a Mose e ka anoanoia kia akapapu e te aruia ra te au akauenga pouroa a Iehova. I te kite anga e kua tauia te tarangaara, kua ui riri atu aia kia Eleazara raua ko Itimara e no teaa raua i kore ei e kai i te reira mei tei akakiteia atu, no te mea kare te toto i orongaia ki mua i te aroaro o Iehova i roto i te Ngai Tapu.​—Levi. 10:17, 18.

Kua pau atu a Aarona i te uianga a Mose, i te mea kua akatika aia kia rave te nga taunga i te reira. I te mea kua tamateia tana nga tamariki, penei kua manako a Aarona e kare i tika i te akava ngakau o tetai ua atu kau taunga kia kai i te tarangaara i taua ra ra. Penei kua manako aia e kare a Iehova e mareka mai me kai ratou i te reira, noatu e kare tikai i runga ia ratou te apainga no te tarevake tei raveia e Nadaba raua ko Abihu.​—Levi. 10:19.

Penei kua manako tikai a Aarona e i te ra i rave ei tona pamiri i ta ratou angaanga kau taunga no te taime mua, tika anga ka akapapu meitaki ratou e kia mareka mai a Iehova i te au mea rikiriki ravarai. Tera ra, kua tanoanoaia te ingoa o Iehova e Nadaba raua ko Abihu, e kua otooto tikai te riri o te Atua ia raua. No reira, penei kua manako a Aarona e kare e tau te au mema o tetai pamiri kau taunga tei rave i te ara, kia kai i te atinga tapu.

I te akaraanga kua ariki a Mose i te pauanga a tona teina no te mea te karanga ra te irava e: “E kite akerā Mose i te reira, maru atura aia.” (Levi. 10:20) Papu e kua mareka katoa a Iehova i te pauanga a Aarona.