“E Meitaki Maata Tei te Akono i Tei te Atinga”

KO SAULA te ariki mua o Iseraela i taito. Noatu e na te Atua mou aia i iki, i te openga kua akarongo kore a Saula.

Eaa te au tarevake ta Saula i rave? Ka rauka ainei iaia te kopae i te reira? Akapeea tatou i te puapinga anga na te akamanako anga i tana akaraanga?

Akakite a Iehova i Tana i Iki ei Ariki

Mua ake ka riro mai ei a Saula ei ariki, te tavini ra te peroveta ko Samuela ei komono no te Atua i Iseraela. Teianei kua ruaine a Samuela, e kua akarongo kore tana au tamariki tamaroa. I taua taime rai, te tamatakuia maira te iti tangata e tona au enemi. I te pati anga te aronga pakari o Iseraela kia Samuela kia iki i tetai ariki ei akava e ei arataki ia ratou ki te tamaki, kua akaue a Iehova i te peroveta kia akatainu ia Saula ei arataki e kua karanga e: “Kia ora toku au tangata,” mei te rima o te Philiseti.​—1 Samu. 8:4-7, 20; 9:16.

E “tangata tau tikai e te meitaki” a Saula. Inara, kare e ko tona tu meitaki ua te reira. E tangata akaaka katoa aia. Ei akaraanga, kua ui a Saula kia Samuela e: ‘Kare ainei au i te ngati Beniamina, kare ainei i te mea iti rava i te au kopu-tangata ravarai i te kopu o Beniamina ra? eaa oki koe i pera mai ei kiaku nei?’ E tu akaaka tikai to Saula nona uaorai e no tona pamiri, noatu e “tangata apinga maata” tona papa ko Kisa.​—1 Samu. 9:1, 2, 21.

Akamanako katoa ana i te pauanga a Saula i te akakite anga a Samuela ki te katoatoa i ta Iehova i iki ei ariki no te iti tangata Iseraela. Kua na mua a Samuela i te akatainu ia Saula i te taime ko raua ua, i te akakite anga kiaia e: “Ka rave ei koe i tei tika ia koe ra: tei ia koe oki te Atua.” Muri ua ake, kua akaputuputu mai te peroveta i te au tangata kia akakite i ta Iehova ikianga ki te katoatoa. I te akatakaia anga e ko Saula tei ikiia, kare ua aia i kitea. Kua pipini a Saula no tona tu akama. Kua akakite a Iehova e teiea aia, e kua akariroia aia ei ariki.​—1 Samu. 10:7, 20-24.

I te Ngai Tamaki

Kua akapapu a Saula i tona au tu tau ki tetai ua atu tei manako ekoko. Te tamataku anga te ngati Amona i tetai oire o te ngati Iseraela, ‘kua tae maira te vaerua o te Atua ki runga ia Saula.’ Ma te mana akaaere kua akaue aia kia uipa mai te au vaeau o te iti tangata, akaaere meitaki ia ratou, e kua taki atu ia ratou kia autu. Inara, kua oronga a Saula i te reira autuanga ki te Atua, i te karanga anga e: “Kua  akaora oki a Iehova ia Iseraela i teianei rā.”​—1 Samu. 11:1-13.

E au tu meitaki to Saula e tei iaia ta te Atua akameitakianga. Kua kite katoa mai aia i te mana o Iehova. Tera ra, kia autu ua atu rai te iti tangata Iseraela e to ratou ariki tei runga te reira i tetai tumu puapinga. Kua akakite a Samuela ki te iti tangata Iseraela e: “Kia mataku kotou ia Iehova, e kia akamori kotou iaia, kia akono oki i tona reo e kare e akatokā i te akauenga a Iehova, ei reira kotou, e te ariki katoa tei tutara ki rungao ia kotou, e aru tamou ei i to kotou Atua ra ia Iehova.” Eaa tei papu i te iti tangata Iseraela e ka rauka ia ratou me tiratiratu ratou ki te Atua? “No tona ra ingoa maat[a] e kore ei a Iehova e akaruke i tona iti-tangata,” i tuatua ai a Samuela, “kua tika oki ia Iehova i te akariro ia kotou ei iti-tangata nona.”​—1 Samu. 12:14, 22.

Ko te akarongo te tumu puapinga roa atu i te akamareka i te Atua, e te pera nei rai. Me akarongo te au tavini o Iehova i tana au akauenga, ka akameitaki aia ia ratou. Inara, akapeea me kare ratou e akarongo ia Iehova?

“E Ravenga Neneva Taau”

Kua akanauru pakari tetai angaanga akaou mai a Saula i te ngati Philiseti kia riri. Ko tetai pupu vaeau “mei te one taatai ra te maata” kua tamaki mai ia Saula. “E kia akara akera to Iseraela i to ratou pekapeka, (tumatetenga oki te tangata,) kua pipini iora te tangata i roto i te ana, e i roto i te ngangaere, e i roto i te mato, e i roto i te au ngai teitei, e i roto i te vaarua.” (1 Samu. 13:5, 6) Eaa ra ta Saula ka rave?

Kua akakite a Samuela kia Saula kia aravei iaia i Gilagala, te ngai e oronga ai te peroveta i te au atinga. Kua tiaki a Saula inara, kare a Samuela i tae vave mai ana e kua pueu aere te pupu vaeau o Saula. Kua rave i reira a Saula e nana e oronga i te au atinga. I te oti anga iaia i te rave i te reira, kua tae mai a Samuela. Muri ake i te akarongo anga e eaa ta Saula i rave, kua akakite a Samuela kiaia e: “E ravenga neneva taau: kare koe i akono i te akauenga a to Atua ra a Iehova, tana i akaue mai kia koe ra: naringa oki koe i akapera, kua akamou ravā Iehova i toou au ki runga ia Iseraela e tuatau ua atu. I teianei ra, kare toou au e mou: kua kimi a Iehova i tetai tangata nona e tau ki tona uaorai ngakau; e kua akaue oki a Iehova iaia e, ei tutara ïa ki rungao i tona iti tangata; no te mea, kare akenei koe i akono i ta Iehova i akaue mai kia koe ra.”​—1 Samu. 10:8; 13:8, 13, 14.

No tei ngere i te akarongo, kua maro a Saula i te iki kia akarongo kore i te akauenga a te Atua kia tiaki ia Samuela no te oronga anga i te atinga. E tuke rai te arataa o Saula mei to Gideona, e rangatira no te pupu vaeau o te ngati Iseraela i mua ana! Kua akaue a Iehova ia Gideona kia akameangiti i tona pupu vaeau mei te 32,000 ki te 300, e kua akarongo a Gideona. Eaa te tumu? No te mea e akarongo mou tona ki roto ia Iehova. Ma te tauturu a te Atua, kua autu aia ki rungao i tetai pupu vaeau e 135,000. (Aka. 7:1-7, 17-22; 8:10) Ka tauturu tikaiia a Saula e Iehova. No tei akarongo kore ra a Saula, kua aruia to Iseraela e to Philiseti.​—1 Samu. 13:17, 18.

Me aro atu i te au tu ngata, e akapeea ana tatou me rave i te au ikianga? Mei te akaraanga a te aronga kare e akarongo, penei e meitaki atu te kopae i te au kaveinga a te Atua. I te kore anga a Samuela i tae mai, penei kua manako a Saula i tana i rave e ko te mea tau ia. No te aronga e tauta ra i te akamareka i te Atua, te aru anga i te au kaveinga Pipiria te ka tau kia taangaangaia no te au manamanata ka tupu mai, ko te reira anake ua te mataara tau kia aruia.

Kopae a Iehova ia Saula

I roto i tetai tamakianga ki to Amaleka, kua apa akaou a Saula i tetai tarevake kino. Kua akaapaia e te Atua te iti tangata Amaleka no tei tamaki atu i te ngati Iseraela ma te kore e tumuanga tau, muri mai i te Akarukeanga ia Aiphiti. (Exo. 17:8; Deu. 25:17, 18) Pera katoa, kua kapiti atu to Amaleka i etai ke i te tamaki i te iti tangata  ikiia o te Atua i te tuatau o te Au Akava. (Aka. 3:12, 13; 6:1-3, 33) No reira, kua patoi a Iehova i to Amaleka e kua akaue atu ia Saula kia akapou takiri ia ratou.—1 Samu. 15:1-3.

Kare i akarongo ana i te akauenga a Iehova kia takore takiri i to Amaleka e kia akapou i ta ratou au apinga, kua opu a Saula i to ratou ariki inara kua vaoo i ta ratou au manu memeitaki. Eaa tei tupu i te tuatua atu anga a Samuela kia Saula no runga i teia? Kua tauta a Saula i te akaapa atu i tetai ke na te karanga anga e: “Kua vaoo oki te au tangata nei i te au mamoe memeitaki, e te au puakatoro ra, ei atinga na to Atua ra na Iehova.” Noatu e kua manako a Saula i te akaatinga i te au manu e me kare, kua akarongo kore aia. Kare a Saula e manako akaou ana e e ‘akaaka aia i tana uaorai akara anga.’ No reira, kua akakite mai te peroveta a te Atua e kua akarongo kore a Saula i te Atua. I reira kua akakite atu a Samuela e: “Tei te atinga karakaratio e te atinga ta Iehova i pingapingareka, mei tei te akarongo i te tuatua a Iehova ra? I na, e meitaki maata tei te akono i tei te atinga . . . E tenana, kua akaruke koe i te tuatua a Iehova ra, kua akaruke katoa aia ia koe, auraka koe ei ariki.”​—1 Samu. 15:15, 17, 22, 23.

I te apai ke anga a Iehova i tona vaerua tapu e tana akameitaki anga mei ia Saula, kua tuku mai aia i “tetai vaerua kino” ki runga i te ariki mua o Iseraela. Kua riro te tu o Saula ei tu tarotokaka e te vareae kia Davida—e tangata ta Iehova i akariro ei ariki i muri mai. Maata te taime, kua tauta a Saula i te tamate ia Davida. Te kite anga e “te piri mairā Iehova kia Davida,” i karanga ai te Pipiria, “riro aturā Saula ei enemi no Davida i te au rā katoa.” Kua tauta a Saula i te kimi ia Davida e kua ota katoa atu kia tamateia e 85 taunga e etai atu. No reira rai a Iehova i akaruke ei ia Saula!​—1 Samu. 16:14; 18:11, 25, 28, 29; 19:10, 11; 20:32, 33; 22:16-19.

I te tamaki akaou anga mai to Philiseti i to Iseraela, kua na roto a Saula i te ravenga purepure i te kimi puapinga kore ua anga i tetai tauturu. Tera mai ra, kua puta aia i roto i te tamaki e kua tamate iaia uaorai. (1 Samu. 28:4-8; 31:3, 4) No runga i te ariki akarongo kore mua o Iseraela, te akakite ra te Tuatua Tapu e: “Mate iorā Saula i tana ara i rave ia Iehova ra, i te akono kore i te tuatua a Iehova, e te ui ki te taura vaerua kino. Kare oki aia i ui kia Iehova.”​—1 Para. 10:13, 14

Te akaari taka meitaki maira te akaraanga kino o Saula e ko te akarongo ia Iehova e meitaki atu i te oronga i tetai ua atu atinga kiaia. “Teia oki te inangaro i te Atua,” i tata ai te apotetoro ko Ioane, “ko te akono i tana au akauenga; kare oki tana au akauenga i te mea teiaa.” (1 Ioa. 5:3) Auraka rava tatou e akangaropoina i teia tuatua mou puapinga tikai e: Ko te pirianga oa mou tikai ki te Atua tei runga te reira i to tatou tu akarongo kiaia.

[Tutu i te kapi 21]

Akamata a Saula ei arataki akaaka

[Tutu i te kapi 23]

Eaa a Samuela i akakite ei kia Saula e “e meitaki maata tei te akono i tei te atinga”?