Marekaia Mai e te Atua, Taki Atu ki te Ora Mutu Kore

‘Naau oki, e Iehova, i akameitaki i te tangata tuatua-tika ra, e ma te tu mareka ka akapini koe ia ratou mei te paruru ra.’​—SALA. 5:12.

1, 2. Eaa ta Elia i pati ki te vaine takaua i Zarephata, e eaa te akapapuanga tana i oronga kiaia?

KUA matepongi te vaine e tana tamaiti, e te peroveta a te Atua. I teia vaine takaua i Zarephata e tutungi ra i tetai ai ei tunu kai, kua pati atu te peroveta ko Elia i tetai vai e te varaoa. Kua inangaro aia i te oronga atu i tetai vai, inara tana kai ua rai e “manga faraoa okotai rima e ki, tei roto i te paero, e tetai manga inu i roto i te āriki.” Manako aia e kare tana kai e rava ana no te oronga atu ki te peroveta, e kua akakite atu kiaia.​—1 Ari. 17:8-12.

² “E akamata ana ra i te rave i tetai vaiʼi me kore areto iti naku, ka apai mai ei kiaku nei, ka rave ei i taau e ta to tamaiti. Te tuatua maira oki te Atua o Iseraela ko Iehova, Kare te paero faraoa e iti, kare oki e pou te āriki inu,” i raurau atu ei a Elia.​—1 Ari. 17:13, 14

3. Eaa te ikianga puapinga tei akanooia i mua ia tatou?

³ E ikianga puapinga ta te vaine takaua ka rave i to te iki ua anga me ka oronga aia i tana manga kai. Ka irinaki ainei aia e ka akaora mai a Iehova iaia e tana tamaiti, me kore ka tuku ainei aia i tona anoano pae materia na mua ake, i to te Atua marekaanga e tona pirianga? Mei te reira katoa rai ta tatou ikianga. Ka maata atu ainei to tatou manako kia marekaia mai e Iehova i to te kimi anga i te turanga tinamou i te pae materia? E tumuanga tau to tatou kia irinaki e kia tavini i te Atua. E au takainga ta tatou ka rave kia kimi e kia marekaia mai e ia.

‘Tau rai Koe kia Akamoriia’

4. Eaa ra a Iehova i tau ei kia akamori tatou iaia?

⁴ E tikaanga to Iehova i te irinaki e ka tavini tau te au tangata iaia. Kua akapapu mai tetai pupu o tona au tavini i te rangi i taua tikaanga na te tuatua taokotaianga e: “E tau te kakā ia  koe, e te Atu [Iehova], e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.” (Apo. 4:11) I te mea nana i anga i te au mea ravarai, tau rai kia akamori tatou ia Iehova.

5. Eaa ra te aroa o te Atua ka akakeu ei ia tatou kia tavini iaia?

⁵ Tetai tumu i tavini ei tatou ia Iehova, no tona aroa aite kore no tatou. “Kua anga iora oki te Atua i te tangata i tona uaorai tu; i anga aia iaia i te tu o te Atua ra; i anga aia ia raua ko te tane e te vaine,” i akakite ei te Pipiria. (Gene. 1:27) Kua oronga mai te Atua i te tikaanga ngateitei ki te tangata kia manako e kia rave i te au ikianga. Na te oronga mai anga i te ora kia tatou, kua riro mai a Iehova ei Metua no te tangata ravarai. (Luka 3:38) Mei te metua meitaki rai, kua rave aia i te au mea ravarai kia rauka i tana tamariki tamaroa e te tamariki tamaine te oraanga mataora. “Te akaiti nei aia i tona rā” e te “akatopa mai nei aia i te ua,” kia akatupu maata mai te pareneta Enua i te kai na tatou i roto i te au ngai manea tikai.—Mata. 5:45.

6, 7. (a) Eaa te kino ta Adamu i apai mai ki runga i tana uanga? (e) Eaa ta te atinga o Karaiti ka rave no te aronga e kimi ra i to te Atua marekaanga?

⁶ Kua akaora katoa mai a Iehova ia tatou mei te au tupuanga kino o te ara. Te ara anga, kua riro mai a Adamu mei tetai tangata pere moni tei keia mei tona pamiri kia piri atu ki roto i te pere moni. Na te meameaau anga ia Iehova, kua apai ke a Adamu te manakonakoanga no te tuatau ki mua mei tana tamariki​—te mataora mutu kore. Kua riro tona tu noinoi i te akatuikaa i te tangata ravarai ki te turanga apa. No reira i rokoia ai te tangata ravarai e te maki, te mii, e te mate. E matara mai ei tetai tavini, ka umuumuia tetai tutaki, e kua oronga mai a Iehova i te tutaki ei akaora ia tatou mei te au tupuanga kino. (E tatau ia Roma 5:21.) Te rave anga i te anoano o tona Metua, kua oronga mai a Iesu Karaiti i “tona ora ei oko no te tangata e manganui.” (Mata. 20:28) Kare e roa atu, ka rauka i te aronga tei marekaia mai e te Atua te au akameitakianga maata o taua oko ra.

⁷ Maata atu ta Tei Anga mai ia tatou ko Iehova i rave i ta tetai ua atu tangata, te oronga mai anga i tetai oraanga mataora e te puapinga no tatou. Te rauka anga tona marekaanga, ka kite tatou akapeea aia me takore i te au kino tei tupu ki te tangata ravarai. Ka akaari mai a Iehova kia tatou tataki tai e koia “tei tutaki mai i te aronga i kimi tikai iaia.”​—Ebe. 11:6.

‘E Puareinga Roa Toou Au Tangata’

8. Eaa to Isaia tupuanga e apii maira kia tatou no te tavini anga i te Atua?

⁸ E marekaia mai ei e te Atua ka taangaanga tau tatou i to tatou tikaanga ngateitei. No te mea kare a Iehova e maro ana i tetai tangata kia tavini iaia. To Isaia tuatau, kua ui Aia e: “Koai taku e tono? koai te ka aere no tatou?” Kua akangateitei a Iehova i te peroveta na te akatikaanga iaia kia rave i tetai ikianga. Akamanako ana i to Isaia mataora te pauanga e: “I na, teia au; ko au taau e tono.”​—Isa. 6:8.

9, 10. (a) Eaa to tatou tu i te tavini anga i te Atua? (e) Eaa ra i tau ei no tatou kia tavini ngakau katoa ia Iehova?

⁹ E tikaanga ngateitei to te au tangata kia iki e me ka tavini ratou i te Atua me kare. Inangaro a Iehova kia tavini puareinga ua tatou iaia. (E tatau ia Iosua 24:15.) Ko tetai kare e inangaro i te akamori i te Atua kare e akamareka ana iaia; kare katoa te Atua e ariki i te akamorianga a te aronga te akakoro ua ra i te akareka i te tangata. (Kolo. 3:22) Me tuku tatou i te au anoano o teianei ao kia tamanamanata i ta tatou akamorianga kia kore tatou e akamori ‘ma to tatou ngakau katoa,’ kare tatou e marekaia mai e te Atua. (Sala. 119:2) Kua kite a Iehova e e mea meitaki no tatou kia tavini ngakau katoa iaia. Kua raurau a Mose i te ngati Iseraela kia iki i te ora na te ‘inangaro anga i to ratou Atua ko Iehova, e kia akarongo  ki tona reo, e kia piri atu kiaia.’​—Deu. 30:19, 20

¹⁰ Kua imene te Ariki ko Davida o Iseraela taito kia Iehova e: “E puareinga roa to toou ra au tangata, i te rā o toou ra mana, ma te kakā tapu ra; toou ra uanga, mei te au ïa o te kopu o te popongi.” (Sala. 110:3) Maata te tangata i teia tuatau te aruaru ua ra i te oraanga tinamou i te pae moni e te tamataoraanga. Inara te aronga e inangaro ra ia Iehova, te tuku ra ratou i te tavinianga tapu i mua ake i te au mea ravarai. Te akapapu maira ta ratou tutu maroiroi anga i te tuatua meitaki e ko teea te mea puapinga atu kia ratou. Kua papu tikai ia ratou e ka rauka ia Iehova te oronga mai i ta ratou e anoano ra i te au ra ravarai.​—Mata. 6:33, 34

Au Atinga te Mareka Maira te Atua

11. Eaa te puapinga ta te ngati Iseraela e manakonako ra ka rauka mai na te oronga anga i te au atinga kia Iehova?

¹¹ I raro ake i te Ture koreromotu, kua oronga te iti tangata o te Atua i te au atinga tau kia mareka mai aia. “E kia apai kotou i te atinga au kia Iehova ra, ei apai anga marekaia mai ta kotou,” i karanga ai a Levitiku 19:5. I roto katoa i taua puka Pipiria ra, ka tatau tatou e: “E kia apai kotou i te atinga akameitaki kia Iehova ra, e apai i te ka marekaia mai ei ra.” (Levi. 22:29) Te oronga anga te ngati Iseraela i te au manu tau ei atinga ki runga i te atarau o Iehova, kua aere atu te auai mei te “aunga kakara” rai ki te Atua mou. (Levi. 1:9, 13) Kua akatupu taua au akaarianga aroa a tona iti tangata iaia kia maru e kia mataora. (Gene. 8:21) I roto i teia au akakiteanga o te Ture, ka kite tatou i tetai kaveinga te tau ra ki teia tuatau. Kua mareka a Iehova i te aronga tei oronga i te au atinga tau kiaia. Eaa te au atinga tana ka ariki? Akamanako ana e rua ngai o te oraanga: to tatou tu e ta tatou tuatua.

12. Eaa te au peu no te ‘tuku anga i to tatou au kopapa ei atinga’ te ka riro ei mea viivii ki te Atua?

¹² I roto i tana reta ki to Roma, kua tata te apotetoro ko Paulo e: “Kia tuku atu kotou i to kotou au kopapa ei atinga ora, e te tapu, e tau oki i te Atua, ko te akamori e tau ïa ia kotou.” (Roma 12:1) E marekaia mai ei e te Atua, ka umuumuia tetai tangata kia akono i tona kopapa kia tau ki te Atua. Me ka taviivii aia iaia uaorai i te kai avaava, apinga akakona, me kore te inu maata i te kava, kare e puapingaia taua atinga ra. (2 Kori. 7:1) Tei maata atu, ko te tangata e “akaturi ra me kore tei rave i te moeaana, kua takinga-kino ïa i tona uaorai kopapa,” ka riro tona au tu akono tau kore ei atinga viivii kia Iehova. (1 Kori. 6:18) E mareka mai ei te Atua, ‘kia tapu te au tu’ o tetai tangata.​—1 Pete. 1:14-16.

13. Eaa ra i tau ei kia akameitaki me kore kia akapaapaa tatou ia Iehova?

¹³ Tetai atinga e mareka ra a Iehova, ta tatou tuatua. E tuatua meitaki ua ana te aronga tei  inangaro ia Iehova i te ngai tangata e i to ratou kainga. (E tatau ia Salamo 34:1-3.) E tatau ia Salamo 148-150, e akara eia taime teia nga taramo e toru te akamaroiroi anga ia tatou kia akameitaki me kore kia akapaapaa ia Iehova. Tika rai, “e tau te akameitaki i te aronga tiratiratu.” (Sala. 33:1) Te akakite maira to tatou Akaraanga ko Iesu Karaiti i te puapinga kia akapaapaa i te Atua na te tutu aere anga i te tuatua meitaki.​—Luka 4:18, 43, 44.

14, 15. Eaa te au atinga ta Hosea i raurau i te ngati Iseraela kia oronga, e akapeea a Iehova te ariu mai anga?

¹⁴ Te akapapu maira ta tatou tutu maroiroi anga i to tatou aroa no Iehova, e to tatou inangaro kia marekaia mai e ia. Ei akaraanga, akamanako ana e akapeea te peroveta ko Hosea te akoanga i te ngati Iseraela tei rave i te akamorianga pikikaa e kua ngere i ta te Atua akameitaki anga. (Hose. 13:1-3) Kua akakite a Hosea kia ratou kia pati akatenga e: “Ka akakore mai koe [Iehova] i te au kino katoa, ka āriki mai ei ia matou ma te aroa: ka oronga atu ei matou i te atinga ra o to matou vaa.”​—Hose. 14:1, 2.

¹⁵ Te taiku ra ‘te atinga o to tatou vaa’ ki te au tuatua ngakau tae tamanako meitakiia, te akapaapaa ra i te Atua mou. Akapeea a Iehova te ariu mai anga ki te aronga e rave ra i taua au atinga ra? Kua tuatua aia e: “Naku e aroa ua atu ia ratou.” (Hose. 14:4) Te aronga tei oronga i taua au atinga akapaapaa, kua akakore a Iehova i ta ratou ara, e kua akaari i tona marekaanga e tona pirianga.

16, 17. Me akakeuia tetai tangata e te akarongo i te Atua kia tutu aere i te tuatua meitaki, akapeea a Iehova te ariki mai anga i tana akapaapaa anga?

¹⁶ E riro ua ana te akapaapaa anga ia Iehova i te ngai tangata ei mea puapinga i roto i te akamorianga mou. E puapinga tikai ki te tata taramo te akakaka anga i te Atua mou, i pati akatenga ai aia ki te Atua e: “E Iehova, e āriki mai koe i ta toku vaa e oronga ua atu nei.” (Sala. 119:108) Akapeea ra i teia tuatau? Tuatua anga no te urupu tangata i to tatou tuatau, kua totou a Isaia e: ‘Ka akakite ratou i te akameitaki anga ia Iehova e ka tae ratou e ta ratou au apinga aroa ki runga i te atarau o toku Atua ma te marekaia mai.’ (Isa. 60: 6, 7) Te akatupu anga i te reira, mirioni ua atu te oronga ra ‘i te atinga akameitaki anga i te Atua, ta te vaa nei, te akapaatu anga i tona ingoa.’​—Ebe. 13:15.

¹⁷ Akapeea ra koe? Te oronga ra ainei koe i te au atinga tau ki te Atua? Me kare ra, ka rave ainei koe i te au taui anga e ka akapaapaa ia Iehova i te ngai tangata? Me akakeuia koe e te akarongo kia tutu aere i te tuatua meitaki, ka riro taau atinga ei ‘mea tau maata kia Iehova.’ (E tatau ia Salamo 69:30, 31) Papu, ka tae taua “aunga kakara ra” o taau atinga akapaapaa kia Iehova e ka mareka mai aia ia koe. (Eze. 20:41) Kare e rauka kia akaaiteia atu te rekareka ka rauka ia koe.

‘Na Iehova, e Akameitaki i te Tangata Tuatua-Tika’

18, 19. (a) Eaa te manako no te tavinianga i te Atua ta te au tangata e irinaki ra i teia tuatau? (e) Ka taki atu te ngere anga i to te Atua marekaanga ki teaa?

¹⁸ Teia tuatau, maata te tangata e manako ra mei tetai rai i te tuatau o Malaki: “E mea puapinga kore te akamori atu i te Atua: e eaa ta tatou puapinga i te akono anga i tana au akonoanga?” (Mala. 3:14) No te au inangaro pae materia, kua manako ratou e kare e rauka i te aru i to te Atua akakoroanga e kare tana au  ture e tau no teia tuatau. Kia ratou, e kaimoumou taime e te akariri tangata te tutu aere i te tuatua meitaki.

¹⁹ Akamata mai taua au tu i roto i te kainga i Edene. Kua maro a Satani ia Eva kia kopae i te oraanga puapinga umere tikai ta Iehova i oronga kiaia e kia kore e marekaia mai e Ia. Teia tuatau, te maro nei rai a Satani i te au tangata kia irinaki e kare e puapinga i te rave i to te Atua anoano. Inara, kua kite mai a Eva raua ko tana tane e ko te ngere anga i to te Atua marekaanga, ka ngere raua i to raua oraanga. Te aronga tei aru i to raua akaraanga kino ka kite katoa mai e ka ngere ratou i to ratou oraanga.​—Gene. 3:1-7, 17-19.

20, 21. (a) Eaa ta te vaine takaua i Zarephata i rave, eaa te akameitakianga tei rauka iaia? (e) Akapeea e eaa ra tatou ka aru ei i te vaine takaua i Zarephata?

²⁰ Akamanako ana i te tupuanga mii o Adamu raua ko Eva e te turanga o te vaine takaua i Zarephata raua ko Elia tei taikuia i mua ana. Muri ake te akarongo anga i te au tuatua akamaroiroi anga a Elia, kua tunu te vaine i te kai e kua oronga i te kai na mua ki te peroveta. I akatupu ei a Iehova i tana taputou i akakite kia Elia. Te akakite maira te papaanga e: “Kua kai iora aia, e ko Elia, e tona katoa ngutuare, e manganui akera te rā. Kare oki taua paero faraoa ra i iti, kare oki te āriki inu i pou, i ta Iehova oki i tuatua mai ia Elia.”​—1 Ari. 17:15, 16.

²¹ Kua rave te vaine takaua i Zarephata i tetai mea e tokoiti ua o te au pirioni tangata e ora nei e inangaro puareinga ra i te rave. Kua irinaki pu tikai aia ki te Atua o te ora, e kua tauturu mai aia iaia. Te akapapu maira teia papaanga Pipiria e tetai atu, e te tau ra tatou kia irinaki ia Iehova. (E tatau ia Iosua 21:43-45; 23:14.) Te akapapu katoa maira te au oraanga o te Au Kite o Iehova i teia tuatau e kare rava aia e akaruke i te aronga te mareka maira aia.​—Sala. 34:6, 7, 17-19. *

22. Eaa i rapurapuia ai kia kimi tatou i to te Atua marekaanga ma te kore e tavarevare?

²² Te vaitata maira te ra akavaanga o te Atua no te aronga “tei noo i te ao katoa nei.” (Luka 21:34, 35) Kare e ngai e oro ei kia ora. Kare te au apinganui e te oraanga meitaki pae materia e aite atu ki te puapinga o te akarongo anga ki te Akava ikiia a te Atua te tuatua anga e: “Ka aere mai kotou, te aronga i akaoraia e taku Metua, e noo ki te basileia i akonoia no kotou mei te maani anga mairai i te enua nei.” (Mata. 25:34) Ae, ‘na Iehova uaorai, i akameitaki i te tangata tuatua-tika ra, e ma te tu mareka ka akapini aia ia ratou mei te paruru ra.’ (Sala. 5:12) Kare ainei tatou e tau i te kimi i to te Atua marekaanga?

[Tataanga Rikiriki i Raro]

Maara Ainei ia Koe?

• Eaa ra a Iehova i tau ei kia akamori ngakau tae tatou iaia?

• Eaa te au atinga ka ariki mai a Iehova i teia tuatau?

• Te taiku ra te tuatua ‘te atinga o to tatou vaa’ ki teaa, eaa tatou ka oronga ai i te reira kia Iehova?

• Eaa tatou ka kimi ei i to te Atua marekaanga?

[Au Uianga Apii]

[Tutu i te kapi 13]

Eaa te ikianga puapinga ta te peroveta a te Atua i tuku ki mua i tetai metua vaine putaua?

[Tutu i te kapi 15]

Eaa te puapinga ka rauka ia tatou me oronga i te atinga akapaapaa kia Iehova?

[Tutu i te kapi 17]

Ka puapingaia toou irinaki ngakau tae kia Iehova