Rikarika ra Ainei Koe i te Kino?

“Te rikarika ra koe [Iesu] i te kino.”​—EBE. 1:9.

1. Eaa ta Iesu i apii no runga i te aroa?

TE AKAKITE pakari anga i te puapinga o te aroa, kua akakite a Iesu Karaiti ki tana au pipi e: “E tuku atu au i te akauenga ou kia kotou, E aroa kotou ia kotou uaorai: mei iaku i aroa ia kotou na, e aroa katoa oki kotou ia kotou uaorai. Ko te mea teia e kite ei te tangata katoa e e pipi kotou naku, kia aroa kotou ia kotou uaorai.” (Ioa. 13:34, 35) Kua akaue a Iesu i tana au pipi kia akaari i te aroa akaatinga uaorai ki tetai e tetai. Ka kiteaia ratou no to ratou aroa. Kua akamaroiroi katoa a Iesu ia ratou: ‘E aroa atu i to kotou au enemi, e pure oki no te aronga tei takinga-kino mai ia kotou.’​—Mata. 5:44.

2. Eaa ta te au pipi a Karaiti ka rikarika atu?

² Kapiti mai ki te apiianga i tana au pipi no runga i te aroa, kua apii a Iesu e eaa ta ratou ka rikarika. Kua tuatuaia no runga ia Iesu e: “I inangaro koe i te tuatua-tika, e te rikarika ra koe i te kino.” (Ebe. 1:9; Sala. 45:7) Te akaari maira teia e ka akatupu tatou i te inangaro no te tuatua tika pera katoa te rikarika no te ara, me kore no te kino. No reira te apotetoro ko Ioane i akakite tikai ei e: “Ko tei rave i te ara ra, kua akaapa ïa i te ture: ko te ara ïa.”​—1 Ioa. 3:4.

3. No runga i te rikarika i te kino, eaa te au tuanga o te oraanga ka akamanakoia i roto i teia atikara?

³ Ei au Kerititiano, e ui tatou kia tatou uaorai e, ‘Te rikarika ra ainei au i te kino?’ Ka akara  ana tatou akapeea me rikarika i te kino i te au tuanga e a o te oraanga e aru mai nei: (1) to tatou tu no runga i te inu maata i te kava, (2) to tatou manako no runga i te angaanga temoni, (3) to tatou tu no te tu akono tau kore, e te (4) to tatou manako no te aronga tei inangaro i te kino.

Akono Tau i te Inu Kava

4. Eaa ra a Iesu i tapupu kore ei i te akamatakite i te inu maata i te kava?

⁴ E inu ana a Iesu i te uaina i tetai taime, te arikianga i te reira ei apinga aroa mei ko mai i te Atua. (Sala. 104:14, 15) Inara, kare rava aia i rave tau kore ana i teia apinga aroa na te inu maata anga. (Mase. 23:29-33) No reira i rauka ai ia Iesu i te ako atu ma te tapupu kore no runga i taua angaanga ra. (E tatau ia Luka 21:34.) Ka akatupu te akono tau kore anga i te kava i tetai atu au ara kino. No reira, kua tata te apotetoro ko Paulo e: ‘Auraka e kona i te wina, e tupu ei te kanga maata; kia ki ra kotou i te vaerua.’ (Ephe. 5:18) Kua ako katoa aia i te au vaine pakarikari i roto i te putuputuanga kia kore e “inu maata i te wina.”​—Tito 2:3.

5. Eaa te au uianga a te aronga inu kava ka ui kia ratou uaorai?

⁵ Me iki koe i te inu kava, e ui kia koe uaorai e: ‘Aite ainei toku manako ki to Iesu no te inu maata i te kava? Me ka ako au i tetai ke no runga i teia manamanata, ka tapupu ainei au i te tuatua atu? Te inu ra ainei au no te takore atu i te manamanata me kore te taitaia? Eaa te maata taku e inu ana i te epetoma tataki tai? Eaa toku manako me karanga mai tetai tangata e te inu maata ra au i te kava? Ka riri ainei au me kore ka patoitoi atu?’ Te akatikaanga ia tatou uaorai kia inu maata i te uaina ka akatupu ia tatou kia kore e akamanako meitaki e kia kore e rave i te au ikianga tau. E tauta ana te au pipi a Karaiti i te paruru i to ratou manako meitaki.​—Mase. 3:21, 22.

Kopae i te Au Angaanga Temoni

6, 7. (a) Akapeea a Iesu te ariu atu anga kia Satani e te au temoni? (e) Eaa ra te au angaanga temoni e totoa nei i teia tuatau?

⁶ Iaia i te enua nei, kua patoi pakari a Iesu ia Satani e te au temoni. Kua patoi aia i ta Satani timataanga i tona tu tiratiratu. (Luka 4:1-13) Kua akataka e kua patoi katoa aia i te au tautaanga kikite te akakeu ra i tona manako e tana au angaanga. (Mata. 16:21-23) Kua tauturu a Iesu i te aronga te tau ra kia ora mai mei te taomianga kino a te au temoni.​—Mare. 5:2, 8, 12-15; 9:20, 25-27.

⁷ Muri ake te akateronoia anga a Iesu ei Ariki i te mataiti 1914, kua tama aia i te au rangi no te akakeuanga viivii a Satani e te au temoni. Tei tupu mai, te pakari atura te tautaanga a Satani​—i teianei i to mua ana—​i te “pikikaa i to te ao katoatoa nei.” (Apo. 12:9, 10) Kare tatou e poitirere e te totoa nei e te maata maira te inangaro no te angaanga temoni. Eaa te au takainga ka rave tatou ei paruru ia tatou uaorai?

8. Eaa ta tatou tataki tai ka rave no runga i ta tatou ikianga i te tamataoraanga?

⁸ Te akamatakite papu maira te Pipiria i te au kino e piri atura ki te angaanga purepure. (E tatau ia Deuteronomi 18:10-12.) Te akakeu nei a Satani e tana au temoni i te manako o te tangata i teia tuatau na roto i te au teata, puka, e te au apinga kangakanga erikitoroniki e akamaroiroi ra i te au angaanga temoni. No  reira me iki i te tamataoraanga, e ui kia tatou uaorai e: ‘I te au marama i topa, kua iki ainei au kia tamataoraia mai e te au teata, porokaramu tivi, apinga kangakanga erikitoroniki, puka, me kore te au komiki no te angaanga temoni? Marama ra ainei au i te puapinga kia kopae i teia au mea kino me kore, kare au e manako ana e e kino te reira? Kua akamanako ainei au e eaa to Iehova manako no taku ikianga no te tamataoraanga? Me kua akatika au i teia au akakeuanga a Satani i roto i toku oraanga, ka akakeu ainei toku inangaro ia Iehova e tana au kaveinga tuatua tika kia rave au i te ikianga meitaki e kia kopae atu i te reira?’​—Anga. 19:19, 20.

Akarongo i ta Iesu Akamatakiteanga no te Tu Akono Tau Kore

9. Akapeea te tangata me akatupu i te inangaro i te kino?

⁹ Kua turuturu a Iesu i to Iehova turanga akono tau no te ainga. Kua tuatua aia e: “Kare rai kotou i tatau e, ko tei anga ia raua i muatangana, i anga ïa i te tane okotai e te vaine okotai; E kua na ko akera, ‘E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai?’ E teianei, kare atura raua i te toko rua, kua kopapa okotai ra. E ta te Atua i topiri ra, auraka te tangata e akataka ke atu.” (Mata. 19:4-6) Kua kite a Iesu e ka akakeuia to tatou ngakau e ta tatou ka akara. I roto i tana Tuatua i runga i te Maunga, kua akakite aia e: “Kua akarongo kotou e, i tuatuaia mai e te aronga taito ra e, ‘Auraka rava koe e akaturi:’ Te karanga atu nei ra au kia kotou, Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mata. 5:27, 28) Te aronga tei kopae i ta Iesu akamatakiteanga te akatupu tikai ra i te inangaro i te kino.

10. Akakite mai i tetai tupuanga e akaari maira e ka rauka i tetai tangata te kopae i te au angaanga ainga viivii.

¹⁰ Te akamaroiroi ra a Satani i te ainga tau kore na roto i te au angaanga ainga viivii. Kua ki te akatereanga o te au mea nei i te reira. E ngata i te aronga e akara ra i te au angaanga ainga viivii i te akakore i te au tutu tau kore mei to ratou manako. Maata to ratou inangaro i te au angaanga ainga viivii. Akamanako ana eaa tei tupu ki tetai Kerititiano. Kua karanga aia e: “Kua akara au i te au angaanga ainga viivii ko au anake ua. Manako au e ko taku e akarakara ra e tuke ki te oraanga e tavini ra au ia Iehova. Kua kite au e tarevake teia, inara kua akakite au kiaku uaorai e te arikiia nei rai taku tavinianga ki te Atua.” Eaa tei taui i te manako o teia taeake? Kua akakite aia e: “Noatu e ko te mea ngata roa atu te reira taku i rave ana, kua akakite au i toku manamanata ki te aronga pakari.” Kua akaruke takiri teia taeake i teia peu viivii tikai. “Muri ake te takore anga au i teia ara i roto i toku oraanga,” i akakite ei aia, “i kite ei au e e akava ngakau ma tikai toku.” Te aronga e rikarika ra i te kino kia kite i te rikarika i te au angaanga ainga viivii.

11, 12. Akapeea tatou me akaari i te rikarika no te kino me iki i te akatangi imene?

¹¹ Ka akakeu pakari te akatangi imene e te au tuatua i to tatou manako e te ngakau. E apinga aroa te akatangi imene no ko mai i te Atua e kua roa te taangaangaia anga i roto i te akamorianga mou. (Exo. 15:20, 21; Ephe. 5:19) Inara te akamaroiroi ra te ao kino o Satani i te akatangi imene e akangateitei ra i te tu akono  tau kore. (1 Ioa. 5:19) Akapeea koe i kite ei e ko te akatangi imene taau e akarongo ra te akaviivii ra ia koe, me kare?

¹² Penei e ui kia koe uaorai e: ‘Te akangateitei ra ainei te au imene taku e akarongo ra i te ta tangata, akaturi, moeaana, e te akakino Atua? Me ka tatau au i te au tuatua o tetai au imene ki tetai tangata, ka kite mai ainei aia e te rikarika nei au i te kino, me kore ka akaari mai ainei te au tuatua e kua viivii toku ngakau?’ Kare tatou e tuatua e te rikarika nei tatou i te kino e te akangateitei ra i te reira i roto i te imene. “Kareka ta te vaa e tuku mai, no roto mai ïa i te ngakau; koia te mea e viivii ei te tangata. No roto mai oki i te ngakau te manako kikino, te ta tangata, te moeaana, te akaturi, te keia, te tapepe pikikaa, e te akakino Atua,” i tuatua ai a Iesu.​—Mata. 15:18, 19; akaaite ia Iakobo 3:10, 11.

Aru i to Iesu Manako no te Aronga Tei Inangaro i te Kino

13. Eaa to Iesu manako no te aronga e rave marokiakia ra i te ara?

¹³ Kua akakite a Iesu e i aere mai aia te pati i te aronga ara, me kore te aronga kino kia tataraara. (Luka 5:30-32) Eaa tona manako no te aronga e rave marokiakia ra i te ara? Kua akamatakite pakari mai a Iesu no runga i te akakeuanga a taua aronga ra. (Mata. 23:15, 23-26) Kua akakite taka meitaki katoa aia e: “Kare te aronga e tuatua mai iaku e, E te Atu, e te Atu, e ope katoatoa i te tae ki te basileia ra ki te ao; ko tei akono ra i te anoano o taku Metua i te ao ra. E manganui te ka tuatua mai kiaku i taua rā ra [me rave te Atua i te akavaanga], E te Atu, e te Atu, kare aina kua apii matou ma toou ingoa; e kua tuaru i te au demoni i toou ingoa; e kua rave i te au akairo e manganui ma toou ingoa?” Noatu rai, ka kopae aia i te aronga tataraara kore e rave ra i te kino, na te tuatua anga e: “Ka aere ke atu kotou.” (Mata. 7:21-23) Eaa ra ka raveia ai teia tu akavaanga? No te mea kare ratou e akangateitei ana i te Atua e te takino ra i tetai ke na roto i ta ratou au angaanga kino.

14. Eaa ra i akaateaia ai te aronga rave ara kare i tataraara mei te putuputuanga?

¹⁴ Te akaue maira te Tuatua a te Atua e kia akaateaia te aronga rave ara kare i tataraara mei te putuputuanga. (E tatau ia 1 Korinetia 5:9-13.) E mea tau teia no nga tumu e toru: (1) kia kore te ingoa o Iehova e akakinoia, (2) kia paruru i te putuputuanga kia kore e taviiviiia, e te (3) kia tauturu i te tangata rave ara kia tataraara me ka rauka.

15. Me ka inangaro tatou kia vai tiratiratu kia Iehova, eaa te au uianga pakari ta tatou ka ui kia tatou uaorai?

¹⁵ Te aru ra ainei tatou i to Iesu manako no runga i te aronga te rave tamou ra i te kino? Ka anoanoia tatou kia akamanako i teia au uianga: ‘Ka iki ainei au i te piri putuputu atu ki tetai tangata tei akaateaia me kore tei akatakake iaia uaorai mei te putuputuanga Kerititiano? Akapeea me e kopu tangata vaitata aia kare e noo ana i te kainga?’ Ka riro taua turanga ra ei timataanga tikai i to tatou inangaro i te tuatua tika e to tatou tu tiratiratu ki te Atua. *

16, 17. Eaa tetai turanga ngata ta tetai metua vaine Kerititiano i aro atu, e eaa tei tauturu iaia kia turuturu i te akanoonooanga no te akaatea anga i te aronga rave kino kare i tataraara?

 ¹⁶ Akamanako i te tupuanga o tetai tuaine kua inangaro ana tana tamaiti mapu ia Iehova. I muri ake, kua rave aia i te kino ma te tataraara kore. No reira, kua akaateaia aia mei te putuputuanga. Te inangaro ra to tatou tuaine ia Iehova, pera katoa i tana tamaiti, inara e ngata tikai iaia i te aru i te akauenga Tuatua Tapu kia kore e piri atu kiaia.

¹⁷ Eaa te tauturu taau ka oronga ki teia tuaine? Kua tauturu tetai tangata pakari iaia kia kite mai e te marama ra a Iehova i tona mamae. Kua pati te taeake iaia kia akamanako i to Iehova mamae te meameaau anga tetai o tana au angera. Kua uriuri manako te tangata pakari kiaia e noatu e kua kite a Iehova mei teaa rai te mamae no taua turanga ra, te umuumu maira aia kia akaateaia te aronga rave ara kare i tataraara. Kua akarongo meitaki aia i te au akamaaraara anga e kua turuturu tiratiratu i te akanoonooanga no te akaatea anga. * E akarekareka ana taua tu tiratiratu ra i to Iehova ngakau.​—Mase. 27:11.

18, 19. (a) Te kore anga e piri atu ki te tangata rave kino te akapapu maira e te rikarika ra tatou i teaa? (e) Eaa te ka tupu mai me tiratiratu tatou ki te Atua e tana akanoonooanga?

¹⁸ Me aro atu koe i taua turanga ra, e akamaara ine, e te marama maira a Iehova i toou turanga. Na te kopae anga i te aronga tei akaateaia me kore tei akatakake ia ratou, te akaari ra koe e te rikarika ra koe i te au tu e te au angaanga tei tupu mai. Te akaari katoa ra koe e te rave ra koe i te mea meitaki nona no toou inangaro iaia. No toou tu tiratiratu kia Iehova penei ka akakeuia taua tangata tei akoia kia tataraara e kia oki mai kia Iehova.

¹⁹ Kua tata tetai tangata tei akaateaia e tei akaoki akaouia mai i muri mai e: “Mataora tikai au e te inangaro ra a Iehova i tona iti tangata, te akapapu anga e kia vai ma ua tona akaaerenga. Te akaraanga ki te aronga i vao e pakari tikai te reira, inara e tu tau e te aroa i te rave i te reira.” Toou manako ka tauturuia ainei teia tangata kia manako akapera me kua piri putuputu ana te au mema o te putuputuanga, e tona pamiri kiaia, i tona akaateaia anga? Te akapapu maira ta tatou turuturu anga i te akanoonooanga Tuatua Tapu no te akaatea anga e te inangaro ra tatou i te tuatua tika e te ariki ra i to Iehova tikaanga kia akanoo i te au turanga no te tu akono tau.

“Rikarika i te Kino”

20, 21. Eaa ra i puapinga ai kia kite i te rikarika i te kino?

²⁰ “E akono meitaki, e matakite,” i akamatakite mai ei te apotetoro ko Petero. No teaa ra? No te mea “te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.” (1 Pete. 5:8) Ko koe ainei taua tangata ra? Tei runga te reira i taau i kite meitaki no runga i te rikarika i te kino.

²¹ Kare i te mea mama ua i te rikarika i te kino. Anau araia mai tatou, e te noo nei tatou i te ao te akamaroiroi ra ia tatou kia aru i te au anoano o te kopapa. (1 Ioa. 2:15-17) Na te aru anga ia Iesu Karaiti e te inangaro maata i te Atua ko Iehova, ka rauka ia tatou i te rikarika i te kino. E tauta tatou i te “rikarika i te kino,” ma te irinaki tikai e te ‘tiaki ra a Iehova i tona aronga tapu; te akaora ra aia ia ratou i te rima o te aronga kino ra.’—Sala. 97:10.

[Au Tataanga Rikiriki i Raro]

Akapeea Koe me Pau?

• Eaa te ka tauturu ia tatou kia akara meitaki i to tatou tu no runga i te kava?

• Eaa te au takainga paruru anga ta tatou ka rave i te patoi atu i te au angaanga

temoni?

• Eaa i kino ei te au angaanga ainga viivii?

• Akapeea tatou me akaari i te rikarika no te kino me akaateaia tetai te inangaro ra tatou?

[Au Uianga Apii]

[Tutu i te kapi 29]

Me iki koe i te inu i te kava, eaa taau ka akamanako?

[Tutu i te kapi 30]

Matakite i te akakeuanga a Satani no te tamataoraanga

[Tutu i te kapi 31]

Akatupu te tangata akarakara i te angaanga ainga viivii i te inangaro no teaa?