Auraka e Akavare ia Koe Uaorai kia Manako Tarevake

“EAA koe i akaperaʼi?” I ui ei te Atua kia Eva muri ake te kai anga i te rakau tureia. “I pikikaa mai te ovi iaku, kai iora au,” i pau atu ei aia. (Gene. 3:13) Ko Satani te ovi kikite tei taki atu iaia kia akarongo kore i te Atua, tei kapikiia i muri mai e “ko taua ovi taito ra, . . . ko tei pikikaa i to te ao katoatoa nei.”​—Apo. 12:9.

Te akaari maira teia papaanga o Genese e e kikite a Satani, tei pikikaa no te akakoroanga kia akavare i te aronga kare e matakite ana. Kua vare atu a Eva i tana pikikaa. No reira auraka rava tatou e manako e ko Satani ua te ka rauka i te akavare ia tatou. Te akamatakite katoa maira te Pipiria i te kino no te ‘akavare anga ia tatou uaorai kia manako tarevake.’​—Iako. 1:22

Te manako anga i te akavare anga ia tatou uaorai, penei ka tupu me kore kare e tupu. Inara, e akakoroanga tetai no te akamatakite anga a te Atua. No reira, e akamanako meitaki tatou akapeea tatou i te akavare anga ia tatou uaorai e ko teea manako tarevake te ka akavare ia tatou. Ka rauka tetai akaraanga Tuatua Tapu i te tauturu ia tatou.

Akaraanga no te Akavare Anga

Mei te mataiti 537 M.T.N., kua tuku a Kuro Maata o Peresia i te akauenga no te ngati Iuda tei tuikaa i Babulonia kia oki ki Ierusalema kia akatu akaou i te iero. (Ezera 1:1, 2) Tera mai mataiti, kia tau ki ta Iehova akakoroanga, kua akamou te iti tangata i te tango no tetai iero ou. No ta Iehova akameitakianga i te tuanga mua o teia angaanga puapinga, kua rekareka te aronga tei oki atu e kua akapaapaa iaia. (Ezera 3:8, 10, 11) Inara, kare i roa ana kua patoiia mai ta ratou akatu anga e kua taitaia te iti tangata. (Ezera 4:4) Mei tetai 15 mataiti muri ake te oki anga ratou, kua arai te aronga mana akaaere o Peresia i te au angaanga akatu anga i Ierusalema. Ei akaketaketa i te araianga, kua aere atu te aronga mana ki Ierusalema e ‘kua tapu atura i te ngati Iuda ma te rima ririnui.’​—Ezera 4:21-24.

No teia araianga pakari tikai, kua akavare te ngati Iuda ia ratou uaorai kia manako tarevake. Kua akakite ratou kia ratou uaorai e: “Kare i tae te tuatau, te tuatau e akatuiaʼi te are o Iehova.” (Haga. 1:2) Kua manako ratou e kare te Atua e inangaro ana kia akatu vivikiia te iero. Ma te kore e kimi i tetai ravenga i te rave i tona anoano, kua akaruke ratou i ta ratou angaanga tapu e kua akapou i to ratou taime i te akaou aere i to ratou au are. Kua ui te peroveta a te Atua ko Hagai kia ratou: “E kotou e, ko te tuatau ainei teia kia noo kotou ki roto i to kotou au are apapaia ra, e e vaoo tanea uaia teianei are [iero o Iehova ra]?”​—Haga. 1:4.

Te kite ra ainei koe te apiianga i roto i teia akaraanga? Te manako tarevake anga i te tuatau no ta te Atua akakoroanga, ka ngaropoina ia tatou te puapinga o te au angaanga pae vaerua e ka varenga ua i te rave i to tatou uaorai au inangaro. Ei akatutuanga, akamanako ana e te tiaki ra koe i te au manuiri. Te tapapa atu anga ia ratou e atoro maira ka rave aere koe i te au angaanga o te ngutuare no to ratou noo mai anga. Inara, kua tae mai te tuatua e ka taroaroa taau au manuiri. Ka akamutu ainei koe i te akapapa?

Kia akamaara ra, e kua tauturu a Hagai raua ko Zekaria i te ngati Iuda kia marama e ka inangaro rai a Iehova kia akatu akaouia te iero ma te kore e tavarevare. “E akamaroiroi katoa kotou, e te au tangata ravarai o te enua nei, . . . e ka rave i te angaanga,” i raurau atu ei a Hagai. (Haga. 2:4) Ka anoanoia ratou kia rave i te angaanga, te irinaki anga e ka tauturu te  vaerua o te Atua ia ratou. (Zeka. 4:6, 7) Ka tauturu ainei teia akaraanga ia tatou kia kore e manako tarevake i te ra o Iehova?​—1 Kori. 10:11.

Mono i te Manako Tarevake ki te Manako Tika

I roto i te rua o tana reta, kua akamanako te apotetoro ko Petero i ta Iehova akapapaanga tuatau no te akanoo anga i “te rangi ou e te enua ou.” (2 Pete. 3:13) Kua tata aia e kua akaekoko tetai au tangata taitoito e me ka akao mai rai te Atua ki roto i te au angaanga a te tangata. Kua taumaro ratou e kare e mea e tupu, e “te vai ua nei rai oki te au mea katoa . . . mei te maani anga mairai o te enua.” (2 Pete. 3:4) Inangaro a Petero i te patoi i taua manako tarevake. Kua tata aia e: ‘Te akaaraara atu nei au i to kotou ngakau pikikaa kore kia manako.’ Kua akamaara atu aia i te au taeake Kerititiano e kua tarevake te aronga taitoito. Kua akao mai ana te Atua ki roto i te au angaanga a te tangata, te tuku mai anga i te vai tiruvi kino rava atu i te ao katoa nei.​—2 Pete. 3:1, 5-7.

Kua oronga a Hagai i taua tu akoanga ki te ngati Iuda taitaia e te paruparu, i te mataiti 520 M.T.N. Kua ako aia ia ratou e: ‘Ka akamaaraara ana i to kotou na au aerenga.’ (Haga. 1:5) Ei akaaraara i to ratou manako, kua akamaara aia i tona au taeake akamori i to te Atua au akakoroanga e te au taputou no Tona iti tangata. (Haga. 1:8; 2:4, 5) Muri ua ake i taua akamaroiroianga, kua akamata akaou te akatu anga​—noatu te arairai anga a te aronga mana. Kua tauta akaou te au enemi i te tapu i te angaanga akatu, kare ra ratou i puapinga ana. Kua akaateaia te araianga, e kua oti te iero i te akatuia i roto i te rima mataiti.​—Ezera 6:14, 15; Haga. 1:14, 15.

Akamaaraara i to Tatou Au Aerenga

Toou manako me tupu mai te au manamanata ka manako taitaia ainei tatou mei te ngati Iuda rai i to Hagai tuatau? Me ka tupu te reira, ka ngata ia tatou i te akono tamou i to tatou maroiroi i te tutu aere i te tuatua meitaki. Inara, eaa te ka akatupu ia tatou kia manako taitaia? Penei te mamae ra tatou no te tu tika kore o teia akatereanga o te au mea nei. Akamanako ana ia Habakuka, tei ui e: “Mei teaa te roa toku kapiki atu anga no te tauturu i mua ake ka akarongo mai ei koe, i mua ake ka akaora ai koe ia matou mei te kino?” (Haba. 1:2, Today’s English Version) No runga i ta tetai pae e manako ra no te tu taroaroa, ka ngaropoina i tetai Kerititiano te manako rapurapu e ka tuku i te oraanga meitaki ko te mea puapinga atu. Te kite ra ainei koe i te reira e tupu ra kia koe? Me ka manako akapera tatou, te akavare ra tatou ia tatou uaorai. E mea puapinga tikai kia aru tatou i te akoanga Tuatua Tapu kia ‘akamaaraara i to tatou au aerenga’ e kia ‘akaaraara i to tatou ngakau pikikaa kore’! Ka ui tatou kia tatou uaorai e, ‘Ka poitirere ainei au e te roa ua atura teia akatereanga o te au mea kino, i taku i tapapa atu ana?’

Tatari Anga i te Tuatau ta te Pipiria i Totou Mai

Akamanako ua ana i ta Iesu au tuatua no te openga o teia akatereanga o te au mea nei. Te akaari maira te papaanga a Mareko i ta Iesu  totou no te au ra openga e te ako putuputu maira a Iesu ia tatou kia vai matakite ua. (Mare. 13:33-37) Ka kite mai tatou i taua akamatakite anga i roto i te akatakaanga o te totou no te ra maata o Iehova i Aramakito. (Apo. 16:14-16) Eaa ra i putuputu ei te au akamatakite anga? Te anoanoia ra taua au akamaaraara anga no te roa i te tiaki ua anga, ka ngaropoina i te au tangata te tu manako rapurapu.

Te akatutu maira a Iesu i te anoano kia vai matakite ua tatou ia tatou e tatari ra i te openga o te akatereanga o te au mea nei. Te taiku ra aia ki tetai tangata ngutuare tei keiaia tana apinga i roto i te are. Eaa tana ka rave kia kore e keiaia? Ka ara ua aia i te po katoa. Kua taopenga a Iesu i teia akatutuanga na te akoanga ia tatou e: “Kia vai teateamamao rai kotou, no te mea, ei te ora manako koreia e kotou, e tae mai ei te Tamaiti a te tangata.”​—Mata. 24:43, 44.

Te akaari maira taua akatutuanga i te anoano kia tapapa atu rai, noatu eaa te roa o te tuatau. Kare tatou e manamanata e kua roa teia akatereanga o te au mea kino i ta tatou i tapapa atu ana. Auraka tatou e akavare ia tatou uaorai na te manako tarevake anga e ‘kare to Iehova tuatau i tae mai.’ Ka akaparuparu taua tu manako ra i to tatou inangaro kia tutu aere i te tuatua meitaki o te Patireia.​—Roma 12:11.

Takore Atu i te Manako Tarevake

No runga i te manako tarevake, te tau ra te kaveinga i roto ia Galatia 6:7 e: “Auraka e vavare . . . ko ta te tangata e ruru ra, ko tana ra ïa e kokoti.” Me kare e tanuia tetai kai ki roto i te one, ka tupu mai te tita. Pera katoa me kare tatou e akaaraara i to tatou manako, ka tupu mai te manako tarevake ki roto ia tatou. Ei akaraanga, penei ka tuatua tatou uaorai e, ‘Kare ekoko e te aere maira te ra o Iehova​—kare ra e tae vave mai.’ Ka akaparuparu taua tu manako ra i ta tatou au angaanga teokaratiki. Aere ua rai, kare tatou e rave maroiroi akaou i ta tatou akamorianga. Ka rokoia poitirereia mai tatou e te ra o Iehova.​—2 Pete. 3:10.

Inara, kare tatou e manako tarevake me akapapu ua rai tatou kia tatou uaorai ‘i to te Atua anoano, tei meitaki, tau, e te apa kore.’ (Roma 12:2) Tetai tauturu meitaki, te tatau putuputu anga i te Tuatua a te Atua. Ka akaketaketa te au Tuatua Tapu i to tatou irinaki e ka rave ua rai a Iehova i tana angaanga i te tuatau i akonoia.​—Haba. 2:3.

Ka tauturu ta tatou apii, au pure, aere putuputu anga ki te uipaanga, te tutu aere anga, e te au angaanga aroa takinga meitaki, kia ‘tatari tatou i te ra o Iehova.’ (2 Pete. 3:11, 12) Ka kite mai a Iehova me rave putuputu tatou i te reira. Te akamaara maira te apotetoro ko Paulo kia tatou e: “Auraka tatou e roiroi i te takinga-meitaki, ei te tuatau tikai oki tatou e kokoti ei, kia kore tatou e akaparuparu.”​—Gala. 6:9.

Kare ko teia te tuatau i te akatika i te manako tarevake kia akavare ia tatou kia manako e ka taroaroa te ra o Iehova. Mari ra, ko te tuatau teia no te akaketaketa i to tatou ngakau, no te mea kua vaitata mai te ra o Iehova.

[Tutu i te kapi 4]

Kua raurau a Hagai e Zekaria i te ngati Iuda kia akatu i te iero

[Tutu i te kapi 5]

Akapeea me kua kite te tangata ngutuare e te aere maira te keia?