E Ara ua Mei ia Ieremia Rai

“Te ara ua nei au [Iehova] no runga i taku tuatua ei akatupu i te reira.”​—IERE. 1:12, NW.

1, 2. Eaa ra te tu o Iehova “kia ara ua” i aite ei ki te pu rakau tekati?

I RUNGA i te au maunga o Lebanona e Iseraela, ko te pu rakau tekati te mea mua e puera mai ana. Ka kite uaia tona tiare manea tarona me kore teatea i te openga o Tianuare me kore i te akamataanga o Peperuare. Te aiteanga o tona ingoa Epera ko “tei akaaraara mai.”

² Te ikianga a Iehova ia Ieremia ei peroveta nana, kua taangaanga meitakiia te tu o te pu rakau tekati ei akatutu i tetai mea puapinga tikai. Te akamataanga o tana angaanga orometua, kua akaariia tetai orama ki te peroveta no tetai rara o taua pu rakau ra. Eaa te aiteanga o te reira? Kua akamarama mai a Iehova e: “Te ara ua nei au no runga i taku tuatua ei akatupu i te reira.” (Iere. 1:11, 12, NW) Mei te pu rakau tekati rai tei puera vave, kua “tu popongi” a Iehova i te tono i tana au peroveta i te akamatakite i tona iti tangata i te ka tupu mai no te akarongo kore. (Iere. 7:25) Kare aia e akangaroi​—ka ‘ara ua rai’ aia—​e tupu ua atu tana tuatua totou. I te mataiti 607 M.T.N., te tuatau tikai i akanooia, kua tupu ta Iehova akavaanga ki te iti tangata apoteiti o Iuda.

3. Eaa tei papu ia tatou no runga ia Iehova?

³ Mei teia tuatau rai, te ara ua ra a Iehova i te akatupu i tona anoano. Kare roa e ngaropoina iaia te akatupu i tana tuatua. Akapeea to Iehova tu ara ua i te akakeuanga ia koe? Te irinaki ra ainei koe e i teia mataiti 2011, te “ara  ua” ra a Iehova no te akatupuanga i tana au taputou? Me te ekoko ra tatou i ta Iehova au taputou papu tikai, ko te taime teia no tatou kia ara ua kia kore e varea moe i te pae vaerua. (Roma 13:11) Ei peroveta no Iehova, kua ara ua rai a Ieremia. Te akamanako anga akapeea e eaa a Ieremia i ara ua ai i te rave i tana tukuanga angaanga ta te Atua i oronga mai, e tauturu ei ia tatou kia kite akapeea tatou me rave ua rai i te angaanga ta Iehova i oronga mai kia tatou.

Karere Rapurapu

4. Eaa te au akaaoanga ta Ieremia i aro atu te oronga anga i tana karere, e eaa ra i rapurapuia ai?

⁴ Penei kua vaitata to Ieremia mataiti ki te 25, te rauka mai anga tana tukuanga angaanga no ko mai ia Iehova ei tangata tiaki. (Iere. 1:1, 2) Inara kua manako aia e e tamaiti ua aia, kare e tukatau i te tuatua ki te aronga pakari o te enua, e au tane pakarikari e e taoonga mana to ratou. (Iere. 1:6) E akaapa anga pakari e te akavaanga mataku tana ka akakitekite ki te kau taunga, au peroveta pikikaa, au tutara, e te aronga tikai te aru ra i “tona uaorai aerenga” e te akatupu ra “i te kotoe-anga mutu kore.” (Iere. 6:13; 8:5, 6) Ka takoreia te iero mekameka o te Ariki ko Solomona, tei riro ana ei ngai maata no te akamorianga mou no tetai a anere mataiti. Ka vai tanea ua a Ierusalema e Iuda, e ka akatuikaaia te au tangata. Te taka ua ra e, e mea rapurapu tikai te karere ta Ieremia i akaueia kia oronga!

5, 6. (a) Akapeea a Iehova te taangaanga anga i te pupu Ieremia i teia tuatau? (e) Eaa ta tatou apii ka akamanako atu?

⁵ I teia tuatau, kua oronga aroa mai a Iehova i tetai pupu Kerititiano akatainuia e angaanga ra ei aronga tiaki akatutu ei akakite i tana akavaanga no teianei ao. No te raungauru mataiti, kua raurau ana teia pupu Ieremia i te au tangata kia akamanako pakari i te tuatau e noo nei tatou. (Iere. 6:17) Te akataka maira te Pipiria e kare a Iehova, Tei Akanoo Maata i te Tuatau, e taroaroa ana. Ka tae mai tona ra i te taime tano tikai, i te ora kare tetai tangata e manako atu ana.​—Zepha. 3:8; Mare. 13:33; 2 Pete. 3:9, 10.

⁶ Kua kite te iti tangata o Iehova e kare roa atu ana ka apai mai a Iehova i tona ao ou. No reira kua kite ratou e kare e maata ana to ratou taime i te tutu aere. E mea rapurapu kia akakite ki te tangata i teianei i ta Iehova karere. Akapeea te reira te akakeuanga ia koe? Te akakite maira a Iesu e ka anoanoia te katoatoa kia turuturu i te Patireia o te Atua. Ka akara ana tatou e toru au tu tei tauturu ia Ieremia kia ara ua i te rave i tana angaanga e ka tauturu ia tatou kia rave katoa i te reira.

Inangaro no te Tangata

7. Akamarama mai akapeea te aroa te akakeuanga ia Ieremia kia tutu aere noatu te au turanga ngata.

⁷ Eaa tei akakeu ia Ieremia kia tutu aere noatu te au turanga ngata? No tona inangaro i te tangata. Kite a Ieremia e na te au tiaki pikikaa e akatupu maata ana i te manamanata e aro atura te au tangata. (Iere. 23:1, 2) Na teia i tauturu iaia kia rave i tana angaanga ma te aroa e te akaaroa. Inangaro aia i tona iti tangata kia akarongo ki te au tuatua a te Atua e kia ora. Kua manamanata tikai aia, no reira kua aue aia i te kino te ka tupu ki rungao ia ratou. (E tatau ia Ieremia 8:21; 9:1.) Te akakite taka meitaki maira te puka Te Aue o Ieremia i to Ieremia aroa oonu e te manako maata i te ingoa e te iti tangata o Iehova. (Aue 4:6, 9) Me kite koe i te iti tangata i teia tuatau e “kua mate ratou i te roiroi, e kua pueurikiriki keia, mei te mamoe tiaki kore ra,” kare ainei ka inangaro koe i te akapumaana atu ia ratou ki te tuatua o te Patireia o te Atua?​—Mata. 9:36.

8. Eaa te akaari maira e kare te mamae i akariri ia Ieremia?

⁸ Kua tamamaeia a Ieremia e te au tangata tana tikai e inangaro ra i te tauturu, inara kare aia i akakino atu me kore i riri atu ia ratou. E akakoromaki maata tona e te takinga meitaki, pera katoa ki te ariki kino ko Zedekia! Muri ake te akatika anga a Zedekia kia tamateia a Ieremia, kua pati akatenga a Ieremia e e akarongo  aia ki te reo o Iehova. (Iere. 38:4, 5, 19, 20) Ketaketa ainei to tatou inangaro no te tangata mei to Ieremia rai?

Tu Ngakau Toa Orongaia Mai e te Atua

9. Akapeea tatou i kite ei e no ko mai i te Atua te tu ngakau toa o Ieremia?

⁹ Te tuatua mua anga a Iehova kiaia, kua kimi kotoe a Ieremia. Te kite nei tatou i te tu maroiroi e te papu tikai tana i akaari, kare nona uaorai. No te irinaki pu tikai anga i te Atua i rauka ai ia Ieremia te ririnui umere tikai tana i akaari no tana angaanga totou. E tika e, tei te pae a Iehova i te peroveta mei tetai “toa rikarika” rai, e kua turuturu e kua akaketaketa aia ia Ieremia kia rave i tana tukuanga angaanga. (Iere. 20:11) Kua rongo meitakiia te tu maroiroi e te ngakau toa o Ieremia, e i te tuatau o ta Iesu angaanga orometua i te enua nei, kua manako tetai pae e ko Iesu a Ieremia tei akaora akaouia mai!​—Mata. 16:13, 14.

10. Eaa ra ka karangaia ai e tei “rungao i te pa enua, e te au basileia” te toenga o te aronga akatainuia?

¹⁰ Ei ‘ariki no te pa enua,’ kua akaue a Iehova ia Ieremia kia oronga i te karere akavaanga ki te au pa enua e te au patireia. (Iere. 10:6, 7) Na teea tu i tukuia ai te toenga o te aronga akatainuia “ki rungao i te pa enua, e te au basileia”? (Iere. 1:10) Mei te peroveta rai i taito, kua oronga Tei Ngateitei i te ao katoa i tetai tukuanga angaanga ki te pupu Ieremia. Kua akamanaia te au tavini akatainuia o te Atua kia akakitekite ki te ao katoa nei no runga i te au pa enua e te au patireia. Akamanaia e te Atua Teitei Rava e te taangaanga anga i te tuatua taka meitaki o tana Tuatua akauruia, te akakite ra te pupu Ieremia e ka kiriti tumuia e ka takoreia te au pa enua e te au patireia o teia tuatau, i to te Atua tuatau tikai, e na roto i tana uaorai ravenga. (Iere. 18:7-10; Apo. 11:18) Te tauta pakari nei te pupu Ieremia kia kore e akaruke i ta ratou angaanga tei orongaia mai e te Atua i te akakite i ta Iehova karere akavaanga i te ao katoa nei.

11. Eaa te ka tauturu ia tatou kia tutu aere ma te tukumoe kore me aro atu i te au turanga ngata?

¹¹ Mea matauia kia manako apikepike i tetai au taime me aro atu i te patoianga, tu inangaro kore, me kore te au turanga ngata. (2 Kori. 1:8) Inara kia maroiroi ua atu rai tatou mei ia Ieremia rai. Auraka e manako apikepike. Kia pure ua rai tatou ki te Atua, irinaki kiaia, e kia “maroiroi” ua rai tatou, ia tatou e akara ra kiaia no te tauturu. (1 Tesa. 2:2) Ei aronga akamori mou, kia ara ua rai tatou i te rave i ta tatou au apainga tei orongaia mai e te Atua. Kia tauta ua rai tatou i te tutu aere ma te tukumoe kore no runga i te takore anga o Kerititome, tei akatutuia mai e to Ierusalema akarongo kore. Ka akakitekite te pupu Ieremia “i te mataiti inangaroia e Iehova” pera katoa “te rā akaoko anga na to tatou Atua.”​—Isa. 61:1, 2; 2 Kori. 6:2.

Ngakau Rekareka

12. Eaa ra tatou ka karanga ai e kua akono tamou a Ieremia i tona tu rekareka, e eaa tei tauturu iaia i te rave i te reira?

¹² Kua rekareka tikai a Ieremia i tana angaanga. Kua tuatua aia kia Iehova e: ‘Kua kitea taau au tuatua, e kua kai atura au; e ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e Iehova e.’ (Iere. 15:16) E tikaanga ngateitei kia Ieremia kia riro ei komono no te Atua mou e kia tutu aere i tana tuatua. E mea puapinga kia kite e te akamou anga a Ieremia ki runga i te tu taitoito o te au tangata, kare aia i rekareka akaou ana. Te akamanako anga ra aia i te manea tikai e te puapinga o tana karere, kua rekareka akaou aia.​—Iere. 20:8, 9.

13. Eaa ra i puapinga ai kia kai i te au tuatua mou oonu pae vaerua ei akono tamou i to tatou rekareka?

¹³ Te akono tamou anga i te rekareka no te angaanga tutu anga i to tatou tuatau, ka anoanoia tatou kia kai i te “kai pakari,” te au tuatua mou oonu a te Tuatua a te Atua. (Ebe. 5:14) E akamaroiroi ana te apii oonu i te akarongo. (Kolo. 2:6, 7) Ka tauturu te reira ia tatou kia akamanako e akapeea ta tatou angaanga te akakeuanga i te ngakau o Iehova. Me te ngata  ra ia tatou te taporoporo i te tuatau no te tatau e te apii i te Pipiria, e akara akaou tatou i ta tatou papaanga. Noatu e manga miniti ua te apiianga e te akamanako oonu anga i te au ra ravarai, ka akavaitata atu ia tatou kia Iehova e ka tauturu ia tatou kia ‘rekareka, e kia pereperekavana te ngakau,’ mei to Ieremia turanga rai.

14, 15. (a) Eaa tei tupu mai no ta Ieremia rave akarongo mou anga i tana angaanga? (e) Eaa ta te iti tangata o te Atua e marama nei i teia tuatau no te angaanga tutu aere?

¹⁴ Kua akakite a Ieremia i te au akamatakiteanga e te au karere akavaanga a Iehova ma te tukumoe kore, inara te akamanako ra aia i tana angaanga “kia akatu, e kia tanu.” (Iere. 1:10) Kua tupu tana angaanga akatu e te tanutanu. Kua ora mai tetai au ngati Iuda, pera katoa tetai aronga kare i te ngati Iseraela, te takoreia anga a Ierusalema i te mataiti 607 M.T.N. Kua akarongo ana tatou no runga i te ngati Rekabi, Ebede-meleka, e Baruka. (Iere. 35:19; 39:15-18; 43:5-7) Te akatutu meitaki maira teia au oa tiratiratu o Ieremia e tei mataku i te Atua, i te aronga e manakonakoanga to ratou no te enua i teia tuatau, tei piri mai ki te pupu Ieremia. Te rekareka maata ra te pupu Ieremia i te akamaroiroi i te akarongo o te “aronga maata rava.”  (Apo. 7:9) Mei te reira katoa, te mareka maata nei teia au oa tiratiratu o te aronga akatainuia te tauturuanga i te aronga ngakau tika kia kite i te tuatua mou.

¹⁵ Te marama nei te iti tangata o te Atua e kare te tutuanga i te tuatua meitaki ei apii ua anga i te aronga e akarongo maira, mari ra e akamorianga te reira i to tatou Atua. Me ka akarongo mai te tangata me kare, ka rekareka maata ra tatou i te oronga i te akamorianga tapu kia Iehova na te tutu aere anga.​—Sala. 71:23; e tatau ia Roma 1:9.

Kia “Ara ua” ki Taau Tukuanga Angaanga!

16, 17. Akapeea a Apokalupo 17:10 e Habakuka 2:3 te akaari mai anga i te tu rapurapu o to tatou tuatau?

¹⁶ Me akamanako tatou i te totou akauruia i roto ia Apokalupo 17:10, ka kite tatou i te tu rapurapu o to tatou tuatau. Kua mama mai te itu o te ariki, te Mana Tutara o Peritane e Marike. No runga i te reira ka tatau tatou e: “E kia tae mai oki aia ra [te itu o te mana tutara], e noo anga poto rai tona e tikaʼi.” I teianei, te vaitata nei taua “noo anga poto” ki te openga. Te akapapu maira te peroveta ko Habakuka ia tatou no runga i te openga o teia akatereanga kino e: “No te tuatau i akonoia ra taua orama nei . . . Ka tapapa atu rai; e tae tika mai ïa, e kare e tavarevare.”​—Haba. 2:3.

¹⁷ Ui kia koe uaorai e: ‘Te akaari tikai ra ainei toku oraanga i te tu rapurapu o to tatou tuatau? Te akaari ra ainei toku tu oraanga e te tapapa ra au i te openga kia tae vave mai? Me kore te akaari maira ainei taku ikianga e te au mea puapinga kiaku e kare au e manako atu ana e ka tupu vave te openga, e kare i papu iaku me ka tupu te reira?’

18, 19. Eaa ra e kare ko teia te taime i te akamarie?

¹⁸ Kare i oti ake te angaanga a te pupu tiaki. (E tatau ia Ieremia 1:17-19.) E tumuanga rekareka tikai e te tu ngaueue kore ra te toenga o te aronga akatainuia mei te “pou auri” e te “oire i akaketaketaia”! ‘Te tatuaia ra to ratou taukupu ki te tuatua-mou’ koia oki, kua akatika ratou i te Tuatua a te Atua kia akaketaketa ia ratou e oti ua atu ta ratou angaanga. (Ephe. 6:14) Ma taua tu tautaanga, te turuturu maroiroi nei te urupu maata i te pupu Ieremia i te rave i ta ratou tukuanga angaanga no ko mai i te Atua.

¹⁹ Kare ko teia te tuatau no te akamarie anga i te angaanga Patireia, mari ra kia akamanako i te puapinga no ta Ieremia 12:5 i akakite mai. (E tatau.) Te aro atura tatou katoatoa i te au timataanga ka anoanoia tatou kia akakoromaki. Te akakoromaki anga i teia au timataanga o te akarongo penei ka akaaiteia ki te oro taemoemo anga ma te “aronga oro.” Noatu e te aere maira te “mate maata,” ka tapapa atu tatou e ka maata mai te au tu ngata. (Mata. 24:21) Ka rauka i te akaaite i te akono atu anga i te au turanga ngata i mua ia tatou ki te oro anga “taemoemo ma te au oroenua.” Ka anoanoia te akakoromakianga maata no tetai tangata kia aru i te au oroenua e oro ra. No reira e puapinga tikai te akakoromaki i te au timataanga e aro atu nei tatou, te ka akapapa ia tatou kia akakoromaki i te au timataanga i mua ia tatou.

20. Eaa taau ka tauta i te rave?

²⁰ Ka rauka ia tatou katoatoa i te aru ia Ieremia e te akatupu meitaki tikai i ta tatou tukuanga angaanga no te tutu aere! Kua akakeuia a Ieremia e te au tu mei te aroa, ngakau toa, e te rekareka kia rave akarongo mou i tana angaanga orometua no tetai 67 mataiti. Te akamaara maira te puera manea o te tekati e ka “ara ua” a Iehova no te akatupuanga i tana tuatua. E tumuanga tau tikai to tatou kia rave i te reira. Kua “ara ua” a Ieremia, e ka rauka katoa ia tatou.

Maara Ainei ia Koe?

• Akapeea te aroa te tauturu anga ia Ieremia kia “ara ua” i te rave i tana angaanga?

• Eaa ra tatou ka anoano ei i te ngakau toa tei orongaia mai e te Atua?

• Eaa tei tauturu ia Ieremia kia akono tamou i tona rekareka?

• Eaa ra koe ka inangaro ei kia “ara ua”?

[Au Uianga Apii]

[Au Tutu i te kapi 31]

Ka tutu aere ua atu ainei koe noatu te patoianga?