E Au Tumu Toou kia Mataora

TE AKAATA maira te au mea angaia i te akaaerenga mako tikai, mei te teera ora meangiti roa ki te au pupu etu mamaata rava tei akapupuia ki roto i te kaviri e te au kaviri mamaata tikai. Kare teia i te mea poitirere, no te mea kare Tei Anga mai ei ‘Atua kononinoni pu ua.’ (1 Kori. 14:33) E mea umere katoa te akanoonooanga a te Atua no te akamorianga. Akamanako ana i ta Iehova i rave. Kua akanoo aia i te au anere mirioni au mea ora kite e tai akaaerenga i te ao katoa e pini ua ake​—te tangata i te enua nei pera katoa te au angera—​ma te tikaanga kia iki, taokotaiia no te akamorianga ma. E mea mekameka tikai teia!

I Iseraela i taito, kua akatutu mai a Ierusalema i te akaaerenga a te Atua i te enua nei, tei reira te iero o Iehova e tei reira tona ariki akatainuia. Kua akakite mai tetai tuikaa ngati Iseraela i Babulonia i tona manako no runga i te oire tapu e: “Kia piri toku arero ki toku vaa nei, kia kore au e manako ia koe: kia kore au e akateitei ia Ierusalema ei mea rekareka maata naku.”​—Sala. 137:6.

Ko toou manako ainei te reira no te akaaerenga a te Atua i teia tuatau? E maata atu ainei toou rekareka i te reira i tetai ua atu apinga? Te marama ra ainei taau tamariki i te tuatua enua e te angaanga a te akaaerenga a te Atua i te enua nei? Te ariki rekareka ra ainei ratou e e tuanga ratou no te taokotaianga taeake i te ao katoa nei o te Au Kite o Iehova? (1 Pete. 2:17) Eaa ka kore ei e kapiti mai i te au manako e aru mai nei ki roto i taau Akamorianga a te Ngutuare i te aiai, kia akamaata atu i te kite o toou pamiri no te akaaerenga a Iehova?

Akamaara i “te Au Rā Taito Ra”

Te au mataiti, kua akaputuputu mai te au pamiri ngati Iseraela kia akono i te Pasa. Te akanooia anga te oroa, kua apii atu a Mose i te iti tangata e: “Kia ui mai to tamaiti kia koe i muri ake, kia tuatua mai e, Eaa teia? ei reira koe e karanga atu ei kiaia, Kua arataki mai a Iehova i to tatou mei Aiphiti mai, mei te ngutuare i tavini ei ra i te rima marōrō.” (Exo. 13:14) Kare ta Iehova akono anga i te ngati Iseraela ei tuatua enua kia akangaropoinaia. Papu e, kua rave te au metua tane ngati Iseraela i ta Mose i akaue atu. Te au uki i muri mai, kua pure tetai ngati Iseraela e: “E te Atua e! kua rongo to matou taringa, kua akakiteia mai matou e to matou ai metua, i taau i rave i to ratou puke rā, i te au rā taito ra.”​—Sala. 44:1.

Ki tetai mapu ou i teia tuatau, penei i te akaraanga ko te tuatua enua o te Au Kite o Iehova i te 100 tuma mataiti i topa mei “te au rā taito ra.” Akapeea koe me akaoraora akaou mai i teia au tupuanga ki taau anau? E taangaanga ana tetai au metua i te puka Jehovah’s Witnesses—Proclaimers of God’s Kingdom, te Yearbook, te au tua oraanga neneiia i roto i ta tatou tianara, e tetai au ripoti ke o te tuatua enua teokaratiki, kapiti mai ta tatou DVD ou no runga i te iti tangata o te Atua i teia tuatau. Te apii maira te au vitio i te au pamiri no runga i te takinokinoia anga to tatou au taeake i te Toviete Unioni e i Nazi Tiamani kia irinaki kia Iehova i te tuatau timataanga. Taangaanga i teia au apinga no taau Akamorianga a te Ngutuare i te aiai. Na te reira e akaketaketa atu i te akarongo o taau tamariki, e ua ake ka aro atu ratou i te au akaaoanga no to ratou tu tiratiratu.

Penei kare e mou mai te manako o te au mapu ki runga i te apii no te tuatua enua. No reira e akakeu i taau tamariki kia inangaro i te apii. Ei akaraanga, e ui ki taau tamaiti kia iki i tetai enua e reka ana aia, kia rave i te kimikimianga no te tuatua enua teokaratiki o taua enua  ra, e kia akakite mai ki tona pamiri tana i kite mai. I roto i taau putuputuanga, penei e au Kerititiano tetai kua roa te tavini akarongo mou anga i te Atua, te ka rauka i te piri mai ki ta kotou akamorianga a te ngutuare i tetai aiai. Penei ka rauka i taau tamaine i te uiui kia ratou, kia akakite mai i tetai au mea tei tupu kia ratou. Me kore, kia toro mai taau tamaiti i tetai au tupuanga puapinga teokaratiki, te akatu anga o te opati manga, te uruoaanga pa enua, e te taangaanga anga i te ponikarapu i roto i te angaanga orometua mei tetai are ki tetai.

Apii Akapeea “te Au Tuanga e Rave ra i Tana Angaanga”

Kua akaaite atu te apotetoro ko Paulo i te putuputuanga Kerititiano ki “te kopapa katoa, tei akapiri meitakiia e tei mouia e te au uaua, [tei] tupu e tei akamatutuia e te aroa, i te au tuanga e rave ra i tana angaanga.” (Ephe. 4:16, New International Version) Ka maata atu to tatou ariki rekareka e te akangateitei anga i Tei Anga mai ia tatou me apii tatou no runga i te angaanga a te kopapa tangata nei. Pera katoa, me akara meitaki tatou i te angaanga a te putuputuanga i te ao katoa nei, ka umere tatou i “te pakari tumatatini o te Atua.”​—Ephe. 3:10.

Te akataka maira a Iehova e akapeea tana akaaerenga e to te rangi, me angaanga. Ei akaraanga, te akakite maira aia e kua oronga mai aia i tetai akakiteanga kia Iesu Karaiti, tei ‘unga mai i tana angela e kua akakite maira ki tona nei tavini ia Ioane: ko tei akakite i te tuatua.’ (Apo. 1:1, 2) Me kua akakite mai te Atua e akapeea tana akaaerenga akara mataia me angaanga, kare ainei ka inangaro aia kia marama tatou akapeea “te au tuanga e rave ra i tana angaanga” i te enua nei?

Ei akatauanga, me ka atoro mai te akaaere kotinga i taau putuputuanga, eaa ka kore ei e akamanako ma toou pamiri i te au angaanga e te au akameitakianga a te au akaaere tutaka? Akapeea ratou me tauturu ia tatou tataki tai? Tetai atu au uianga te ka tau no te akamanako koia oki: Eaa ra i puapinga ai kia ripoti i te angaanga orometua? Akapeea te turuturuia anga te akaaerenga a te Atua? Akapeea te akaaereia anga te Pupu Akaaere, e akapeea te reira te oronga mai anga i te kai pae vaerua?

Me marama tatou akapeea me akaaereia te iti tangata o Iehova, e toru mataara e puapinga ai tatou: Ka ariki rekareka maata atu tatou i te aronga e angaanga pakari ra no tatou. (1 Tesa. 5:12, 13) Ka akakeuia tatou kia turuturu i te au akanoonooanga teokaratiki. (Anga. 16:4, 5) E ka akamatutuia to tatou irinaki i te aronga e arataki ra ia tatou, ia tatou e kite ra i te tumu Tuatua Tapu no te au ikianga e te au akanoonooanga tei raveia.​—Ebe. 13:7.

‘Akara Meitaki i Tona Au Punanga’

“E akapini ana ia Ziona, ka takako iaia e pini ua ake, ka tatau i to reira au are teitei. Ka akara meitaki ana i te au patu akaketaketa, e akamaara i tona au punanga: ei tuatua anga na kotou i tera atu uki.” (Sala. 48:12, 13) Te raurau maira te tata taramo i te ngati Iseraela kia akara meitaki ia Ierusalema. Ka rauka ainei ia koe i te akamanako i te au akamaaraanga puapinga tikai a te au pamiri ngati Iseraela tei aere ki te oire tapu no te au oroa e tei kite i tona iero mekameka? Papu kua akakeuia ratou kia ‘tuatua i te reira ki tera atu uki.’

Akamanako ana i te ariki vaine o Seba, tei ekoko i mua ana no te au ripoti no ta Solomona tutaraanga meitaki e te pakari maata. Eaa tei akapapu kiaia e e au mea tika tana i akarongo? “Kare ra au i akarongo i ta ratou au tuatua,” i karanga ai aia, “kia tae maira au, e kite pu akenei oku mata nei.” (2 Para. 9:6) Ae, ka akakeuia tatou i ta tatou ka kite ma to tatou “mata.”

Akapeea koe me tauturu i taau tamariki kia kite i te au mea umere o to Iehova akaaerenga ma to ratou uaorai “mata”? Me e opati manga tetai no te Au Kite o Iehova vaitata ki toou kainga, e tauta kia atoro atu. Ei akaraanga, kua mamaata mai a Mandy e Bethany i to raua enua, mei tetai 900 maire (1,500 kiro mita) te mamao mei te kainga Betela. Inara, kua parani to raua nga metua i tetai au tere kia atoro atu i te Betela, e meangiti ra rai te nga tamaine. “I mua ake ka atoro atu ei maua i te Betela, kua  manako maua e e pakari te oraanga e no te aronga pakarikari ua te reira ngai,” i akamarama mai ei raua. “Inara kua aravei atu maua i te au mapu e angaanga pakari ra na Iehova e te mataora ra! Kua kite maua e e maata atu tikai te akaaerenga a Iehova i to te ngai meangiti ua e noo ra maua, e te au taime me atoro maua i te Betela kua akavaitata atu ia maua kia Iehova e kua akakeu maata ia maua kia tavini iaia.” Kua akakeuia a Mandy e Bethany kia painia i te kite anga raua i te akaaerenga a te Atua, e kua patiia raua kia tavini i Betela no tetai tuatau poto.

E mataara ke atu to tatou kia “kite” i te akaaerenga a Iehova, e mataara kare i rauka ana i to Iseraela i taito. I te au mataiti ua akenei, kua rauka i te iti tangata o te Atua te au vitio e te au DVD, e au mea tukeke no runga i te akaaerenga a te Atua, koia oki: Jehovah’s Witnesses​—Organized to Share the Good News, Our Whole Association of Brothers, To the Ends of the Earth, e te United by Divine Teaching. Me kite koe e toou pamiri i te angaanga pakari a te au taeake i Betela, te aronga angaanga tauturu, te au mitinari, e te au taeake tei akapapa e tei akanoo i te au uruoaanga, ka ariki rekareka koe i te taokotaianga taeake i te ao katoa nei.

E tuanga puapinga ta te au putuputuanga o te iti tangata o te Atua no te tutu aere anga i te tuatua meitaki e te turuturu anga i te au Kerititiano i te reira ngai. Inara, e akapou i tetai taime ki toou pamiri kia akamaara i te “au taeake katoa i te ao nei.” Ka tauturu teia ia koe e taau tamariki kia vai “akarongo turori kore,” te kite anga e e au tumu toou kia mataora.​—1 Pete. 5:9.

 [Pia​/Tutu i te kapi 18]

Akaaerenga a te Atua Manako Tau no te Apii

Maata tikai ta tatou au apinga ei tauturu i te katoatoa kia apii maata atu no runga i te tuatua enua e te angaanga a te akaaerenga o Iehova. Na te au uianga e aru maira e tauturu ia koe:

☞ Akapeea te angaanga a te au akaaere tutaka o teia tuatau te akamataanga?​—Te Punanga Tiaki, Noema 15, 1996, kapi 10-15.

☞ Eaa te au ravenga ta te akaaerenga o Iehova i taangaanga ana i te tutu aere i te tuatua meitaki?​—Te Punanga Tiaki, Me 1, 1994, kapi 14.

☞ Akapeea te Pupu Akaaere i te akaaereia anga?​—Te Punanga Tiaki, Me 15, 2008, kapi 29.