Akatika ra Koe i te Vaerua o te Atua kia Arataki ia Koe?

‘Kia aratakiia au e toou vaerua meitaki i te enua o te aronga tiratiratu.’​—SALA. 143:10.

1, 2. (a) Akakite mai i tetai au atianga te taangaanga anga a Iehova i te vaerua tapu no tona au tavini. (e) Kua kotinga uaia ainei te vaerua tapu no te au atianga takake? Akamarama mai.

EAA toou manako no runga i te angaanga a te vaerua tapu? Te manako ra ainei koe i te au angaanga ririnui a Gideona e Samasona? (Aka. 6:33, 34; 15:14, 15) Penei te manako ra koe i te tu mataku kore o te au Kerititiano mua, me kore te tu maru o Setephano iaia e tu ra i mua i te Sunederi. (Anga. 4:31; 6:15) I teia tuatau, akapeea ra te mataora e tupu ra i ko i ta tatou au uruoaanga pa enua, e te tu tiratiratu o to tatou au taeake tei tapekaia no to ratou tu papakitai kore, e te tupu anga umere o te angaanga tutuanga? E au akaraanga teia ei akapapu i te angaanga a te vaerua tapu.

² Te angaanga ua ra ainei te vaerua tapu i te au atianga takake, me kore i raro ake i tetai au turanga umere tikai? Kare. Te akakite maira te Tuatua a te Atua i te au Kerititiano ‘e akono ra i ta te vaerua,’ ‘e aratakiia ra e te vaerua’ e ‘e ora ra i ta te vaerua.’ (Gala. 5:16, 18, 25) Te akakite maira teia au tuatua e ka angaanga ua rai te vaerua tapu i roto i to tatou oraanga. I te au ra ravarai, e pati tatou kia Iehova kia arataki i to tatou manako, tuatua, e te au angaanga na roto i tona vaerua. (E tatau ia Salamo 143:10.) Na te akatikaanga i te vaerua kia angaanga i roto i to tatou oraanga, ka akatupu te reira i te ua te ka riro ei akaoraora anga ki tetai ke e ei akapaapaa anga i te Atua.

3. (a) Eaa ra tatou ka anoanoia ai kia aratakiia e te vaerua tapu? (e) Eaa ta tatou au uianga ka akamanako?

³ Eaa ra i puapinga ai kia aratakiia tatou e te vaerua tapu? No te mea e mana ke atu tetai e akaaere ra ia tatou e patoi ra i te angaanga a te vaerua tapu. Te akakite maira te au Tuatua Tapu i taua mana ra ko “te kopapa,” te au anoano o to tatou tu ara, te tu apa tei orongaia mai kia tatou ei uanga na Adamu. (E tatau ia Galatia 5:17.) Eaa te o maira ki te akatikaanga ia tatou uaorai kia aratakiia e te vaerua o te Atua? E au takainga ainei tetai ei patoi atu i to tatou tu ara? Ka akamanako tatou i teia au uianga me uriuri tatou i te au tuanga toe e ono o “te ua o te vaerua,” “te akakoromakianga roa, te takinga meitaki, te meitaki, te akarongo, te maru, te akatere-uaorai.”​—Gala. 5:22, 23, NW.

Ka Au te Putuputuanga me Akatupuia te Maru e te Akakoromakianga Roa

4. Akapeea te maru e te akakoromakianga roa te akatupu anga i te au i roto i te putuputuanga?

⁴ E tatau ia Kolosa 3:12, 13. I roto i te putuputuanga, e akatupu ana te maru e te akakoromakianga roa i te au. Ka tauturu teia nga ua o te vaerua ia tatou kia akono aroa i tetai ke, kia maru ua me akaririia mai, e kia kore e riri atu me tuatua me kore me rave mai tetai i te kino. Me manamanata tatou e tetai taeake Kerititiano, ka tauturu te akakoromakianga roa ia tatou kia kore e akaruke i to tatou taeake me kore tuaine, inara kia akatupu i te au. Ka anoanoia ainei te maru e te akakoromakianga roa i roto i te putuputuanga? Ae, no te mea e aronga ara pouroa tatou.

5. Eaa tei tupu kia Paulo e Banaba, e eaa ta teia e akakite maira?

⁵ Akamanako ana i tei tupu kia Paulo e Banaba. Kua angaanga kapiti raua no tetai au mataiti i te akatotoaanga i te tuatua meitaki.  E au tu meitaki to raua roa ai. Inara, i tetai atianga, kua tupu “te taumāro maata ia raua uaorai, e taka ke atura raua.” (Anga. 15:36-39) Te akakite maira teia e e tupu katoa ana te taumaro i rotopu i te au tavini tiratiratu o te Atua i tetai au taime. Me e manamanata to tetai Kerititiano ki tetai taeake, eaa tana ka rave kia kore te manamanata e kino roa atu te ka akakino atu i te pirianga?

6, 7. (a) Eaa te akoanga Tuatua Tapu ka aru tatou i mua ake ka kino atu ei te uriurianga ki tetai taeake? (e) Eaa te au puapinga ka tupu me ‘rapurapu ua i te akarongo, tavarevare i te tuatua, tavarevare i te riri’?

⁶ Mei tei akakiteia e te tuatua “taumāro maata,” te manamanata tei tupu kia Paulo e Banaba e mea poitirere e te pakari tikai. Me kite mai tetai Kerititiano e kua riri aia me te uriuri manako ra raua ko tetai taeake, e mea meitaki i te aru i te akoanga i roto ia Iakobo 1: 19, 20 e: “Kia rapurapu ua te tangata ravarai i te akarongo, kia tavarevare i te tuatua, kia tavarevare oki i te riri: Kare oki te riri o te tangata e akatupu i te tuatua-tika a te Atua.” Noatu eaa te turanga, ka tauta aia i te taui i te manako, uriuri akaou i te manako a tetai tuatau, me kore ka akaruke aia i mua ake ka kino atu ei te uriurianga.​—Mase. 12:16; 17:14; 29:11.

⁷ Eaa te au puapinga ka tupu mai me aruia teia akoanga? Na te tuku anga i tetai taime kia maru mai, pure no runga i te manamanata, e te akamanako anga i te mataara meitaki me pau atu, te akatika ra tetai Kerititiano iaia kia aratakiia e te vaerua o te Atua. (Mase. 15:1, 28) Na te akakeu anga a te vaerua, ka rauka iaia te akaari i te maru e te akakoromakianga roa. Ka tau i reira aia kia aru i te akoanga i roto ia Ephesia 4:26, 29: “Kia riri kotou ra, auraka kia araia . . . Auraka ei tuatua viivii e mama mai no roto i to kotou vaa, ei tuatua meitaki ra e tupu ei te meitaki tika ra, e meitaki ei te aronga e akarongo ra.” Ae, me akatupu tatou i te maru e te akakoromakianga roa, te akatupu ra tatou i te au e te taokotaianga o te putuputuanga.

Akamaroiroi i Toou Pamiri ma te Takinga Meitaki e te Meitaki

8, 9. Eaa te takinga meitaki e te meitaki, e eaa ta te reira e akatupu ra ki te turanga o te ngutuare?

⁸ E tatau ia Ephesia 4:31, 32; 5:8, 9. E akaoraora anga te takinga meitaki e te meitaki, mei te matangi e aangi maru maira e te vai anuanu i te ra vera. Ka akatupu te reira i te turanga maru i roto i te pamiri. E tu akaperepere te takinga meitaki no te inangaro tikai i tetai ke, e inangaro te akaariia ra na roto i te au angaanga puapinga e te au tuatua tau. E tu papu te tu meitaki, mei te takinga meitaki rai, e akaariia ra na roto i te au angaanga kia puapingaia tetai ke. E akairo te reira no te tu oronga. (Anga. 9:36, 39; 16:14, 15) Inara, e maata atu te o maira ki te tu meitaki.

 ⁹ E tu akono tau tikai te tu meitaki. Te o maira ta tatou e rave ra, e te mea puapinga roa atu, to tatou tu. Akamanako ana i tetai vaine e matipi ra i tetai ua rakau na tona pamiri, te akara meitaki anga i te au potonga me kua para e te vene, kare i kino a roto e a vao. Te akatupu katoa ra te vaerua tapu i te tu meitaki i roto i te oraanga katoa o tetai Kerititiano.

10. Eaa te ka raveia ei tauturu i te au mema pamiri kia akatupu i te ua o te vaerua?

¹⁰ I roto i te ngutuare Kerititiano, eaa te ka tauturu i te au mema pamiri kia akono i tetai e tetai ma te takinga meitaki e te meitaki? E tuanga puapinga te kite tika tikai i te Tuatua a te Atua. (Kolo. 3:9, 10) Kapiti mai ana tetai au upoko o te pamiri i te apii no te ua o te vaerua ei tuanga no ta ratou Akamorianga a te Ngutuare i te aiai i te au epetoma. Mama ua i te apii i te ua o te vaerua. Na te taangaanga anga i te au apinga kimikimi i roto i toou reo, e iki i tetai au puka no runga i te au tuanga tataki tai o te ua o te vaerua. Penei ka apii koe i tetai nga parakarapa i te epetoma, te uriurianga i te au tuanga tataki tai i te au epetoma. Ia koe e apii ra i te puka, e tatau e e uriuri i te au irava i taikuia mai. Kimi i te au mataara no te taangaanga i taau i apii mai, e e pure kia Iehova kia akameitaki mai i taau tautaanga. (1 Timo. 4:15; 1 Ioa. 5:14, 15) Ka riro ainei taua apiianga ra ei taui i te tu e akono ra te au mema pamiri i tetai e tetai?

11, 12. Akapeea tetai nga tokorua Kerititiano te puapinga anga i te apii no runga i te takinga meitaki?

¹¹ Kua iki tetai tokorua mapu, i te apii oonu i te ua o te vaerua kia puapingaia to raua akaipoipo. Akapeea raua te puapinga anga? Kua akakite mai te vaine e: “Te kite anga maua e te kapiti maira te tu irinaki e te tiratiratu ki te takinga meitaki, kua taui tikai to maua tu te akono anga i tetai e tetai e tae ua mai ki teia ra. Kua apii mai te reira ia maua kia kore e maro ua atu e kia akakore i te ara. E kua tauturu te reira ia maua kia tuatua e, ‘meitaki maata’ e ‘te tataraara atu nei au.’”

¹² Kua kite mai tetai nga tokorua Kerititiano, te manamanata ra to raua akaipoipo, e kare e takinga meitaki i roto i to raua oraanga. Kua apii kapiti raua no runga i te takinga meitaki. Eaa tei tupu mai? Kua maara mai i te tane e: “Kua tauturu mai te apiianga no runga i te takinga meitaki ia maua kia kore e akaapa tarevake atu i tetai e tetai, kia akara ra i te tu meitaki o tetai e tetai. Kua maata atu to maua manako anga i te au anoano o tetai e tetai. Ko te akaari anga i te tu takinga meitaki, te pati anga ki taku vaine kia akakite ua mai i tona manako e kia kore e riri atu i tana ka tuatua mai. Te aiteanga, kare au  e akaari i toku tu akaparau. Te taangaanga anga maua i te takinga meitaki i roto i to maua akaipoipo, kare maua e patoi viviki ana i tetai e tetai. E akamaroiroi anga tikai te reira.” Ka puapingaia ainei toou pamiri me apii i te ua o te vaerua?

Taangaanga i te Akarongo me ko Koe Anake Ua

13. Eaa te kino ki to tatou turanga pae vaerua kia matakite tatou?

¹³ Ka anoanoia te au Kerititiano kia tuku i te vaerua o te Atua ei arataki ia ratou i te ngai tangata, e me ko ratou anake ua. Te totoa nei te au tutu e te tamataoraanga viivii tikai i roto i to Satani ao i teia tuatau. Ka akakino teia i to tatou turanga pae vaerua. Eaa ta tetai Kerititiano ka rave? Te ako maira te Tuatua a te Atua ia tatou e: ‘E tuku ke atu i te au mea viivii ra, e te au mea kino maata ravarai, ka āriki marie ei ma te maru i te tuatua tanumia ki roto ra, e oraʼi oki kotou.’ (Iako. 1:21) Ka akamanako ana tatou akapeea te akarongo, tetai tuanga o te ua o te vaerua, te tauturu anga ia tatou kia vai ma ua i mua ia Iehova.

14. Akapeea te ngere anga i te akarongo te taki atu anga ki te tarevake?

¹⁴ Te aiteanga o te akarongo, ko te irinaki e e Atua tika tikai a Iehova kia tatou. Me kare aia i te Atua tika tikai kia tatou, mama ua ia tatou i te rave i te mea tarevake. Akamanako ana eaa tei tupu i rotopu i te iti tangata o te Atua i te tuatau taito. Kua akakite a Iehova ki te peroveta ko Ezekiela e te rave poiriia ra te mea rikarika, te karanga anga e: “E te tamaiti a te tangata na, kua kite ainei koe i ta te aronga pakari o te ngutuare o Iseraela i rave nei i te poiri, te au tangata ravarai i roto i te au pia tiki nona ra? te karanga ra oki ratou, Kare a Iehova e akara mai ia tatou; kua akaruke a Iehova i te enua nei.” (Ezeki. 8:12) Te kite ra koe eaa tei akatupu i te manamanata? Kare ratou e irinaki ana e te kite maira a Iehova i ta ratou e rave ra. Kare a Iehova e tika tikai ana kia ratou.

15. Akapeea te akarongo ketaketa kia Iehova te paruruanga ia tatou?

¹⁵ Ei tuke, akamanako ana i te akaraanga o Iosepha. Noatu kare aia e noo ana ki tona pamiri e tona iti tangata, kare a Iosepha i akaturi ana ki te vaine a Potiphara. No teaa ra? Kua akakite aia e: “Eaa oki au e tikaʼi kia rave i tenana kino maata, e te ara i te Atua?” (Gene. 39:7-9) Ae e tika tikai a Iehova kiaia. Me e tika tikai te Atua kia tatou, kare tatou e akara i te au tamataora viivii me kore e rave poiri i tetai ua atu mea ta tatou i kite e kare te Atua e mareka mai. Ka aite to tatou akakoroanga mei to te tata taramo i imene e: “Ka aaere ua au ma te ngakau apa kore i roto i toku uaorai nei ngutuare. Kare au e tuku i tetai mea kino ki mua i toku mata.”​—Sala. 101:2, 3.

 Paruru i Toou Ngakau na te Akatere-Uaorai Anga

16, 17. (a) Mei tei akatakaia mai i roto i te puka o Maseli, akapeea “tetai tangata ou manako kore” te akavareia anga kia ara? (e) Mei tei akaariia mai i te kapi 26, akapeea te reira te tupu anga i teia tuatau, noatu eaa te mataiti o tetai tangata?

¹⁶ Ka tauturu te akatere-uaorai, te tuanga openga o te ua o te vaerua, ia tatou kia patoi i te au mea ta te Atua e patoi ra. Ka tauturu te reira ia tatou kia paruru i to tatou ngakau. (Mase. 4:23) Akamanako ana i te turanga i roto ia Maseli 7:6-23, te akataka maira akapeea “tetai tangata ou manako kore” i vare ei ki te tu kikite o te vaine akaturi. ‘Te aere ua ra aia na te arataa i vaitatao i te ngai o te vaine’ e kua akavareia aia i muri mai. Penei kua aere atu aia ki te ngai o tera vaine no te inangaro i te aroro atu iaia. E kare aia i kite ana e te aratakiia ra aia ki tetai aerenga neneva e ka “mate aia.”

¹⁷ Akapeea teia tangata mapu me kopae i teia tarevake kino? Na te aru anga i te akamatakiteanga e: “Auraka koe e aere ke na tona ra au mataara.” (Mase. 7:25) E apiianga teia kia tatou: Me inangaro tatou i te vaerua o te Atua kia arataki ia tatou, kare tatou e tuku ia tatou ki roto i tetai timataanga. Tetai ravenga e aere ana tetai tangata na te mataara neneva o te “tangata ou manako kore” ra, koia oki na te tauiui anga i te tutu o te tivi me kore te akarakara anga i runga i te Initaneti. Me e mea akakoro nana me kare, ka kite atu aia i te au tutu akakeu anga ainga. Aere ua rai ka akatupu aia i te peu tau kore no te akarakara anga i te au ravenga ainga viivii, te ka akakino i tona akava ngakau e tona pirianga ki te Atua. E ka kino tona oraanga.​—E tatau ia Roma 8:5-8.

18. Eaa te au takainga ta tetai Kerititiano ka rave ei paruru i tona ngakau, e akapeea te o mai anga te akatere-uaorai anga?

¹⁸ Ae, ka rauka e ka tau tatou i te akatere-uaorai ia tatou na te tamate viviki anga i te tivi me kite atu tatou i te au tutu tau kore. Meitaki atu ra me kare tatou e akara i te reira i te akamata anga! (Mase. 22:3) Ka o mai te akatere-uaorai anga i te akanoo anga i te au paruruanga tau e te aru anga i te reira. Ei akaraanga, ka riro ei paruruanga me tuku i te komupiuta ki te ngai atea ua. Kua kite mai tetai pae e e mea meitaki atu i te taangaanga i te komupiuta me kore te tivi, me e aronga tetai i reira. Kua iki tetai pae e kare a ratou Initaneti. (E tatau ia Mataio 5:27-30.) E rave tatou i te au takainga ei paruru ia tatou e to tatou pamiri kia rauka ia tatou i te akamori ia Iehova ma te “ngakau mā, e te akava-ngakau meitaki, e te akarongo pikikaa kore.”​—1 Timo. 1:5.

19. Eaa te au puapinga ka rauka mai me tuku i te vaerua tapu kia arataki ia tatou?

¹⁹ E maata te au puapinga ta te ua o te vaerua i akatupu na roto i te angaanga a te vaerua tapu. Ka akatupu te maru e te akakoromakianga roa i te au i roto i te putuputuanga. Ka akatupu te takinga meitaki e te meitaki i te mataora i roto i te pamiri. Ka tauturu te akarongo e te akatere-uaorai ia tatou kia piri vaitata ua rai kia Iehova e kia vai ma ua i mua iaia. Tei maata atu, te akapapu maira a Galatia 6:8 kia tatou e: ‘Ko tei ruru i ta te vaerua, ko te ora mutu kore tana e rauka i te vaerua ra.’ Ae, ka taangaanga a Iehova i te vaerua tapu kia oronga i te oraanga mutu kore ki te aronga tei tuku ia ratou kia aratakiia e te vaerua, akatumuia ki runga i te oko o Karaiti.

Akapeea Koe me Pau?

• Akapeea te maru e te akakoromakianga roa me akatupu i te au i roto i te putuputuanga?

• Eaa te ka tatuturu i te au Kerititiano kia akaari i te takinga meitaki e te tu meitaki i te kainga?

• Akapeea te akarongo e te akatere-uaorai anga me tauturu i tetai Kerititiano kia paruru i tona ngakau?

[Au Uianga Apii]

[Tutu i te kapi 24]

Akapeea koe me kopae i tetai uriurianga kia kore e kino roa atu?

[Tutu i te kapi 25]

Ka puapingaia toou pamiri me apii i te ua o te vaerua

[Tutu i te kapi 26]

Eaa te au kino ka kopaeia me taangaanga i te akarongo e te akatere-uaorai?