Maara Ainei ia Koe?

Kua rekareka ainei koe i te tatau anga i te au itiu ou o Te Punanga Tiaki? Akara ana me ka rauka ia koe i te pau i te au uianga ka aru mai:

• E taangaanga ana ainei te au Kerititiano mou i te ingoa o te Atua ei akamanuia anga?

E manako ana tetai aronga i tetai apinga me kore tetai akairo ei akamanuia anga te ka paruru ia ratou, inara kare te iti tangata o te Atua e manako akapera ana i tona ingoa. Kua irinaki ratou ia Iehova e kua kimi i te rave i tona anoano, i te akaruru anga i raro ake i tona ingoa. (Zepha. 3:12, 13)​—1/15, kapi 5-6.

• Eaa ra a Iehova i kopae ei i te Ariki ko Saula?

Ka tiaki tikai a Saula i te peroveta o te Atua kia oronga i te atinga, inara kare te ariki i akarongo ana e kua oronga aia i te atinga. Muri mai, kare aia i akarongo ana i te akauenga kia tamate i te au enemi.​—2/15, kapi 22-23.

• Akapeea tatou me akaari e te rikarika ra tatou i te kino?

Ka akono tau tatou i te kava, ka kopae i te au angaanga temoni, e kia akarongo i te akamatakiteanga a Iesu no runga i te tu akono tau kore. Ei akaraanga, ka kopae tatou i te ravenga ainga viivii e ta te reira au mea e akatupu ana. (Mata. 5:27, 28) Kare katoa tatou e kapiti atu ki te aronga tei akaateaia ki vao.​—2/15, kapi 29-32.

• Akapeea a Ieremia i aite ei ki te pu rakau “i tanumia i te pae vai ra, ko tei akatoro i tona au aka”? (Iere. 17:7, 8)

Kare rava aia i tukumoe i te uua mai; e kare aia i tuku ana kia akakeuia e te aronga aviri. Inara, kua noo tamou aia ki te Tumu o te vai ora, te irinaki anga i ta te Atua i akakite kiaia.​—3/15, kapi 14.

• Eaa tatou ka irinaki ei e e ngai tika tikai te kainga i Edene?

Te akakite maira te Pipiria e e ngai tika tikai te reira, te akataka mai anga i to te reira ngai. Te tae nei rai te nga kauvai i teia tuatau tei taikuia i roto i te tataanga. Kare te au tua maani ua e te au tua tamanako ua i akakite mai ana i te ngai tikai. Kua akakite mai a Iesu, te Kite irinaki rava atu, e e tika tikai a Adamu raua ko Eva.​—4/1, kapi 5-6, 9.

• Kua kite ainei te Atua e ka ara a Adamu raua ko Eva?

Kare. Kua oronga a Iehova i te kite pakari e te tu rangatira kia raua, kia iki i te akarongo me kare. Noatu ka kite te Atua i te ka tupu, kua taangaanga meitaki aia i taua kite ra.​—4/1, kapi 13-15.

• Eaa te tu o te are ta Aberahama i noo ana ki roto?

Mua ake ka noo ei ki roto i te puakapa, kua noo ana a Aberahama e tana vaine ki tetai oire puapinga ko Ura, i Kaledea. Te keriia anga te oire ko Ura, ko Iraka i teia tuatau, kua kite mai ratou i tetai au are tei patuia ki te piriki e a rotopu i te au paepae, e e au paipa tetai no te akatae i te vai repo ki vao. I roto i te au are mamaata mai, e au are repo tetai i roto i te pia tataki tai no te au manuiri. Tetai au are, e rua taua. Kua kiteaia mai e no te aronga puapinga teia au are.​—4/1, kapi 19.