Peea me Vai Tika ua i Teia Ao Tika Kore

TEI te au ngai ravarai te tu tika kore mei te reva ta tatou e akaea ra. E pikikaa ana te tangata, e tiati maata ana, e keia ana, kare e tutaki i te au kaiou, e te akatietie ra no te au angaanga pitiniti tika kore. E aro ua atu ana tatou i roto i teia tu oraanga te au turanga te ka timata i ta tatou aruaru anga kia vai tika ua. Akapeea tatou me patoi i te tu tika kore? Ka akamanako tatou e toru mataara te ka tauturu ia tatou i te patoi i te reira. Ko te mataku ia Iehova, te akava ngakau meitaki, e kia mareka ua.

Mataku Tau ia Iehova

Kua tata te peroveta ko Isaia e: “Ko Iehova oki to tatou akava; ko Iehova ta tatou tuku ture; ko Iehova to tatou ariki.” (Isa. 33:22) Ka tupu mai te mataku i te Atua te kite anga i to Iehova mana taoonga—e akakeuanga ririnui no te patoi anga i te tu tika kore. Te akakite ra a Maseli 16:6 e: “Te akaruke nei te tangata i te kino i te mataku ia Iehova.” Kare taua mataku ra i te mataku kino i te Atua, mari ra e manako tau kia kore e akamareka kore i to tatou Metua i te rangi, tei inangaro maata kia puapingaia tatou.​—1 Pete. 3:12.

Te akatutu maira tetai tua oraanga i te akakeu anga papu no taua tu manako e te mataku tau. Kua koi mai a Ricardo e tana vaine ko Fernanda e iva anere tuma tara (N.Z.) mei roto mai i ta raua pangika. * Kua tuku a Fernanda i te moni ki roto i tana kiri, kare i tare ana. Te tae anga ki te kainga i muri ake te tutaki anga i tetai au pira, kua poitirere raua i te kite e te vai ra rai te moni ta raua i koi mai i roto i te kiri a Fernanda. “Kua maata rava te moni ta te tangata pangika i oronga mai na taua,” i karanga ai raua. Te akamataanga, kua timataia raua kia kore e akaoki i te moni no te mea e au pira ke atu ta raua ka tutaki. Kua akamarama mai a Ricardo e: “Kua pure maua kia Iehova no te maroiroi kia akaoki i te moni. No to maua inangaro i te akamareka iaia no tana patianga i roto ia Maseli 27:11, i akakeu ia maua kia akaoki i te moni.”

Akava Ngakau Tereniia e te Pipiria

Ka rauka ia tatou i te tereni i to tatou akava ngakau na te apii anga i te Pipiria e te tautaanga i te taangaanga i ta tatou i apii mai. I reira ‘te tuatua ora e te ririnui a te Atua,’ e itae ei i to tatou manako e to tatou ngakau. Na teia e akakeu ia tatou kia ‘akono meitaki i te au mea katoa nei.’​—Ebe. 4:12; 13:18.

Akamanako ana i te turanga o João. E aka kaiou tana, e ono tauatini tuma tara (N.Z.). Kare aia i tutaki ana i tana kaiou, kua neke atu aia ki tetai oire ke. E varu mataiti i muri mai, kua kite mai a João i te tuatua mou, e kua akakeuia tona akava ngakau tereniia e te Pipiria kia aravei atu i te ona o te kamupani e kia tutaki i taua kaiou ra! No te mea e meangiti ua te moni a João i te akono i tana vaine e te tamariki e a, kua akatika te ona o te kamupani kia ta marama aia me tutaki i tana kaiou.

Tu Mareka Tikai

Kua tata te apotetoro ko Paulo e: “Te akono i te Atua e te mareka ua ra, ko te apinga maata ïa. . . . E teianei, e kai ta tatou, e te kakau, kia mareka tatou i te reira.” (1 Timo. 6:6-8) Na te akamanako meitaki anga i teia akoanga pakari, e tauturu ia tatou kia kore e akaereereia e te au angaanga pitiniti noinoi, me kore tetai  ravenga kia rauka viviki mai tetai aka moni. (Mase. 28:20) Na te aru anga i te akoanga a Paulo e tauturu katoa ia tatou kia tuku i te Patireia o te Atua na mua, te irinaki anga e ka orongaia mai ta tatou au mea e anoano ra.​—Mata. 6:25-34.

Inara, no “te pikikaa o te apinga,” auraka rava tatou e manako e kare te tu noinoi e te morimori apinga e kino ana. (Mata. 13:22) Akamanako ana i te turanga o Akana. Kua kite aia te tikoti temeio anga te ngati Iseraela i te Kauvai Ioridana. No tona tu noinoi, kare aia i akakore ana i te inangaro i te keia i tetai ario e te auro e tetai kakau oko maata mei roto mai i te au apinga aru o te oire o Ieriko. No tana i rave, kua tamateia aia. (Iosu. 7:1, 20-26) No reira i tetai au anere mataiti i muri mai, kua akamatakite a Iesu e: “E akono meitaki e e matakite ia kotou i te morimori apinga”!​—Luka 12:15.

Tu Tika i te Ngai Angaanga

Ka akamanako ana tatou i tetai au turanga te ka timata i ta tatou tauta anga kia vai tika ua i roto i te au mea pouroa. Kia rauka te tu tika i te ngai angaanga, auraka tatou “e rave poiri ua i te apinga”—noatu e angaanga matauia teia e tetai ke. (Tito 2:9, 10) Kua akakite tika a Jurandir, e angaanga ana na tetai tipatimani kavamani, i tana moni e pou ana no te teretere anga. Inara kua maata atu te moni ta tona au taeake angaanga i rekoti, i ta ratou i akapou. Kua rave ratou i te reira no te mea kua akatika te pu o te tipatimani kia akapera ratou. Kua karo taua tangata ra ia Jurandir no tona tu tika e kare e tuku akaou ana iaia kia aere ki te au tere pitiniti. Inara kare i roa ana, kua akara meitakiia te rekoti o te moni pouroa a te tipatimani, e kua akameitakiia a Jurandir no tona tu tika. Kua oronga katoaia kiaia tetai taoonga teitei.

Kua akakite te pu angaanga kia André, e tangata okooko apinga, kia taki rua te tiati anga i te au tangata ka kaiou mai. Kua pure to tatou taeake kia Iehova no te maroiroi kia aru i te au kaveinga Pipiria. (Sala. 145:18-20) Kua tauta katoa aia i te akamarama ki tona pu i te tumu kare aia e aru i tana ikuikuanga​—kare ra i puapinga ana. No reira, kua akaruke a André i teia angaanga moni meitaki. E tai mataiti i muri mai, kua pati akaou tona pu iaia kia oki ki te angaanga, te akapapu anga kiaia e kare te tangata e tiati maata akaouia ana. Kua orongaia te taoonga manitia kia André.

Tutaki i te Au Kaiou

Kua ako atu te apotetoro ko Paulo i te au Kerititiano e: “Auraka kotou ei kai ou na te tangata ravarai.” (Roma 13:8) Penei ka kimi kotoe tatou kia kore e tutaki i tetai kaiou, te  manako anga e e maata te moni a te tangata taau i kaiou mai, e kare aia e anoano i te moni. Inara, te akamatakite maira te Pipiria: “E pati te tangata kino ra, e kare e akaoki mai.”​—Sala. 37:21.

Akapeea ra me ‘tupu tetai mea kitea koreia’ e kare e rauka ia tatou i te tutaki i ta tatou kaiou? (Kohe. 9:11, NW) Kua pati a Francisco e iva tauatini tuma tara (N.Z.) mei ko ia Alfredo ei tutaki i tana kaiou no tona are. Inara no te au manamanata o te pitiniti, kare i rauka ana ia Francisco i te tutaki i tana kaiou i te ra tei akanooia. Kua rave aia i te takainga mua kia aravei atu ia Alfredo no te manamanata, e kua akatika a Alfredo kia ta tuanga me tutaki i te moni.

Kopae i te Akavare Atu

Akamaara ana i te akaraanga kino o Anania e Saphira, tetai tokorua i roto i te putuputuanga Kerititiano i te anere mataiti mua. Kua oko raua i tetai kainga e kua oronga i tetai tuanga ua o te moni ki te au apotetoro, e kua karanga e ko te reira te katoaanga o te moni no te kainga. Kua inangaro raua i te akamareka atu i tetai ke kia manako e e nga tangata oronga raua. Raro ake i te akauruanga o te vaerua tapu o te Atua, kua akaari pu mai te apotetoro ko Petero i ta raua pikikaa e kua tamate poitirereia raua e Iehova.​—Anga. 5:1-11.

E tu tika kore to Anania e Saphira, kare ra mei te aronga tuatua mou e te tika tei tata i te Pipiria. Kua akakite tika a Mose i tona riri, tei arai iaia kia kore e tomo atu ki te Enua Taputouia. (Nume. 20:7-13) Pera katoa, kare a Iona i uuna ana i te tu paruparu tana i akaari mai i mua e i muri ake te tutu anga aia ki to Nineve. E kua tata aia i te reira.​—Iona 1:1-3; 4:1-3.

E tika rai, ka anoanoia te tu mataku kore ei akakite i te tuatua mou noatu te au turanga mareka kore, mei tei tupu kia Nathalia i te apii, e 14 ona mataiti. Kua akara akaou aia i tana tarere e kua kite mai e kua tarevake tetai pauanga ta tona puapii i maka. Noatu e kua kite aia e ka topa mai tana maka ki raro, kua akakite atu rai a Nathalia i te reira ki tona puapii. “Kua apii mai toku nga metua iaku e kia akamareka ia Iehova, e rave au i te mea tika. Ka kinokino toku akava ngakau me kare au e akakite i te reira ki toku puapii,” i tuatua ai aia. Kua ariki rekareka te puapii i to Nathalia tu tika.

Tu Tika—Tu Akangateitei ia Iehova

Kua kite mai tetai tamaine ko Giselle, e 17 ona mataiti, i tetai kiri e au pepa puapinga e te $45 (N.Z.) i roto. Kua aravei aia i te au akaaere o te apii kia akaoki i te reira ki te tangata nana te kiri. E tai marama i muri mai, kua tatau te puapii teitei tauturu i tetai reta ki te pupu apii te akapaapaa anga ia Giselle no tona tu tika e te akameitakianga i tona pamiri no te tereni meitaki anga iaia e te apiianga a te akonoanga. Kua akakaka tana “angaanga meitaki” ia Iehova.​—Mata. 5:14-16.

Ka anoanoia te tauta anga pakari kia tika, te noo anga ki rotopu i te aronga ‘tei akaperepere ia ratou uaorai, noinoi, akatietie, nengonengo, e te viivii.’ (2 Timo. 3:2) Inara, na te mataku tau ia Iehova, te akava ngakau tereniia e te Pipiria, e te tu mareka tikai, e tauturu ia tatou kia vai tika ua i teia ao tika kore. Ka akatupu katoa tatou i te pirianga vaitata tikai kia Iehova tei ‘tuatua-tika, e tei inangaro i te tuatua-tika.’​—Sala. 11:7.

[Tataanga Rikiriki i Raro]

[Au Tutu i te kapi 7]

Ka akaketaketa te mataku tau ia Iehova ia tatou kia tika

[Tutu i te kapi 8]

Ka akakaka to tatou tu tika ia Iehova