Au Pamiri Kerititiano​—‘Kia Vai Ara Ua’

“Kia ara ra, e e akono meitaki.”​—1 TESA. 5:6.

1, 2. Eaa te umuumuia ra kia vai ara ua tetai pamiri i te pae vaerua?

TAIKU anga i te “rā maata e te rikarika o Iehova ra,” kua tata te apotetoro ko Paulo ki te au Kerititiano i Tesalonia e: “Kareka kotou, e te au taeake, kare ïa i roto i te poiri, ka rokoia mai ei kotou e taua rā ra mei te keia. E tamariki anake kotou no te mārama, e tamariki no te ao; kare tatou i to te po, e to te poiri.” Kua tuatua katoa a Paulo e: “E teianei, auraka tatou e moe, mei tetai papaki ra, kia ara ra, e e akono meitaki.”​—Ioela 2:31; 1 Tesa. 5:4-6.

² Tano meitaki tikai te akoanga a Paulo ki to Tesalonia no te au Kerititiano e noo ra i “te tuatau openga.” (Dani. 12:4) E vaitata maira te openga o te akatereanga a Satani, te tauta pakari ra aia i te akaanga ke i te aronga akamori mou mei te tavini anga i te Atua. E mea meitaki i reira no tatou kia akarongo ki ta Paulo akoanga kia maroiroi ua rai i te pae vaerua. Kia vai ara ua tetai pamiri Kerititiano, e puapinga tikai kia rave te mema tataki tai i tana tuanga ta Iehova i oronga mai kiaia, mei tei akamaramaia mai i roto i te Pipiria. Eaa te tuanga a te au tane, au vaine, e te au mapu te tauturu anga i to ratou pamiri ‘kia vai ara ua’?

Te Au Tane​—Aru i “te Tiaki Mamoe Meitaki”

3. Kia tau kia 1 Timoteo 5:8, eaa te o maira ki te apainga a te tane ei upoko no te ngutuare?

³ “To te vaine ra upoko, ko te tane ïa,” i akakite ei te Pipiria. (1 Kori. 11:3) Eaa te o maira ki te apainga a te tane ei upoko no te ngutuare? Te akakite anga i tetai tuanga o te taoonga upoko, te karanga ra te au Tuatua Tapu e: “Ko te tangata oki kare i takinga-meitaki i tona uaorai, e maata ua atu rai i tona uaorai ngutuare, kua akaruke ïa aia i te akarongo, e e maata atu ïa tona kino i to te tangata akarongo kore ra.” (1 Timo. 5:8) E tika rai, ka akono te tane i te anoano pae materia o tona pamiri. Me ka tauturu aia i tona pamiri kia ara ua i te pae vaerua, maata atu tana ka rave i to te angaanga moni ua ei turuturu i tona pamiri. Ka akamaroiroi aia i tona ngutuare i te pae vaerua, te tauturu anga i te katoatoa kia akaketaketa i to ratou pirianga ki te Atua. (Mase. 24:3, 4) Akapeea aia me rave i te reira?

4. Eaa te ka tauturu i tetai tangata kia puapingaia te akamaroiroi anga i tona ngutuare i te pae vaerua?

⁴ I te mea e “ko te tane oki te upoko o te vaine, mei te Mesia katoa ra te upoko ïa i te ekalesia,” ka akara meitaki e ka aru te tane i te tu taoonga upoko ta Iesu e akaari maira no te putuputuanga. (Ephe. 5:23) Akamanako ana akapeea a Iesu te akatakaanga i tona pirianga ki tana au pipi. (E tatau ia Ioane 10:14, 15.) Eaa te taviri kia puapingaia te tane te inangaro ra i te akamaroiroi i tona ngutuare i te pae vaerua? Ko teia: Te apiianga i ta Iesu i akakite mai e i rave ei “tiaki mamoe meitaki,” e te ‘aru anga i tona takainga vaevae.’​—1 Pete. 2:21.

5. Eaa te kite tei rauka i te Tiaki Mamoe Meitaki no runga i te putuputuanga?

⁵ Kua akatumuia te pirianga o te tiaki e tana au mamoe ki runga i te kite e te irinaki. Kua kite te tiaki i tana au mamoe e kua kite e kua irinaki te au mamoe i te tiaki, e te akarongo ra ratou i tona reo. “Kua kite au i taku uaorai, e kua kitea au e ratou,” i tuatua ai a Iesu. Kua kite tikai aia i te putuputuanga. Te taiku ra te kupu Ereni “kite” i te “kite tika tikai anga.”  Ae, kua kite tikai te Tiaki Mamoe Meitaki i tana au mamoe. Kua kite aia i to ratou au anoano, tu paruparu, e to ratou tu maroiroi. Kua kite meitaki to tatou Akaraanga i tana au mamoe. E kua kite pu tikai te mamoe i te tiaki e te irinaki ra i tana aratakianga.

6. Akapeea te au tane me aru i te Tiaki Mamoe Meitaki?

⁶ Ei taangaanga i tona taoonga upoko te aru anga ia Karaiti, e akamanako te tane iaia uaorai ei tiaki e te aronga tana e akono ra ei au mamoe. E tauta aia kia kite tikai i tona pamiri. Ka rauka ainei i tetai tane taua tu kite ra? Ae, me ka komunikeiti meitaki aia ki te au mema o tona pamiri, akarongo anga ki to ratou au manamanata, rave anga i te au angaanga a te pamiri, rave anga i te au ikianga meitaki te o maira te akamorianga a te ngutuare, aere anga ki te uipaanga, angaanga tutuanga, tamataoraanga, e te tarekareka. Me apii meitaki te tane Kerititiano i ta te Tuatua a te Atua e akakite maira e te akono katoa anga i te au mema o tona pamiri, papu e ka ariki mai tona pamiri i tona taoonga upoko e ka mareka tikai aia me kite atu e te vai tinamou ra ratou i roto i te akamorianga mou.

7, 8. Akapeea tetai tane te aru anga i te Tiaki Mamoe Meitaki me aroa i te aronga tana e akono ra?

⁷ E aroa katoa tetai tiaki meitaki i tana au mamoe. Me apii tatou i te au papaanga Evangeria no te angaanga orometua e te oraanga o Iesu, ka akakeuia to tatou ngakau kia ariki rekareka i te aroa ta Iesu i akaari ki tana au pipi. Kua ‘oronga aia i tona ora no te au mamoe.’ E aru te au tane ia Iesu na te aroa anga i te aronga e akono ra ratou. Ma te kore e akaaere pakari i tana vaine, ko te tane te inangaro ra kia marekaia mai e te Atua, kia aroa ua rai aia i tana vaine “mei te Mesia katoa i aroa i te ekalesia.” (Ephe. 5:25) Kia riro tana au tuatua ei takinga meitaki e te akamanako anga i tana vaine, no te mea te tau ra aia kia akangateiteiia.​—1 Pete. 3:7.

⁸ Te tereni anga i te au tamariki, ka anoanoia te upoko o te pamiri kia turuturu pakari i te au kaveinga a te Atua. Inara, e akaari ua rai aia i te aroa ki tana tamariki. E oronga aroa i te akoanga, me ka anoanoia. E marie ake tetai au tamariki i tetai ke i te marama i te umuumuia ra no ratou. No reira, kia akakoromaki maata te metua tane. Me aru putuputu te au tane i to Iesu akaraanga, ka akatupu ratou i tetai turanga meitaki e te tinamou i roto i te kainga. Ka mataora to ratou pamiri i te tu tinamou pae vaerua ta te tata taramo e imene ra.​—E tatau ia Salamo 23:1-6.

9. Mei te pateriareka ko Noa, eaa te apainga a te au tane Kerititiano, e eaa te ka tauturu ia ratou kia apai i te reira?

⁹ Ko Noa tetai akaraanga meitaki no te au upoko o te pamiri Kerititiano. Te ora ra te pateriareka ko Noa i te tuatau openga o teianei ao o tona tuatau. Inara kua akaora a Iehova iaia ‘ma etai tokoitu, te nina-anga aia i teianei ao akono kore i te Atua.’ (2 Pete. 2:5) Tei runga ia Noa te apainga i te tauturu i tona pamiri kia ora mai mei te Vaipuke. Mei te reira katoa rai te turanga o te au upoko o te pamiri Kerititiano i teia tuatau openga. (Mata. 24:37) E puapinga tikai kia apii ratou i te akaraanga o “te tiaki mamoe meitaki” e kia tauta i te aru iaia!

Te Au Vaine​—‘Patu i to Kotou Ngutuare’

10. Eaa te aiteanga e kia kauraro te vaine ki tana tane?

¹⁰ “E te au vaine noo tane ra, e kauraro kotou ki ta kotou uaorai au tane, mei ta kotou e kauraro i te Atu ra,” i tata ei te apotetoro ko Paulo. (Ephe. 5:22) Kare teia tuatua e akakite mai ana i te tu akangateitei kore. Mua ake ka angaia ai te vaine mua, ko Eva, kua akakite te Atua mou e: “Kare ïa e meitaki kia noo ua te tangata koia anake ra; e anga au i tetai tauturu tau nona ra.” (Gene. 2:18) Te tuanga a te “tauturu tau”​—kia turuturu te vaine i tana tane, i te tane e akono ra i tana au apainga a te pamiri—​e mea akangateitei anga tikai te reira.

11. Akapeea te vaine akono meitaki ‘te patu anga i tona ngutuare’?

 ¹¹ E angaanga ana te vaine akono meitaki kia puapingaia tona ngutuare. (E tatau ia Maseli 14:1.) Kare mei te vaine neneva ra tei akangateitei kore i te akanoonoo anga o te taoonga upoko, te akangateitei maata ra te vaine pakari i teia akanoonooanga. Kare aia e akaari i te tu akarongo kore e te tu akatakake e akaariia ra e teianei ao, te kauraro ra aia ki tona tokorua. (Ephe. 2:2) Kare te vaine neneva e emiemi ana i te tuatua akakino i tana tane, ko te vaine pakari ra te tauta ra kia akangateitei atu tana tamariki e tetai ke i tana tane. Te matakite ra taua vaine ra kia kore te taoonga upoko o tana tane e akangateitei koreia, na te kopekope anga me kore te taumaroanga kiaia. Pera katoa no runga i te akatere anga i te moni. Ka kaimoumou te vaine neneva i te moni ta tona pamiri i angaanga pakari ana. Kare ra te vaine turuturu e akapera ana. Ka turuturu aia i tana tane no runga i te turanga pae moni. Te tu e rave ra aia i te au mea, kua akatakaia mai na roto i tona tu matakite e te akono anga i te moni. Kare aia e maro i tana tane kia angaanga roa atu.

12. Eaa ta te vaine ka rave i te tauturu i tona pamiri ‘kia vai ara ua’?

¹² Ka tauturu te vaine akono meitaki i tona pamiri ‘kia vai ara ua’ na te tauturu anga i tana tane i te apii i te tamariki i te pae vaerua. (Mase. 1:8) Ka turuturu maroiroi aia i te porokaramu no te Akamorianga a te Ngutuare. Ka turuturu katoa aia i tana tane me oronga i te akoanga e te apiianga ki ta raua tamariki. Kare aia mei te vaine te mamae ra tana tamariki i te pae kopapa e te pae vaerua no te kore i turuturu i tana tane!

13. Eaa ra i puapinga ai no te vaine kia turuturu i tana tane e piri maroiroi ra i roto i te angaanga teokaratiki?

¹³ Eaa te manako o te vaine turuturu te kite ra i tana tane e rave maroiroi ra i tana tuanga i roto i te putuputuanga Kerititiano? Rekareka tikai aia! Me e tavini orometua, me e tangata pakari tana tane, me kore e mema no te Kumiti Aremaki me kore Kumiti Patu Anga o te Tapere, mataora aia i te apainga a tana tane. Te turuturu maroiroi anga i tana tane na roto i te tuatua e te angaanga ka o mai te au akaatinga anga. Te kite ra aia e te tauturu ra te angaanga maroiroi a tana tane i roto i te au angaanga teokaratiki kia vai ara ua te pamiri i te pae vaerua.

14. (a) Eaa te akaaoanga o te vaine turuturu, e akapeea aia me akono atu i te reira? (e) Akapeea te vaine te akatupu anga i te oraanga meitaki o tona pamiri?

¹⁴ E akaaoanga no te vaine turuturu meitaki me rave tana tane i te ikianga kare aia e mareka ana. Noatu rai, ka akaari aia i “te ngakau maru e te muteki ua” e ka turuturu iaia kia tupu tana ikianga. (1 Pete. 3:4) Ka tauta te vaine meitaki i te aru i te au akaraanga meitaki o te au vaine akono Atua o mua ana, mei ia Sara, Ruta, Abigaila, e te metua vaine o Iesu,  ko Maria. (1 Pete. 3:5, 6) Ka aru katoa aia i te au vaine pakarikari o teia tuatau tei “tau ta ratou tuatua.” (Tito 2:3, 4) Na te aroa anga e te akangateitei anga i tana tane, te turuturu maata ra te vaine akono meitaki i to raua akaipoipo e te oraanga meitaki o te pamiri. E ngai meitaki e te mako tikai tona kainga. E puapinga tikai te vaine turuturu ki te tane pae vaerua!​—Mase. 18:22.

Te Au Mapu​—‘Akono i te Au Mea Akara Koreia’

15. Akapeea te au mapu te angaanga kapiti anga ki to ratou metua ‘kia vai ara ua’ te pamiri?

¹⁵ Akapeea kotou te au mapu te angaanga kapiti anga ki to kotou metua ‘kia vai ara ua’ to kotou pamiri i te pae vaerua? Akamanako ana i te tutaki ta Iehova i tuku ki mua ia kotou. Penei kua akaari atu ana to kotou metua i te au tutu no runga i te oraanga Parataito i to kotou tamarikianga. Ia kotou e mamaata maira, penei kua taangaanga ratou i te Pipiria e te au puka Kerititiano ei tauturu ia kotou kia akamanako mei teaa rai te oraanga mutu kore i roto i te ao ou. Na te akamou anga i te manako ki ta kotou tavini anga ia Iehova e te parani anga i to kotou oraanga kia tau ki te reira e tauturu ei ia kotou ‘kia vai ara ua.’

16, 17. Eaa ta te au mapu ka rave kia puapingaia i te oro i te taemoemo anga no te ora?

¹⁶ Akamanako i te au tuatua a te apotetoro ko Paulo i roto ia 1 Korinetia 9:24. (E tatau.) E oro i te taemoemo anga no te ora kia re. Iki i te mataara kia rauka mai te tutaki no te ora mutu kore. Kua tuku te manganui i te aruaru anga i te au apinga materia kia akavare ia ratou kia kore e akamou i te manako ki runga i te tutaki. E mea neneva tikai te reira! Kare e rauka te mataora tika tikai me tuku i te au apinga nui ei mea puapinga i roto i te oraanga. E tuatau poto ua to te au apinga ta te moni ka oko mai. Ko kotou ra, e akono i te “au mea akara koreia.” No teaa ra? No te mea ko “te au mea akara koreia ra, e tika ïa i te vai ranga.”​—2 Kori. 4:18.

¹⁷ Te kapiti maira “te au mea akara koreia” i te au akameitakianga o te Patireia. Parani i to kotou oraanga kia rauka mai te reira. Ka rauka te mataora tika tikai na te taangaanga anga i to kotou oraanga i roto i ta Iehova angaanga. Te tavini anga i te Atua mou te oronga maira i te au atianga kia itae atu i te au akakoroanga no te tuatau roa e te tuatau poto. * Ka tauturu te au akakoroanga pae vaerua tau tikai ia kotou, kia akamou i te manako ki te tavini anga i te Atua kia rauka mai te tutaki no te ora mutu kore.​—1 Ioa. 2:17.

18, 19. Akapeea tetai mapu e papu ei e kua aru aia i te tuatua mou?

¹⁸ E te au mapu, te takainga mua i runga i te mataara o te ora ko te akatupu anga i tetai pirianga kia Iehova. Kua rave ainei kotou i te reira? E ui kia koe uaorai e: ‘E tangata pae vaerua ainei au, me kore te aru ua ra au i toku nga metua ki te au angaanga pae vaerua? Te akatupu ra ainei au i te au tu te akamareka ra i te Atua? Te tauta ra ainei au i te aru putuputu i taku papaanga te o maira te au angaanga no te akamorianga mou, pure putuputu anga, apiianga, aere anga ki te uipaanga, e te angaanga tutuanga? Te akavaitata ra ainei au ki te Atua na te akatupu anga i tetai pirianga kiaia?’​—Iako. 4:8.

¹⁹ Akamanako ana i to Mose akaraanga.  Noatu kua na roto ana aia i te peu a tetai enua ke, kua iki aia kia kiteaia mai aia ei tangata akamori no Iehova, kare ei tamaiti na te tamaine a Pharao. (E tatau ia Ebera 11:24-27.) E te au mapu Kerititiano, tauta katoa i te tavini ia Iehova ma te akarongo mou. Na te rave anga i te reira, ka rauka ia kotou te mataora tika tikai, te oraanga meitaki roa atu i teia tuatau, e te manakonakoanga no “te ora mutu kore.”​—1 Timo. 6:19.

20. I roto i te taemoemo no te ora, koai ma te ka tutakiia?

²⁰ I roto i te taemoemo anga i te tuatau taito, e tai rai tangata oro ka re. Kare ra te reira i aite ki te taemoemo anga no te ora. To te Atua anoano ‘kia ora te tangata katoatoa, e kia rauka te kite i te tuatua-mou.’ (1 Timo. 2:3, 4) Kua puapingaia te manganui tei oro ana i mua ake ia koe, e e maata rai te oro ra na te pae ia koe. (Ebe. 12:1, 2) Ka tutakiia te katoatoa kare i tuku i te au. No reira e tauta kia re!

21. Eaa te ka uriuriia i roto i te atikara ka aru mai?

²¹ Ka tupu te “rā maata e te mataku o Iehova.” (Mala. 4:5) Auraka te au pamiri Kerititiano e rokoia mai e taua ra ra. E puapinga tikai kia apai te katoatoa o te pamiri i ta ratou apainga Tuatua Tapu. Eaa ua atu taau ka rave kia vai matakite ua i te pae vaerua e kia akaketaketa i toou pirianga ki te Atua? Ka uriuri te atikara ka aru mai e toru tumu te ka akakeu i te turanga meitaki pae vaerua o te pamiri.

[Tataanga Rikiriki i Raro]

Eaa Taau i Kite?

• Eaa ra i puapinga ai no te au pamiri Kerititiano ‘kia vai ara ua’?

• Akapeea te tane me aru i te Tiaki Mamoe Meitaki?

• Eaa ta te vaine akono meitaki ka rave ei turuturu i tana tane?

• Akapeea te au mapu te tauturu anga i to ratou pamiri kia vai ara ua i te pae vaerua?

[Au Uianga Apii]

[Tutu i te kapi 9]

Puapinga tikai te vaine turuturu ki te tane pae vaerua