Au Pamiri Kerititiano​—‘Kia Vai Teateamamao Ua’

“Kia vai teateamamao rai kotou, no te mea, ei te ora manako koreia e kotou na, e tae mai ei te Tamaiti a te tangata.”​—LUKA 12:40.

1, 2. Eaa ra tatou ka akarongo ei ki ta Iesu akoanga ‘kia vai teateamamao ua’?

EAA te ka tupu kia koe e toou pamiri ‘me tae mai te Tamaiti a te tangata ma tona kakā’ e te akatakake anga i te tangata mei tetai e tetai? (Mata. 25:31, 32) I te mea e ka tupu teia i te ora kare tatou i manako atu ana, e puapinga tikai kia akarongo tatou ki ta Iesu akoanga ‘kia vai teateamamao ua’!​—Luka 12:40.

² Kua uriuri ana te atikara i mua atu akapeea te mema tataki tai o te pamiri me tauturu i te pamiri katoa kia vai ara ua i te pae vaerua na te manako pakari anga i tana apainga. Ka akamanako ana tatou i tetai atu au mataara ka rauka ia tatou i te akatupu i te turanga meitaki pae vaerua o to tatou pamiri.

Akono “Meitaki” i Toou Mata

3, 4. (a) Eaa ta te au pamiri Kerititiano ka matakite? (e) Eaa te aiteanga kia akono “meitaki” i te mata?

³ Kia vai teateamamao ua no to Karaiti tae anga mai, kia matakite te au pamiri kia kore e akaanga keia mei te au mea no runga i te akamorianga mou. Kia matakite ratou kia kore e akavareia. I te mea e e ereere te au apinga materia tei marei i tetai au pamiri, akamanako ana i ta Iesu tuatua no te akono ‘meitaki anga’ i to tatou mata. (E tatau ia Mataio 6:22, 23.) Mei te ramepa rai e turama ra i to tatou arataa kia kore tatou e paku ki raro, ka tauturu ta tatou e akara ra na roto i te ‘mata o te ngakau’ kia marama e kia  akamako ia tatou uaorai kia kore e akaturoriia.​—Ephe. 1:18.

⁴ E kite meitaki ei tetai mata, ka anoanoia kia angaanga meitaki e kia kite meitaki i ta te reira e akara ra. Kare te reira e tuke ana ki te mata o te ngakau. Te aiteanga o te mata meitaki koia oki te akamou ra tatou ki runga i te akakoroanga okotai. Ka akamou tatou i to tatou mata ki runga i te au mea pae vaerua, kare ra ki runga i te au apinga materia e kia manamanata i te akono anga i te au anoano pae kopapa o te pamiri. (Mata. 6:33) Te aiteanga kia mareka ua tatou i ta tatou au apinga materia e kia tuku i ta te Atua angaanga ei mea mua i roto i to tatou oraanga.​—Ebe. 13:5.

5. Akapeea tetai tamaine mapu te akaari anga e kua akamou aia i tona “mata” i te tavini anga i te Atua?

⁵ Ka tupu mai te au mea meitaki me tereniia te tamariki kia akono meitaki i te mata! Akamanako ana i te akaraanga o tetai tamaine mapu i te enua o Etiopia. Meitaki tikai aia i te rave i tana apii e te oti anga tana au apii, kua orongaia tetai apii tutakiia ei akamaata atu i tana apii. Inara kare aia i ariki ana i te apii tutakiia no te mea kua akamou aia i tona mata i te tavini anga ia Iehova. Kare i roa ana i muri mai, kua orongaia mai tetai angaanga nana te ka tutaki iaia e 3,000 euro ($5,589, N.Z.) i te marama​—e aka moni me akaaiteia ki te moni e tutakiia ana i tona enua. Kua akamou ra te tamaine i tona “mata” ki runga i te angaanga painia. Kare aia i uriuri manako ana ki tona nga metua no te patoi anga i taua angaanga ra. Eaa te manako o tona nga metua te kite anga i tana i rave? Kua rekareka raua, e kua akakite e kua mataora tikai raua iaia!

6, 7. Eaa te kino ta tatou ka matakite me ‘akono i to tatou mata’?

⁶ E akamatakite anga te au tuatua papu a Iesu no runga i te noinoi tei rekotiia i roto ia Mataio 6:22, 23. Kua taangaanga te Pipiria i te nga kupu ‘meitaki te mata’ e e ‘kino te mata.’ E morimori apinga me kore e noinoi te ‘mata kino.’ Eaa to Iehova manako no runga i te morimori apinga me kore te noinoi? “Kareka te akaturi, e te au tuatua viivii ravarai, e te noinoi apinga, auraka rava e akaikiia ki o kotou na,” i akakite ei te Pipiria.​—Ephe. 5:3.

⁷ Mama ua i te kite atu i te tu noinoi o tetai ke, kare ra i te mea mama i te kite mai i te reira i roto ia tatou. No reira, e mea meitaki kia akarongo tatou ki ta Iesu akoanga e: “E akono meitaki e e matakite ia kotou i te morimori apinga.” (Luka 12:15) Na te rave anga i te reira te umuumuia ra kia kite tatou e eaa to roto i to tatou ngakau. Kia akamanako pakari te au pamiri Kerititiano i te taime e te moni ta ratou ka akapou ki runga i te tamataoraanga, tarekareka, e te oko mai i te au apinga materia.

8. Me oko mai i tetai apinga, akapeea tatou me ‘akono meitaki i to tatou mata’?

⁸ Mua ake ka oko mai ei koe i tetai apinga, akamanako e me ka rava taau moni i te oko mai i te reira, me kare. E akamanako i te au tumu mei teia rai: ‘E taime ainei toku i te taangaanga putuputu i teia apinga e te akono anga i te reira? Eaa te roa e kite ei au i te taangaanga meitaki i te reira?’ E te au mapu, auraka e irinaki i te au akakitekite anga ravarai a teianei ao no runga i te au apinga ka oko, e te maroanga tau kore kia rauka te au kakau oko maata no te ingoa ua, me kore tetai atu au apinga. Kopae pakari atu i te reira. Akamanako katoa ana me ka rauka i teia au apinga taau ka oko mai i te tauturu i toou pamiri kia vai teateamamao ua no te tae anga mai te Tamaiti a te tangata. E irinaki i ta Iehova taputou e: “Kare rava au e akaruke atu ia koe, kare oki au e taka ke ia koe.”​—Ebe. 13:5.

Aruaru i te Au Akakoroanga Pae Vaerua

9. Eaa ta te aruaru anga i te au akakoroanga pae vaerua ka akatupu ki tetai pamiri?

⁹ Tetai mataara no te au mema pamiri kia akaketaketa i to ratou akarongo e kia akatupu i te turanga meitaki pae vaerua o te pamiri, kia akanoo e kia aruaru i te au akakoroanga pae  vaerua. Ka tauturu teia i te au pamiri kia kite e te peea ua ra ta ratou tavini anga ia Iehova, e kia iki katoa ko teea te au angaanga puapinga i roto i to ratou oraanga.​—E tatau ia Philipi 1:10.

10, 11 Eaa te au akakoroanga pae vaerua e to te tuatau ki mua ka aruaru kotou i te akanoo ei pamiri?

¹⁰ Te akanoo katoa anga i te au akakoroanga rikiriki ta te au mema pamiri ka itae, ka apai mai i te au akameitakianga maata. Ei akaraanga, te uriurianga i te tia no te au ra. Te paupau anga a te au mema pamiri, ka tauturu i te upoko o te ngutuare kia kite e mei teaa te maata o to ratou inangaro ia Iehova e te tuatua mou. Te oronga maira te akakoroanga no te tatau putuputu anga i te Pipiria ei pamiri i tetai atianga meitaki no te tamariki kia akameitaki mai i ta ratou tatau e kia marama meitaki atu i te karere o te Pipiria. (Sala. 1:1, 2) E kare ainei tatou e inangaro i te akanoo ei akakoroanga na tatou kia akameitaki mai i te tu o ta tatou au pure? Te akatupu anga i te au tuanga o te ua o te vaerua, ka riro katoa ei akakoroanga meitaki kia aruaruia. (Gala. 5:22, 23) Akapeea me kimi i te au mataara kia akaari i te ngakau aroa ki te au tangata ka aravei tatou i roto i te angaanga orometua? Na te rave anga i te reira ei pamiri ka tauturu i te tamariki kia manako aroa, e penei ka inangaro ratou i te tavini ei au painia tamou me kore ei au mitinari.

¹¹ Eaa ka kore ei e akamanako i tetai au akakoroanga te ka rauka ia koe e toou pamiri i te aruaru? Ka rauka ainei i toou pamiri i te akanoo i tetai akakoroanga kia maata atu te taime i roto i te angaanga orometua? Ka tauta ainei koe kia kore e emiemi i te akakitekite i runga i te terepaoni, i runga i te mataara, me kore i te au ngai pitiniti? Akapeea te angaanga anga i te ngai te anoano maataia ra te au papuritia no  te Patireia? Ka apii ainei tetai mema o te pamiri i tetai reo ou kia oronga atu i te tuatua meitaki ki te aronga o tetai enua ke?

12. Eaa ta te upoko o te pamiri ka rave ei tauturu i to ratou pamiri kia tupu i te pae vaerua?

¹² Ei upoko no te pamiri, akara i te au ngai ka rauka i toou pamiri kia tupu i te pae vaerua. E oti e akanoo i te au akakoroanga taka meitaki kia tupu taua au akakoroanga ra. Kia riro te au akakoroanga ta kotou i akanoo ei pamiri ei mea tau tikai ki to kotou turanga e ta kotou ka rauka. (Mase. 13:12) E tika, ka roa rai te tuatau e rauka ai tetai akakoroanga puapinga. No reira, e taporoporo marie i te tuatau no te akarakara tivi e e taangaanga i te reira no te au mea pae vaerua. (Ephe. 5:15, 16) Angaanga pakari i te itae i te au akakoroanga taau i akanoo no toou pamiri. (Gala. 6:9) Ko te pamiri e aruaru ra i te au akakoroanga pae vaerua ka “kite te tangata katoa” te tupu anga o to ratou kite.​—1 Timo 4:15.

Rave Tamou i te Akamorianga a te Ngutuare i te Aiai

13. Eaa te tauianga tei raveia i roto i te papaanga uipaanga a te putuputuanga i te au epetoma, e eaa te au uianga ka akamanako tatou?

¹³ Tetai tauturu meitaki no te pamiri ‘kia vai teateamamao ua’ no te tae anga mai te Tamaiti a te tangata, ko te taui anga puapinga o te papaanga uipaanga i te au epetoma tei akamataia i roto ia Tianuare 1, 2009. Kare tatou e taokotai akaou ana i tetai ra ke mai i te epetoma, tei kapikiia ana e ko te Apii Puka a te Putuputuanga. Kua kapitiia atu teia uipaanga ki te Apii Orometua Teokaratiki e te Uipaanga Tavini Anga. Kua raveia teia tauianga ei akaketaketa i te turanga pae vaerua o te au pamiri Kerititiano, na te akanoo anga i tetai aiai i te au epetoma no te akamorianga a te ngutuare. Kua pou rai tetai au tuatau i raveia ai te tauianga, e ka ui tatou kia tatou uaorai e: ‘Te taangaanga ra ainei au i te taime no te Akamorianga a te Ngutuare i te aiai me kore kia rave i taku uaorai apii? Kua puapingaia ainei au te aru anga i te akakoroanga o taua akanoonooanga ra?’

14. (a) Eaa te akakoroanga maata no te rave ua anga i te Akamorianga a te Ngutuare i te aiai me kore ta tatou uaorai apii? (e) Eaa ra i riro ei te akanoo anga i tetai aiai no te apii ei mea puapinga?

¹⁴ Te akakoroanga maata no te rave ua anga i te Akamorianga a te Ngutuare i te aiai me kore te rave i taau uaorai apii, kia akavaitata atu ki te Atua. (Iako. 4:8) Me akapou tatou i te taime i te apii putuputu i te Pipiria e kia kite maata atu i Tei Anga maira, ka ketaketa atu to tatou pirianga kiaia. Me piri vaitata atu tatou kia Iehova, ka akakeu maataia tatou kia inangaro iaia ‘ma to tatou ngakau katoa, to tatou vaerua katoa, to tatou manako katoa, e to tatou ririnui katoa.’ (Mare. 12:30) Papu e te inangaro nei tatou i te akarongo ki te Atua e kia aru iaia. (Ephe. 5:1) Na te rave putuputu anga i te Akamorianga a te Ngutuare i te aiai, ko te taviri puapinga ia i te tauturu i te au mema o to tatou pamiri ‘kia vai teateamamao ua’ i te pae vaerua, ia tatou e tapapa atura i te “mate maata” tei totouia mai. (Mata. 24:21) E puapinga tikai te reira no to tatou ora.

15. Eaa ta te Akamorianga a te Ngutuare i te aiai ka akatupu ki te au mema o te pamiri i te manako anga i tetai e tetai?

¹⁵ E akakoroanga ke atu tetai no te akanoonooanga i te Akamorianga a te Ngutuare​—te tauturu anga i te au mema pamiri kia akavaitata ki tetai e tetai. Kua riro te akapou anga i te taime no te uriuri kapiti i te au mea pae vaerua i te au epetoma ei tauturu i te au mema pamiri kia kite i te manako o tetai e tetai. Ka piri vaitata atu te nga tokorua akaipoipo me mataora raua i te apii kapitianga i te Pipiria! (E tatau ia Koheleta 4:12.) Ka taokotai aroaia te au metua e te tamariki e akamori kapiti ra no te ‘tatua apa kore.’​—Kolo. 3:14.

16. Akakite mai akapeea te au tuaine pae vaerua e toru te puapingaia anga te akanoo anga i tetai aiai no te apii Pipiria.

¹⁶ Akamanako ana akapeea te au tuaine  pae vaerua e toru te puapingaia anga te akanoo anga i tetai aiai no te apii Pipiria. E noo ana teia au tuaine pakarikari takaua e toru i roto i te oire okotai e kua riro mai ratou ei au oa meitaki no tetai au mataiti noatu kare o ratou pirianga. No te inangaro kia kapiti taokotai mai e kia puapingaia i te pae vaerua, kare i te kapiti ua anga, kua akanoo ratou i tetai aiai i te aravei e kia apii i te Pipiria. Kua akamata ratou i te rave i teia na te apii anga i te puka “Bearing Thorough Witness” About God’s Kingdom. “Kua mataora tikai matou i ta matou apii tei tere atu i te tai ora,” i tuatua ai tetai o ratou. “Ka akamanako atu matou i te au turanga e tupu ra ki to tatou au taeake i te anere mataiti mua, e ka uriuri eaa ta matou ka rave i roto i taua au turanga ra. Ka taangaanga matou i roto i te angaanga orometua te au manako ta matou i apii mai mei ta matou uriurianga. Kua akariro teia i ta matou tutuanga i te Patireia e te akariro anga i te tangata ei pipi ei mea mataora tikai e te puapinga, tei kare i tupu ana i mua ana.” Kapiti mai te akamaroiroi anga ia ratou i te pae vaerua, kua akavaitata atu teia akanoonooanga ia ratou ei au oa meitaki. “Te akaperepere nei matou i teia akanoonooanga,” i tuatua ai ratou.

17. Eaa te au mea te ka tauturu i te Akamorianga a te Ngutuare i te aiai kia puapingaia?

¹⁷ Akapeea ra koe? Te puapingaia ra ainei koe i te akanoo anga i tetai aiai no te akamorianga a te ngutuare me kore no taau uaorai apii? Me kare te reira e rave putuputuia ana, kare te akanoonooanga e puapingaia. Kia papa ua te mema tataki taki o te pamiri no te apii i te ora tei akatakaia. Auraka e tuku i tetai au manamanata rikiriki kia tamanamanata i te reira aiai. E iki katoa i te au puka apii te ka tau no toou pamiri. Eaa taau ka rave kia mataora teia au tuatau apii? E taangaanga i te au ravenga meitaki no te apii, e e akono i te turanga akangateitei e kia au ua.​—Iako. 3:19. *

‘Kia Vai Ara ua’ e ‘kia Vai Teateamamao Ua’

18, 19. Te kite anga e te vaitata maira te tae anga mai te Tamaiti a te tangata, akapeea te reira te akakeu anga ia koe e toou pamiri?

¹⁸ Te akapapu maira te au turanga kino o teianei ao e tupu nei i to tatou tuatau mei te mataiti 1914 e, tei te tuatau openga te ao kino o Satani. Te vaitata maira a Aramakito. Kare e roa atu ka tae mai te Tamaiti a te tangata e ka tuku mai aia i ta Iehova akavaanga ki runga i te aronga akono kore i te Atua. (Sala. 37:10; Mase. 2:21, 22) Kare ainei te reira e akakeu ia koe e toou pamiri?

¹⁹ Te akarongo ra ainei koe ki ta Iesu akoanga kia akono “meitaki” i toou mata? I te au tangata o teianei ao e aruaru ra i te apinganui, rongonui, me kore te mana, te aruaru ra ainei toou pamiri i te au akakoroanga pae vaerua? Te tupu ra ainei te akanoonooanga no te Akamorianga a te Ngutuare i te aiai me kore te taime no taau uaorai apii? Rauka ra ainei ia koe te akatupu i taua akakoroanga ra? Mei tei uriuriia i te atikara i mua atu, te rave ra ainei koe i taau apainga Tuatua Tapu ei tane, ei vaine, me kore ei tamaiti, te tauturu anga i te pamiri ‘kia vai ara ua’? (1 Tesa. 5:6) Me koia ia, ka ‘vai teateamamao ua rai’ koe no te tae anga mai te Tamaiti a te tangata.

[Tataanga Rikiriki i Raro]

Eaa Taau i Kite?

• Akamarama mai akapeea te au pamiri Kerititiano te ‘vai teateamamao anga’ na te . . .

akono ‘meitaki anga’ i te mata.

akanoo anga e te aruaru anga i te au akakoroanga pae vaerua.

rave ua anga i te Akamorianga a te Ngutuare i te aiai.

[Au Uianga Apii]

[Tutu i te kapi 13]

Ka patoi atu to tatou mata “meitaki” i te au akavareanga a teianei ao