Rekareka Tikai Ainei Koe i te Tuatua a te Atua?

“TE AKAMATAANGA au i te tatau putuputu i te Pipiria, kua kite mai au e e ngata tikai te reira e kare i te mea mataora,” i tuatua ai a Lorraine. “Kare au e marama ana i te reira, no reira kare toku manako e mou ana.”

Kua akakite katoa mai tetai pae e kare ratou i mataora ana te akamataanga ratou i te tatau i te Pipiria. Inara, kua tauta ua atu rai ratou no te mea kua kite ratou e e mea meitaki i te tatau i te au Tuatua Tapu. Kua tuatua a Marc e: “Mama ua i te akatika i tetai au mea kia tamanamanata mai i taku tatauanga e te apiianga i te Pipiria. E ka anoanoia te pure e te tautaanga maata kia riro te tatauanga Pipiria i te au ra ei tuanga no taku e rave ra.”

Eaa taau ka rave kia ariki rekareka maata atu koe i te Tuatua tataia a te Atua, te Pipiria? Akapeea koe e mataora ai i te tatau anga i te reira? Akamanako i te au manako e aru maira.

Au Akakoroanga e te Au Ravenga

Akamata i te tatau i te Pipiria na roto i te pure e kia mou toou manako. Pati kia Iehova kia tauturu mai ia koe kia akatupu i te inangaro tikai i te apii i tana Tuatua. Pati akatenga kiaia kia akatuera mai i toou manako e toou ngakau kia marama meitaki i tona tu pakari. (Sala. 119:34) Me kare teia tu e aruia, kare te apii Pipiria e akamanako oonuia, e ka ngaro toou inangaro i te rave i te reira. Kua tuatua a Lynn e: “Tetai taime e viviki ana taku tatau e e ngaro ana te au manako puapinga tikai. Maata o te taime, kare au e marama tikai ana i te au manako maata. E pure ana au kia akamanako meitaki i taku e tatau ra, e kua tauturu mai teia kia kore toku manako e aere ke.”

Akaperepere i taau e apii ra. Kia akamaara e e puapinga no toou oraanga me marama tikai e me taangaanga koe i te au tuatua mou Pipiria. No reira, e tauta pakari ua rai i te kimi i te au manako tau e kia taangaanga i te reira. “E kimi ana au i te au mea te ka tauturu iaku kia akataka i te au tu e te au akakoroanga tarevake i roto iaku,” i tuatua ai a Chris. “E akaoraora anga tikai te kite e akapeea te Pipiria e ta tatou au puka te akakite mai anga i te au manako ka puapingaia au, noatu e kare rava te aronga tata i kite iaku.”

Akanoo i te au akakoroanga ka rauka ia koe i te itae atu. Tauta i te apii i tetai apinga ou no runga i te au tangata o te Pipiria. Ka kite mai koe i te au manako manea tikai no runga ia ratou na te akaraanga ki roto i te Insight on the Scriptures me kore te Watch Tower Publications Index. Ia koe e kite meitaki ra i te au tane e te au vaine i roto i te Pipiria ei au tangata tika tikai ma to ratou au tu e te manako ngakau, ka riro ratou ei aronga tika tikai kia koe.

Kimi i te au mataara ou no te uriurianga i te au Tuatua Tapu. (Anga. 17:2, 3) Te apii ra a Sophia ma te akamanakoanga i te reira. “Toku inangaro ko te apii i te au mataara ou no te uriurianga ki te au tangata i roto i taku angaanga orometua, pera katoa tetai atu au taime, e kia rauka iaku i te akamarama meitaki atu i te au tuatua mou Pipiria. E makatini meitaki tikai Te Punanga Tiaki no te akatupu anga i teia,” i tuatua ai aia.​—2 Timo. 2:15.

Akamanako i te tu o te au tua Pipiria. “E mea ora oki te tuatua a te Atua,” i akakite ei a Ebera 4:12. Ia koe e tatau ra i te au Tuatua Tapu, e akariro i te karere a te Atua ei mea ora i roto i  toou manako na te akamanako anga i ta te au tangata Pipiria e kite ra. Tauta i te akarongo i ta ratou e akarongo ra e kia kite i ta ratou e manako ra. Akaaite i ta ratou i na roto ana ki te au turanga tikai o toou oraanga. Tamou akapeea ratou te akono anga i tetai au turanga. Na teia e akamaata atu i toou marama e kia akono tamou i te au tua Pipiria.

Akapou i te taime ki te au tuatua tapu ngata e te au akamaramaanga kia marama meitaki koe i te reira. Kia maata toou taime no te apiianga tataki tai. Penei ka kite mai koe i tetai au uianga puapinga te ka anoanoia kia kimikimiia. Akara i te au tuatua kare i kite matauia, e e akara i te au irava turuturu i roto i te Pipiria. Te maata atu taau ka marama e te taangaanga i taau i tatau, ka mataora atu koe i te Tuatua tataia a te Atua. Ka rauka ia koe i te tuatua mei te tata taramo e: “Te inangaro nei au i taau [Iehova] au tuatua-akakite ei tuanga naku e tuatau ua atu; ko ta toku ngakau oki ïa rekareka anga.”​—Sala. 119:111.

Eiaa e rapurapu i te tatau i te puka. Kia tau ua toou taime ka akapou no taau apii. Paunu meitaki i teia ki te taime ka akapou koe i te akapapa anga no te au uipaanga putuputuanga. “Maata te taime e taitaia ana au e kare toku manako e mou ana,” i tuatua ai a Raquel. “No reira kua kite mai au e e puapinga tikai te au apiianga poto ua. Ka tauturu teia iaku kia puapinga maataia mei taku apii.” Kua akakite mai a Chris e: “Me manako rapurapu au, ka manamanata toku akava ngakau no te mea e meangiti ua taku i mou mai. Kare te apii e tae ki roto i toku ngakau.” No reira, eiaa e rapurapu.

Akatupu i te inangaro tikai no te tuatua a te Atua. Kua akakite te apotetoro ko Petero e: “Kia kaki tikai kotou mei te tamariki anau ou, i te u iro koreia ra, i te tuatua, kia pakari kotou i te reira.” (1 Pete. 2:2) Kare te au pepe e anoanoia kia akatupu i te inangaro no te u. E tu natura ua te reira inangaro. Inara te akakite maira te au Tuatua Tapu e ka anoanoia tatou kia akatupu i te inangaro no te tuatua a te Atua. Me tatau koe e tai kapi i roto i te Pipiria i te au ra ravarai, ka tupu mai taua inangaro ra. E ngata te akamataanga, inara me roa mai ka riro ei mea marekaanga tikai.

Akamanako oonu i te au irava Tuatua Tapu. Ka rauka katoa te puapinga maata mei te akamanako oonu anga i taau e tatau ra. Na teia e tauturu ia koe i te kite i te pirianga o te au manako pae vaerua taau i akara mai ana. Aere ua  rai ka maata toou pakari i te pae vaerua​—e mea marekaanga tikai.​—Sala. 19:14; Mase. 3:3.

Akapou Meitakiia te Taime

E tautaanga pakari te akono tamou i te au tu meitaki no te apii, inara e maata te au akameitakianga. Ka meitaki atu toou marama anga i te au Tuatua Tapu. (Ebe. 5:12-14) Ka apai mai te kite e te pakari tei rauka mai mei te au Tuatua Tapu akauruia, i te tu mataora, marekaanga, e te au. E “rakau ora” te pakari e kiteia ra i roto i te Tuatua akauruia a te Atua no te aronga tei rave e tei taangaanga i te reira.​—Mase. 3:13-18.

Ka marama koe i te apiianga oonu i te Tuatua a te Atua. (Mase. 15:14) Ka tauturu te reira ia koe kia oronga i te akoanga ngakau tae akatumuia ki runga i te Pipiria. Me akatika koe i taau au ikianga kia aratakiia e taau i tatau ana i roto i te au Tuatua Tapu e te au puka a “te tavini akono meitaki e te pakari,” ka kite koe i te akaoraora anga e te akakeuanga ngaueue kore o te Tuatua akauruia a Iehova. (Mata. 24:45) Ka akakeu te Tuatua a Iehova i toou manako, au angaanga, e taau ka tuatua. Tei maata atu, ka puapingaia toou pirianga ki te Atua.​—Sala. 1:2, 3.

Ka akakeu toou ngakau inangaro i te Atua kia akakite koe i toou akarongo. Ka riro katoa teia ei mea puapinga tikai. Te tauta ra a Sophia i te akamaara e te taangaanga i te au irava tukeke kia inangaro mai te tangata ngutuare, e kia tukatau e kia mataora tana angaanga orometua Kerititiano. “Mataora tikai te kite anga i te tangata te ariu mai anga ki te au tuatua a te Pipiria,” i karanga ai aia.

Te mea puapinga rava atu no te rekareka anga i te Tuatua a te Atua, ko te pirianga vaitata kia Iehova. Ka tauturu te apiianga Pipiria ia koe kia kite i tona au turanga e kia marama e kia akaperepere i tona aroa, tu oronga ua, e te tu tika. Kare e tautaanga puapinga atu e te meitaki roa atu mei te reira. Akapou i toou taime i te apiianga i te Tuatua a te Atua. Na te rave anga i te reira, kua akapou meitakiia te taime.​—Sala. 19:7-11.

[Pia/​Tutu i te kapi 5]

TATAU TE TUATUA A TE ATUA: AU AKAKOROANGA E TE AU RAVENGA

▪ Akamata i te tatau i te Pipiria na roto i te pure e kia mou toou manako.

▪ Akaperepere i taau e apii ra.

▪ Akanoo i te au akakoroanga ka rauka ia koe te itae atu.

▪ Kimi i te au mataara ou no te uriurianga i te au Tuatua Tapu.

▪ Akamanako i te tu o te au tua Pipiria.

▪ Akapou i te taime ki te au tuatua tapu ngata e te au akamaramaanga kia marama meitaki koe i te reira.

▪ Eiaa e rapurapu i te tatau i te puka.

▪ Akatupu i te inangaro tikai no te tuatua a te Atua.

▪ Akamanako oonu i te au irava Tuatua Tapu.

[Tutu i te kapi 4]

Me tatau i tetai papaanga Pipiria, akamanako e tei roto koe i taua turanga ra