“Akamanako i te Aronga e Angaanga Pakari ra i Roto ia Kotou”

“Akamanako i te aronga e angaanga pakari ra i roto ia kotou e te akaaere ra ia kotou i roto i te Atu e te ako ra ia kotou.”​—1 TESA. 5:12, NW.

1, 2. (a) Eaa te turanga o te putuputuanga i Tesalonia te tata anga a Paulo i tana reta mua kia ratou? (e) Eaa ta Paulo i akamaroiroi ki to Tesalonia kia rave?

AKAMANAKO ana ia koe uaorai ei mema no te putuputuanga i Tesalonia i te anere mataiti mua, tei akanoo muaia i Europa. Kua roa rai te apotetoro ko Paulo i reira no te akaketaketa i te au taeake. Penei kua iki aia i te aronga pakari ei arataki, mei tetai au putuputuanga rai. (Anga. 14:23) Muri ake te akanooia anga te putuputuanga, kua akaputuputu mai te ngati Iuda i tetai au tangata kia akaatea ia Paulo e Sila mei roto i te oire. Penei kua manako te au Kerititiano tei noo atu e kua akarukeia mai ratou, e kua mataku ratou.

² Te marama uaia atura e ka manamanata a Paulo i te putuputuanga ou i muri ake i tona akaruke anga ia Tesalonia. Kua tauta aia i te oki atu, inara kua ‘arai mai a Satani’ iaia. No reira kua tono aia ia Timoteo kia akamaroiroi i te putuputuanga. (1 Tesa. 2:18; 3:2) Te apai mai anga a Timoteo i te ripoti meitaki, kua akakeuia a Paulo kia tata i tetai reta ki to Tesalonia. Kua akamaroiroi katoa a Paulo ia ratou kia ‘akamanako i te aronga e akaaere ra ia ratou.’​—E tatau ia 1 Tesalonia 5:12, 13. *

3. Eaa ra te au tumu ka akamanako maata ei te au Kerititiano i Tesalonia i te aronga pakari?

 ³ Kare te au taeake e arataki ra i te au Kerititiano i Tesalonia e tukatau roa ana mei ia Paulo e tona au oa teretere; kare katoa ratou i roa ana ei au Kerititiano mei te aronga pakari rai i Ierusalema. No te mea, kare i taeria ake e tai mataiti te akanooia anga te putuputuanga! Noatu rai, e tumu tetai no te aronga i roto i te putuputuanga kia akameitaki atu i to ratou aronga pakari “e angaanga pakari ra” e “te akaaere ra” i te putuputuanga e te “ako ra” i te au taeake. Tika rai, e tumu tau “kia akamanako maata atu [ratou i te aronga pakari] ma te aroa.” Aru mai i teia patianga ko ta Paulo akoanga “kia akatupu i te au ki tetai e tetai.” Naringa e tei Tesalonia koe, ka ariki rekareka maata ainei koe i te angaanga a te aronga pakari? Eaa toou manako no runga i “te meitaki i te tangata nei” ta te Atua i oronga mai no toou putuputuanga na roto ia Karaiti?​—Ephe. 4:8.

“Angaanga Pakari”

4, 5. Eaa ra i riro ei ei angaanga pakari na te aronga pakari i to Paulo tuatau i te apii i te putuputuanga, e eaa ra i aiteite ei i teia tuatau?

⁴ Muri ake te tono anga ia Paulo e Sila ki Berea, akapeea te aronga pakari i Tesalonia te ‘angaanga pakari anga’? Papu e kua apii atu ratou i te putuputuanga na te taangaanga anga i te au Tuatua Tapu, te aru anga ia Paulo. Penei i manako ana koe e, ‘Kua ariki rekareka ainei te au Kerititiano i Tesalonia i te Tuatua a te Atua?’ No te mea, te karanga ra te Pipiria e e ‘maata rava to Berea meitaki i to Tesalonia, te kimi anga i te tuatua i tataia ra’ i te au ra. (Anga. 17:11) Inara, te akaaiteia ra te reira ki te au ngati Iuda i Tesalonia, kare ki te au Kerititiano. Te aronga tei riro mai ei aronga irinaki kua ‘āriki i te tuatua a te Atua kare ei tuatua na te tangata, ei tuatua ra na te Atua.’ (1 Tesa. 2:13) Papu e kua angaanga pakari ana te aronga pakari i te apii atu i te putuputuanga.

⁵ Teia tuatau, te oronga nei te pupu tavini akono meitaki e te pakari i ‘te kai i te ora mou’ ki te anana a te Atua. (Mata. 24:45) Raro ake i te aratakianga a te tavini, te angaanga pakari ra te aronga pakari i te apii i to ratou au taeake i te pae vaerua. Kua rauka i te aronga i roto i te putuputuanga te au puka e manganui tei akatumuia ki runga i te Pipiria, e i roto i tetai au reo te vai ra te au apinga tauturu mei te Watch Tower Publications Index e te Watchtower Library i runga i te CD-ROM. Ei akamerengo i te au anoano pae vaerua o te putuputuanga, ka akapou te aronga pakari i te au ora i te akapapa i te au tuanga o te uipaanga kia oronga i te apiianga na roto i te tu tau. Kua manako ana ainei koe i te taime e akapou ana te aronga pakari i te akapapa i ta ratou tuanga no te au uipaanga, akaputuputuanga, e te uruoaanga?

6, 7. (a) Eaa te akaraanga ta te aronga pakari i Tesalonia i rauka mai mei ia Paulo? (e) Eaa i riro ei ei akaaoanga no te aronga pakari i teia tuatau i te aru ia Paulo?

⁶ Kua maara i te aronga pakari i Tesalonia te akaraanga meitaki ta Paulo i akanoo te tiaki anga i te anana. Kua atoro aia i te anana ma te ngakau tae. Mei tei uriuriia i roto i te atikara i mua akenei, kua ‘maru ua a Paulo mei te metua vaine i matuapuru i tana tamariki.’ (E tatau ia 1 Tesalonia 2:7, 8.) Kua inangaro katoa aia i te “oronga” i tona uaorai ora! Me rave i te angaanga tiaki, kia aite te aronga pakari mei iaia rai.

⁷ Te aru ra te au tiaki Kerititiano o teia tuatau ia Paulo na te akaperepere anga i te anana. Kare tetai au mamoe e takinga meitaki ana e te oaoa. Noatu rai, kia marama te aronga pakari ia ratou e kia kimi i te “meitaki” i roto ia ratou. (Mase. 16:20) E tika, no te tu apa, ka ngata i tetai tangata pakari i te akamanako tau atu ia ratou. Inara, iaia e rave ra i te ka rauka iaia kia maru ua ki te katoatoa, kare ainei e tau kia akameitaki iaia no tana tauta anga ei tiaki mamoe meitaki i raro ake ia Karaiti?

8, 9. Eaa tetai au mataara te ‘tiaki ra te aronga pakari o teia tuatau ia tatou’?

⁸ E tumuanga tau to tatou katoatoa kia “kauraro” ki te aronga pakari. Mei ta Paulo i tata, ‘te  tiaki ra ratou ia tatou.’ (Ebe. 13:17) Te akamaara maira taua tuatua ra ia tatou i te tiaki mamoe kare e moe ana kia rauka iaia i te paruru i tana anana. Penei kare katoa te aronga pakari o teia tuatau e moe ana no te akono anga i te au anoano o te aronga maki me kore e au manamanata to ratou i te pae manako e te pae vaerua. Ei akaraanga, ka akaaraia mai te au taeake o te Kumiti Are Maki kia aere atu ki tetai rapakau anga kino pakari. Inara, e rekareka ana tatou i ta ratou angaanga me na roto tatou i taua turanga ra!

⁹ E angaanga pakari ana te aronga pakari o te au Kumiti Patu Anga o te Tapere e te au kumiti tauturu ei tauturu i te au taeake. Tau rai kia turuturu ngakau tae tatou ia ratou. Akamanako ana i te angaanga tauturu i muri ake i te Uriia Nargis tei tupu i Mianama i te mataiti 2008. E tae atu ei ki te Putuputuanga o Bothingone i te ngai kino tikai i Irrawaddy Delta, kua na roto atu te pupu tauturu i te au ngai kino o te enua te vai ra te au kopapa mate. Te kite anga te au taeake e kua tae atu te pupu tauturu mua e to ratou akaaere kotinga o mua ana ki Bothingone, kua tuatua ratou e: “Akara ana! Tera to tatou akaaere kotinga! Kua akaora a Iehova ia tatou!” Te ariki rekareka ra ainei koe i te angaanga pakari a te aronga pakari e rave ra i te po e te ao? Kua ikiia tetai aronga pakari kia tavini no te au kumiti takake kia akono i te au manamanata no te au akavaanga ngata. Kare teia aronga pakari e akatietie ana i ta ratou i rave; inara mataora tikai te aronga tei puapingaia mei ta ratou angaanga.​—Mata. 6:2-4.

10. Eaa te au angaanga a te aronga pakari kare e kiteaia atu ana?

¹⁰ E akono katoa ana te aronga pakari e manganui i teia tuatau i te au pepa. Ei akaraanga, ka akapapa te akaaere o te pupu aronga pakari i te au papaanga no te au uipaanga i te au epetoma. Ka akaputu mai te tereketere o te putuputuanga i te au ripoti no te angaanga orometua o te marama e to te mataiti. Ka akamanako meitaki te akaaere apii i te papaanga apii. I te au toru marama, ka akara meitakiia te au rekoti papaanga moni a te putuputuanga. Ka tatau te aronga pakari i te au reta no ko mai i te opati manga e ka taangaanga i te akauenga kia akono tamou i “te akarongo okotai.” (Ephe. 4:3, 13) Na te angaanga pakari a te aronga pakari, ‘e raveia ai te au mea ravarai ma te tika e te manea.’​—1 Kori. 14:40.

“Akaaere ra ia Kotou”

11, 12. Koai te akaaere ra i te putputuanga, e eaa te o maira ki te reira?

¹¹ Kua akataka mai a Paulo i te aronga pakari o Tesalonia e angaanga pakari ra e “akaaere ra” i te putuputuanga. Ko te tuatua i roto i te reo mua “kia tu ki mua” ka rauka kia uriia e e “arataki anga; rave i te arataki anga i rotopu.” (1 Tesa. 5:12; tataanga i raro ake, NW.) Te taiku ra a Paulo ki taua aronga pakari e “angaanga pakari ra.” Kare aia e tuatua ra no te “akaaere akatere” okotai, mari ra no te aronga pakari katoatoa o te putuputuanga. Teia tuatau, te tu ra te maataanga o te aronga pakari ki mua i te putuputuanga e te akaaere ra i te au uipaanga. Ka tauturu te akanoonoo anga ou no te “akaaere o te pupu o te aronga pakari” ia tatou kia akamanako i te aronga pakari katoatoa ei au mema no tetai pupu taokotaiia.

¹² Maata atu te o maira ki te ‘akaaere anga’ i te putuputuanga i to te apii ua anga. Kua taangaangaia taua tu tuatua ra i roto ia 1 Timoteo 3:4. Te tuatua ra a Paulo e ka tau tetai akaaere “ei arataki meitaki i tona uaorai ngutuare ra, e tana au tamariki i te kauraro marie anga iaia.” Te tuatua “arataki meitaki” i konei, te kapiti maira i te apiianga i tana tamariki, e te arataki anga i tona pamiri e kia “kauraro marie” te tamariki. Ae, ka arataki te aronga pakari i te putuputuanga, te tauturu anga i te katoatoa kia kauraro kia Iehova.​—1 Timo. 3:5.

13. Eaa ra ka pou ei te taime e rauka ai tetai tikaanga i te uipaanga a te aronga pakari?

¹³ E rauka ai i te akaaere meitaki i te anana, ka uriuri te aronga pakari i te ka anoanoia no te putuputuanga. Penei e meitaki atu e na tetai tangata pakari ua e rave i te au ikianga. Te aru anga i te akaraanga o te pupu akaaere o te  anere mataiti mua, ka uriuri te pupu aronga pakari o teia tuatau i te au mea ravarai, na roto i te au Tuatua Tapu. To ratou akakoroanga, kia taangaanga i te au kaveinga Tuatua Tapu kia tau ki te au anoano o te putuputuanga o reira. Ka puapingaia me akapapa te aronga pakari tataki tai no te au uipaanga a te aronga pakari, te akamanako anga i te au Tuatua Tapu e te au kaveinga a te pupu tavini akono meitaki e te pakari. Ae, ka pou rai te taime. Me tukeke te manako, mei te uriuri anga a te pupu akaaere o te anere mataiti mua no runga i te peritome, ka anoanoia te taime e te kimikimi anga kia rotai te manako ki te au Tuatua Tapu.​—Anga. 15:2, 6, 7, 12-14, 28.

14. Te ariki rekareka ra ainei koe e te angaanga kapiti ra te pupu aronga pakari? Eaa koe i manako akapera ai?

¹⁴ Eaa te ka tupu me maro ua rai tetai tangata pakari i tona inangaro me kore i tona manako? Akapeea me ka akatupu tetai tangata​—mei ia Dioterepe i te anere mataiti mua—​i te au manako akataka ke? (3 Ioa. 9, 10) Ka kino te putuputuanga katoa. Me kua tamanamanata a Satani i te putuputuanga i te anere mataiti mua, papu e ka tamanamanata aia i te putuputuanga i teia tuatau. Penei ka akakeu aia i te tu noinoi o te tangata, kia inangaro i te taoonga teitei. No reira, kia akatupu te aronga pakari i te tu akaaka e kia angaanga kapiti ei kopapa okotai. E ariki rekareka ana tatou i te tu akaaka o te aronga pakari e angaanga kapiti ra ei kopapa okotai!

“Ako Atu Anga ia Kotou”

15. Eaa te akakoroanga me ako te aronga pakari i tetai taeake me kore tuaine?

¹⁵ Kua akakite mai a Paulo i tetai angaanga ngata e te puapinga a te aronga pakari: te ako anga i te anana. Roto i te au Tuatua Tapu Ereni  Kerititiano, ko Paulo anake tei taangaanga i te tuatua Ereni tei uriia e “ako.” Te taikuia ra te reira ki te akoanga pakari, kare ra e akaari maira i te tu riri. (Anga. 20:31; 2 Tesa. 3:15) Ei akatauanga, kua tata a Paulo ki to Korinetia e: “Kare au i tata i teianei au tuatua kia akama kotou, te ako atu nei ra au ia kotou i taku au tamariki akaperepere.” (1 Kori. 4:14) Tona akakoroanga no te akoanga, no tona manako aroa i tetai ke.

16. Eaa ta te aronga pakari ka akamanako meitaki me ako atu i tetai ke?

¹⁶ Ka akamanako meitaki te aronga pakari i te tu me ako ratou i tetai ke. Ka tauta ratou i te aru ia Paulo na roto i te tu takinga meitaki, aroa e te tauturu. (E tatau ia 1 Tesalonia 2:11, 12) Ae, ka ‘tāpu piri tikai te aronga pakari i te tuatua-mou, kia tika ia ratou kia apii i te tuatua ora.’​—Tito 1:5-9.

17, 18. Eaa taau ka akamanako meitaki me ako mai tetai tangata pakari ia koe?

¹⁷ E tika, e aronga apa te aronga pakari e penei ka tuatua i tetai apinga ka tataraara ratou a muri ake. (1 Ari. 8:46; Iako. 3:8) Kua kite katoa te aronga pakari e ko te akoanga tei orongaia ki te au taeake e te au tuaine pae vaerua, kare i te ‘mea rekareka, e mea aue ra.’ (Ebe. 12:11) No reira me ka ako tetai tangata pakari i tetai taeake, ka tau aia kia akamanako meitaki i te manamanata e kia pure no runga i te reira. Me kua akoia ana koe, te ariki rekareka ra ainei koe i te manako aroa o taua tangata pakari ra?

¹⁸ Penei e maki toou kare koe e marama ana. E kua akakite mai te taote i te manamanata, e ngata ra ia koe te ariki i te reira. Ka riri ainei koe i te taote? Kare! Noatu ka akakite mai aia kia vaiia koe, penei ka ariki koe i te rapakauanga, te irinaki anga e e meitaki te reira noou. Penei kare koe e reka i te tu i akakite mai ei te taote i te rapakauanga, ka tuku ainei koe i te reira ei akaaere i taau ikianga? Kare paa. No reira, auraka e akatika i te tu i akoia mai ei koe, ei arai ia koe mei te akarongo anga ki te aronga ta Iehova e Iesu e taangaanga ra i te akakite mai e akapeea koe me tauturu me kore me paruru ia koe uaorai i te pae vaerua.

Ariki Rekareka i te Aronga Pakari ta Iehova i Oronga Mai

19, 20. Akapeea koe me ariki rekareka i te “meitaki i te tangata nei”?

¹⁹ Eaa taau ka rave me orongaia mai tetai apinga aroa tei maaniia naau? Ka ariki rekareka ainei koe na te taangaanga anga i te reira? Kua oronga mai a Iehova i “te meitaki i te tangata nei” kia koe na roto ia Iesu Karaiti. Tetai mataara ka ariki rekareka koe i teia au apinga aroa, e akarongo meitaki ki te au akoanga a te aronga pakari e kia taangaanga i te au manako ta ratou i taiku mai. Kia ariki rekareka katoa koe na te paupau meitaki anga i te au uipaanga. Turuturu i te angaanga ta te aronga pakari e arataki ra, mei te angaanga orometua rai. Me kua puapingaia koe e tetai akoanga a tetai tangata pakari, eaa ka kore ei e akakite atu kiaia? Pera katoa, eaa ka kore ei e ariki rekareka atu i te au pamiri o te aronga pakari? Kia maara e, no tetai tangata pakari kia angaanga pakari i roto i te putuputuanga, kua akaatinga tona pamiri i to ratou tuatau.

²⁰ Ae, e maata te tumu kia ariki rekareka tatou i te aronga pakari e angaanga pakari ra, e akaaere ra e te ako anga ia tatou. E akanoonooanga aroa tikai teia “meitaki i te tangata nei” no ko mai ia Iehova!

[Tataanga Rikiriki i Raro]

Maara Ainei ia Koe?

• Eaa te au tumu i ariki rekareka ai te au Kerititiano i Tesalonia i te aronga e arataki ra i rotopu ia ratou?

• Akapeea te aronga pakari te angaanga pakari anga i roto i toou putuputuanga?

• Akapeea koe e puapingaia ai mei te akaaere anga a te aronga pakari?

• Me kua akoia mai e tetai tangata pakari, eaa taau ka akamanako meitaki?

[Au Uianga Apii]

[Tutu i te kapi 27]

Te ariki ra ainei koe te au tu e tiaki ra te aronga pakari i te putuputuanga?