‘Apai Mai te Pokaikai, Maata Atu te Pepa Kiri’

KUA raurau te apotetoro ko Paulo i tona taeake mitinari ko Timoteo, kia apai mai kiaia tetai au pokaikai e te au pepa kiri tei tataia. Eaa te tu o te au pokaikai e te au pepa kiri ta Paulo e taiku ra? Eaa ra aia i tuatua ai i teia? E eaa ta tatou ka kite mai mei teia patianga?

Te tae anga ki rotopu i te anere mataiti mua T.N. te tata anga a Paulo i teia au tuatua, kua akatakakeia te 39 au puka o te au Tuatua Tapu Epera ki roto i te 22 me kore 24 puka, maataanga tei roto i te au pokaikai tukeke. Kua akakite mai te Poropeta ko Alan Millard e “kua rauka mai . . . i te aronga puapinga” teia au pokaikai noatu te aka moni. Kua tu tetai pae e tai kopi o te reira. Ei akaraanga, e pokaikai ta te eunuka Etiopia i roto i tona kariota “e te tatau ra oki i ta Isaia peroveta ra.” ‘E tangata mana aia i raro ake i te ariki vaine o Etiopia ko Kanedake e e tiaki no tana apinga tini.’ Penei e tangata apinga nui aia i rauka mai ei iaia tetai tuanga o te au Tuatua Tapu.​—Anga. 8:27, 28

I roto i tana patianga kia Timoteo, kua tata a Paulo e: ‘Te kakau pu taku i vaio i Teroa ia Karepo, apai mai me aere mai koe, e te au pokaikai, maata atu te au pepa kiri.’ (2 Timo. 4:13) Te akaari maira teia e e au puka ta Paulo. Eaa te puka puapinga roa atu i roto i tana vairanga puka i te pae mai i te Tuatua a te Atua? No runga i te tuatua “au pepa kiri” i roto i teia irava, kua akakite te tangata apii Pipiria ko A. T. Robertson e: “Penei e au kopi teia no te au puka o te Koreromutu Taito, e maata atu te moni o te pepa kiri [e te pakari] i te au pepa raupo.” Mei tona mapuanga ‘kua apiiia a Paulo i te pae i te vaevae o Gamaliela,’ tei apii i te Ture a Mose e kua akangateiteiia e te au tangata. No reira te maramaia atura eaa a Paulo i tu ei i te au kopi o te pokaikai no te Tuatua a te Atua.​—Anga. 5:34; 22:3.

Taangaanga te Au Kerititiano i te Au Pokaikai

E tikaanga manea tei rauka i te aronga tei tu i te au pokaikai Tuatua Tapu. Akapeea i rauka mai ei te maataanga o te au Kerititiano i taua tuatau ra te Tuatua a te Atua? Ka kite tatou i te pauanga mei ta Paulo i tata i roto i tana reta mua kia Timoteo. Kua tata aia e: “E akamaroiroi rai i te tatau i te tuatua, e te ako, e te apii, e tae ua atu au.” (1 Timo. 4:13) E tuanga te tatau anga ki te katoatoa no te porokaramu uipaanga a te au putuputuanga Kerititiano, tei rave uaia ana e te iti tangata o te Atua mei te tuatau o Mose.​—Anga. 13:15; 15:21; 2 Kori. 3:15.

Ei tangata pakari, ka “akamaroiroi” a Timoteo i te tatau maata i te tuatua, kia puapingaia te aronga kare a ratou kopi o te au Tuatua Tapu. Papu e te tatauia anga te Tuatua a te Atua, kua  akarongo meitaki te katoatoa i te au tuatua ravarai, e kua uriuri te au metua e ta ratou tamariki i te kainga i tei tatauia i te au uipaanga.

Vaitata rai e 24 tapuae (7.3 mita) te roaroa o te Pokaikai Tuatua Tai Mate a Isaia. E rakau tetai i te nga ope e e vaii putuputuia ana kia kore e kino, e ka teiaa te pokaikai. Kare te maataanga o te au Kerititiano i rauka ana i te apai maata i te reira me tutu aere ratou. Noatu e au pokaikai ta Paulo no te au Tuatua Tapu ei taangaanga nana, kare i rauka iaia i te apai i tana au pokaikai me teretere aere aia. Kua akaruke aia i tetai ki tona oa ko Karepo i Teroa.

Eaa ta Tatou ka Kite mei to Paulo Akaraanga?

Mua ua ake i tana patianga, kua tata a Paulo, tei akamouauriia i Roma no te rua o te taime e: “I kukumi ana au i te kukumianga meitaki, kua oti toku oro anga . . . E teianei te vaioia nei te korona o te tuatua-tika noku.” (2 Timo. 4:7, 8) Penei kua tata aia i teia au tuatua i te mataiti 65 T.N. te tuatau o ta Nero takinokino anga. Teia taime e kino tikai tona akamouariiaanga. Kua kite aia e kare e roa atu ana ka tamateia aia. (2 Timo. 1:16; 4:6) Te marama uaia atura te tumu i akakite ei a Paulo i tona inangaro tikai kia rauka mai tana au pokaikai. Noatu e kua papu iaia e kua kukumi aia i te kukumianga meitaki e oti ua atu, kua inangaro tikai aia i te akaketaketa iaia uaorai na te apii anga i te Tuatua a te Atua.

Penei tei Ephesia rai a Timoteo, i tae mai ei te patianga a Paulo kiaia. (1 Timo. 1:3) Mei tetai 1,000 maire (1,600 kiro mita) te mamao me aere mei ia Ephesia ki Roma te na roto anga ia Teroa. I roto i taua reta ra, kua raurau a Paulo ia Timoteo e: “Kia rapurapu mai oki koe, ko te rokoia i te paroro.” (2 Timo. 4:21) Kare te Pipiria i akakite mai ana me kua na runga a Timoteo i tetai poti te aere anga ki Roma te tuatau i inangaro ei a Paulo i te pokaikai.

Eaa ta tatou ka kite mai mei ta Paulo pati anga i te ‘au pokaikai, maata atu te pepa kiri’? Kua inangaro atu rai aia i te Tuatua a te Atua i teia tuatau tumatetenga rava atu o tona oraanga. Te kite ra ainei koe e no tona inangaro ua anga i te Tuatua a te Atua i rauka ai iaia tetai pirianga vaitata kia Iehova, kia maroiroi i te tavini Iaia, e kia akamaroiroi atu i tetai ke?

E akameitakianga tikai no tatou i teia tuatau me e Pipiria katoa ta tatou! Tetai aronga e maata ta ratou au kopi e te au tataanga. Mei ia Paulo rai, kia akatupu tatou i te inangaro tikai kia marama oonu atu i te au Tuatua Tapu. I roto i te 14 reta akauruia tei rauka ia Paulo te tikaanga ngateitei kia tata, ko te rua o tana tataanga kia Timoteo te mea openga. Ka kiteaia tana patianga uaorai i te openga o te puka. Te tikaanga, ko te pati akatenga a Paulo kia Timoteo kia ‘apai mai i te au pokaikai, maata atu te pepa kiri,’ ko tetai ia o tona inangaro openga tei rekotiia.

Ko toou inangaro tikai ainei kia kukumi i te kukumianga meitaki no te akarongo e oti ua atu, mei ta Paulo rai i rave? Te inangaro ra ainei koe kia rave maroiroi ua rai i ta Iehova angaanga, e kia piri atu ki te angaanga tutuanga noatu eaa te roa ka inangaro mai te Atu ia tatou kia rave i te reira? Ina, eaa ka kore ei e rave i ta Paulo e akamaroiroi maira i te au Kerititiano kia rave? “Kia matakite ia koe, e taau e apii ra” na te inangaro anga i te apii putuputu i te Pipiria, e taangaangaia nei e te maataanga o te tangata i roto i te au tu mama atu i to te au pokaikai.​—1 Timo. 4:16.

[Mapu/Tutu i te kapi 18, 19]

(No runga i teia, akara i te puka)

Ephesia

Teroa

Roma