‘Kia Meitaki Toou Aerenga’​—Akapeea Ra?

‘AERENGA meitaki’​—e tuatua puapinga tikai! Kua puapingaia tetai aronga e kua meitaki tikai e te rongonui i te pae apinga nui. Kua manakonako tetai pae kia meitaki te aerenga, inara kare i puapingaia ana.

Tei runga te meitaki o toou aerenga i taau e manako maata ra i roto i toou oraanga. E rua tumu puapinga akapeea koe me taangaanga i toou taime e te maroiroi, e te rave anga i te reira.

Maata te au Kerititiano tei mataora tikai te piri anga ki te angaanga orometua. Kua meitaki te aerenga o tetai au mapu e te aronga pakarikari no te rave tamou anga i te angaanga orometua. Inara, e maromaroa ana tetai pae i te angaanga orometua e kua tuku i te reira ei tuanga rua i roto i to ratou oraanga kia aruaru i tetai atu au akakoroanga. Eaa ra teia i tupu ei? Eaa taau ka rave kia kore e ngaropoina ia koe te au mea puapinga tikai? E akapeea e “meitaki ei toou aerenga”?​—Iosu. 1:8.

Tarekareka Muri Ake i te Apii, e te Angaanga Reka

Ka anoanoia te au mapu Kerititiano kia manako tau i te tavini anga i te Atua mou e te pirianga ki roto i tetai atu au angaanga. Ka meitaki te oraanga o te aronga e rave ra i te reira e ka tau ratou kia akameitakiia.

Inara, e maata te taime o tetai au Kerititiano mapu ki te tarekareka e te au angaanga e reka ana ratou i muri ake i te apii. Kare e tarevake ana te reira au angaanga. E ui ra te au mapu Kerititiano kia ratou uaorai e: ‘Eaa te maata o toku taime ka pou ki teia au tarekareka? Akapeea te aronga ka piri atu au? Eaa te au tu ka piri mai kiaku me o atu au ki teia au tarekareka? E eaa te mea maata i roto i toku oraanga?’ Penei ka kite mai koe e ka pou te taime ki taua au angaanga e kare e taime e te maroiroi no te akono anga i te pirianga ki te Atua. Te kite ra i reira koe i te puapinga no te akanoo i te au mea maata i roto i te oraanga.​—Ephe. 5:15-17.

Akamanako ana i te turanga o Wiktor. * Kua karanga aia e: “Toku 12 mataiti anga, kua tomo au ki roto i tetai tarekareka anga vori poro. Kare i roa ana maata taku au re i rauka mai. E ka riro mai au ei tangata rongonui.” Aere ua rai, kua manamanata a Wiktor ta te angaanga tipoti ka akatupu ki tona pirianga kia Iehova. Tetai ra, kua varea aia e te moe te tatau anga i tana Pipiria. Kua kite katoa aia e kare aia e mataora ana i te angaanga orometua. “Kua pou toku maroiroi i te angaanga tipoti e kua kite mai au e kare au e maroiroi ana no te angaanga a Iehova. Kua kite au e kare au e rave ana i taku ka rauka.”

Apii Teitei Atu

E apainga Tuatua Tapu ta tetai Kerititiano kia akono i tona pamiri, e to ratou au anoano pae materia. (1 Timo. 5:8) Inara, ka anoanoia ainei tetai pepa apii koreti me kore apii univetiti?

E mea meitaki i te akamanako eaa ta te aruaru anga i te apii teitei atu ka akatupu ki te pirianga o tetai kia Iehova. Ka akatutu tatou i teia na te akamanako anga i tetai akaraanga Tuatua Tapu.

E tekeretere a Baruka no te peroveta ko Ieremia. Tetai atianga, kua inangaro maata a Baruka kia puapingaia aia, kare i akamanako ana i tona tikaanga ngateitei i te tavini ia Iehova. Kua kite mai a Iehova i teia e kua  akamatakite atu iaia na roto ia Ieremia: “Te kimi ra ainei koe i te meitaki maata noou uaorai? Auraka e kimiia.”​—Iere. 45:5.

Eaa te au mea “meitaki maata” e kimi ra a Baruka? Penei kua timataia aia kia rongonui i roto i te akatereanga a te ngati Iuda. Me kore ko te au mea meitaki maata, ko te au mea puapinga i te pae materia. Noatu eaa te tu, kua ngaropoina iaia te au mea e maata ua atu te meitaki, te au mea puapinga i te pae vaerua. (Phili. 1:10) Inara, kua akarongo a Baruka ki ta Iehova akamatakite anga na roto ia Ieremia e kua ora mai te takoreia anga a Ierusalema.​—Iere. 43:6.

Eaa ta tatou ka rauka mai mei teia papaanga? Te akakite maira te ako anga tei orongaia kia Baruka e e apinga tarevake tetai. Te kimi ra aia i te au mea meitaki maata nona uaorai. Me e ravenga taau no te akono anga ia koe uaorai, ka anoano ainei koe i te akapou i te taime, te moni, e te maroiroi ki tetai atu au apii kia puapingaia, no te inangaro o te metua e te kopu tangata?

Akamanako ana ia Grzegorz, e tangata tata porokaramu no te komupiuta. Kua akakeuia aia e tona au oa angaanga kia apii pakari no tetai atu au terenianga puapinga tikai. Kare i roa ana kare ona taime no te au angaanga a te Atua. Kua maara iaia e: “E taitaia ua ana au. Kua kinokino toku akava ngakau no te kare e rauka ana iaku te itae i te au akakoroanga pae vaerua taku i akanoo.”

Pou te Maroiroi i te Angaanga Moni

Te akamaroiroi maira te Tuatua a te Atua i te au Kerititiano mou kia angaanga pakari e kia riro mai ei au pu e ei au tangata angaanga irinakiia. Kua tata te apotetoro ko Paulo e: “Ta kotou au mea e rave ra, e rave ïa ma te ngakau katoa, mei te mea e na te Atu, eiaa e na te tangata.” (Kolo. 3:22, 23) E tika e meitaki te angaanga pakari, e apinga ke atu ra tetai e anoanoia ra​—tetai pirianga meitaki ki Tei Anga mai ia tatou. (Kohe. 12:13) Me pou te maroiroi o tetai Kerititiano i te angaanga moni, ka riro mai te au angaanga a te Atua ei tuanga rua i roto i tona oraanga.

Me maata te taime o tetai Kerititiano ki te angaanga moni kare e rauka iaia te akono i tona uaorai turanga pae vaerua e te tauturu i tona pamiri. Kua kite te Ariki ko Solomona e ko te ‘nga rima angaanga pakari e rua’ e kapiti mai ana ‘i te kai anga i te matangi.’ Me pou te taime o tetai Kerititiano i te angaanga moni, ka maata atu tona taitaia. Ka riro taua tangata ra ei tuikaa ki tana angaanga moni e ka roiroi kino tikai aia. Me koia ia, ka ‘rekareka e ka meitaki ainei aia no tana au angaanga pakari’? (Kohe. 3:12, 13; 4:6) Mea puapinga atu, ka maroiroi ainei aia i te pae kopapa e te pae manako i te rave i tana au  apainga no te pamiri e te au angaanga a te Atua?

Maata te taime o Janusz, tei noo ana i te Itinga Europa, i pou ki te angaanga pitiniti tanu tiare. Kua maara iaia e: “Kua reka tikai te au tangata o teianei ao iaku no toku au tu kite karape e te rave meitaki anga i te angaanga. Inara kua kino toku pirianga kia Iehova e kare au e piri akaou ana ki te angaanga orometua. Kare i roa ana kua akamutu au i te aere ki te au uipaanga. No toku tu parau, kare au i akarongo ana ki te akoanga a te aronga pakari e kua akaatea mai mei te putuputuanga.”

Ka Meitaki Tikai Toou Aerenga

Kua akamanako ana tatou e toru ngai te ka aruaru maata atu tetai Kerititiano e ka takino atu i tona pirianga ki te Atua. Te rave ra koe i tetai o teia? Me koia ia, ka tauturu te au  uianga, au irava, e te au pauanga ka aru mai ia koe kia akapapu me te meitaki tikai ra toou aerenga.

Tarekareka muri ake i te apii, e te angaanga reka: Eaa te maata o toou taime e akapou ana ki taua au tarekareka ra? Te akapou ra ainei teia i toou taime tei akapou ana koe ki te au angaanga a te Atua? Te kite ra ainei koe e kare koe e mataora ana i te piri atu ki toou au oa irinaki? Me koia ia, e aru i te Ariki ko Davida tei kimi ia Iehova: “E akakite mai koe kiaku i toku arataa kia aere ra.”​—Sala. 143:8.

Kua tauturu tetai akaaere tutaka ia Wiktor, tei taikuia i mua atu ana. Kua akakite te akaaere kiaia e: “Mataora tikai koe me tuatua i taau tarekareka vori poro.” “Kua poitirere tikai au,” i karanga ai a Wiktor. “Kua kite mai au e te kino atura toku turanga. Kare i roa ana kua akamutu au i te piri atu ki te au oa o teianei ao i te ngai tarekareka, e kua kimi atu i te au oa i roto i te putuputuanga.” Teianei te tavini maroiroi ra a Wiktor ia Iehova i roto i tana putuputuanga. Te akamaroiroi maira aia e: “E ui ki toou au oa, nga metua e te aronga pakari o te putuputuanga me te kite ra ratou i taau au angaanga i te apii e akavaitata ra ia koe kia Iehova, me kare.”

Eaa ka kore ei e akakite ki te aronga pakari o taau putuputuanga e ka inangaro koe i te rave maata atu i te au angaanga a te Atua? Ka rauka ainei ia koe te turuturu i te aronga pakarikari e anoano ra i tetai oa me kore tetai tauturu, na te tauturu anga ia ratou me oko kai me kore te au angaanga i te kainga? Noatu eaa toou mataiti, penei ka rauka ia koe te piri atu ki te angaanga orometua tamou, te akakitekite anga te tumu o toou mataora ki tetai ke.

Apii teitei atu: Kua akamatakite mai a Iesu no tetai ‘e kimi ra i tona uaorai kakā.’ (Ioa. 7:18) Noatu eaa taau ka iki no runga i te maata o taau apii ka rave, kua akapapu ainei koe “i te au mea e maata ua atu te meitaki”?​—Phili. 1:9, 10.

Kua rave a Grzegorz, te tangata tata porokaramu komupiuta, i tetai au taui anga i roto i tona oraanga. Kua karanga aia e: “Te akarongo meitaki anga ki te tauturu a te aronga pakari, kua akamama mai au i toku oraanga. Kua kite mai au e kare au e anoano i te rave maata atu i taku apii o teianei ao. Ka akapou te reira i toku taime e te maroiroi.” Kua piri maroiroi atu a Grzegorz ki roto i te au angaanga a te putuputuanga. Kare i roa ana, kua oti meitaki tana apii tei kapikiia i teianei e ko te Apii Pipiria no te Au Taeake Kare i Akaipoipo. Ae, kua ‘taporoporo marie aia i te tuatau’ kia akamaata atu i tana apii na te Atua.​—Ephe. 5:16.

Angaanga moni: Kua pou ainei toou taime ki taau angaanga e kare e taime no te au mea pae vaerua? Te tuku ra ainei koe tetai taime i te komunikeiti ki toou pamiri? Te akameitaki maira ainei koe i te tu o taau akoanga i roto i te putuputuanga? Akapeea ra te pukapuka anga akamaroiroi ki tetai ke? ‘Kia mataku atu i te Atua, e akono oki i tana au akauenga,’ e ka rauka ia koe te au akameitaki anga maata a Iehova e ‘ka kite i te meitaki i taau angaanga pakari.’​—Kohe. 2:24; 12:13.

Kare te pitiniti tanu tiare a Janusz, tei taikuia i mua atu ana, i meitaki maata ana; kua puapinga kore te reira. No te kare e moni e rauka mai ana e te maata o te kaiou, kua akamanako aia ia Iehova. Kua akatanotano a Janusz i tana au angaanga e te tavini nei aia i teianei ei painia tamou e ei tangata pakari no te putuputuanga. Kua tuatua aia e: “Me mareka au i te au mea puapinga o te oraanga, e te oronga maroiroi i toku taime no te Atua, kua rauka iaku te manako au e te ngakau maru.”​—Phili. 4:6, 7.

Tuku i tetai taime i te akara meitaki i toou au akakoroanga e te au mea maata kia koe. Te mataara no te oraanga meitaki roa atu, ko te tavini anga ia Iehova. Kia riro te reira ei mea maata i roto i toou oraanga.

Penei ka rave koe i tetai au akatanotano anga, e te kopae anga i tetai au mea puapinga kore kia taka tikai ia koe “to te Atua ra anoano, tei meitaki, e te tau, e te apa kore oki.” (Roma 12:2) ‘Ka meitaki toou aerenga’ na te tavini ngakau katoa anga i te Atua.

[Tataanga Rikiriki i Raro]

[Pia/​Tutu i te kapi 31]

Akapeea e Meitaki ei Toou Aerenga?

Maata te au mea e tamanamanata ra i toou taime, akapeea koe me kopae i te akangaropoina anga i te mea puapinga tikai? Akara meitaki i tetai taime i toou au akakoroanga e te au mea puapinga na te akamanako anga i te au uianga e aru mai nei:

TAREKAREKA MURI AKE I TE APII, E TE ANGAANGA REKA

▪ Eaa te au tu taau ka kite me piri koe ki taua au tarekareka?

▪ Eaa te maata o te taime ta teia ka umuumu mai?

▪ Ka riro ainei teia au mea ei mea maata i roto i toou oraanga?

▪ Ka akapou ainei teia au mea i toou taime tei orongaia ana ki te au mea pae vaerua?

▪ Eaa te tu tangata taau ka kapiti atu?

▪ Reka atu ainei koe i teia au oa, i toou au taeake irinaki?

APII TEITEI ATU

▪ Me ka rauka ia koe te akono ia koe uaorai, ka anoano ainei koe i te akapou i toou taime, moni, e te maroiroi kia akamaata atu i te apii?

▪ Ei akono ia koe, ka anoanoia ainei tetai pepa apii tua rua me kore pepa apii univetiti?

▪ Eaa te ka tupu ki taau aere anga ki te uipaanga?

▪ Kua akapapu ainei koe “i te au mea e maata ua atu te meitaki”?

▪ Ka anoano ainei koe i te akaketaketa i toou irinaki e ka akono mai a Iehova ia koe?

ANGAANGA MONI

▪ Te akatika ra ainei taau ikianga ia koe ‘kia rekareka i te meitaki o taau au angaanga pakari’?

▪ Maroiroi ainei koe i te pae kopapa e te pae manako i te rave i taau au apainga no te pamiri e te au angaanga a te Atua?

▪ Te tuku ra ainei koe tetai taime i te komunikeiti ki toou pamiri?

▪ Kua pou ainei toou taime ki taau angaanga e kare e taime no te au mea pae vaerua?

▪ Kua takino ainei te reira i te tu o taau au akoanga?

[Tutu i te kapi 30]

Akamatakite a Iehova ia Baruka no te inangaro maata kia puapingaia