Ka Aru Ainei Koe i ta Iehova Arataki Anga Aroa?
Ka Aru Ainei Koe i ta Iehova Arataki Anga Aroa?
“Te rikarika nei ra au i te au arataa pikikaa ravarai.”—SALA. 119:128.
1, 2. (a) Te kimi anga i te aratakianga kia taeria te ngai e akakoro ra tatou, eaa te akamatakiteanga ta tatou ka ariki, e no teaa ra? (e) Eaa te au tu akamatakiteanga ta Iehova e oronga maira ki te aronga e tavini ra iaia, e no teaa ra?
AKAMANAKO i teia: Ka inangaro koe i te aere ki tetai ngai. Ei arataki ia koe, kua pati koe ki toou oa tei kite i te mataara. Iaia e akakite meitaki maira i te ngai ka aere koe, penei ka karanga mai aia e: “Matakite i te ngai ka tapae i mua ua atu. Kua tarevake te akairo. Maata te tangata e ngaro ana me aru i te reira.” Ka ariki ainei koe i tona manako e tana akamatakiteanga? Mei taua oa rai a Iehova i tetai tua. Ka oronga mai aia i te au aratakianga meitaki e tae ei tatou ki te ora mutu kore, inara ka akamatakite katoa mai aia ia tatou i te au akakeuanga kino ka taki atu ia tatou ki te arataa tarevake.—Deu. 5:32; Isa. 30:21.
2 I roto i teia atikara e te ka aru mai, ka uriuri tatou i tetai au akakeuanga ta te Atua ko Iehova, to tatou Oa, e akamatakite maira ia tatou. Kia akamaara tatou e te oronga maira a Iehova i taua au akamatakiteanga no tona inangaro ia tatou. Te inangaro ra aia kia taeria e tatou te ngai e akakoro ra tatou. E mamae ana aia i te kite i te tangata e o atura ki te au akakeuanga kino e te ngaro anga. (Eze. 33:11) I roto i teia atikara, ka uriuri tatou e toru akakeuanga kino. Te mea mua, e akakeuanga no vao mai, te rua no roto mai. Te toru kare i te mea tika tikai; noatu ra, e kino tikai te reira. Ka anoanoia tatou kia kite eaa teia au akakeuanga e akapeea to tatou Metua i te rangi te apii mai anga ia tatou kia kopae i te reira. Kua akakite tetai tata taramo kia Iehova e: “Te rikarika nei ra au i te au arataa pikikaa ravarai.” (Sala. 119:128) Mei te reira ainei toou manako? Ka akara tatou akapeea me akaketaketa i taua au manako e te rave anga i te reira.
Auraka e Aru i te “Urupu Tangata”
3. (a) Eaa ra i kino ei i te aru i te aronga teretere me kare i papu ia tatou te mataara ka aere? (e) Eaa te kaveinga puapinga ta tatou ka kite mai i roto ia Exodo 23:2?
3 Me aere koe ki tetai tere mamao, eaa taau ka rave me kare i papu ia koe te mataara ka aere koe? Penei ka timataia koe kia aru i te aronga teretere—me kite tikai koe i te maataanga e aere ra i taua mataara ra. E kino te reira aerenga manako. No te mea, kare taua aronga ra e aere ra i te ngai taau e akakoro ra, me kore kua ngaro ratou. No runga i teia, akamanako ana i tetai kaveinga te akaari maira i tetai ture tei orongaia ki to Iseraela i taito. Kua akamatakiteia te au akava me kore te au kite i roto i te au akavaanga, i te kino i te ‘aru anga i te urupu tangata.’ (E tatau ia Exodo 23:2.) Kare ekoko, mama ua i te au tangata apa i te aru i te taomianga a to ratou au oa, kare e aru ana i te ture. Inara, te kotingaia ra ainei te kaveinga no te aru anga i te urupu tangata ki te au akava e te au kite no te akavaanga? Kare.
4, 5. Akapeea a Iosua raua ko Kaleba te maroia anga kia aru i te urupu tangata, eaa ra tei tauturu ia raua kia kore e aru ia ratou?
4 E tika, ka akakeuia tatou e te taomianga kia “aru i te urupu tangata” i tetai ua atu taime. Penei ka tupu poitirere mai te reira, e ka ngata i te kopae. Ei akaraanga, akamanako ana i te taomianga ta Iosua raua Kaleba i na roto. Ko raua tetai i roto i te 12 tangata tei aere ki te Enua Taputouia i te tutaka. To ratou oki mai anga, kua oronga mai te tai ngauru i te ripoti tau kore e te akamaroiroi kore. Kua karanga ratou e e au tuputupua tetai e noo ra i taua enua ra, e uanga na te au toa uritumu, te uanga a te au angera e te au vaine meameaau. (Gene. 6:4) Kare te reira tuatua e tika ana. Kua takoreia taua au toa uritumu kino i roto i te Tiruvi i tetai au anere mataiti i topa, e kare to ratou uanga i toe mai ana. Inara, ka rauka i te au manako tarevake i te akakeu pakari i te aronga paruparu te akarongo. No te au ripoti tau kore a taua aronga tutaka e tai ngauru, kua tupu viviki te mataku i rotopu i te tangata. Muri mai, kua papu i te maataanga e e tarevake ta Iehova i akakite mai kia tomo ratou ki roto i te Enua Taputouia. I roto i taua turanga ngata tikai, eaa ta Iosua raua ko Kaleba i rave?—Nume. 13:25-33.
5 Kare raua i aru ana i te urupu tangata. Noatu kua riri te urupu tangata te akarongo anga kia raua, kua akakite rai raua i te tika e kua tamou ki te reira—noatu kua tamatakuia e ka tamateia raua! Noea mai to raua tu mataku kore? Kare ekoko, no to raua akarongo. Ka kite te aronga akarongo i te tuke i te au tuatua puapinga kore a te au tangata e te au taputou tapu a te Atua ko Iehova. Muri mai kua akakite raua i to raua manako e e akatupu ua ana a Iehova i tana au taputou. (E tatau ia Iosua 14:6, 8; 23:2, 14.) E akarongo mou tikai to Iosua raua ko Kaleba i te Atua, e kare rava raua e inangaro ana i te tamamae iaia na te aru anga i te urupu tangata akarongo kore. No reira kua vai ngaueue kore raua, te akanoo anga i te akaraanga meitaki tikai no tatou i teia tuatau.—Nume. 14:1-10.
6. Na teea au mataara e maroia ra tatou kia aru i te urupu tangata?
6 Kua na roto ana ainei koe i te taomianga kia aru i te urupu tangata? E urupu maata tikai te au tangata tei akatakake mai mei ia Iehova, e te aviri ra i tona au turanga tau i teia tuatau. I te tuatau tamataora e te tarekareka, e akamaroiroi ana taua urupu tangata ra i te au manako puapinga kore. Penei ka maro mai ratou e kare e kino ana te tu akono tau kore, ta ua, e te purepure e kite uaia ana i runga i te au porokaramu tivi, au teata, e te au vitio kangakanga. (2 Timo. 3:1-5) Me iki koe i te tamataora e te tarekareka naau uaorai e toou pamiri, e akatika ana ainei koe i te akava ngakau paruparu o tetai ke kia akakeu i taau au iki anga e kia taui i toou akava ngakau? Kare ainei te reira e te aru ra i te urupu tangata?
7, 8. (a) Akapeea to tatou “kite ngakau” te tereniia anga, e eaa ra taua terenianga i puapinga atu ei i to te aru anga i tetai au ture pakari? (e) Eaa ra i pumaana ei kia koe te akaraanga o te manganui o te au mapu Kerititiano?
7 Kua oronga mai a Iehova i tetai apinga aroa akaperepere—to tatou “kite ngakau,” ei tauturu ia tatou kia rave i te au ikianga. Inara, kia tereniia teia au kite ngakau na te ‘taangaanga anga’ i te reira. (Ebe. 5:14) Kare e rauka ia tatou i te tereni i to tatou kite ngakau me rave tatou i ta tetai ke e rave ra me kore me inangaro tatou i tetai ke kia akakite mai i ta tatou ka rave. No reira, kare a Iehova i oronga mai i tetai au papaanga teata, au puka e te au ngai i runga i te Initaneti kia kopae tona iti tangata. No te mea te taui viviki nei teianei ao, ka anoanoia tetai au papaanga ou i te au taime ravarai. (1 Kori. 7:31) Tei kino atu, kare e rauka ia tatou kia akamanako meitaki na roto i te pure i te au kaveinga Pipiria e te rave i te au iki anga tei akatumuia ki runga i taua au kaveinga ra.—Ephe. 5:10.
8 Tetai taime kare tetai ke e reka mai ana i ta tatou au ikianga tei akatumuia ki runga i te Pipiria. E aro atu ana te au mapu Kerititiano i te au taomianga pakari i te apii kia rave i ta te katoatoa e rave ra. (1 Pete. 4:4) No reira, e manea tikai me kite atu i te au mapu e te au Kerititiano pakarikari e aru ra i te akarongo o Iosua e Kaleba, kia kore e aru i te urupu tangata.
Auraka e Aru i ‘to Kotou Ngakau e to Kotou Mata’
9. (a) Me aere ki tetai tere, eaa ra ka kino ei i te aru i to tatou uaorai inangaro? (e) Eaa ra i puapinga ai ki te iti tangata o te Atua i taito, te ture i roto ia Numero 15:37-39?
9 Te rua o te akakeuanga kino ta tatou ka uriuri, ko te akakeu anga no roto mai. Ka akatutu tatou i te reira na teia mataara: Me te aere ra koe ki tetai ngai, ka titiri ainei koe i taau mapu e ka aru i toou uaorai manako—te aru anga i te au mataara manea taau e kite ra? Taka ua ra e me aru koe i taua manako ra, kare koe e tae ki te ngai taau e akakoro ra. No reira, akamanako ana i tetai ture a Iehova ki to Iseraela i taito. Maata i teia tuatau kare e marama ana i te tumu o te ture kia tamou i te veruveru e te taura auika ki runga i to ratou tapa kakau. (E tatau ia Numero 15:37-39.) Te kite ra ainei koe eaa i puapinga ai teia ture? Te akarongo anga ki taua ture ra, kua tauturu i te iti tangata o te Atua kia akatakake mai mei te iti tangata peikani. E mea puapinga tikai te reira kia mareka mai a Iehova ia ratou. (Levi. 18:24, 25) Inara, te akaari katoa maira taua ture i tetai akakeuanga kino no roto mai, te ka taki ke ia tatou mei to tatou akakoroanga no te oraanga mutu kore. Akapeea ra?
10. Akapeea a Iehova te kite meitaki anga i te au tu o te tangata?
10 Akara ana i ta Iehova i oronga ki tona iti tangata ei tumu no teia ture: “Auraka e aru aere i to kotou uaorai ngakau e to kotou uaorai mata, i mātau ei kotou i te aru akaturi aere.” Kua kite meitaki a Iehova i te au tu o te tangata. Kua kite meitaki aia e ka mama ua i te akavare i to tatou ngakau i ta tatou e akara ra. No reira i akamatakite mai ei te Pipiria ia tatou e: “E pikikaa maata to te ngakau i te au mea katoa nei, e kua kino takiri: koai te kite?” (Iere. 17:9) Te kite ra ainei koe i te tu tau o ta Iehova akamatakite anga i te ngati Iseraela? Kua kite aia e ka akakeuia ratou kia akara i te iti tangata peikani e kia akavareia e ta ratou e kite ra. Penei ka timataia ratou kia akamanea, kia manako e kia aru i to ratou au tu.—Mase. 13:20
11. Na teea mataara e akavareia ana tatou i ta tatou e kite ra?
11 To tatou tuatau, mama ua i to tatou ngakau pikikaa kia inangaro i ta tatou e kite ra. Te noo nei tatou i roto i te ao ka mama ua i te aru i te au anoano tarevake. Akapeea ra tatou me akono i te kaveinga i roto ia Numero 15:39? Akamanako ana: Me te aao ra te au tamariki apii, te aronga angaanga, e te aronga o toou oire i te au kakau akaariari kopapa, kare ainei koe e akakeuia? Ka timataia ainei koe i te ‘aru i toou uaorai ngakau e toou mata’ e kia akavareia i taau i kite? Ka timataia ainei koe kia akamanea mei ia ratou rai?—Roma 12:1, 2
12, 13. (a) Eaa ta tatou ka rave me akara to tatou mata i te mea kino? (e) Eaa te ka akakeu ia tatou kia kore e akavare i tetai ke?
12 E mea puapinga tikai i te akatere meitaki i to tatou inangaro. Me akara ke to tatou mata, e akamaara tatou i te iki anga ngaueue kore a Iobu akarongo mou, tei papau i te koreromutu ki tona uaorai mata—te akapapu anga kia kore e akara akainangaro atu i tetai vaine kare i te vaine nana. (Iobu 31:1) Pera katoa kua akakoro te Ariki ko Davida e: “Kare au e tuku i tetai mea kino ki mua i toku mata.” (Sala. 101:3) Tetai ua atu mea ka takino i to tatou akava ngakau ma, e to tatou pirianga kia Iehova e “mea kino” te reira no tatou. Ka kapiti mai tetai au timataanga te ka akavare i to tatou mata e te ngakau kia rave i te tarevake.
13 Tetai katoa, kare rava tatou e inangaro kia riro mai ei “mea kino” ki tetai ke na te timata anga ia ratou kia rave i te tarevake. Ka aru pakari tatou i te akoanga akauruia e te Pipiria kia aao i te kakau manea e te tau. (1 Timo. 2:9) Kare i te mea meitaki kia rave tatou i tei tau ki to tatou uaorai inangaro. Ka akamanako tatou i te au akava ngakau e te au manako o tetai ke, kia akamareka atu i tetai ke kare ia tatou uaorai. (Roma 15:1, 2) E tauatini ua atu au mapu i roto i te putuputuanga Kerititiano tei akanoo i te akaraanga meitaki tikai no runga i teia. Ngakau parau tikai tatou ia ratou e kopae ra i te ‘aru i to ratou ngakau e to ratou mata,’ te akamareka anga ia Iehova i te au mea ta ratou e rave ra—e te tu e akamanea ra ratou!
Auraka e Aru i te “Au Mea Puapinga Kore”
14. Eaa te akamatakite anga no te aruaru anga i te “au mea puapinga kore” ta Samuela i akakite?
14 Akamanako e te aere ra koe na roto i tetai metepara mamaata tikai. Eaa te ka tupu me akaruke koe i te mataara i te aru i taau e manako ra e e vai? Ka ngaro koe e ka mate! Kua kite meitaki a Iehova i taua tu kino ra. Akamanako ana i tetai akaraanga. Kua inangaro te ngati Iseraela kia aite mei te au iti tangata e akatereia ra e tetai au ariki. Kua riro taua inangaro ei ara kino no te mea kua kopae ratou ia Iehova ei Ariki no ratou. Noatu e kua akatika a Iehova i tetai ariki no ratou, kua tono aia i tana peroveta ko Samuela kia akamatakite ia ratou no te aruaru anga i te “au mea puapinga kore.”—E tatau ia 1 Samuela 12:21.
15. Eaa te au mataara e aruaru ra te ngati Iseraela i te au mea puapinga kore?
15 Kua manako ainei taua aronga ra e e meitaki atu i te irinaki i tetai ariki i te irinaki ia Iehova? Me koia ia, te aruaru ra ratou i te au mea puapinga kore! E ka rokoia ratou i te kino me aruaru atu i tetai atu au mea puapinga kore a Satani. Ka arataki te au ariki ia ratou ki te akamori itoro. E manako tarevake ana te aronga akamori itoro i te au apinga noa ua nei—au atua rakau me kore toka—ei mea tika tikai, e kia irinaki maataia atu i to te irinaki anga ia Iehova, te Atua akara koreia, tei anga i te au mea pouroa. Inara, mei ta te apotetoro ko Paulo i kite, “e mea puapinga kore” te au itoro. (1 Kori. 8:4) Kare ratou e kite ana, e akarongo ana, e tuatua ana e kare e angaanga ana. Ka kite koe ia ratou e ka rauka i te amiri atu, inara me akamori koe i tetai, te aruaru ra koe i te mea puapinga kore—tetai mea kare e tika tikai ana te ka akatupu i te kino.—Sala. 115:4-8.
16. (a) Akapeea a Satani te akavare anga i te tangata o teia tuatau kia aruaru i te au mea puapinga kore? (e) Eaa ra tatou i karanga ai e e au mea puapinga kore te au apinga materia me akaaiteia atu ki te Atua ko Iehova?
16 E kikite tikai a Satani te maro anga i te tangata kia aruaru i te au mea puapinga kore. Ei akatauanga, maata tana tangata i akavare kia irinaki i te au apinga materia kia rauka te oraanga tinamou. Penei ka tauturu te moni, au apinga, e te au angaanga tutaki maata, i te akatikatika i te au manamanata. Eaa ta te au apinga materia ka rauka i te rave me kino te oraanga kopapa, te turanga pae moni e me tupu tetai tumatetenga natura? Eaa ta te reira ka rave me manako te tangata e kare o ratou akakoroanga, arataki anga e te au pauanga ki te au uianga no te oraanga? Eaa te tauturu ka rauka mai me mate tetai tangata? Me akara tatou ki te au apinga materia ei akatupu i te au anoano pae vaerua, kare tatou e mataora. Kare te au apinga materia e akaora mai ia tatou; e au mea puapinga kore te reira. Kare katoa te reira e oronga mai i te turanga tinamou, e kare e rauka i te reira i te akaora mai ia tatou mei te maki e te mate. (Mase. 23:4, 5) E tika tikai to tatou Atua ko Iehova! Me e pirianga ketaketa to tatou kiaia ka kite tatou i te tu tinamou tika tikai. E akameitaki anga akaperepere tikai te reira! Auraka rava tatou e akaruke iaia kia aruaru atu i te au mea puapinga kore.
17. Eaa toou akakoroanga no te au akakeuanga kino ta tatou i uriuri mai ana?
17 Kare ainei i te akameitaki anga e ko Iehova to tatou Oa e te Arataki ra ia tatou ki te ora mutu kore? Me aru ua tatou i tana au akamatakite anga aroa mei te au akakeuanga kino e toru—te urupu tangata, to tatou ngakau, e te au mea puapinga kore—papu e ka tae tatou ki te ngai e akakoro ra tatou, te oraanga mutu kore. I roto i te atikara e aru maira, ka akamanako tatou e toru au akamatakite anga ta Iehova e oronga maira ei tauturu ia tatou kia rikarika i te au arataa pikikaa te arataki ke ra i te manganui.—Sala. 119:128.
Eaa Toou Manako?
Akapeea koe me taangaanga i te au kaveinga i roto i te au tuatua tapu e aru maira?
[Au Uianga Apii]
[Tutu i te kapi 11]
Timataia ana ainei koe kia aru i te urupu tangata?
[Tutu i te kapi 13]
Eaa ra i kino ei kia aru i toou uaorai manako?
[Tutu i te kapi 14]
Te aruaru ra ainei koe i te au mea puapinga kore?
