Au Uianga a te Aronga Tatau

Akapeea tatou e marama ai te tareanga i roto i te ripoti no te mataiti tavini anga?

I te au mataiti ravarai, e tapapa ana tatou i te ripoti tavini anga tei neneiia i roto i te Yearbook. Mataora tikai tatou i te kite i ta te iti tangata o Iehova e rave ra ei pupu, no te tutuanga e te apiianga no runga i te Patireia i te ao katoa. E puapingaia ai mei te ripoti, ka anoanoia tatou kia marama meitaki no runga i te au numero. Teia tetai au akaraanga.

Mataiti tavini anga. Akamata teia mei ia Tepetema mai kia Aukute. Tei roto i te Yearbook te ripoti no te mataiti tavini anga i topa. No reira, tei roto i te 2011 Yearbook te ripoti no te mataiti tavini anga 2010, tei akamata mai mei ia Tepetema 1, 2009, kia Aukute 31, 2010.

Take e te avereti o te au papuritia. Te “au papuritia,” ko te Au Kite papetitoia o Iehova e te aronga tei akatikaia kia tutu aere i te tuatua meitaki o te Patireia. Ko te “take o te au papuritia” ko te numero maata tei ripoti mai i te marama okotai o te mataiti tavini anga kapiti mai te au ripoti tei tae reiti mai kare i kapitiia atu ki te ripoti o te marama i mua atu. No teia tu penei kua tareia tetai au papuritia e rua taime. Inara, kare teia numero maata i kapiti mai i te au papuritia tei piri tikai ana ki roto i te angaanga orometua, tei ngaropoina i te ripoti vave mai. Te akaari meitaki maira teia e e puapinga tikai kia ripoti viviki mai te au papuritia i te au marama ravarai. Te “au avereti papuritia” ko te aronga tei ripoti putuputu mai i to ratou ora i roto i te angaanga orometua i te au marama ravarai.

Ora katoa. Tei tau ki te 2011 Yearbook, tere atu e 1.6 pirioni ora ta te Au Kite o Iehova i akapou i roto i te angaanga orometua. Inara, kare teia ora katoa e kapiti maira i te ora katoatoa ta tatou i akapou i roto i te akamorianga, e kare te reira e kapiti mai ana i te taime e akapouia ana ki roto i te angaanga atoro anga, aere anga ki te au uipaanga, e te rave anga i ta tatou uaorai apii Pipiria e te akamanako oonu anga i ta tatou i apii ana.

Moni i pou. I te mataiti tavini anga 2010, kua tere atu i te $155 mirioni ta te Au Kite o Iehova i akapou no te akono anga i te au painia takake, te au mitinari, e te au akaaere tutaka i roto i ta ratou angaanga orometua. Kare teia numero i kapiti mai ana i te moni no te nenei anga i te au puka akatumuia ki runga i te Pipiria; kare katoa e kapiti maira i te moni i pou no te akono anga i te au taeake i Betela tere atu i te 20,000 e angaanga ra i ko i te au opati manga i te ao katoa.

Aronga kai i te oroa. Ko te numero teia o te aronga papetitoia i te ao katoa tei kai i te oroa i ko i te Akamaaraanga. Te akaari maira ainei teia numero i te katoaanga o te aronga akatainuia i runga nei i te enua? Kare. Penei no tetai au tumu​—ta ratou i irinaki ana i te tuatau i topa, me kore e manamanata pae manako to ratou—​i manako tarevake ei tetai pae e ko ratou tetai ka aere ki te rangi. No reira kare tatou i kite e eaa tikai te numero o te aronga akatainuia i runga nei i te enua; e kare katoa tatou e anoanoia kia kite. Kare te Pupu Akaaere e akono ana i tetai papaanga ingoa no te aronga katoatoa tei kai i te varaoa e tei inu i te uaina i te tuatau Akamaaraanga. *

Kua kite tatou e ka ora rai tetai tei akatainuia ei au “tavini o to tatou Atua” i te enua nei, me akamata te mate maata. (Apo. 7:1-3) Ia ratou i runga nei i te enua, ka rave maroiroi te aronga akatainuia i te angaanga tutuanga e te apiianga. Te akakite maira te ripoti o te mataiti eaa ta te iti tangata o Iehova takapini i teianei ao e rave ra i roto i teia angaanga puapinga rava atu o te tuatua enua.

[Tataanga Rikiriki i Raro]