Kua Kitea e Ratou te Mesia!

“Kua kitea ia maua te Mesia.”​—IOA. 1:41.

1. Eaa ra a Anederea i tuatua ai i teia akakiteanga: “Kua kitea ia maua te Mesia”?

TE TU ua ra a Ioane Papetito e tetai o tana nga pipi. Ia Iesu e aere maira, kua tuatua a Ioane e: “Ka akara na i te Punua-mamoe a te Atua.” Kua aru viviki atura te nga pipi ko Anederea raua ko Ioane ia Iesu, e kua noo atu ki ko iaia no taua ra katoa ra. Muri mai, kua kimi atu a Anederea i tona tuakana ko Simona Petero, e kua taki atu iaia kia Iesu muri ake i te tuatua anga i teia akakite anga taka meitaki: “Kua kitea ia maua te Mesia.”​—Ioa. 1:35-41.

2. Akapeea tatou e puapingaia ai na te akamanako oonu anga i te au totou o te Mesia?

² Te au tuatau i aereia, ka rauka ia Anederea, Petero e tetai atu i te apii meitaki i te au Tuatua Tapu e te akakite aere e ko Iesu o Nazareta te Mesia tei totouia mai. Ia tatou e akamanako oonu ra i te au totou o te Mesia, ka akaketaketaia to tatou irinaki i te Tuatua a te Atua e tana i Akatainuia.

“I na, te Aere Maira To Ariki”

3. Eaa te au totou tei akatupuia te tomo autu anga a Iesu ki roto ia Ierusalema?

³ Ka tomo autu mai te Mesia ki roto ia Ierusalema. Kua akakite te totou a Zekaria e: “Kia rekareka maata koe, e te tamaine a Ziona e; ka maeva na, e te tamaine a Ierusalema e; i na, te aere maira to ariki kia koe ra; e tuatua-tika tana, e tei iaia te ora; e akaaka tona, e te noo anga ki runga i te asini, e te punua oki, te anaunga a te asini.” (Zeka. 9:9) Kua tata te tata taramo e: “Kia ora aia ko tei aere mai ma te ingoa o Iehova.” (Sala. 118:26) Kare na Iesu i akakeu i te urupu tangata kia rave i te reira. Inara, kua maeva taokotai te urupu tangata ma te rekareka maata ei akatupu i te totou. Ia koe e tatau ra i te au irava, akamanako e tei reira koe e te akarongo ra i te au reo mataora.​—E tatau ia Mataio 21:4-9.

4. Akamarama mai akapeea a Salamo 118:22, 23 te akatupuia anga.

⁴ E akaperepere ana te Atua ia Iesu, noatu kare te maataanga e ariki ana e koia te Mesia. Mei tei totouia, ‘kua akavaavaaia a Iesu, e kare i manako meitakiia ana’ e te aronga kare e irinaki ana i te akapapuanga. (Isa. 53:3; Mare. 9:12) Inara, kua akauruia te tata taramo e te Atua kia tuatua e: “Ko te toka i akarukeia e te aronga patu are ra, ko tei akariroia ei toka tiavā. Ko ta Iehova teia i rave.” (Sala.  118:22, 23) Kua akakite a Iesu i teia au tuatua ki te aronga akonoanga tei patoi iaia, e kua karanga a Petero e kua akatupuia te reira i roto ia Karaiti. (Mare. 12:10, 11; Anga. 4:8-11) Kua riro mai a Iesu ko te “toka tiavā” o te putuputuanga Kerititiano. Kua kopaeia aia e te au tangata irinaki kore i te Atua, inara kua ‘akonoia aia e e meitaki maata ki te Atua.’​—1 Pete. 2:4-6.

Pikikaaia e kua Kopaeia!

5, 6. Eaa tei totouia e tei akatupuia no runga i te pikikaaia anga te Mesia?

⁵ Kua totouia e ka pikikaaia te Mesia e tetai oa pikikaa. Kua totou a Davida e: “E ko toku oa akaperepere nei oki i irinakiia e au ra, tei kai katoa i taku nei kai, ko tei akateitei i tona poo vaevae iaku nei.” (Sala. 41:9) Me kaikai kapiti tetai nga tangata, e manakoia ana e e pirianga vaitata to raua. (Gene. 31:54) No reira e kino tikai te pikikaa anga a Iuda Ikariota ia Iesu. Te tuatua ra a Iesu no runga i te akatupu anga i ta Davida au tuatua totou, te taiku anga Aia no runga i tei pikikaa iaia e kua akakite atu ki tana au apotetoro e: “Kare to kotou katoa taku e tuatua nei: kua kite au i taku i iki: kia tupu ra te tuatua i tataia ra e, Ko tei kai i taku ra kaingakai, kua akateitei aia i tona poo vaevae iaku nei.”​—Ioa. 13:18.

⁶ Ka orongaia e 30 ario ki te tangata ka pikikaa i te Mesia​—te tutaki no tetai tuikaa! Te tuatua anga no runga ia Zekaria 11:12, 13, kua akaari mai a Mataio e kua pikikaaia a Iesu no tetai moni meangiti ua. Eaa ra a Mataio i karanga ai e kua totouia teia na roto ia “Ieremia peroveta ra”? I to Mataio tuatau, kua tukuia te puka a Ieremia i mua ake i te au puka Pipiria tei kapiti mai i te puka a Zekaria. (Akaaite ia Luka 24:44.) Kare rava a Iuda i oko ana i tetai apinga ki tana moni, kua titiri ra aia i te reira ki roto i te iero e kua tamate atu iaia.​—Mata. 26:14-16; 27:3-10.

7. Akapeea a Zekaria 13:7 te akatupuia anga?

⁷ Ka akapueurikiriki keia te au pipi a te Mesia. Kua tata a Zekaria e: “Ka ta i te tiaki, e ka pueurikiriki ke atura ïa te au mamoe.” (Zeka. 13:7) Ia Nisana 14, i te mataiti 33 T.N., kua akakite a Iesu ki tana au pipi e: “Ei teianei po e maitu ei kotou katoa iaku nei: kua oti oki i te tataia, ‘E pāpā au i te tiaki, e ka pueurikiriki ke oki te mamoe.’” Kua tupu tikai te reira, no te mea kua ripoti mai a Mataio e kua “akaruke iora te au pipi ravarai [ia Iesu] i reira ra, oro atura.”​—Mata. 26:31, 56.

Akaapaia e kua Takinokinoia

8. Raro ake i teea au turanga i akatupuia ai a Isaia 53:8?

⁸ Ka akavaia te Mesia e ka akautungaia. (E tatau ia Isaia 53:8.) I te popongi mamaiata ia Nisana 14, kua akaputuputu maira te  Tuneteri katoa, kua tapeka ia Iesu e kua tuku atu iaia ki te Kavana o Roma ko Ponotio Pilato. Kua uiui aia ia Iesu e kua kite mai e kare a Iesu apa. Inara, te akakite anga a Pilato e kia tukuia a Iesu kia aere, kua kapiki mai te urupu tangata e: “E akasatauro atu iaia” e kua kapiki mai e kia tukuia te tangata kino ko Baraba kia aere. Ei akamareka i te urupu tangata, kua tuku atu a Pilato ia Baraba kia aere, e kia papa e kia akatatauroia a Iesu.​—Mare. 15:1-15.

9. Eaa tei tupu i to Iesu tuatau mei tei totouia i roto ia Salamo 35:11?

⁹ Ka tapepe atu te au kite pikikaa i te Mesia. Kua tuatua te tata taramo ko Davida e: “E aronga kite pikikaa tei tu mai ki runga, kua tapepe maira iaku i tei kore i kitea e au ra.” (Sala. 35:11) Tei tika ki te totou, “te kimi ra te kau taunga nunui ra, e te aronga pakari, e te Sunederi katoa, i te kite pikikaa ia Iesu, kia akaapa atu iaia kia mate.” (Mata. 26:59) E tika rai, “e manganui oki tei tuku mai i te tuatua pikikaa iaia ra, kare ra ta ratou tuatua i tika.” (Mare. 14:56) Kare te au enemi o Iesu e inangaro ra i te tamate ia Iesu e manamanata ana e te pikikaa ra te au kite no runga iaia.

10. Akamarama mai akapeea a Isaia 53:7 te akatupuia anga.

¹⁰ Ka muteki ua te Mesia i mua i tona aronga akaapa. Kua totou a Isaia e: “Kua takinga-kinoia oki aia, e kua tinai-mateia aia, kare ra tona vaa i ki atu: i aratakiia aia mei te punua mamoe ki te tainga, e mei te mamoe e muteki ki mua i te aroaro o tei pakoti i tona uru ra, kare katoa oki tona vaa i tuatua mai.” (Isa. 53:7) Ia Iesu e ‘tapepeia ra e te kau taunga nunui, e te aronga pakari, kare aia i tuatua atu ana.’ Kua ui atu a Pilato e: “Kare koe i akarongo i te au mea e manganui ta ratou i tapepe mai ia koe nei?” Noatu rai, kare a Iesu “i ki atu i taua tuatua ra; va ua atura te tutara.” (Mata. 27:12-14) Kare rava a Iesu i riri atu ana i te aronga i tapepe mai iaia.​—Roma 12:17-21; 1 Pete. 2:23.

11. Akapeea a Isaia 50:6 e Mika 5:1 te akatupuia anga?

¹¹ Kua totou a Isaia e ka takinokinoia te Mesia. Kua tata te peroveta ko Isaia e: “Kua tuku ua atu au i taku tua ki te aronga i pāpā mai, e oku paparinga ki te aronga i utiuti i te kumikumi: kare au i uuna ke atu i toku mata i te akavaavaa, e i te tutua uavare.” (Isa. 50:6) Kua totou a Mika e: “Kua taia e ratou te paparinga o te akava ra o Iseraela ki te rakau.” (Mika 5:1) Te akapapu anga e kua akatupuia teia au totou, kua akakite te tangata tata Evangeria ko Mareko e: “Kua tutua atura etai pae i te uavare ki rungao [ia Iesu], e i akapuroku maira etai i tona mata, moto atura, na ko atura, Ka akakite mai ana i tei moto ia koe na: papaki atura oki te au tavini iaia i to ratou kapu-rima.” Kua akakite a Mareko e na te au vaeau e “pāpā i tona mimiti i te kakao, kua tutua atura i te uavare ki rungao iaia, tuturi atura ki muao iaia [ma te aviri], akamori atura” iaia. (Mare. 14:65; 15:19) Kare rava a Iesu i rave ana i tetai mea kia takinokinoia mai aia.

Tiratiratu e Mate ua Atu

12. Akapeea a Salamo 22:16 e Isaia 53:12 te akatupuia anga no runga ia Iesu?

¹² Kua totouia e ka akatatauroia te Mesia. Kua tuatua te tata taramo ko Davida e: “Kua takako roaia e te uipa anga tangata kino ra: kua puta oku puke rima e oku puke vaevae ia ratou.” (Sala. 22:16) Te ripoti anga i tetai tupuanga kite meitakiia e te aronga tatau Pipiria, kua akakite te tangata tata Evangeria ko Mareko e: “I te toru o te ora ra [mei te ora iva i te popongi] i akasatauro ei ratou iaia.” (Mare. 15:25) Kua totou katoaia e ka kapitiia te Mesia ki te aronga rave ara. Kua tata a Isaia e: “Kua riringi aia i tona vaerua e tae ra atura ki te mate: e kua kapiti katoaia aia e te aronga rave ara ra.” (Isa. 53:12) No reira, “e toko rua puke tangata keia tei akasatauro katoaia [e Iesu], tei te rima katau tetai, tei te rima kaui tetai.”​—Mata. 27:38.

13. Akapeea a Salamo 22:7, 8 te akatupuia anga no runga ia Iesu?

 ¹³ Kua totou a Davida e ka akakinoia te Mesia. (E tatau ia Salamo 22:7, 8.) Iaia e mamae ra i runga i te tatauro, kua akakinoia a Iesu mei ta Mataio i ripoti mai e: “Te aronga i aere na reirao, kua akakino maira, ma te takirikiri i to ratou mimiti, Na ko maira, Ko tei vavaʼi i te nao e, e kua po toru anake kua akatu akaou, ka akaora ia koe uaorai: ko te Tamaiti a te Atua koe na, ka eke mai koe ki raro nei i tenana satauro.” Kua aviri katoa te kau taunga nunui, te au tata tuatua, e te aronga pakari iaia, te na ko anga e: “Kua akaora aia i etai ke ra; kare ra e tika kia akaora iaia uaorai. Ko te Ariki aia no Iseraela, ka eke mai aia i teianei mei runga i te satauro, e na matou e akarongo atu iaia. I irinaki ana aia i te Atua; e te kite maira te Atua iaia, e akaora aia iaia i teianei: nana uaorai oki i karanga e, E Tamaiti au na te Atua.” (Mata. 27:39-43) Inara, kua akakoromaki a Iesu i teia au mea ma te tu akangateitei. E akaraanga meitaki tikai teia no tatou!

14, 15. Akakite mai akapeea te au totou taka meitaki te akatupuia anga no runga i te kakau o te Mesia e te orongaia anga te vineka kiaia.

¹⁴ Kua tua kereroia te kakau o te Mesia. Kua tata te tata taramo e: “Te tua nei ratou i toku au kakau no ratou, e te akatopa kelero nei i toku pereue.” (Sala. 22:18) Kua tupu tikai te reira, te ‘akasatauroia anga a Iesu e te au vaeau o Roma e kua tua kelero iora ratou i tona kakau.’​—Mata. 27:35; e tatau ia Ioane 19:23, 24

¹⁵ Ka orongaia te vineka e te au ki te Mesia. Kua tuatua te tata taramo e: “Kua apai mai ratou i te apinga kava ei kai naku; e i toku kaki vai anga ra, kua apai mai i te vinega e inu.” (Sala. 69:21) E kua akakite mai a Mataio e: “Kua apai atura ratou [kia Iesu] i te wina i irokia ki te au ra e inu; e kia timata ra aia, kare akera i inu.” Muri mai, ‘kua oro atura tetai, rave atura i te rimu, akaki atura ki te vinega, topiri iora ki tetai kakao, apai atura kia inu aia.’​—Mata. 27:34, 48

16. Akamarama mai e akapeea te au tuatua totou o Salamo 22:1 te akatupuia anga.

¹⁶ Akaraanga e kua akaruke te Atua i te Mesia. (E tatau ia Salamo 22:1.) Kia tau ki te totou, “e tae akera ki te ora iva ra [mei te ora toru i te aiai], kua kapiki aturā Iesu ma te reo maata, na ko atura, ‘Eloi, Eloi, lama sabatani?’ tera oki te akatau anga, ‘E taku Atua, e taku Atua, eaa koe i akaruke mai ei iaku?’” (Mare. 15:34) Kare to Iesu akarongo no tona  Metua i te rangi i ngaro ana. Kua tuku atu te Atua ia Iesu ki tona au enemi na te apai ke anga i Tana paruru anga kia timata pu tikaiia te tu tiratiratu o Karaiti. Na te kapiki maata anga kua akatupu a Iesu ia Salamo 22:1.

17. Akapeea a Zekaria 12:10 e Salamo 34:20 te akatupuia anga?

¹⁷ Ka koia te Mesia, e kare rava tona au ivi e aatiia. ‘Ka akara te au tangata o Ierusalema ki tei koia e ratou.’ (Zeka. 12:10) E kua akakite mai a Salamo 34:20 e: “[Na te Atua] e tiaki i tona ra au ivi katoa, kare rava tetai e aatiia.” Te akapapu anga i teia au manako, kua tata te apotetoro ko Ioane e: “Ko atura tetai vaeau i tona [to Iesu] kaokao i te korare, taʼe ua maira te toto e te vai. Kua kite tikai te mata o te tangata [ko Ioane], e tuatua i teianei au tuatua e tuatua-mou oki tana i tuatua ra . . . I tupu ei oki teianei au peu, kia tika te tuatua i tataia ra e, ‘Auraka roa tetai ivi ona kia aatiia.’ E te na ko maira oki tetai manga tuatua i tataia ra e, ‘E akara ratou i ta ratou i ko ra.’”​—Ioa. 19:33-37.

18. Akapeea a Iesu te tanu kapitiia anga ma te aronga apinga nui?

¹⁸ Ka tanu kapitiia te Mesia ma te aronga apinga nui. (E tatau ia Isaia 53:5, 8, 9.) I te aiai ia Nisana 14, kua pati atu ‘tetai tangata apinga no Arimatea, ko Iosepha te ingoa’ i te kopapa o Iesu kia Pilato, e kua akatikaia mai tana patianga. Kua akakite katoa mai a Mataio e: “Kua rave aturā Iosepha i te kopapa, opa iora i te kakau orongā manea ra, Kua tuku atura ki roto i tona uaorai tanumanga ou, i paoia e ia i roto i te mato; uri atura i tetai toka maata ki te ngutupa o taua tanumanga ra, aere atura.”​—Mata. 27:57-60.

Akapaapaa Anga i te Ariki Mesia!

19. Akapeea te au tuatua totou a Salamo 16:10 te akatupuia anga?

¹⁹ Ka akatuakaouia mai te Mesia. Kua tata a Davida e: “Kare oki koe [e Iehova] e vaoo i toku vaerua i ade.” (Sala. 16:10) Akamanako ana, te poitirere o te au vaine tei aere ki te ngai tanumanga tei reira te kopapa o Iesu. Kua aravei ratou i tetai angera tei akakite mai kia ratou e: “Auraka e ngarangara; te kimi nei kotou ia Iesu i Nazareta, ko tei akasatauroia ra: kua tu akenei aia ki runga; kare aia i ko nei: ka akara i te ngai ta ratou i vaio iaia.” (Mare. 16:6) Kua akakite te apotetoro ko Petero ki te urupu tangata i Ierusalema i te ra Penetekote i te mataiti 33 T.N., e: “[Kua] kite takere ana [a Davida] i te reira, i tuatuaʼi i te tuakaouanga o te Mesia, kare tona vaerua e vaooia i ade, e kare tona kopapa i tuku uaia kia kite i te pe.” (Anga. 2:29-31) Kare te Atua i akatika ana i te kopapa o tana Tamaiti akaperepere kia pe. Kua akatu temeio ra aia ia Iesu ki te oraanga vaerua!​—1 Pete. 3:18.

20. Eaa tei totouia no runga i te tutaraanga a te Mesia?

²⁰ Mei tei totouia, kua akakite mai te Atua e e Tamaiti a Iesu nana. (E tatau ia Salamo 2:7; Mataio 3:17.) Pera katoa, kua akapaapaa te urupu tangata ia Iesu e tona Patireia e aere maira, e te akakitekite mataora ra tatou no runga iaia e tona Patireia. (Mare. 11:7-10) Kare e roa atu ka takore a Karaiti i tona au enemi, iaia e ‘akaoro ra ei akatupu i te tuatua-mou, te maru, e te tuatua-tika.’ (Sala. 2:8, 9; 45:1-6) Ka apai mai tana tutaraanga i te au e te oraanga puapinga ki te enua katoa. (Sala. 72:1, 3, 12, 16; Isa. 9:5, 6) E tikaanga ngateitei to tatou i te akakitekite i teia au tuatua mou ei Au Kite no Iehova, no te mea te tutara ra tana Tamaiti akaperepere i te rangi ei Ariki Mesia!

Akapeea Koe me Pau?

• Akapeea a Iesu te pikikaaia anga e te akarukeia anga?

• Eaa tetai au totou no te akatatauroia anga a Iesu Karaiti?

• Eaa i papu ei ia koe e ko Iesu te Mesia tei taputouia mai?

[Au Uianga Apii]

[Tutu i te kapi 13]

Eaa te au totou tei akatupuia i to Iesu tomo autu anga ki roto ia Ierusalema?

[Tutu i te kapi 15]

Mate a Iesu no ta tatou ara, teianei te tutara ra aia ei Ariki Mesia