Uipaanga Puapinga Maata Tikai

“ME OTI mai teia uipaanga, ka karanga koe e, ‘E uipaanga teokaratiki puapinga maata tikai teia o te mataiti!’” Ma taua au tuatua ra, kua akakeu maata a Stephen Lett o te Pupu Akaaere o te Au Kite o Iehova i te katoatoa. Kua akaputuputu mai ratou no te 126 uipaanga mataiti o te Taiate Punanga Tiaki Pipiria e te Pepa o Pennsylvania, tei raveia i roto ia Okotopa 2, 2010, i ko i te Are Akaputuputuanga o te Au Kite o Iehova i Jersey City, New Jersey, U.S.A. Eaa tetai au manako puapinga tei rauka mai mei teia uipaanga puapinga tikai?

E uriurianga oraora te akoanga mua a te Taeake Lett no runga i to Iehova kariota i te rangi, mei tei akatakaia i roto i te puka o Ezekiela. Te akatutu maira teia kariota mamaata e te mekameka tikai i te akaaerenga a te Atua, e na Iehova e akatere meitaki ra i teia. Te tere viviki ra te reira tuanga o te rangi, ma te au mea ora vaerua—mei te viviki o to Iehova uaorai manako, i tuatua ai te Taeake Lett. Te tere katoa nei rai te tuanga o te akaaerenga a te Atua ko Iehova i te enua nei. Kua akakite mai te Taeake Lett i tetai au tupuanga mataora i roto i te tuanga o te akaaerenga a te Atua i te enua nei i te au mataiti i topa akenei.

Ei akatauanga, kua kapitiia e kua akatinamouia tetai au opati manga kia rauka i te manganui tei tavini ana i mua ana i Betela i taua au enua ra, i te rave maata atu i te angaanga tutuanga. Kua akamaroiroi te Taeake Lett i te katoatoa kia pure ua rai no te Pupu Akaaere, ei komono no te pupu tavini, kia vai akarongo mou e te pakari.​—Mata. 24:45-47.

Au Ripoti Akamaroiroi e te Au Uiuianga Pumaana

Kua akakite mai a Tab Honsberger, e tavini ra ei mema no te Kumiti Manga i Aiti, i tetai ripoti mii tikai te tupu anga te ngaruerue enua i roto ia Tianuare 12, 2010, e mei tetai 300,000 tangata tei mate i taua enua ra. Kua akakite mai aia e te akakite aere ra te au orometua ki te tangata e kua tamate te Atua i taua aronga ra no te akarongo kore e kua paruru i te aronga meitaki. Inara, tauatini ua atu aronga kino tei matara mai te pururu anga te au paruru o te are auri no te ngaruerue enua. Manganui ra te aronga ngakau tika i Aiti tei akapumaanaia te kite anga i te tumu i kino roa ai to tatou tuatau. Kua taiku mai te Taeake Honsberger no runga i tetai taeake akarongo mou i Aiti tei mate tana vaine, te na ko anga e: “Te aue nei rai au i teia ra. Kare au i kite eaa te roa o toku aue anga, inara te rekareka nei au i te kite i te aroa o ta Iehova akaaerenga. E manakonakoanga toku, e ka tauta ua atu au i te akakitekite aere i teia.”

Kua oronga a Mark Sanderson, e mema no te pamiri Betela i Brooklyn, i tetai ripoti no  runga ia Piripine. Ei mema no te Kumiti Manga i mua ana no te reira ngai, mataora tikai aia te akakite mai anga e e 32 te take numero o te au papuritia o te Patireia i te au marama, e e maata atu te numero o te au apii Pipiria i te au papuritia i taua enua ra. Kua akakite mai aia i tetai taeake, ko Miguel tona ingoa, tei tamateia tana mokopuna tamaroa. Kua tauta pakari a Miguel kia akautungaia te tangata tei tamate i tana mokopuna e kia peiia ki roto i te are auri. Muri mai, kua aravei a Miguel i taua tangata ra te tutu aere anga i roto i te are auri. Noatu tona mataku, kua tuatua maru atu a Miguel kiaia. Kua apii raua ko taua tangata ra, tei ariu meitaki mai e kua inangaro ia Iehova. E kua papetitoia aia i teianei. Ko Miguel tona oa piri vaitata e te angaanga pakari nei a Miguel kia matara vave mai tona taeake ou mei te are auri. *

Kua akaari mai te porokaramu tei aru mai i tetai uiuianga tei raveia e Mark Noumair, e puapii no te Tipatimani o te Apii Teokaratiki. Kua uiui atu aia e toru tokorua akaipoipo​—ko Alex raua ko Sarah Reinmueller, David raua ko Krista Schafer, e Robert raua ko Ketra Ciranko. Kua akakite mai a Alex Reinmueller, e tauturu ra i te Kumiti Neneianga, akapeea aia te aere mai anga ki roto i te tuatua mou, iaia e painia ra i Kanata e 15 rai ona mataiti, te angaanga putuputu anga koia anake ua. Te uiia anga e koai ma tei akakeu maata iaia i Betela, kua taiku mai te Taeake Reinmueller e toru tangata akarongo mou, te akakite mai anga akapeea ratou te tauturu anga iaia kia tupu i te pae vaerua. Kua akakite tana vaine, ko Sarah, i tona pirianga ki tetai tuaine tei akakoromaki ana no tetai raungauru mataiti i roto i te are auri i Tinito, no tona akarongo. Kua akakite a Sarah e kua irinaki aia kia Iehova na roto i te pure.

Kua akameitaki a David Schafer, e tauturu ra i te Kumiti Apiianga, i tona metua vaine no tona akarongo ketaketa e kua akakite mai no runga i te au taeake tei angaanga ana ei aronga tipu rakau e tei tauturu iaia kia painia tauturu, iaia e mapu ra. Kua tuatua akaperepere tana vaine, ko Krista, no te akakeu anga a te au mema pamiri pakarikari o Betela, tei “akono meitaki i te mea ngiti ra,” mei ta Iesu i akamaroiroi mai.​—Luka 16:10.

Kua akakite mataora mai a Robert Ciranko, e tauturu ra i te Kumiti Tataanga, no runga i tona nga papa ruau e te nga mama ruau, e au tuitarere no Ungari e e au Kerititiano akatainuia. Tona mapuanga, kua mareka tikai aia i te aere ki te au uruoaanga mamaata i te au mataiti 1950 e kua kite mai aia e e maatamaata atu to Iehova akaaerenga i tana uaorai putuputuanga. Kua akakite mai tana vaine, ko  Ketra, e akapeea aia te kite anga i te tu tiratiratu iaia e tavini ra ei painia i roto i tetai putuputuanga e maata te apii apoteiti e te au manamanata. Kua akakoromaki ua aia, e kare i roa ana kua tukuia atu aia kia tavini ei painia takake i roto i tetai putuputuanga, i akakeuia ai tona ngakau e te tu taokotaianga.

Muri ake kua oronga mai a Manfred Tonak i tetai ripoti no runga ia Etiopia. Akamata mai teia enua i te tuatau Pipiria, e kua akameitakiia teia enua i teianei e 9,000 tuma papuritia no te tuatua meitaki. E noo ana te maataanga i roto me kore i te pae i te oire maata, ko Addis Ababa. No reira ka anoano maataia te tauturu i te au ngai mamao. Ei akono i teia anoano, kua patiia te Au Kite Etiopia e noo ra i te au enua ke kia aere mai kia tutu aere i roto i tetai au ngai mamao o te enua. E maata tei aere mai, kua akamaroiroi atu i te Au Kite i reira, e kua aravei atu i te aronga tei akarongo mai.

Tetai tupuanga puapinga o te porokaramu, ko te tuatua kapipiti no runga i te Au Kite o Iehova i Rutia e ta ratou au taumaroanga i te pae ture. Kua oronga mai a Aulis Bergdahl o te Kumiti Manga i Rutia i tetai akakiteanga tuatua enua no te takinokino anga o te Au Kite i Rutia, i roto tikai ia Moscow. Kua akakite mai a Philip Brumley no te Tipatimani Pae Ture i ko i te opati manga o Marike i te au tupuanga rekareka i nga marama i topa, te akarongo anga te Akavaanga no te Au Tika Anga o te Tangata i Europa (ECHR) e iva akaapaanga no runga i te Au Kite. Kua kite mai te Akavaanga e kare te au akaapaanga e iva e tika ana, e i roto i tetai au oroanga kua tauta katoa te akavaanga i te akamarama meitaki mai e eaa te akaapaanga i tarevake ei. Te tiaki atu anga eaa te ka tupu mai, kua tuatua papu te Taeake Brumley no runga i ta te Akavaanga tukuanga tika ka akatupu no tetai au oroanga i roto i tetai au enua ke.

Aru mai i teia nuti mataora, kua akakite te Taeake Lett e kua akatika te ECHR e kia raveia te oroanga tero kua roa te tuatau, te o maira te kavamani o Varani e te Au Kite o Iehova. E tokoiti ua oroanga ta teia Akavaanga akangateitei maataia ka akatika kia tukuia mai kia ratou. E 39 au oroanga ta te ECHR i akara ana no runga i te Au Kite o Iehova, e e 37 au oroanga tei akatikaia. Kua akamaroiroi te Taeake Lett i te iti tangata katoatoa o te Atua kia pure ki te Atua ko Iehova no runga i te manamanata.

Kua oronga mai a Richard Morlan, e puapii no te Apii na te Aronga Pakari o te Putuputuanga i te ripoti openga. Kua tuatua oraora mai aia no runga i te apii e te au tuatua akameitakianga a te aronga pakari tei aere mai ki teia apii.

 Au Akoanga a te Au Mema o te Pupu Akaaere

Kua oronga a Guy Pierce o te Pupu Akaaere i tetai akoanga ngakau tae te akamou ra ki runga i te irava o te mataiti 2011, ‘Akaruru i raro ake i te ingoa o Iehova.’ (Zepha. 3:12) Kua akakite aia e noatu e tuatau mataora teia no te iti tangata o Iehova, e tuatau ngata katoa te reira. Te vaitata maira te ra maata o Iehova; te kimi nei rai te au tangata i te akaruru ki roto i te akonoanga pikikaa, poritiki, apinga nui pae materia, te tu manako kore e te vai atura. E rauka ai te akaruruanga tika tikai, e kapiki tatou i te ingoa o Iehova, te kapiti maira te kite anga, te akangateitei maataanga, e te irinaki anga i te Peretana nona taua ingoa ra, e te inangaro anga iaia ma to tatou oraanga katoa.

Aru mai kua oronga a David Splane o te Pupu Akaaere i tetai uriurianga akakeuanga pakari no runga i te tumu tuatua “Kua O Atu Ainei Koe ki Roto i to te Atua Akaangaroianga?” Kua akakite mai aia e kare te aiteanga o to te Atua akaangaroianga e kua akamutu aia i tana angaanga, no te mea “te angaanga ua nei rai” a Iehova e tana Tamaiti i roto i taua ra akaangaroianga, kia akatupu meitakiia to te Atua akakoroanga no te au mea tei angaia no te enua. (Ioa. 5:17) Akapeea i reira tatou e tomo atu ei ki roto i to te Atua akaangaroianga? Na te kopae anga i te ara e kia kore e akangateitei ia tatou uaorai. Ka anoanoia tatou kia taangaanga i to tatou akarongo e kia akamaara ua rai i to te Atua akakoroanga, e te turuturu anga i taua akakoroanga ra. E akaaoanga maata te reira i tetai au taime, kia ariki ra tatou i te akoanga e kia aru rotai i te aratakianga a to Iehova akaaerenga. Kua pati te Taeake Splane i te katoatoa kia rave i te au mea ravarai te ka rauka ia ratou kia o atu ki roto i to te Atua akaangaroianga.

Ko te akoanga openga, ta Anthony Morris o te Pupu Akaaere i oronga, koia oki, “Eaa ta Tatou e Tapapa Atu Nei?” Ma te rapurapu e te pumaana, kua akamaara atu te Taeake Morris i te katoatoa no runga i te au tupuanga totou i mua ua atu ia tatou, e au tupuanga te tapapa atu nei te au tangata akarongo mou. Te kapiti maira teia i te kapiki anga no te “Au e te tinamou!” e te takore anga i te akonoanga pikikaa. (1 Tesa. 5:2, 3, NW; Apo. 17:15-17) Kua akamatakite mai te Taeake Morris e me kite tatou i te au tupuanga i roto i te nuti kare e akatupu ana i taua au totou ra, auraka e tuatua e, “Ko Aramakito teia.” Kua akamaroiroi mai aia i te tu rekareka, akakoromaki e te tapapaanga tei akatakaia mai i roto ia Mika 7:7. Taua taime rai, kua akamaroiroi aia i te katoatoa kia akavaitata atu ki te Pupu Akaaere, mei te au vaeau e tomo atura ki roto i te tamaki. Kua tuatua aia e: ‘E akamaroiroi i to kotou ngakau, ko kotou ravarai, te aronga e tapapa ra ia Iehova.’​—Sala. 31:24.

Ei taopenga anga, kua orongaia mai tetai au akakiteanga mataora, e te puapinga maata. Kua akakite mai a Geoffrey Jackson no te Pupu Akaaere i te au parani no te tamata anga i te tuanga apii mama ua o The Watchtower no te aronga kare e kite roa ana i te tatau i te reo Papaa. E oti kua akakite mai a Stephen Lett e ka akapapa te Pupu Akaaere i te au atoro anga a te au tiaki no te au akaaere tapere e ta ratou vaine i Marike. Kua akakite katoa mai aia e ka kapikiia te Apii Terenianga Orometua e ko te Apii Pipiria na te Au Taeake Kare i Akaipoipo, pera katoa tetai apii ou ko te Apii Pipiria no te Au Tokorua Akaipoipo Kerititiano. Ka oronga mai teia apii i tetai atu au terenianga no te au tokorua akaipoipo kia taangaanga maataia e to Iehova akaaerenga. Kua akakite katoa mai te Taeake Lett e ka akanooia te Apii no te Au Akaaere Tutaka e ta Ratou Vaine e te Apii no te Au Mema o te Kumiti Manga e ta Ratou Vaine e rua nga pupu i te mataiti tataki tai i Patterson, e te akatikaanga i te aronga kua aere takere ana kia oki akaou no te rua o te taime.

Kua oronga a John E. Barr, e 97 ona mataiti, kua roa te tavini anga ei mema no te Pupu Akaaere, i tetai pure ngakau akaaka na te taopenga meitaki anga i te porokaramu. * I te openga o te uipaanga, kua manako te katoatoa e kua riro teia ra ei ra puapinga maata tikai.

[Au Tataanga Rikiriki i Raro]

[Tataanga i te kapi 19]

Mataora te katoatoa i te akarongo ki te aronga tei uiuiia

[Tataanga i te kapi 20]

Kua akameitaki a Iehova i te angaanga tutuanga i Etiopia