Akoanga Pakari no Tei Kare i Akaipoipo e Tei Akaipoipo

‘I karanga atu ei au i teianei tuatua, no te mea e tuatua tau, e kia akono kotou i ta te Atu ma te iroirongata kore me kare kia kore e akavareia.’​—1 KORI. 7:35.

1, 2. Eaa ra tetai tangata ka akara ai i te akoanga Pipiria no runga i te turanga kare i akaipoipo e tei akaipoipo?

E TUPU ana te mataora, te tu mareka kore e te manako manamanata i roto i to tatou pirianga ki tetai tane me kore vaine. E akono meitaki ei i taua au manako ngakau ra ka anoanoia kia pati atu tatou i ta te Atua aratakianga, inara e au tumu ke atu tetai ka anoano tatou i tana aratakianga. Penei ka manako tetai Kerititiano te mataora ua ra i te noo kare i akaipoipo e te maro maira tona pamiri me kore te au oa kia akaipoipo aia. Penei te inangaro ra tetai i te akaipoipo inara kare i kiteaia mai tetai tokorua tau nona. Ka anoano tetai pae i te aratakianga no te akapapa anga no te au apainga akaipoipo ei tane me kore ei vaine. E e aro atu ana te au Kerititiano kare i akaipoipo e tei akaipoipo i te au timataanga no runga i te ainga tau kore.

² Kapiti mai ki to tatou uaorai mataora, e akakeu ana teia au manamanata i to tatou turanga i mua i te Atua ko Iehova. I roto i te pene 7 o tana reta mua ki to Korinetia, kua oronga mai a Paulo i te aratakianga no te turanga kare i akaipoipo e tei akaipoipo. Tona akakoroanga kia akakeu i tana aronga tatau ‘no te tuatua tau, e kia akono i ta te Atu ma te iroirongata kore me kare kia kore e akavareia.’ (1 Kori. 7:35) Ia koe e akamanako ra i tana akoanga no runga i teia au manako puapinga, e akara i toou turanga​—kare i akaipoipo me kore kua akaipoipo—​ei mataara no te tavini pu tikai anga ia Iehova.

Taau Uaorai Ikianga Puapinga

3, 4. (a) Akapeea te au manamanata te tupu anga i tetai au taime, me te manako maata ra tetai aronga i tetai oa me kore kopu tangata kare i akaipoipo? (e) Akapeea ta Paulo akoanga te tauturu anga i tetai tangata kia akamanako meitaki i te akaipoipo?

³ Mei te iti tangata ngati Iuda i te anere mataiti mua, maata te au peu i teia tuatau te akamaroiroi ra i te akaipoipo ei mea puapinga tikai. Me kare tetai tangata mapu me kore vaine mapu i akaipoipo ake, ka manamanata te au oa e te kopu tangata no runga iaia e ka akamaroiroi atu iaia kia akaipoipo. I roto i ta ratou pukapuka anga, ka akamaroiroi atu ratou iaia kia kimi i tetai tokorua nona. Penei ka akakite atu ratou kiaia e koai te ka tano nana. Penei ka taangaanga katoa ratou i tetai ravenga kikite kia akaaravei i teia nga tangata kare i akaipoipo. I tetai au taime e akatupu ana teia i te akama, akatakake i te pirianga oa, e te mamae ngakau.

⁴ Kare rava a Paulo i maro ana i tetai ke kia akaipoipo me kare kia kore e akaipoipo. (1 Kori. 7:7) Mareka ua aia i te tavini ia Iehova kare e vaine, inara kua akangateitei aia i te tikaanga o tetai ke kia mataora i te akaipoipo. Tei runga katoa i te au Kerititiano tataki tai i teia tuatau te tikaanga i te iki me ka akaipoipo ratou, me kare e akaipoipo. Auraka tetai ke e maro ia ratou kia iki e me ka akaipoipo, me kare.

Ka Puapingaia me Kare i Akaipoipo

5, 6. Eaa ra a Paulo i akamaroiroi ei i te turanga kare i akaipoipo?

⁵ Tetai mea puapinga no ta Paulo au tuatua ki to Korinetia, ko tona manako papu no runga i tetai kare i akaipoipo. (E tatau ia 1 Korinetia 7:8.) Noatu e kare a Paulo i akaipoipo, kare aia i akateitei ana iaia uaorai i runga ake i te aronga tei akaipoipo, mei ta te au orometua rai o Kerititome kare i akaipoipo e rave ana. Mari ra, te akataka maira te apotetoro i tetai mea puapinga ta te aronga tutu aere i te tuatua meitaki, kare i akaipoipo ka mataora i te rave. Eaa taua mea puapinga ra?

 ⁶ Ka ariki putuputu ua tetai Kerititiano kare i akaipoipo i tetai au angaanga i te tavini anga ia Iehova kare e rauka i tetai tangata tei akaipoipo i te rave. Kua rauka ia Paulo te tikaanga ngateitei kia riro mai ei ‘aposetolo no te au etene.’ (Roma 11:13) E tatau ia Angaanga pene 13 ki te 20, e e aru iaia e tona au oa mitinari ia ratou e tutu aere ra i te au ngai ou e te akanoo anga i te au putuputuanga ou. I roto i tana tavinianga, kua akakoromaki a Paulo i te au turanga ngata kare te maataanga o teia tuatau e aro atu ana. (2 Kori. 11:23-27, 32, 33) No tona rekareka i te tauturu i te manganui kia riro mai ei au pipi, i rauka ai iaia i te akakoromaki i taua au manamanata ra. (1 Tesa. 1:2-7, 9; 2:19) Ka rauka ainei iaia i te rave i te reira naringa e kua akaipoipo aia me kore e pamiri tona? Kare paa.

7. Oronga mai i tetai akaraanga o tetai nga Kite kare i akaipoipo tei taangaanga i to raua turanga kia akakite aere i te anoano o te Patireia.

⁷ Maata te au Kerititiano kare i akaipoipo te taangaanga ra i to ratou turanga kia akamaata atu i ta ratou angaanga no te Patireia. Kua neke atu a Sara raua ko Limbania, e nga tuaine painia kare i akaipoipo e noo ana i Porivia, ki tetai oire kare rava i tutu aereia ana no tetai au mataiti. Ka riro ainei ei manamanata no te mea kare e uira paoa i reira? Kua akakite mai raua e: “Kare e ratio me kore e tivi i reira, no reira kare te au tangata e tamanamanataia ana mei ta ratou e reka ana i te rave, koia oki te tatau puka.” Kua akaari tetai aronga o te oire ki te nga painia i te au kopi o te au puka a te Au Kite o Iehova ta ratou e tatau ua ana, kare ra e nenei akaouia ana. No te maata o te au tangata ta teia nga tuaine i aravei tei inangaro mai i te tuatua mou, i ngata ei ia raua i te atoro atu i te au ngutuare ravarai i taua ngai ra. Kua akakite mai tetai vaine pakarikari kia raua e: “Te vaitata mai nei te openga no te mea kua tae mai te Au Kite o Iehova.” Kare i roa ana kua aere mai tetai aronga i roto i taua oire ra ki te au uipaanga a te putuputuanga.

8, 9. (a) Eaa ta Paulo e akamanako ra te akameitakianga aia i te turanga kare i akaipoipo? (e) Eaa te au akameitakianga ka rauka i te au Kerititiano kare i akaipoipo?

⁸ Tika rai, e tupu katoa ana te au mea meitaki ki te au Kerititiano tei akaipoipo me tutu aere ratou i te tuatua meitaki i roto i te au ngai ngata tikai. Inara ka riro tetai au angaanga te ka rauka i te au painia kare i akaipoipo i te rave, te ka  ngata no te aronga tei akaipoipo me kore e tamariki ta ratou. Kua manako a Paulo i te puapinga ka rauka mai mei tana i kite no te akamaata atu anga i te tuatua meitaki i roto i te au putuputuanga o te reira ngai. Kua inangaro aia kia rekareka te katoatoa, mei iaia rai. No taua tumu ra, kua akameitaki tikai aia i te tangata kare i akaipoipo e tavini ra ia Iehova.

⁹ Kua tata tetai tuaine painia kare i akaipoipo no Marike mai e: “Te irinaki ra tetai au tangata e kare te aronga kare i akaipoipo e mataora ana. Inara kua kite au e ka rauka te mataora mou me e pirianga to tetai kia Iehova. Noatu e akaatinga anga te turanga kare i akaipoipo, e apinga aroa umere me taangaanga meitaki koe i te reira.” E rauka ai te mataora, kua tata aia e: “Ka riro mai te turanga kare i akaipoipo ei mea mataora, kare ei arairai anga. Kua kite au e te inangaro katoa maira a Iehova i te aronga kare i akaipoipo e tei akaipoipo.” Te tavini mataora ra aia i teianei i tetai enua te anoano maataia ra te au papuritia o te Patireia. Me kare koe i akaipoipo, ka rauka ainei ia koe i te piri maata atu i te apiianga i te tuatua mou ki tetai ke? Penei ka kite katoa mai koe i te turanga kare i akaipoipo ei akameitakianga puapinga tikai no ko mai ia Iehova.

Me Inangaro Tei Kare i Akaipoipo i te Akaipoipo

10, 11. Akapeea a Iehova te tauturu anga i te aronga te inangaro ra i te akaipoipo inara kare i kiteaia mai tetai tokorua tau?

¹⁰ Muri ake te noo ua anga kare i akaipoipo, e maata te au tavini akarongo mou o Iehova tei iki kia akaipoipo. Te kite anga e ka anoanoia tetai aratakianga, kua pati ratou kia Iehova no te tauturu i te kimi mai i tetai tokorua tau.​—E tatau ia 1 Korinetia 7:36.

¹¹ Me ka inangaro koe i te akaipoipo i tetai tangata te tavini ngakau katoa ra ia Iehova, e pure Kiaia no runga i teia. (Phili. 4:6, 7) Noatu ka roa koe i te tiaki anga, auraka e taitaia. E irinaki ua rai i to tatou Atua aroa ei Tauturu noou, e ka tauturu mai aia ia koe i te pae manako ngakau kia tau ki toou anoano.​—Ebe. 13:6.

12. Eaa ra tetai Kerititiano ka akamanako meitaki ei na mua me patiia mai aia kia akaipoipo?

¹² Penei ka pati mai tetai tangata kare e maroiroi ana i te pae vaerua me kore kare i roto i te tuatua mou i tetai Kerititiano kare i akaipoipo, kia akaipoipo raua. Me tupu te reira kia koe, kia akamaara e e kino atu te mamae ngakau mei te ikianga tarevake i tetai tokorua akaipoipo, i to te turanga maromaroa i te tuatau kare i akaipoipo. Me akaipoipo ana koe, kua topiriia koe ki toou tokorua e tuatau ua atu no te meitaki me kare no te kino. (1 Kori. 7:27) Auraka e iki kia akaipoipo no toou inangaro maata i tetai tokorua te ka tataraapa koe a muri mai.​—E tatau ia 1 Korinetia 7:39.

Kia Papa no te Au Turanga Tika Tikai o te Akaipoipo

13-15. Eaa te au manamanata ta tetai nga tokorua ka uriuri manako i mua ake ka akaipoipo ei raua?

¹³ Noatu kua akamaroiroi mai a Paulo kia tavini ia Iehova ei tangata kare i akaipoipo, kare ra aia i akavaavaa ana i te aronga tei iki kia akaipoipo. Mari ra, te tauturu maira tana akoanga akauruia i te au tokorua kia marama i te au tu tika tikai o te oraanga akaipoipo e kia akatinamou i to ratou pirianga.

¹⁴ Te anoanoia ra tetai au tokorua kia akatanotano i ta ratou e tapapa atura no te tuatau ki mua. I te tuatau e akainangaro ra raua, penei ka kite mai te nga tokorua e e aroa aite kore to raua, e te meitaki tikai, ei akapapu anga e ka mataora to raua oraanga akaipoipo. Ka akaipoipo raua i te manakoanga e ka mataora ua raua i te au taime pouroa, e te irinakianga e kare rava tetai apinga e takino i to raua mataora. Kare taua tu manako ra i te mea tau. E mataora ana te tuatau akainangaro o te oraanga akaipoipo, inara kare ko te reira ua te ka akatikatika i te au manamanata e tupu ana ki te au akaipoipo ravarai.​—E tatau ia 1 Korinetia 7:28. *

¹⁵ E poitirere ana e e maroaroa ana te maataanga o te au tokorua akaipoipo ou me tuke te manako o to ratou tokorua no runga i te au  mea puapinga. Penei ka pekapeka raua no runga i te moni e te tuatau tamataoraanga, ta raua ngai ka noo, e eia taime ka atoro raua i te nga metua ongai. E e au tu apa to raua te ka akariri i tetai e tetai. I te tuatau akainangaroanga, kare raua e manako atu i taua au mea puapinga, inara ka akatupu teia au mea i te manamanata i roto i te akaipoipo i muri mai. No reira ka uriuri manako te nga tokorua i te reira i mua ake ka akaipoipo ei raua.

16. Eaa ra tetai nga tokorua ka ariki ei akapeea me akono i te au apainga o te oraanga akaipoipo?

¹⁶ E puapingaia ai e kia mataora, kia ariki te nga tokorua e akapeea me akono i ta raua au apainga. Ka ariki raua e akapeea me ako i ta raua tamariki e me akono i to raua nga metua pakarikari. Auraka te au manamanata o te pamiri e akatakake ia raua. Na te taangaanga anga i te akoanga Pipiria, e maata te au manamanata ta raua ka akatikatika, ka akakoromaki ua atu i tetai au manamanata, e ka mataora ua rai raua.​—1 Kori. 7:10, 11.

17. Eaa ra te au apiapi no te “au mea o teianei ao” ta te nga tokorua akaipoipo ka manamanata atu?

¹⁷ Te akakite maira a Paulo i tetai turanga tika tikai o te oraanga akaipoipo i roto ia 1 Korinetia 7:32-34. (E tatau.) Te apiapi ra te aronga tei akaipoipo i ‘te akono i te au mea o teianei ao,’ mei te kai, kakau, ngai nooanga, e tetai atu au mea ka anoanoia. No teaa ra? Me kare tetai taeake i akaipoipo, ka rauka iaia i te akapou i tona taime ki roto i te angaanga orometua. Inara me akaipoipo aia, ka taangaanga aia i tona taime e te maroiroi i te akono i tana vaine e kia mareka mai tana vaine. Ka pera rai te vaine ki tana tane. No tona tu pakari, kua marama a Iehova i teia anoano. Kua kite aia e umuumu maata ana tetai akaipoipo e puapinga ra i tetai au taime e te maroiroi ta te nga tokorua i taangaanga ana i roto i ta raua tavinianga Iaia i to raua tuatau kare i akaipoipo ake.

18. Eaa te au akatikatikaanga no te au angaanga tamataoraanga ta tetai ka rave i muri ake i te akaipoipo?

¹⁸ Inara maata atu ta te apiianga e akakite  maira. Me ka tuku te nga tokorua i tetai taime e te maroiroi mei te angaanga a te Atua i te akono atu i tetai e tetai, kare ainei e ka akapera rai raua me taangaanga i te taime e te maroiroi no te tamataoraanga i te tuatau kare raua i akaipoipo ake? Eaa to te vaine manako me akapou tana tane i tona taime ki te au angaanga tipoti ma tona au oa? Eaa to te tane manako me akapou tana vaine i tona taime ki tana au angaanga e reka ana ma tona au oa? Penei ka maromaroa aia, kare e mataora, e ka manako e kare tona tokorua e inangaro ana iaia. E kopae ei i teia, ka rave te aronga tei akaipoipo i te ka rauka ia ratou kia akaketaketa i to ratou pirianga akaipoipo.​—Ephe. 5:31.

Umuumu Maira a Iehova i te Tu Viivii Kore

19, 20. (a) Eaa ra te aronga akaipoipo ka paruru ei ia ratou mei te ainga tau kore? (e) Eaa te kino ka tupu mai me akatika te nga tokorua akaipoipo ia raua kia takake no tetai tuatau roa?

¹⁹ Kua akapapu te au tavini o Iehova e kia vai viivii kore ua ratou. Kua iki tetai pae kia akaipoipo kia kore teia manamanata e tupu mai. Inara, kare te akaipoipo e paruru ana i tetai mei te ainga viivii. I te tuatau Pipiria, e paruru ana tetai oire ketaketa i te tangata me noo ua ratou i roto i te oire. Me aere ra tetai tangata ki vao ake i te paruru i te tuatau e ori aere ra te aronga keia e te aronga kino, ka keiaia tana apinga me kore ka tamateia aia. Pera katoa, ka paruruia te aronga akaipoipo mei te ainga tau kore me akarongo ratou ki te au ture e te au kotingaanga ta Tei Akamata i te akaipoipo i akanoo no ratou.

²⁰ Kua akataka mai a Paulo i taua au kotingaanga i roto ia 1 Korinetia 7:2-5. Tei te vaine te tikaanga i te pirianga ainga ki tana tane; pera katoa tei te tane te tikaanga i te pirianga ainga ki tana vaine. Ka tau raua roa ai kia oronga atu i te “mea takinga-meitaki,” me kore te pirianga ainga tei tau no te tangata akaipoipo kia oronga atu. Inara, kare tetai au tane e te au vaine e akapou ana i te tuatau ki tetai e tetai​—te orote anga koia anake me kore te aere anga koia anake ua no te angaanga moni, e kare e oronga atu i te “mea takinga meitaki” ki tetai e tetai. Akamanako ana i te kino ‘no tei kore i akakoromaki,’ kua tuku ua atu te tangata ki te taomianga a Satani e kua akaturi. Te akameitaki ra a Iehova i te au upoko o te pamiri e akono ra i to ratou pamiri e kare i tuku i to ratou akaipoipo ki roto i te kino.​—Sala. 37:25.

Puapinga kia Akarongo ki te Akoanga Pipiria

21. (a) Eaa ra i ngata ai i te rave i te au ikianga no runga i te turanga kare i akaipoipo e tei akaipoipo? (e) Eaa ra te akoanga i roto ia 1 Korinetia pene 7 i puapinga ai?

²¹ E ngata tikai ana no tetai tangata kia rave i te au ikianga no runga i te turanga kare i akaipoipo e kua akaipoipo. Te tumu maata o te au manamanata ko te tu apa ua o te tangata nei. No reira ka taitaia rai te aronga ta Iehova e ariki ra e e akameitaki ra, noatu kare i akaipoipo e me kua akaipoipo. Me taangaanga koe i te akoanga puapinga i roto ia 1 Korinetia pene 7, ka rauka ia koe i te akaiti mai i taua au manamanata ra. I roto i te mata o Iehova, ka riro koe ei “mea tika” me kare koe i akaipoipo me kore kua akaipoipo koe. (E tatau ia 1 Korinetia 7:37, 38.) Ko te akakoroanga maata rava atu ka rauka ia koe, ko ta te Atua marekaanga. Me mareka mai aia, ka puapingaia toou oraanga e tae ua atu ki roto i tona ao ou. I reira, kare te au taomianga tei matauia i teia tuatau e tupu i rotopu i te pirianga o te tane e te vaine.

[Tataanga Rikiriki i Raro]

Ka Rauka Ainei ia Koe te Pau?

• Eaa te tumu kare tetai tangata e maro atu i tetai kia akaipoipo?

• Akapeea koe me taangaanga meitaki i toou tuatau ei tavini no Iehova kare i akaipoipo?

• Akapeea tetai nga tokorua e akainangaro ra me akapapa no te au apainga akaipoipo?

• Eaa te tumu kare te akaipoipo e paruru i tetai mei te ainga tau kore?

[Au Uianga Apii]

[Au Tutu i te kapi 14]

Rekareka te au Kerititiano kare i akaipoipo tei taangaanga i to ratou taime no ta ratou angaanga orometua

[Tutu i te kapi 16]

Eaa te au akatikatikaanga ta tetai ka rave me oti te akaipoipo?