“Pirikoki i Teianei Kare ra e Tuatau ua Atu!”

Akakiteia e Sara van der Monde

E akakite ua mai ana te tangata kiaku e, “E Sara, manea tikai toou mata katakata. Eaa ra koe i mataora ua ai?” Ka akakite au kia ratou e e manakonakoanga umere toku. Ka rauka i te akataka i toku manakonakoanga na roto i teia au tuatua, “Kua pirikoki au i teianei, kare ra e tuatau ua atu!”

ANAUIA au ki Paris, i Varani, i te mataiti 1974. Ngata tikai toku anauia mai anga, e kua kitea mai i muri mai e kua paruka ua toku kopapa no tei kino toku roro. Kare toku rima e toku vaevae e tipatipa ana, e kare e maramaia ana taku tuatua. Kua tu katoaia au e te maki uti e te viviki i te tuia e te au maki.

Tae anga au ki te rua mataiti, kua neke atu toku pamiri ki Melbourne, i Autireria. E rua mataiti i muri mai, kua akaruke toku Papa ia maua ko toku Mama. Ko te taime mua te reira i piri vaitata ai au ki te Atua. E apai ua ana a Mama iaku, koia tetai o te Au Kite o Iehova, ki te au uipaanga Kerititiano, i kite mai ei au e te inangaro e te manako maira te Atua iaku. Kua tauturu mai taua maramaanga, kapiti mai te aroa e te akamaroiroianga a toku Mama iaku kia manako tinamou noatu te tauianga o to maua turanga.

Kua apii katoa mai a Mama iaku akapeea me pure kia Iehova. E kua kite mai au e e mama ake te pure i te tuatua. Te tuatau me pure au, kare au e anoanoia kia tuatua, ka akamanako ua au i taku ka tuatua. No te mea e ngata i te marama i taku tuatua, e mea pumaana ra i te kite e te marama maira a Iehova i te au mea ravarai, noatu e ka manako ua au i te reira me kore kare taku tuatua e takataka ana.—Sala. 65:2.

Akakoromaki Anga i te Oraanga Manamanata

Tae anga au ki te rima mataiti, kua paruka ua toku nga vaevae e ka anoanoia au kia aao i tetai nga auri ei akaketaketa i toku nga vaevae kia rauka iaku te aere. E tauriuri ana au me aere au! Tae anga au ki te 11 mataiti, kare e rauka iaku te aere. Muri mai, kare e rauka iaku te eke e te kake ki runga i toku roi me kare e ivi uira ei taki iaku ki roto i toku pereoo, e akatere ana au ki te mouranga rima.

E maromaroa ana au i tetai au taime no toku tu pirikoki. Inara kua maara iaku te tuatua a toku pamiri e: “Eiaa e manamanata i te au mea kare e rauka ia koe i te rave. E rave ra i te ka rauka ia koe.” Na teia i tauturu iaku kia rave i te au mea mei te akaoro oroenua, teretere poti, oe vaka, camping, e te akaoro motoka! E reka ana au i te angaanga ati no reira e rave ana au i te reira na te peni anga, tui kakau, maani tivaivai, tuitui, e te maani apinga karakaraea.

No te kino pakari o toku pirikoki, kua akakite mai tetai pae e kare au i tukatau i te iki kia  akamori i te Atua. Tae anga au ki te 18 mataiti, kua maro mai tetai puapii kia akaruke au i te kainga kia “akaatea mai” mei te akonoanga a toku mama. Kua akakite katoa mai aia e ka tauturu aia iaku kia kimi i tetai ngai nooanga. Inara, kua akakite atu au kiaia e kare rava au e akaruke i taku akonoanga, e ka akaruke au i te kainga me mako au i te akono iaku uaorai.

Kare i roa ana i muri ake i taua manamanata ra ki toku puapii, kua papetitoia au e ko tetai o te Au Kite o Iehova. E rua mataiti i muri mai, kua neke atu au ki tetai apatimani meangiti ua. Mataora tikai au i konei, no te tauturu tei rauka iaku e te mako i te akono iaku uaorai.

Patianga Poitirere kia Akaipoipo

Te au mataiti i aereia, kua na roto ana au i tetai au timataanga no toku akarongo. Tetai ra kua poitirere tikai au te pati mai anga tetai oa apii—e pirikoki katoa—kia akaipoipo maua. Te akamataanga, kua mataora au. Mei te maataanga o te au vaine mapu, e inangaro tikai ana au i tetai tokorua noku. Inara, no te mea e aiteite ua to maua tu pirikoki, kare e akapapu anga e ka mataora te oraanga akaipoipo. Pera katoa, kare taua tamaiti ra e irinaki ana ki te Atua. Tuke tikai ta maua irinakianga, au angaanga, e te au akakoroanga. No reira akapeea maua e mataora ai i te noo kapiti? Kua tauta au i te akarongo ki te akauenga taka meitaki a te Atua kia akaipoipo ua i tetai taeake irinaki. (1 Kori. 7:39) No reira, kua akakite maru atu au ki te tangata mapu e kare au e ariki i tana patianga.

Tae mai ki teia tuatau, kua kite au e kua rave au i te ikianga tau. E kare au e ekoko ana e ka mataora au i roto i te ao ou tei taputouia mai e te Atua. (Sala. 145:16; 2 Pete. 3:13) I teianei, te tauta nei au kia vai tiratiratu kia Iehova e kia mareka ua i toku au turanga.

Te tapapa nei au i te ra e oro ei au mei te matangi rai. Ka rauka iaku i reira i te kapiki maata e, “Kua pirikoki ana au, teianei kua meitaki tikai au—e tuatau ua atu!”