Rekareka Ainei Koe i te “Oronga Aroa Atu?”

KUA kiteia te au Kerititiano mua i Philipi no to ratou tu oronga no te akamorianga mou. I roto i tana reta akauruia kia ratou, kua tata te apotetoro ko Paulo e: “Te akameitaki nei au i taku Atua kia maara ua atu au ia kotou kare e tivata, I te au pure katoa naku nei ia kotou ravarai, e pure atu rai au ma te rekareka kare e tivata, I to kotou tau meitaki anga i te evangelia nei mei muatangana mairai e tae rava akenei i teianei.” (Phili. 1:3-5) Kua maara ia Paulo te papetitoia anga a Ludia e tona kopu tangata, e tona maro mai anga iaia e tona au taeake irinaki kia noo ki roto i tona are.​—Anga. 16:14, 15.

Kare i roa ana i muri mai, kua tuku te putuputuanga ou i Philipi i te au apinga kia Paulo e rua taime, tona noo anga ki te au taeake irinaki no tetai au epetoma i Tesalonia vaitata rai e 160 kiro mita te mamao. (Phili. 4:15, 16) Tetai au mataiti i muri mai, i te au taeake i Philipi e tetai atu i Makedonia e na roto ra i te turanga  putaua e te “mate maata,” kua akarongo ratou i te anoano o te au Kerititiano tei takinokinoia i Ierusalema e kua inangaro i te tauturu ia ratou. Kua kite a Paulo e ‘e maata rava te reira’ no ratou kia rave. Inara, kua tata aia e: “Kua pati akatenga ua mairai ratou kia matou i te tikaanga ngateitei kia oronga aroa atu.”​—2 Kori. 8:1-4, NW; Roma 15:26.

Mei tetai tai ngauru mataiti i muri ake te riro anga to Philipi ei au Kerititiano, kua akaari rai ratou i taua tu oronga anga. To ratou akarongo anga e kua tapekaia a Paulo i Roma, kua tono ratou ia Epaperodito kia aere e 1,287 kiro mita te mamao te apai anga i te au apinga ei tauturu i te apotetoro. Te taka ua ra e, kua inangaro to Philipi i te tauturu ia Paulo kia rauka iaia i te akaketaketa i te au taeake e kia rave i te tutu anga, noatu e kua tapekaia aia.​—Phili. 1:12-14; 2:25-30; 4:18.

Teia tuatau, e akangateitei anga ki te au Kerititiano kia turuturu i te angaanga tutu aere i te Patireia e te akariro anga i te tangata ei pipi. (Mata. 28:19, 20) Ka turuturu ratou i te au anoano o te Patireia na te oronga anga i to ratou taime, maroiroi e te moni. Te akaari maira te pia i tetai au ravenga ka rauka ia koe i te turuturu i teia angaanga a te Atua.

[Pia i te kapi 22, 23]

AU RAVENGA TA ETAI E IKI RA NO TE ORONGA

AKAPUTUANGA NO TE ANGAANGA I TEIANEI AO

Manganui te akapae ra, me kore te akapapa ra, i tetai moni no te tuku ki roto i te au pia akaputu anga tei akairoia “Akaputuanga no te Angaanga i Teianei Ao.”

I te marama tataki tai, e tuku ana te au putuputuanga i teia au moni ki te opati o te Au Kite o Iehova e akono ra i to ratou au enua. E tuku tika katoaia atu ana te au moni tauturu tei oronga uaia mai ki te Watch Tower Bible and Tract Society of New Zealand, PO Box 75142, Manurewa, Auckland 2243, me kore ki te opati manga o te Au Kite o Iehova e akono ra i toou enua. Te au cheque ka tuku atu ki te atereti i runga akenei e tata kia tutaki ia ki te “Watch Tower.” Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te akakite e e au apinga aroa tikai taua au apinga ra no teia au akaputuanga.

AKANOOANGA I TE TURANGA NO TE TAUTURU ME KORE E ROUNU KARE E INTEREST

Penei e tuku i te moni ki roto i te au mea oronga (trust) kia rauka i te taangaanga i Nu Tireni me kore i te ao katoa. Me inangaroia e te tangata nana te reira, ka rauka i te akaoki i teia au moni me patiia mai. No tetai akakiteanga maata atu, e tata ki te Treasurer’s Office i te atereti i runga akenei, ine.

PARANIANGA ORONGA UA

I te pae mai te au moni oronga aroa ua, te vaira tetai atu au ravenga orongaanga no te akapuapinga i te angaanga Patireia i teianei ao. Te kapiti maira teia i te:

Initurini: Penei kia tukuia te ingoa o te Watch Tower Bible and Tract Society of New Zealand, koia te ka puapingaia mei tetai koreromotu initurini no te oraanga me kore tetai akapapaanga akaangaroi anga/moni pakari.

Apinga Akaputuia e te Au Poni: Penei ka orongaia te au apinga akaputuia e te au poni ki te Watch Tower Society ei apinga aroa.

Are e te Enua: Penei ka orongaia te au enua e te au are ka rauka i te oko ei apinga aroa me kore, te au are e nooia ra e te tangata na te akono anga i tetai koreromotu no te au apinga o te oraanga ki tei oronga mai i te reira, te ka rauka iaia i te noo ki roto i te tuatau e ora ra aia. Aravei atu i te opati manga i toou enua i mua ake ka akamanaia ai tetai ua atu enua e te are.

Au Koreromotu e te Au Mea Oronga: Penei ka oronga tikaia te apinga me kore te moni ki te Watch Tower Bible and Tract Society of New Zealand na roto i tetai koreromotu tikaia e te ture, me kore kia tukuia te ingoa o te Watch Tower Society te ka puapingaia i tetai koreromotu no te au mea oronga. Penei ka riro tetai au mea oronga e akapuapinga ra i tetai akaaerenga akonoanga, ei oronga mai i tetai tauturu i te pae o te tero.

No tetai akakiteanga maata atu, aravei atu i te Treasurer’s Office, na te tata anga me kore na runga i te tereponi, i te atereti i runga akenei, me kore i te opati manga e akono ra i toou enua.