Aratakiia e te Vaerua o te Atua i te Anere Mataiti Mua e Teia Tuatau

‘Na taua vaerua okotai ra i anga i taua au mea katoa nei.’​—1 KORI. 12:11.

1. Eaa te au tumu manako ta tatou ka akamanako i roto i teia apii?

KO PENETEKOTE te mataiti i tupu ei tetai au mea umere tikai! (Anga. 2:1-4) Kua riro te riringiia mai anga o te vaerua tapu i taua atianga i te anere mataiti mua, ei tauianga maata i te tu e akono ra te Atua i tona au tavini. I roto i te atikara i mua akenei, kua akamanako ana tatou i tetai au mataara te tauturu anga te vaerua o te Atua i te aronga akarongo mou i taito kia rave i te au angaanga ngata e te taka meitaki. Inara, eaa te tuke i rotopu i te tu i angaanga ai te vaerua o te Atua i mua ake i te tuatau Kerititiano e i te anere mataiti mua? Akapeea te au Kerititiano e puapingaia ai mei te angaanga a te vaerua tapu o te Atua i teia tuatau? Ka akara ana tatou.

‘I Na, e Tavini Au no Iehova’!

2. Akapeea a Maria i kite ei i ta te vaerua tapu i rave?

² Ko Maria tetai i roto i taua pia mamaata ra i runga, i Ierusalema, te riringiia mai anga te  vaerua tapu tei taputouia mai. (Anga. 1:13, 14) Inara, tere atu i te toru ngauru mataiti i mua ake i taua tupuanga ra, kua kite ana aia i te au mea umere ta te vaerua o Iehova i rave. Kua taui mai a Iehova i te oraanga o tana Tamaiti mei runga i te rangi ki te enua nei, te akatupu anga ia Maria kia nui i tona paretenia anga. ‘Na te vaerua tapu’ i nui ei aia.​—Mata. 1:20.

3, 4. Eaa te tu ta Maria i akaari mai, e akapeea tatou me aru iaia?

³ Eaa i orongaia ai taua tikaanga ngateitei umere tikai kia Maria? Muri ake te akamarama anga te angera i to Iehova anoano no runga iaia, kua tuatua a Maria e: ‘I na, e tavini au no Iehova; kia peraia mai au mei taau i tuatua ana.’ (Luka 1:38) Te tuatua akapera anga aia, kua akaari a Maria i tona tu ngakau akaaka, kua kite ke ana te Atua. Tona ariu viviki mai anga, kua akaari mai aia e kua papa aia i te ariki i to Iehova anoano. Kare aia i ui ana eaa ta te au tangata o te oire ka manako mai no runga iaia no tei nui aia, me kore eaa ta te reira ka akatupu ki tona pirianga ki tana tane ka akaipoipo. Na te karanga anga e e tavini ua aia, kua akaari mai a Maria e te irinaki pu tikai ra aia ia Iehova ei Pu nona.

⁴ Kua manako ana ainei koe i tetai taime e e pakari tikai te au akaaoanga me kore te au apainga i roto i te angaanga a te Atua? E mea tau no tatou tataki tai kia ui kia tatou uaorai e: ‘Te irinaki pu tikai ra ainei au e ka akono a Iehova i te au mea ravarai kia tau ki tona anoano? Te akaari tikai ra ainei au i te ngakau puareinga?’ Kia papu e ka oronga mai te Atua i tona vaerua ki te aronga te irinaki ra kiaia ma to ratou ngakau katoa e te ariki ra i tona turanga ngateitei.​—Anga. 5:32.

Kua Tauturu te Vaerua Tapu ia Petero

5. Eaa te au mataara i kite ei a Petero i te vaerua tapu te angaanga anga i mua ake i te Penetekote 33 T.N.?

⁵ Mei ia Maria rai, kua kite katoa ana te apotetoro ko Petero i te angaanga ririnui a te vaerua tapu o te Atua i mua ake i te Penetekote 33 T.N. Kua oronga a Iesu kiaia e ki tetai au apotetoro te mana kia tuaru i te au temoni. (Mare. 3:14-16) Noatu e kare te au Tuatua Tapu i oronga mai ana i te au akatakaanga e manganui, i te akaraanga kua taangaanga a Petero i taua mana ra. Kua akaari katoaia mai to te Atua mana te pati anga a Iesu ia Petero kia aere mai na runga i te Tai o Galilea, e kua rave a Petero i te reira. (E tatau ia Mataio 14:25-29.) Taka meitaki ua ra e kua irinaki a Petero i te vaerua tapu kia tauturu iaia kia rave i te au angaanga ririnui. Kare e roa ka oronga taua vaerua ra i te mana kia Petero e tetai atu au pipi kia rave i tetai atu au angaanga.

6. Na roto i te vaerua o te Atua, eaa ta Petero i rave i te Penetekote 33 T.N. e i muri mai?

⁶ I ko i te Oroa o Penetekote 33 T.N., kua oronga temeioia kia Petero e tetai atu te kite kia tuatua i te au reo o te aronga tei aere mai ki Ierusalema. Muri mai, kua tu akera a Petero e kua tuatua ki te au tangata tei akaputuputu mai. (Anga. 2:14-36) Ae, kua akakeuia teia tangata manako rererere e te mataku kia tutu mataku kore atu, noatu te tamatakutakuanga e te takinokinoanga. (Anga. 4:18-20, 31) Kua oronga te Atua i te kite umere tikai kiaia. (Anga. 5:8, 9) E kua akamanaia aia kia akatuakaou mai i tetai tangata.​—Anga. 9:40.

7. Eaa te au apiianga a Iesu ta Petero i marama i muri ake tona akatainuia anga?

⁷ I mua ake i te Penetekote, kua marama a Petero i te au tuatua mou e manganui ta Iesu i apii. (Mata. 16:16, 17; Ioa. 6:68) Inara te vai ra tetai au tuatua mou o ta Iesu apiianga kare e taka roa ana iaia i mua ake i te Penetekote. Ei akatauanga, kare a Petero i kite ana e ka akatuakaouia mai a Karaiti ei vaerua i te toru o te ra; e kare katoa a Petero i marama ana e tei runga te Patireia i te rangi. (Ioa. 20:6-10; Anga. 1:6) Kare a Petero e marama ana akapeea te au tangata te riro anga ei au mea ora vaerua e te tutaraanga i te Patireia i runga i te rangi. Muri ake te papetitoia anga aia e te vaerua tapu e te orongaia anga te manakonako anga no te rangi, i marama ai aia i ta Iesu au apiianga no runga i taua au tumu manako ra.

8. Eaa te kite tei rauka mai i te aronga akatainuia e te “mamoe ke atu”?

 ⁸ Kua rauka mai te marama tei kare i rauka ana i te au pipi a Iesu i mua ana, i muri ake i te riringiia mai anga te vaerua tapu. Kua akauruia te aronga tata o te au Tuatua Tapu Ereni Kerititiano kia akamarama mai i tetai au tuanga umere tikai o to Iehova akakoroanga kia puapingaia tatou. (Ephe. 3:8-11, 18) Teia tuatau, te apii nei e te marama nei te aronga tei akatainuia e te vaerua e te aronga o te “mamoe ke atu” i teia au tuatua mou. (Ioa. 10:16) Te akaperepere ra ainei koe i te kite e te marama o te Tuatua a te Atua ta te vaerua tapu i oronga mai kia koe?

‘Ki Akera a Paulo i te Vaerua Tapu’

9. Eaa ta Paulo i akatupu na roto i te vaerua tapu?

⁹ E tai mataiti i muri ake ia Penetekote 33 T.N., kua oronga katoaia ki tetai tangata te apinga aroa a te Atua, te vaerua tapu. Ko Saula taua tangata ra, tei riro mai e ko Paulo. Kua angaanga te vaerua ki rungao iaia na roto i te au mataara e puapinga ra tatou i teia tuatau. Kua akauruia te apotetoro ko Paulo kia tata e 14 puka o te Pipiria. Mei tei tupu kia Petero, kua tauturu te vaerua o te Atua ia Paulo kia marama e kia tata taka meitaki mai i te manakonakoanga no te oraanga mutu kore e te tiama i runga i te rangi. Na roto i te vaerua tapu, kua rapakau a Paulo i te au maki, tuaru i te au temoni, e kua akatu akaou mai i tei mate! Inara, e akakoroanga puapinga maata atu ta te mana o te vaerua tapu, ta te au tavini o te Atua e kite nei i teia tuatau, noatu e kare e rauka mai ana na roto i te tu temeio.

10. Akapeea te vaerua tapu te tauturu anga ia Paulo kia tuatua?

¹⁰ Kua tuatua a Paulo tei ‘kiia e te vaerua tapu,’ ma te mataku kore no runga i tetai tangata purepure. Kua akakeuia te akaaere maata o Kupero, tona akarongo anga i te pukapukaanga! Kua ariki taua tutara ra i te tuatua mou, ‘va rava atura oki i te tuatua a Iehova.’ (Anga. 13:8-12) Taka meitaki ua ra e kua kite meitaki a Paulo i te puapinga o te vaerua tapu o te Atua no te tuatua anga i te tuatua mou. (Mata. 10:20) Muri mai kua pati aia ki te putuputuanga i Ephesia kia pure nona kia rauka iaia i te “tuatua atu.”​—Ephe. 6:18-20.

11. Akapeea a Paulo te aratakiia anga e te vaerua o te Atua?

¹¹ Kua tauturu te vaerua tapu ia Paulo kia tuatua, tetai au taime ra kua tapu te reira iaia kia kore e tuatua i tetai au ngai ke. Te akamataanga aia i tona au tere mitinari, kua aratakiia a Paulo e te vaerua o te Atua. (Anga. 13:2; e tatau ia Angaanga 16:6-10.) Te arataki nei rai a Iehova i te angaanga tutu anga na roto i tona vaerua. Mei ia Paulo rai, te tauta ra te au tavini akarongo pouroa o Iehova i te akakite aere i te tuatua mou ma te mataku kore e te maroiroi. Noatu e tuke te aratakianga a te Atua i teia tuatau mei to Paulo tuatau, papu ia tatou e te taangaanga ra a Iehova i tona vaerua tapu ei akapapu e ka akarongo mai te aronga tei tau ki te tuatua mou.​—Ioa. 6:44.

“Manganui rai oki te Angaanga”

12-14. Te angaanga aiteite ra ainei te vaerua o te Atua i rungao i tana au tavini pouroa? Akamarama mai.

¹² E akamaroiroianga ainei te au akakiteanga no ta Iehova akameitakianga i te putuputuanga o te aronga akatainuia i te anere mataiti mua, ki te au tavini akatapuia o te Atua i teia tuatau? Ae!  Akamanako ana i ta Paulo au tuatua akauruia ki te putuputuanga i Korinetia no te au angaanga temeio a te vaerua i tona tuatau: ‘E manganui te tu o te au mea i orongaia mai, okotai ra vaerua. E manganui rai oki te taoonga, okotai ra Atu. Manganui rai oki te angaanga, okotai ra Atua e anga i te au mea katoa ki roto i te tangata katoa.’ (1 Kori. 12:4-6, 11) Ae, ka rauka i te vaerua tapu i te angaanga ki runga i te au tavini tukeke o te Atua na roto i te au tu tukeke no tetai akakoroanga. Ae, te arataki ra te vaerua tapu i te “anana iti” a Karaiti e tana “mamoe ke atu.” (Luka 12:32; Ioa. 10:16) Inara, kare te reira e angaanga aiteite ua ana ki runga i te au mema tataki tai o te putuputuanga.

¹³ Ei akatauanga, na te vaerua tapu e iki ana i te aronga pakari. (Anga. 20:28) Kare te aronga pouroa tei akatainuia e te vaerua e tavini ana ei au akaaere i roto i te putuputuanga. Eaa to tatou manako no runga i teia? Taka ua ra e te angaanga ra te vaerua o te Atua na roto i te au mataara tukeke i rungao i te au mema o te putuputuanga.

¹⁴ Ko te vaerua tei oronga i te ‘vaerua akatamariki’ ki te aronga akatainuia, ko taua vaerua rai ta Iehova i taangaanga i te akatu mai i tana Tamaiti anau tai mei te mate ki te oraanga mutu kore i te rangi. (E tatau ia Roma 8:11, 15.) Ko taua vaerua rai ta Iehova i taangaanga i te anga mai anga i te ao katoa e pini ua ake. (Gene. 1:1-3) Na roto i taua vaerua tapu ra, kua taangaanga a Iehova ia Bezaleela kia rave i tetai angaanga puapinga i runga i te tapenakara, kua akaketaketaia a Samasona kia rave i te au angaanga te umuumuia ra te maroiroi, e kua tauturu ia Petero kia aere na runga i te tai. Inara, auraka tatou e manako e e aiteite ua me aratakiia e te vaerua o te Atua ki te akatainu anga ki te vaerua o te Atua, no te mea e tuanga takake rava me akatainuia ki te vaerua o te Atua. Na te Atua rai e iki ana e koai tana ka akatainu ki te vaerua.

15. Ka rave uaia ainei te papetitoanga ki te vaerua tapu e tuatau ua atu? Akamarama mai.

¹⁵ Kua angaanga ua ana te vaerua tapu o te Atua i roto i te au mataara tukeke ki rungao i tana au tavini akarongo mou no te tauatini ua atu mataiti i mua ake ka akamata ai te akatainuia anga ki te vaerua. Kua akamata mai te akatainu anga i te Penetekote 33 T.N., inara kare te reira e rave uaia atu. Ka ope te papetitoanga ki te vaerua, inara ka angaanga ua rai te vaerua tapu ki rungao i te iti tangata o te Atua kia rauka ia ratou i te rave i tona anoano e tuatau ua atu.

16. Eaa ta te au tavini o te Atua e rave ra i teianei na roto i tona vaerua tapu?

¹⁶ Eaa tikai te raveia ra i te enua nei na roto i te vaerua tapu o Iehova? Te pau maira a Apokalupo 22:17 e: ‘E te tuatua nei te vaerua ma te vaine akaipoipo ou ra, E aere mai. E ko tei akarongo ra, ka tuatua katoa aia e, E aere mai. E ko tei kaki ra, ka aere mai.’ Ma te akakeu anga a te vaerua o te Atua, te oronga nei te au Kerititiano i teia tuatau i ta Iehova patianga no te ora ki “tei anoano ua,” kia ariki mai i te vai ora. Ko te au Kerititiano akatainuia te arataki nei i teia angaanga. E kua kapiti mai te mamoe ke atu kia ratou i te oronga anga i teia patianga. Te angaanga kapiti ra teia nga pupu ma taua vaerua tapu ra i te akatupu anga i teia angaanga. Kua akatutu mai taua nga pupu ra i to ratou akatapuanga kia Iehova na roto i te papetito anga ‘i te ingoa o te Metua, e no te Tamaiti, e no te vaerua tapu.’ (Mata. 28:19) Kua kauraro pouroa ratou ki te angaanga a te vaerua o te Atua i roto i to ratou oraanga, te akatika anga i te reira kia akatupu i te au ua o te vaerua ki roto ia ratou. (Gala. 5:22, 23, NW) Mei te aronga akatainuia, kua akatika te mamoe ke atu i te vaerua o te Atua kia tauturu ia ratou. Ma te tauturu a te vaerua tapu, ka rave ratou i te ka rauka ia ratou ki tau ki ta Iehova au umuumuanga no te tu tapu.​—2 Kori. 7:1; Apo. 7:9, 14.

Pati ua rai i te Vaerua Tapu

17. Akapeea tatou me akapapu e tei ia tatou te vaerua o te Atua?

¹⁷ Me e manakonakoanga toou no te oraanga mutu kore i te rangi me no te enua nei, ka oronga mai a Iehova i “te mana maata meitaki” kia rauka ia koe i te akono tamou i toou  tu tiratiratu e kia rauka te akameitakianga. (2 Kori. 4:7) Ka aviriia koe me tutu ua rai koe i te tuatua meitaki o te Patireia. E akamaara ra e ‘ka akakinoia kotou i te ingoa o te Mesia ra, e ao to kotou; no te mea te noo ra te vaerua kakā, te vaerua o te Atua, ki runga ia kotou.’​—1 Pete. 4:14.

18, 19. Akapeea a Iehova te tauturu anga ia koe na roto i tona vaerua tapu, e eaa taau ka tauta i te rave no runga i teia?

¹⁸ Ka oronga ua mai te Atua i te apinga aroa o te vaerua tapu ki te aronga e pati ngakau tae ra i te reira. Ka akameitaki mai te reira i toou tu karape e toou inangaro kia rave i te ka rauka ia koe i roto i tana angaanga. “Ko te Atua oki tei angaanga ki roto ia kotou, i te inangaro e te rave, mei tana i anoano ra.” Ka tauturu mai te apinga akaperepere o te vaerua tapu, e ta tatou au tauta anga pakari kia ‘mou piri tikai tatou i te tuatua ora’ e kia ‘rave akaoti i to tatou uaorai ora ma te mataku e te rutetetete.’​—Phili. 2:12, 13, 16, NW.

¹⁹ Ma te irinaki pu tikai anga i te vaerua o te Atua, e angaanga pakari i te rave i te au angaanga ravarai, kia tukatau i te rave i tei orongaia mai kia koe, e kia pati kia Iehova no tana tauturu. (Iako. 1:5) Ka oronga mai aia i taau e anoano ra kia marama i tana Tuatua, kia akakoromaki i te au manamanata o te oraanga, e kia tutu aere i te tuatua meitaki. “E pati, e e orongaia mai ta kotou; e kimi, e kitea ïa ia kotou; e topāpā atu, e kiritiia mai te pa ia kotou,” e te kapiti maira teia i te rauka mai anga i te vaerua tapu. (Luka 11:9, 13) Ae, e pati ua rai kia Iehova kia aite koe mei te aronga akarongo mou​—i te tuatau taito e i teia tuatau—​tei aratakiia e te vaerua tapu o te Atua.

Ka Rauka Ainei ia Koe te Akataka?

• Mei ia Maria rai, eaa te tu ka akaari tatou kia rauka te au akameitakianga?

• Na teea tu i aratakiia ai a Paulo e te vaerua o te Atua?

• Akapeea te au tavini o te Atua me aratakiia e te vaerua o te Atua i teia tuatau?

[Au Uianga Apii]

[Tutu i te kapi 24]

Kua tauturu te vaerua o te Atua ia Paulo kia autu i te akakeuanga a te vaerua kino

[Tutu i te kapi 26]

Teia tuatau, ka tauturu te vaerua tapu i te au Kerititiano, noatu eaa to ratou manakonakoanga