‘Akapeea e Rauka ai Iaku te Tutu Aere?’

I roto i teianei ao, e au taeake e e au tuaine to tatou e akaraanga meitaki tikai to ratou, te rave akarongo mou ra i te angaanga tutuanga noatu te au tu maki kino. Ko Dalia tetai akaraanga, e noo ana i Vilnius, te oire maata o Rituania.

E tuaine a Dalia e 30 tuma ona mataiti. Mei tona anau mai anga kua akamate tetai ngai o tona roro. Kua akaparuparu taua maki ra i tona kopapa e kua ngata tikai iaia te tuatua. Ko te au mema pamiri ua te marama ra iaia. E noo ana a Dalia ki ko i tona mama ko Galina, e nana e akono ana iaia. Noatu e maata te au tu kino e te taitaia i roto i te oraanga o Dalia, kua vai rai tona tu manako papu. Akapeea i rauka ai te reira?

Kua akamarama mai a Galina e: “I te mataiti 1999, kua atoro mai toku katini ko Apolonija ia maua. Kua kite mai maua e kua kite tikai a Apolonija, tetai o te Au Kite o Iehova, i tana Pipiria, e e maata ta maua uianga i uiui atu kiaia. Kare i roa ana, kua apii aia i te Pipiria kia Dalia. Tetai taime ka piri atu au ki ta raua apii i te uri atu i ta Dalia au tuatua. Kua kite mai au e te puapinga tikai ra a Dalia mei tana au mea e apii ra. Kua pati katoa atu au i tetai apii Pipiria naku.”

Ia Dalia e marama maira i te au tuatua mou Pipiria, kua manamanata aia no runga i tetai uianga. E kua ui aia kia Apolonija e: “Akapeea toku tu​—pirikoki—​e rauka ai i te tutu aere?” (Mata. 28:19, 20) Kua akapapu atu a Apolonija kia Dalia e: “Auraka e mataku. Ka tauturu mai a Iehova ia koe.” Tika rai, kua tauturu mai a Iehova iaia.

Akapeea i rauka ai ia Dalia i te tutu aere? Maata te au mataara. Kua tauturu te au tuaine Kerititiano iaia kia akapapa i tetai au reta ma te au karere Pipiria. Mea mua, ka akakite a Dalia i tona manako ki te au tuaine. E ka tata ratou i tona manako ki roto i te reta. E akakitekite katoa ana a Dalia na te tuku karere anga na runga i tana terepaoni apaipai aere. Me meitaki te reva, e apai ana te au mema putuputuanga iaia kia aravei i te au tangata i roto i te paka e i runga i te mataara.

Kua tere a Dalia e tona mama ki mua i roto i te tuatua mou. Kua akatapu raua ia raua uaorai kia Iehova e kua papetitoia i roto ia Noema 2004. Kua akamata tetai pupu reo Porani i Vilnius i roto ia Tepetema 2008. E kua piri atu a Dalia raua ko tona mama ki roto no te mea te anoano maataia ra te au papuritia o te Patireia i reira. Kua tuatua a Dalia e: “Tetai au marama e manamanata ana au me kare au i aere ana ki vao i te tutu aere. Muri ake te pure anga i te reira kia Iehova, kare i roa ana kua pati mai tetai papuritia kia angaanga kapiti maua ki roto i te angaanga orometua.” Eaa ra te manako o to tatou tuaine akaperepere ko Dalia no runga i tona turanga? Kua akakite mai aia e: “Kua akamate te maki i toku kopapa, kare ra te reira i akamate i toku manako. Te mataora tikai nei au i te akakite ki tetai ke no runga ia Iehova!”