“E uki ikiia ra kotou, e kau taunga ariki, e iti-tangata tapu, e aronga okoia.”​—1 PETE. 2:9.

1. Eaa ra te “kaikai anga aiai a te Atu” i kapiki katoaia ai e ko te Akamaaraanga, e eaa ra tona akakoroanga?

I TE aiai o Nisana 14 i te mataiti 33 T.N., te akono ra a Iesu Karaiti e tana 12 apotetoro i te Pasa ngati Iuda no te taime openga. Muri ake te akaateaia anga te tangata pikikaa ko Iuda Ikariota, kua akakite a Iesu i tetai akamaaraanga tuke, tei kapikiia i muri mai e ko “te kaikai anga aiai a te Atu.” (1 Kori. 11:20, NW) E rua taime to Iesu tuatua anga e: “E pera kotou ei manako anga iaku.” Kua kite katoaia teia angaanga e ko te Akamaaraanga, e akamaaraanga i te mate o Karaiti. (1 Kori. 11:24, 25) Te akarongo anga ki teia akauenga, e akono ana te Au Kite o Iehova i te ao katoa i te Akamaaraanga i te au mataiti ravarai. A te mataiti 2012, ka akamata te ra 14 o Nisana o te karena Pipiria i te opunga ra, a te Paraparau, ra 5 o Aperira.

2. Eaa ta Iesu i tuatua no runga i te varaoa e te uaina?

² Kua akakite mai te pipi ko Luka i ta Iesu i rave e i tuatua i taua atianga ra i roto i te nga irava e: “Kua rave iora aia i te manga, akameitaki atura, vavaʼi iora, tuku atura kia ratou, na ko atura, Toku kopapa teia, e orongaia no kotou; e akapera kotou ei manako anga iaku. E kua pera katoa iora i te kapu, kia oti ake te kai anga, na ko atura, Teianei kapu, ko te koreromotu ïa i toku nei toto, e akamaringiia no kotou nei.” (Luka 22:19, 20) Akapeea te au apotetoro te marama anga i teia au tuatua?

3. Akapeea te au apotetoro te marama anga i te aiteanga o te varaoa e te uaina?

³ Ei au ngati Iuda, kua matau te au apotetoro i te au atinga manu ta te kau taunga e oronga ana ki te Atua i te iero i Ierusalema. Kua orongaia taua au atinga ra ei akamareka ia Iehova, e kua riro te maataanga o te au atinga ei tapokiangaara. (Levi. 1:4; 22:17-29) No reira kua marama te au apotetoro i ta Iesu  tuatua anga e ‘ka orongaia tona kopapa e ka akamaringiia tona toto no ratou,’ te aiteanga ka oronga aia i tona oraanga apa kore ei atinga. E atinga puapinga roa atu ia i to te au manu.

4. Eaa te aiteanga o ta Iesu tuatua e: “Teianei kapu, ko te koreromotu [ou] ïa i toku nei toto”?

⁴ Akapeea ra ta Iesu au tuatua no runga i “teianei kapu, ko te koromotu [ou] ïa i toku nei toto”? Kua kite te au apotetoro i te totou no runga i te koreromotu ou, tei rekotiia i roto ia Ieremia 31:31-33. (E tatau.) Te akaari maira ta Iesu au tuatua e te akanoo ra aia i teianei i tetai koreromotu ou, te ka mono i te Ture koreromotu ta Iehova i akatinamou kia Iseraela na roto ia Mose. E pirianga ainei to teia nga koreromotu?

5. Eaa te au manakonakoanga ta te Ture koreromotu i oronga ki to Iseraela?

⁵ Ae, te turuturu ra teia nga koreromotu e tai akakoroanga. To Iehova oronga anga i te Ture koreromotu, kua akakite aia ki te iti tangata e: “Kia akarongo tikai kotou i toku reo, e kia akono i taku ra koreromotu, ka riro ïa kotou ei apinga akaperepere maata naku, i te au tangata ravarai ra: noku uaorai oki te ao katoa nei: E riro rai kotou ei basileia taunga naku, e ei iti-tangata tapu.” (Exo. 19:5, 6) Eaa te aiteanga o teia au tuatua ki to Iseraela?

TAPUTOU NO TETAI KAU TAUNGA ARIKI

6. Eaa te taputou ta te Ture koreromotu i akatupu mai?

⁶ Kua marama te ngati Iseraela i te tuatua “koreromotu,” no te mea kua papau a Iehova i taua koreromtou ra ki to ratou ui tupuna ko Noa raua ko Aberahama. (Gene. 6:18; 9:8-17; 15:18; 17:1-9) Ei tuanga no tana koreromotu kia Aberahama, kua taputou a Iehova e: “Ka meitaki te pa enua katoa o te ao nei i toou ra uanga.” (Gene. 22:18) Kua oronga mai a Iehova i te Ture koreromotu ei akatupu i teia taputou. Te akatumu anga ki runga i te reira, ka riro mai a Iseraela ‘ei apinga akaperepere maata, i te au tangata ravarai’ na Iehova. Eaa te akakoronga? Kia ‘riro mai ei basileia taunga na Iehova.’

7. Eaa ra te aiteanga o te tuatua “basileia taunga”?

⁷ Kua matau te ngati Iseraela i te kite i te ui ariki e te kau taunga, inara ko Melekizedeka te tangata anake ua ta Iehova i ariki ei ariki e ei taunga i te tuatau i topa. (Gene. 14:18) Kua oronga a Iehova i teianei i te atianga ki te iti tangata kia iki i tetai “basileia taunga.” Mei ta te au tataanga akauruia i akakite mai i muri mai, kua tae mai te tuatau i te iki i tetai kau taunga ariki, te ka riro mai ei ui ariki e ei kau taunga.​—1 Pete. 2:9.

8. Eaa te au angaanga ta te kau taunga tei ikiia e te Atua e oronga ra?

⁸ E tutara ana tetai ariki. Inara eaa ta te taunga e rave ana? Te akamarama maira a Ebera 5:1 e: “Ko te kau taunga mamaata katoa i ikiia no roto i te tangata nei, kua akonoia ïa na te tangata, ei rave i te au mea o te Atua ra, ei apai i te atinga e te tarangaara ra.” Ka riro tetai taunga tei ikiia e Iehova, ei mata no te au tangata ara i mua i te aroaro o te Atua na te oronga anga i te au atinga, te pati akatenga anga Kiaia no ratou. Pera katoa, ka riro tetai taunga ei mata no Iehova i mua i te au tangata, te apiianga i te ture a te Atua kia ratou. (Levi. 10:8-11; Mala. 2:7) Na roto i teia tu, te akaongi ra te kau taunga tei ikiia e te Atua i te au tangata ki te Atua.

9. (a) I roto i teea turanga i kite ei a Iseraela i te taputou kia riro mai ei “basileia taunga”? (e) Eaa a Iehova i akanoo ei i tetai kau taunga i roto ia Iseraela? (ng) Eaa tei arai ia Iseraela kia kore e riro mai ei “basileia taunga” i raro ake i te Ture koreromotu?

⁹ Kua oronga te Ture koreromotu i te atianga kia Iseraela kia iki i te kau taunga ariki te ka puapingaia te “au tangata ravarai.” Inara, e umuumuanga tetai no teia akameitakianga umere e:  “Kia akarongo tikai kotou i toku reo, e kia akono i taku ra koreromotu.” Ka ‘akarongo ainei te ngati Iseraela i to Iehova reo’? Ae, i tetai taime. Ka rave ainei ratou i te reira ma te tu apa kore? Kare. (Roma 3:19, 20) No teia tumu nei i iki ei a Iehova i tetai kau taunga i roto ia Iseraela. Kare teia kau taunga e riro mai ei au ariki. Ka oronga ratou i te au atinga manu no te au ara a te iti tangata. (Levi. 4:1–6:7) Te kapiti maira teia i te au ara a te kau taunga. (Ebe. 5:1-3; 8:3) Kua ariki a Iehova i taua au atinga ra, inara kare te reira i akakore takiri i te au ara a te ngati Iseraela. E kare i rauka i te kau taunga i raro ake i te Ture koreromotu i te akaongi i te au ngati Iseraela ngakau tika ki te Atua. Kua tuatua te apotetoro ko Paulo e: “Kare rava e tika i te toto puakatoro e te puaka-nio kia akakore i te ara.” (Ebe. 10:1-4) No te mea kua aati ratou i te Ture, kua taumaaia te ngati Iseraela. (Gala. 3:10) Kare ratou e tavini ei kau taunga ariki i teianei ao i roto i taua turanga ra.

10. Eaa te akakoroanga o te Ture koreromotu?

¹⁰ Puapinga kore ainei ta Iehova taputou e ka riro mai ratou ei “basileia taunga”? Kare rava. Naringa ratou i akarongo, ka rauka ia ratou teia tikaanga​—kare ra i raro ake i te Ture. No teaa ra? (E tatau ia Galatia 3:19-25.) Ko te aronga tei tauta akarongo mou i te aru i te reira, ka rauka i te Ture i te akatinamou i te akamorianga ma. Kua tauturu te reira i te ngati Iuda kia kite i ta ratou au ara e te anoanoia ra tetai atinga tei maata atu i ta te taunga maata e oronga ra. No reira, kua riro te Ture ei “arataki,” te ka akapapa ia ratou kia ariki i te Karaiti, me kore te Mesia. Te aiteanga o teia nga ingoa ko “Tei Akatainuia.” Inara, me tae mai te Mesia, ka oronga mai aia i te koreromotu ou ta Ieremia i totou mai. Te aronga tei ariki i te Karaiti, kua patiia kia riro mai ei tuanga no te koreromotu ou e ei “basileia taunga.” Akara ana tatou e akapeea.

AKATUPU MAI TE KOREROMOTU OU I TE KAU TAUNGA ARIKI

11. Akapeea a Iesu te riro anga ei tango no te kau taunga ariki?

¹¹ I te mataiti 29 T.N., kua riro mai a Iesu o Nazareta e ko te Mesia. Tae anga aia ki te 30 mataiti, kua oronga aia iaia uaorai kia rave i to Iehova anoano takake, te akatutuanga i teia na te papetitoanga ki roto i te vai. Kua ariki a Iehova iaia e ko “Taku Tamaiti akaperepere,” te akatainu anga iaia, kare ki te manongi, mari ra ki te vaerua tapu. (Mata. 3:13-17; Anga. 10:38) Kua akamana taua akatainu anga ra iaia ei Taunga Maata e ei Ariki no te tuatau ki mua no te au tangata irinaki ravarai. (Ebe. 1:8, 9; 5:5, 6) Koia te tango o te kau taunga ariki tika tikai.

12. Eaa ta te atinga o Iesu i akatupu mai?

¹² Ei Taunga Maata, eaa te atinga ta Iesu ka oronga ei tapoki i te ara a te aronga irinaki? Mei tana rai i akakite mai te akanoo anga i te Akamaaraanga o tona mate, kua riro tona uaorai oraanga apa kore ei atinga. (E tatau ia Ebera 9:11, 12.) Mei te taime o tona papetitoanga i te mataiti 29 T.N., ei Taunga Maata kua ariki a Iesu i te au timataanga e te au terenianga e tae ua atu ki tona mate. (Ebe. 4:15; 5:7-10) Muri ake tona akatuia mai anga, kua aere atu aia ki te rangi e kua oronga atu i te puapinga o tona atinga kia Iehova. (Ebe. 9:24) Mei reira mai, ka pati a Iesu kia Iehova no te aronga e tuku ra i te akarongo ki roto i tona atinga, e te tauturu anga ia ratou kia tavini i te Atua ma te manakonakoanga no te ora mutu kore. (Ebe. 7:25) Kua riro katoa tona atinga ei akamana anga i te koreromotu ou.​—Ebe. 8:6; 9:15.

13. Eaa te manakonakoanga no te aronga tei patiia kia o atu ki roto i te koreromotu ou?

¹³ Te aronga tei patiia kia o atu ki roto  i te koreromotu ou ka akatainu katoaia ki te vaerua tapu. (2 Kori. 1:21) Kua kapitiia atu te au ngati Iuda akarongo mou e i muri mai ko te au Kenitara. (Ephe. 3:5, 6) Eaa te manakonakoanga no te aronga tei o atu ki roto i te koreromotu ou? Ka akakore takiriia ta ratou ara. Kua taputou mai a Iehova e: “E akakore oki au i ta ratou ara, e kare au e manako akaou i to ratou kino.” (Iere. 31:34) No te mea kua akakore takiriia ta ratou ara, e tikaanga to ratou kia riro mai ei “basileia taunga.” Te tuatua anga ki te au Kerititiano akatainuia, kua tata a Petero e: “E uki ikiia ra kotou, e kau taunga ariki, e iti-tangata tapu, e aronga okoia; kia akakite ua kotou i tona meitaki, to tei kapiki ia kotou i to roto i te poiri, kia tae ki tona mārama umereia ra.” (1 Pete. 2:9) Te taiku ra a Petero i ta Iehova au tuatua kia Iseraela te oronga anga i te Ture e te taangaanga anga i te reira ki te au Kerititiano i roto i te koreromotu ou.​—Exo. 19:5, 6.

KAU TAUNGA ARIKI KIA PUAPINGAIA TE AU TANGATA RAVARAI

14. Ka tavini te kau taunga ariki kiea?

¹⁴ Ka tavini te aronga i roto i te koreromotu ou kiea? Ei pupu tangata i te enua nei, ka tavini ratou ei kau taunga ariki, e ka riro mai ei mata no Iehova na te ‘akakite anga i tona meitaki’ ki te au tangata e te oronga anga i te kai pae vaerua. (Mata. 24:45; 1 Pete. 2:4, 5) Muri ake i to ratou mate e te tuakaouanga, ka rave ratou i te angaanga ei ui ariki e ei kau taunga ma te Karaiti i runga i te rangi. (Luka 22:29; 1 Pete. 1:3-5; Apo. 1:6) Ei akapapu i teia, i roto i tetai orama kua kite atu te apotetoro ko Ioane i te au mea ora vaerua i te pae i to Iehova terono i te rangi. I roto i “te imene ou” ki te “Punua-mamoe,” te imene ra ratou e: “Kua oko koe ia matou ei tangata no te Atua i toou uaorai toto, no roto i te au kopu ravarai, e te au reo katoa, e te au iti-tangata katoa, e te pa enua katoa; E kua akariro koe ia matou ei ui ariki e ei kau taunga na to matou Atua: [“e kia tutara ratou ei au ariki i rungao i te enua nei,” NW].” (Apo. 5:8-10) I roto i tetai orama i muri mai, kua tuatua a Ioane no runga i teia au tutara e: “E riro ra ratou ei taunga na te Atua, e na te Mesia, e e au to ratou iaia e kia okotai tausani i te mataiti.” (Apo. 20:6) Kua akanoo teia ui ariki e Karaiti i tetai kau taunga ariki kia puapingaia te au tangata ravarai.

15, 16. Eaa te au akameitakianga ta te kau taunga ariki ka oronga mai ki te au tangata?

 ¹⁵ Eaa te au akameitakianga ta te 144,000 ka oronga mai no te au tangata i te enua nei? Te akatutu maira a Apokalupo pene 21 i te reira ei oire i te rangi, ko Ierusalema Ou, tei kapikiia e ko “te vaine a te Punua-mamoe.” (Apo. 21:9) Te akakite ra te irava 2 ki te 4 e: “E kite atura oki au nei ko Ioane i te oire tapu ra, ko Ierusalema ou, i te eke anga mai mei ko mai i te Atua i runga i te rangi, kua akamaneaia mei te vaine i akamaneaia no te akaipoipo anga ki tana tane ra, Kua akarongo atura au i tetai reo maata no te rangi maira, i te na ko anga mai e, I na, tei ko te tangata ra te puakapa o te Atua e e noo aia ki rotopu ia ratou, e riro ratou ei tangata nona, e e noo te Atua ki rotopu ia ratou, ei Atua no ratou. E nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.” E au akameitakianga mataora tikai teia! Me takoreia te mate, kare te roi mata, te aue, te mii e te mamae e tupu akaou. Ka akaokiia te au tangata akarongo mou ki te turanga apa kore, na te akaongi anga ia ratou ki te Atua.

¹⁶ Te akataka mai anga i teia au akameitakianga ta teia kau taunga ariki ka oronga mai, te akakite ra a Apokalupo 22:1, 2 e: “Kua akakite maira aia iaku i tetai vai ora, e vai taʼe oki, mei te io te areare, no roto mai i te terono o te Atua e to te Punua-mamoe ra. E tei rotopu i te arataa [o Ierusalema Ou] i taua oire ra, e tei tetai pae vai e tetai pae, ko te rakau ora te tu anga, okotai ngauru ma rua tu o te ua, okotai marama okotai ua anga, e ope rava ake te au marama katoa ra: e te rau o taua rakau ra, ko te rapakau ïa i to te pa enua.” Na roto i teia au akameitakianga akatutu ua, ka akaora takiriia “te pa enua” mei te turanga apa ta Adamu i tuku mai ki runga i te au tangata. Tika rai, ‘ka kore te au mea taito.’

OTI MEITAKI TE ANGAANGA A TE KAU TAUNGA ARIKI

17. Eaa ta te kau taunga ariki ka akatupu?

¹⁷ Tae ua atu ki te openga o te 1,000 mataiti tavinianga, ka tauturu mai te kau taunga ariki i te au tangata kia riro mai ei au tangata apa kore. Ei Taunga Maata e ei Ariki, ka oronga atu a Karaiti i te au tangata apa kore kia Iehova. (E tatau ia 1 Korinetia 15:22-26.) Kua oti meitaki i reira te angaanga a te kau taunga ariki.

18. Muri ake te oti anga te angaanga a te kau taunga ariki, akapeea a Iehova me taangaanga i te au oa o Karaiti?

¹⁸ Muri ake i te reira, akapeea a Iehova te taangaanga anga i teia au oa ngateitei tikai o Karaiti? Kia tau kia Apokalupo 22:5, ‘ka tutara ratou ei ui ariki e tuatau ua atu.’ Ki runga ake iaai ma? Kare te Pipiria i akakite mai ana. Inara no to ratou tu oraanga e to ratou tu tukatau i te tauturu anga i te au tangata apa o teianei ao, ka rauka ia ratou i te rave ua rai i te taoonga ariki i te akatupu i ta Iehova akakoroanga e tuatau ua atu.

19. Eaa te ka akamaaraia ki te aronga tei tae mai ki te Akamaaraanga?

¹⁹ Me akaputuputu mai tatou i te akono i te Akamaaraanga o to Iesu mate a te Paraparau, ra 5 o Aperira 2012, ka maara ia tatou teia au apiianga Pipiria. Ka kai te toenga o te au Kerititiano akatainuia i runga nei i te enua i te varaoa opue kore e ka inu i te uaina muramura, te akatutuanga e e mema ratou no te koreromotu ou. Ka riro teia nga akatutuanga o te atinga o Karaiti ei akamaara anga kia ratou i to ratou tikaanga umere e ta ratou au apainga i roto i ta te Atua au akakoroanga mutu kore. Kia tae pouroa mai tatou ma te ariki rekareka i te kau taunga ariki ta te Atua ko Iehova i iki kia puapingaia te au tangata ravarai.

[Au Uianga Apii]

[Tutu i te kapi 29]

Ka oronga mai te kau taunga ariki i te au akameitakianga mutu kore ki te au tangata