‘E ta kotou au mea e rave ra, e rave ïa ma te ngakau katoa kia Iehova.’​—KOLO. 3:23.

1-3. (a) Te mate anga a Iesu i runga i te rakau tamamae, ko te aiteanga ainei e kare a Iehova e umuumu maira kia oronga tatou i tetai ua atu atinga? Akamarama mai. (e) Eaa te uianga no runga i te au atinga i teia tuatau?

I TE anere mataiti mua T.N., kua akakite a Iehova ki tona iti tangata e kua akakore te atinga oko o Iesu i te Ture a Mose. (Kolo. 2:13, 14) Kare e anoanoia e kare e puapinga akaou te au atinga ta te ngati Iuda i oronga ua ana no te au anere mataiti. Kua akatupu te Ture i tana angaanga ‘ei arataki ki te Mesia.’​—Gala. 3:24.

² Kare mei te mea e kare te au Kerititiano e oronga i te au atinga. No te mea, kua tuatua te apotetoro ko Petero i te anoano kia ‘apai i te atinga vaerua, e tau i te Atua na roto ia Iesu Mesia.’ (1 Pete. 2:5) Pera katoa, kua akataka meitaki mai te apotetoro ko Paulo e e mea tau kia akamanakoia te oraanga katoa o tetai Kerititiano akatapuia “ei atinga.”​—Roma 12:1.

³ No reira, ka oronga te Kerititiano i te au atinga kia Iehova, na te oronga anga i tetai au mea kiaia me kore na te akaruke anga i tetai au mea kia tavini iaia. Mei ta tatou i kite no runga i te au atinga a te ngati Iseraela, akapeea e papu ei ia tatou e te tau ra ta tatou au atinga pouroa e oronga nei kia Iehova i teia tuatau?

AU RA RAVARAI O TE ORAANGA

4. Eaa ta tatou ka akamaara no runga i te au angaanga o te oraanga i te au ra ravarai?

⁴ Penei e ngata te marama e te o maira ta tatou au mea e rave ra i te au ra ravarai ki te oronga anga i te au atinga kia Iehova. Penei kare te au angaanga o te ngutuare, te ngai angaanga, te oko kai e te vai atura e akakeu ana i to tatou pirianga kiaia. Inara, me kua akatapu koe i toou oraanga kia Iehova me kore te manako ra i te rave i te reira a te tuatau ki mua, e mea  puapinga kia akamanako i te tu ka rave koe i te au angaanga i te au ra ravarai. E au Kerititiano tatou e 24 ora i te ra. Ka anoanoia tatou kia taangaanga i te au kaveinga Tuatua Tapu i roto i to tatou oraanga i te au ra ravarai. No reira a Paulo i raurau mai ia tatou e: “E ta kotou au mea e rave ra, e rave ïa ma te ngakau katoa, mei te mea e na te Atu [Iehova], eiaa e na te tangata.”​—E tatau ia Kolosa 3:18-24.

5, 6. Eaa te au mea te ka akakeu i to tatou akamanea anga e to tatou tu i te au ra ravarai?

⁵ Kare ta tatou au angaanga i te au ra ravarai ei tuanga no ta tatou tavinianga i te Atua. Inara, te akamaroiroi maira a Paulo ia tatou kia angaanga ‘ma te ngakau katoa kia Iehova’ e kia akamanako tatou i to tatou tu i te au taime ravarai. No reira, ka akapeea tatou me taangaanga i teia kia tatou uaorai? Mako ra ainei to tatou tu e te akamanea anga i te au taime ravarai? Me kore, ia tatou e rave ra i te au angaanga i te au ra, ka akama ainei tatou i te akakite e ko tatou tetai o te Au Kite o Iehova, penei no to tatou tu me kore te tu e akamanea ra tatou? Auraka te reira e tupu! Kare te iti tangata o Iehova e inangaro i te rave i tetai ua atu mea te ka takino i te ingoa o te Atua.​—Isa. 43:10; 2 Kori. 6:3, 4, 9.

⁶ Akara ana tatou akapeea te inangaro kia angaanga ‘ma te ngakau katoa kia Iehova’ te akakeuanga i te au turanga tukeke o to tatou oraanga. Me rave tatou i teia, akamanako meitaki e ko te au atinga ravarai ta te ngati Iseraela i oronga kia Iehova, e au mea meitaki tikai.​—Exo. 23:19.

AKAKEU ANGA I TOOU ORAANGA

7. Eaa te o maira ki to tatou akatapuanga ki te Atua?

⁷ Te akatapu anga koe i toou oraanga kia Iehova, kare ainei kua rave koe i te reira ma te papu tikai? Kua akakite koe e ka tuku koe ia Iehova na mua i roto i toou oraanga. (E tatau ia Ebera 10:7.) E ikianga meitaki te reira. Kare ekoko e kua kite koe e me rave koe i to Iehova anoano no tetai turanga e me tauta koe i te aru rotai i te reira, ka tupu mai te au mea meitaki. (Isa. 48:17, 18) E aronga tapu e te mataora te iti tangata o te Atua no te mea te akaari ra ratou i te au tu o Tei apii mai ia ratou.​—Levi. 11:44; 1 Timo. 1:11.

8. Eaa i puapinga ai kia akamaara tatou e e mea tapu te au atinga a te ngati Iseraela kia Iehova?

⁸ E au mea tapu te au atinga ta te ngati Iseraela i oronga kia Iehova. (Levi. 6:25; 7:1) Te kupu tuatua Epera tei uriia “tu tapu” te akaari maira i te tu akatakakeanga, me kore akatapuanga ki te Atua. E ariki mai ei a Iehova i ta tatou au atinga, e mea tau kia akatakakeia mai te reira mei te au akakeuanga viivii o teianei ao. Kare tatou e anoano atu i tetai ua atu au mea ta Iehova e rikarika ra. (E tatau ia 1 Ioane 2:15-17.) Te taka ua ra e kare tatou e piri atu ki roto i tetai ua atu mea ka akaviivii  ia tatou i roto i te mata o Iehova. (Isa. 2:4; Apo. 18:4) E kare katoa tatou e akara me kore e akamanako ua atu i te au mea viivii e te tau kore.​—Kolo. 3:5, 6.

9. Eaa ra i puapinga ai te tu Kerititiano ki tetai ke, e no teaa ra?

⁹ Kua raurau a Paulo i te au taeake irinaki e: “Kareka te takinga-meitaki e te oronga, eiaa rava ïa e akatopaia: te pereperekavana ra oki te Atua i te reira atinga.” (Ebe. 13:16) No reira, me meitaki tatou e me rave tatou i te meitaki ki tetai ke, te ariki maira a Iehova i te reira ei atinga tau. Ko te aroa no tetai ke tetai akairo o te au Kerititiano mou.​—Ioa. 13:34, 35; Kolo. 1:10.

AU ATINGA I ROTO I TE AKAMORIANGA

10, 11. Eaa to Iehova manako no ta tatou angaanga orometua e te akamorianga Kerititiano, e eaa ta teia ka akakeu ia tatou kia rave?

¹⁰ Tetai mataara taka meitaki ka rave tatou te au Kerititiano i te au mea meitaki no tetai ke, na te ‘tuatua ngaueue kore anga’ i to tatou manakonakoanga. Te akakitekite ra ainei koe i te tuatua meitaki i te au atianga ravarai? Kua kapiki a Paulo i teia angaanga puapinga a te au Kerititiano ei ‘atinga, i te akameitaki i te Atua, koia oki ta te vaa nei, i te akapaatu anga i tona ingoa.’ (Ebe. 10:23; 13:15; Hose. 14:2) E puapinga i te akamanako e eaa te maata o to tatou taime te tutu aere anga i te tuatua meitaki e akapeea tatou me akameitaki atu i ta tatou tutuanga. Ka tauturu mai te au tuanga o te Uipaanga Tavini Anga ia tatou kia rave i te reira. Inara, no te mea e ‘atinga akameitaki anga’ ta tatou angaanga orometua e te akakitekite ua anga no ta tatou akamorianga, kia riro i reira ta tatou atinga ei mea meitaki tikai. No te tukeke o te au turanga, ka akaari mai te taime e akapou ana tatou ki te akakitekiteanga i te tuatua meitaki i to tatou ariki rekareka anga i te au mea pae vaerua.

¹¹ E akamori putuputu ana te au Kerititiano i te kainga me kore i roto i te putuputuanga. E te umuumu maira a Iehova ia tatou kia akapera katoa. Tika rai, kare tatou e akono akaou ana i te Sabati me kore e aere ana ki te au oroa i Ierusalema. Inara, e mea puapinga taua au akono anga taito ra i roto i te oraanga Kerititiano. Te umuumu maira te Atua ia tatou kia kopae i te au angaanga puapinga kore e kia apii i tana Tuatua, pure, e kia aere ki te au uipaanga Kerititiano. E kia rave te au upoko o te pamiri  Kerititiano i te takainga mua no te akamorianga a te pamiri ma te au mema o to ratou uaorai ngutuare. (1 Tesa. 5:17; Ebe. 10:24, 25) No ta tatou au angaanga pae vaerua, e mea meitaki kia ui kia tatou uaorai e, ‘Ka rauka ainei iaku i te akameitaki mai i te tu o taku akamorianga?’

12. (a) Te akaaiteia ra te oronga anga i te atinga kakara i roto i te akamorianga i taito ki teaa i teia tuatau? (e) Akapeea tatou me oronga i ta tatou pure mei te atinga kakara rai?

¹² Kua imene te Ariki ko Davida kia Iehova e: “Kia ana atu taku pure ki mua ia koe mei te atinga kakara ra.” (Sala. 141:2) Akamanako meitaki no runga i te putuputu e te tu o taau pure. Kua akaaite te puka o Apokalupo i “te pure a te aronga tapu” ki te rakau kakara. Te karanga ra te reira e te aite ra te au pure tau e aere ra kia Iehova ki te aunga kakara. (Apo. 5:8) I Iseraela taito, ka akapapa meitakiia te atinga kakara ma te tau tikai kia orongaia ki runga i te atarau a Iehova. Ka ariki mai a Iehova i te reira me orongaia kia tau ki te au kaveinga tana i akanoo mai. (Exo. 30:34-37; Levi. 10:1, 2) Me akapapa meitaki tatou i ta tatou pure ngakau tae, papu ia tatou e ka ariki mai a Iehova i te reira.

ORONGA ATU, RAVE MAI

13, 14. (a) Eaa ta Epaperodito e te putuputuanga i Philipi i rave no Paulo, e eaa to te apotetoro manako no runga i te reira? (e) Akapeea tatou me aru i te akaraanga o Epaperodito e te au taeake i Philipi?

¹³ Kua akaaiteia te au moni oronga e turuturu ra i te angaanga i teianei ao ki tetai atinga, me e maata me e mea meangiti ua ta tatou e oronga ra. (Mare. 12:41-44) I te anere mataiti mua T.N., kua tono te putuputuanga i Philipi ia Epaperodito kia aere ki Roma i te akono i to Paulo turanga pae kopapa. Kua apai atu taua komono ra i tetai moni ei apinga aroa no ko mai i te putuputuanga i Philipi. Kare ko te taime mua teia i akaari ei te au taeake i Philipi i te tu ngakau aroa kia Paulo. No to ratou tu takinga meitaki kare ratou i inangaro ia Paulo kia manamanata no runga i te moni, kia rauka iaia i te akapou i tona taime ki te angaanga orometua. Eaa to Paulo manako no runga i teia apinga aroa? Kua kapiki aia i te reira e ‘e ruru kakara e te atinga mareka ki te Atua.’ (E tatau ia Philipi 4:15-19.) Kua ariki rekareka tikai a Paulo i te tu takinga meitaki o te au taeake i Philipi, e kua mareka katoa a Iehova i te reira.

¹⁴ Pera katoa i teia tuatau, te ariki rekareka tikai ra a Iehova i ta tatou au moni e oronga ra no te angaanga i teianei ao. E te taputou maira aia e me tuku ua rai tatou i te au anoano o te Patireia ei mea mua i roto i to tatou oraanga, ka akono aia i to tatou au anoano i te pae vaerua e te pae kopapa.​—Mata. 6:33; Luka 6:38.

AKAARI I TE TU ARIKI REKAREKA

15. Eaa ra tetai au mea ka akameitaki koe ia Iehova?

¹⁵ Maata te au tumu kia ariki rekareka tatou ia Iehova. Kare ainei e ka akameitaki tatou iaia i te au ra ravarai no te au apinga aroa o te oraanga? Te oronga maira aia i te au mea ravarai ta tatou e anoano ra ei akono ia tatou​—te kai, kakau, e te ngai nooanga, pera katoa te reva ta tatou e akaea ra. Te oronga maira te akarongo, akatumuia ki runga i te kite tika tikai, i te manakonakoanga. E mea tau kia akamori tatou ia Iehova e kia oronga i te au atinga ei akameitaki iaia, no tona tu e no tana i rave no tatou.​—E tatau ia Apokalupo 4:11.

16. Akapeea tatou me akaari e te ariki ra tatou i te atinga oko o Karaiti?

¹⁶ Mei ta tatou i kite i roto i te atikara i mua akenei, tetai apinga aroa akaperepere ta te Atua i oronga mai ki te tangata ravarai, ko te atinga oko o Karaiti. E akaarianga puapinga maata tikai teia i to te Atua aroa no tatou. (1 Ioa. 4:10) Akapeea  tatou me akaari e te ariki ra tatou i te reira? Kua akakite a Paulo e: “Te riro nei oki matou i te aroa o te Mesia ra, no te mea te karanga nei matou e, i mate te tangata okotai no te tangata ravarai . . . E i mate oki aia no te tangata ravarai, kia kore te aronga e ora ra e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou ra.” (2 Kori. 5:14, 15) Te karanga ra a Paulo e me ariki tatou i te aroa takinga meitaki o te Atua, ka taangaanga tatou i to tatou oraanga ei akangateitei Iaia e Tana Tamaiti. Ka akaari tatou i to tatou aroa e te ariki rekareka anga no te Atua raua ko Karaiti, na te akarongo anga e te inangaro anga i te tutu aere e te akariro anga i te au tangata ei pipi.​—1 Timo. 2:3, 4; 1 Ioa. 5:3.

17, 18. Eaa tetai au mataara i akamaata atu ei tetai pae i ta ratou atinga akameitaki kia Iehova? Oronga mai i tetai akaraanga.

¹⁷ Ka rauka ainei ia koe i te akameitaki atu i taau atinga akameitaki e oronga ra koe ki te Atua? Muri ake te akamanako anga i te au mea meitaki ta Iehova i rave no ratou, maata tei akakeuia kia akanoonoo i to ratou taime e te angaanga kia rave maata atu i te angaanga tutuanga o te Patireia me kore i tetai atu au angaanga teokaratiki. Kua rauka i tetai pae i te painia tauturu no tetai au marama i te mataiti, e kua rauka i tetai pae i te painia tamou. Kua piri atu tetai pae ki roto i te au angaanga patu anga i te au are Patireia. Kare ainei teia ei au mataara meitaki tikai i te akaari i to tatou tu ariki rekareka? Me raveia teia ma te akakoroanga tau​—ei akaari e ei oronga i te akameitakianga—​ka ariki mai te Atua i teia au angaanga ei akamorianga iaia.

¹⁸ Manganui te au Kerititiano tei akakeuia kia akameitaki maata atu ia Iehova. Ko Morena tetai ia ratou. Kua kimi aia i te au pauanga ki tana au uianga i roto i te Akonoanga Katorika, e akonoanga tei utuutu mai iaia, e i roto i te au apiianga o Asia. Kare ra i pauia mai ana tana au uianga. Tona apii anga i te Pipiria ma te Au Kite o Iehova i akamerengoia ai tona inangaro pae vaerua. Kua ariki rekareka a Morena i te au pauanga Tuatua Tapu ki tana au uianga, e no te tu papu ta taua au pauanga ra i oronga mai kiaia, i inangaro ei aia i te akameitaki ia Iehova na te taangaanga anga i tona maroiroi katoa kia tavini iaia. Muri ake i tona papetitoanga, kua piri putuputu atu aia ki roto i te angaanga painia tauturu, e te tau anga tona turanga, kua riro mai aia ei painia tamou. E 30 mataiti i topa, te angaanga tamou nei rai a Morena.

19. Akapeea koe me akamaata atu i taau au atinga kia Iehova?

¹⁹ E tika, e manganui te au tavini akarongo mou o Iehova kare e rauka ana i te painia no to ratou au turanga. No reira, ta tatou ua atu ka rauka i te rave i roto i ta Iehova angaanga, ka rauka ia tatou i te oronga i te au atinga tei tau kiaia. Na roto i to tatou tu, ka akaari tatou i te au kaveinga tuatua tika, te akamaara anga e e au mata tatou no Iehova i te au taime ravarai. Na roto i te akarongo, ka irinaki pu tikai tatou e ka akatupu te Atua i tana au akakoroanga. Na roto i te au angaanga meitaki, ka akatotoa tatou i te tuatua meitaki. No to tatou ariki rekareka maataanga i te au mea ravarai ta Iehova i rave no tatou, ka oronga ngakau katoa ua rai tatou i te au atinga kia Iehova.

[Au Uianga Apii]

[Tataanga i te kapi 25]

Te akakeu ra ainei to Iehova tu meitaki ia koe kia akameitaki atu i taau atinga akameitaki?

[Tutu i te kapi 23]

Te akakitekite ra ainei koe i te tuatua meitaki i te au atianga ravarai?