Tae anga te tuaine tutu evangeria tamou ko Charlotte White ki Louisville, i Kentucky, i U.S.A., kua akara mai te tangata iaia e opara ra i tetai kiri e auira tona.

Ko te mataiti 1908 te reira, kua akara mai te tangata o te oire i te Tuaine White e opara ra i tetai apinga ou​—te kiri mua e auira tona (Dawn-Mobile). “Kua tuatua te au tangata no runga i te reira,” i akakite mai ei aia, “e kua manakoia au e manuiri.”

Kua kite mai te aronga apii Pipiria, tei kapikiia te Au Kite o Iehova i taua tuatau ra, e ka anoanoia kia akakite i te au tuatua mou puapinga ta ratou i apii maroiroi mai mei te au Tuatua Tapu. E maata tei marama i te Pipiria na te apiianga i te au puka Millennial Dawn (tei kapikiia i muri mai e ko te Studies in the Scriptures). Te au Kerititiano tei inangaro e tei rauka i te aere mamao atu na roto i te au taoni, oire, e te au ngai i vao mai, kua oronga atu i teia au puka tei akatakaia ei “Au Rima Tauturu no te Aronga Apii Pipiria” ki te aronga tei inangaro i te tatau i te reira.

I te mataiti 1908, ka rauka i te Tuaine White e tetai aronga akakitekite maroiroi i te Patireia i te oronga e ono voriumu o te puka tei vaiia ki te kakau, e $2.92 (N.Z.). Kare ratou e oronga vave ana i te au puka Dawn ki te tangata, ka tata ratou na mua i te au ota, e ka oki atu​—i te ra koi moni—​i te oronga atu i te reira e te koi mai i te moni ei tauturu i te neneianga. Kua kopekope tetai tangata patoi no te manga moni ta te au tangata e oronga maira no te au puka!

Maara ia Malinda Keefer te tataanga i te au ota e rua anere ki te toru anere puka i te epetoma. Inara, no te maata tei inangaro i te au puka Dawn,  kua riro mai ei manamanata. Te tumu, e 740 kapi i roto i te ono o te voriumu! Kua akakite Te Punanga Tiaki e, “E rima ngauru puka, e a ngauru paunu te teiaa,” (18 kiro karama) e e “teiaa roa” no te au tuaine i te apai aere.

E rauka ai i te apai aere i te au puka Dawn, kua maani te Taeake ko James Cole i tetai apinga auri e nga auira tona te ka rauka i te aatu kia tamouia te kiri puka ki runga. No te kare e apai akaouia ana te au pia ki i te au puka, kua tuatua te taeake tei maani i teia apinga e: “Kare e mamae akaou ana toku pakuivi.” Kua akaari aia i teia apinga ou ki te katoatoa tei tae mai ki te uruoaanga a te Aronga Apii Pipiria i te mataiti 1908 i Cincinnati, i Ohio. Kua tataia te ingoa Dawn-Mobile ki runga i te nga pitopito i te ope o te auri, no te mea e apainaia ana te au voriumu o te puka Millennial Dawn na roto i reira. Aere ua rai, mama ua no tetai i te opara aere i te kiri ki i te au puka e tai rima. Ka rauka i te akatanotano i te teitei o te kiri e te akatere i te nga auira na runga i te au mataara oneone. Muri ake i te tutuanga no te reira ra, ka rauka i te aatu i te nga auira i te nga matamata o te kiri no te oki anga ki te kainga, me aere ua, e me na runga i te rerue.

Ka orongaia tetai kiri e auira tona ki te au tuaine tutu evangeria tamou, kare e tutaki. Naringa kare, ka tutaki ratou e $3.16 (N.Z.). Kua tukatau te Tuaine Keefer, e akaariia ra i roto i te tutu, i te opara aere i te kiri tei ki i te au puka e tai rima e te apai katoa i tetai kiri puka meangiti i tetai mai rima. Kite mai anga aia i tetai aronga i tetai oire ko maina i Pennsylvania, i U.S.A., e akarongo maira, ka aere aia e toru me kore e a taime ki tetai tua o te ana i te apai i te au puka.

I te mataiti 1987 kua maani tetai tangata akarere pairere i tetai kiri e auira tona e kite putuputuia nei i te ngai akatoanga pairere e i roto i te au oire maata. Inara, no tetai anere mataiti i topa, kua rekareka te Aronga Apii Pipiria maroiroi me akara mai te au tangata ia ratou e opara aere ra i ta ratou kiri Dawn Mobile mei tetai ngai ki tetai i te akatotoa anga i te au tuatua mou Pipiria.

[Tataanga i te kapi 32]

Ka aere te Tuaine Keefer e toru me kore e a taime ki tetai tua o te ana i te apai i te au puka

[Tataanga i te kapi 32]

Kua rauka te ravenga no te apai i te au puka Dawn