Natana​—Tei Turuturu Tiratiratu i te Akamorianga Ma

Ngata i te akapapu ki tetai tangata mana ririnui e e kino tikai tona tu e ka anoanoia aia kia taui. Ka aravei ainei koe iaia me kua kite koe e kua tamate aia i tetai tangata ei uuna i tana kino i rave?

Kua akaturi te ariki o Iseraela i taito ko Davida kia Bate-seba, e kua nui aia. Ei uuna i ta raua ara, kua parani a Davida kia tamateia tana tane e kua rave ia Bate-seba ei vaine nana. No tetai au marama, kua rave ua a Davida i tana au angaanga ei ariki e kua uuna i tana tarevake. Inara, kare a Iehova i akangaropoina ana i te ara a te ariki. Kua tono atu aia i tana peroveta ko Natana kia aravei ia Davida.

E angaanga ngata tikai teia. Akamanako ana e ko koe a Natana. No tona tu tiratiratu kia Iehova e te aru ngaueue kore anga i te au turanga o te Atua, i akakeuia ai a Natana kia akamaara kia Davida i tana au ara. Akapeea te peroveta me rave e me akapapu i teia ki te Ariki ko Davida e ka anoanoia aia kia tataraara?

PUAPII MARU

Eaa ka kore ei e tatau ia 2 Samuela 12:1-25 no tetai nga miniti ua? Akamanako ana ko Natana koe e te akakite ra kia Davida i teia tua e: “Toko rua puke tangata i te oire okotai: e taoiau tetai, e ao tetai. E manganui ua atura ta taua tangata taoiau ra mamoe e te puakatoro: Kareka taua tangata ao ra kare ana, mari ra tetai punua mamoe iti e ua, i okoia e ia, e kua angaiia: e tupu katoa atura ma ia katoa, e tana au tamariki; okotai rai oki a raua kai, okotai oki kapu kia inu, e moe ki roto i tona keke, riro atura mei te tamaine te tu.  Kua tapae maira tetai tangata aere ki o taua tangata taoiau ra, kua akaperepere atura aia i tana uaorai au mamoe, e tana uaorai au puakatoro, ka tao ei na taua tangata i aere mai kiaia ra; kua rave iora ra i ta taua tangata ao ra punua mamoe; kua taʼu iora na taua tangata i aere mai kiaia ra.”​—2 Samu. 12:1-4.

Kua irinaki a Davida​—tei riro ana ei tiaki mamoe—​e e tua tika tikai teia. Kua akakite mai tetai tangata akamarama e: “Penei, kua matau a Natana i te aere kiaia i te pati tauturu no te aronga tei takinoia, e kua manako a Davida e ko te tumu teia i aere mai ei aia i teianei.” Noatu e tika te reira, kia tiratiratu a Natana ki te Atua e kia ngakau toa kia rauka iaia i te tuatua atu ki te ariki. Kua riri tikai a Davida i te tua a Natana. “Te ora rā Iehova, ko te tangata i pera ra, e tau tikai iaia te mate”! i tuatua ai aia. E oti kua akakite tika atu a Natana e: “Ko koe rai taua tangata ra”!​—2 Samu. 12:5-7.

Akamanako ana i te tumu i akakite ei a Natana i te manamanata na roto i teia tu. Kare i te mea mama no tetai tangata tei matemate i te inangaro i tetai ke kia manako meitaki i tona turanga. Maata ia tatou e kimi kotoe ana i te akatika ia tatou uaorai me akakiteia mai to tatou tarevake. Inara kua akakeu te akatutuanga a Natana ia Davida kia tuatua ma te kore e kite e te akaapa ra aia i tana uaorai i rave. Kua kite meitaki te ariki e e kino tikai taua tu ra ta Natana i akataka mai. Inara, no muri ua ake i akaapa ei a Davida i te reira tu, i akakite ei a Natana e no runga taua tua ra i te ariki. I kite mai ei a Davida i te kino o tana ara. Kua tauturu teia iaia kia akamanako meitaki e kia ariki i te akoanga. Kua kite aia e kua “akavaavaa” aia ia Iehova no tona pirianga kia Bate-seba, e kua ariki aia i te akoanga tei tau kiaia.​—2 Samu. 12:9-14; Sala. 51, tataanga i runga ake.

Eaa ta tatou i apii mai mei teia? Te akakoroanga o tetai puapii Pipiria kia tauturu i te aronga e akarongo maira kia marama i te mea tika. Kua akangateitei a Natana ia Davida e kua tuatua maru atu kiaia. Kua kite a Natana e e inangaro to Davida i te tuatua tika e te tu tika. Na roto i tana akatutuanga, kua rauka i te peroveta i te akakeu i teia au tu o te Atua i roto ia Davida. Ka rauka katoa ia tatou i te tauturu i te aronga ngakau tika kia marama i te manako o Iehova. Akapeea ra? Na te akakeu anga ia ratou kia akamanako eaa te mea tika, kia kore e manako e te akakite atu nei tatou kia ratou eaa ta ratou ka rave. Ka akaari tatou i to te Pipiria manako no runga i te mea tika e te mea tarevake, kare i to tatou uaorai manako.

Tei maata atu, na te tu tiratiratu ki te Atua i tauturu ia Natana kia ako atu i te ariki mana ririnui. (2 Samu. 12:1) Ka oronga mai taua tu tiratiratu i te tu ngakau toa kia tatou kia paruru i te au kaveinga tuatua tika a Iehova.

TEI TURUTURU I TE AKAMORIANGA MA

Kua riro ana a Davida raua ko Natana ei nga oa meitaki, e kua tapa a Davida i te ingoa o Natana ki runga i tetai o tana tamaiti. (1 Para. 3:1, 5) Te taime mua i taikuia ai a Natana i roto i te Pipiria, ko raua ko Davida. Inangaro raua roa ai ia Iehova. Kua irinaki tikai te ariki i to Natana tu manako tau, no te mea kua akakite aia ki te peroveta i tona inangaro kia akatu i tetai iero no Iehova. “Ka akara ana,” i tuatua ai a Davida, “te noo nei au i roto i te are arezi, kareka te aruna a te Atua, te vai nei i roto i te paruru. E kua karanga aturā Natana ki te ariki, E aere, e rave i ta toou ngakau i anoano ra; tei ia koe oki a Iehova.”​—2 Samu. 7:2, 3.

Ei tangata akamori akarongo mou no Iehova, kua turuturu maroiroi a Natana i ta Davida parani kia akatu i te iero mua no te akamorianga ma i te enua nei. I taua atianga ra, kua tuatua a Natana i tona uaorai manako kare i to Iehova. Taua po ra, kua ikuiku te Atua i tana peroveta kia akakite i tetai karere ke ki te ariki: Kare a Davida e akatu i te iero o Iehova. Na tetai tamaiti a Davida e rave i te reira. Inara, kua akakite a Natana e te papau ra te Atua i tetai koreromotu kia Davida e “ka mou [tona terono] e tuatau ua atu.”​—2 Samu. 7:4-16.

Kare to Natana manako i rotai ana ki to te Atua anoano no te akatu anga i te iero. Inara, kare teia peroveta akaaka i kopekope ana, mari ra kua ariki aia i to Iehova akakoroanga e kua aru i te reira. E akaraanga meitaki tikai teia no tatou  kia aru me akatikatika mai te Atua ia tatou! Kua akaari mai te au angaanga a Natana ei peroveta e te mareka ra te Atua iaia. Ae, kua akaue a Iehova ia Natana e Gada te tangata akara, kia tauturu ia Davida kia akanoonoo e 4,000 aronga akatangi imene i roto i te iero.​—1 Para. 23:1-5; 2 Para. 29:25.

TEI PARURU I TE TAOONGA ARIKI

Kua kite a Natana e ka riro mai a Solomona ei ariki i muri ake ia Davida. No reira kua rave viviki a Natana i tetai mea te tauta anga a Adonia i te rave i te terono te tuatau e ruaine atura a Davida. Kua akaari akaou a Natana i te tu maru e te tu tiratiratu. Mea mua, kua raurau aia ia Bate-seba kia akamaara kia Davida no tana i taputou kia akariro i ta raua tamaiti ko Solomona ei ariki. E oti kua aravei atu a Natana i te ariki i te ui me kua iki rai a Davida ia Adonia kia mono iaia ei ariki. Te kite anga aia i te kino o te turanga, kua ikuiku te ariki ia Natana e tetai atu au tavini tiratiratu kia akatainu ia Solomona e kia akakite aere e koia te ariki. Kare ta Adonia parani i tupu ana.​—1 Ari. 1:5-53.

TANGATA TUATUA ENUA AKAAKA

Kua ariki rai te au tangata e na Natana raua ko Gada i tata ia 1 Samuela pene 25 ki te 31, pera katoa ia 2 Samuela. No runga i te au tuatua enua akauruia tei rekotiia i roto i taua au puka ra, te akakiteia maira e: “E te au angaanga a te ariki ra a Davida, ko mua e ko muri, i na, kua tataia ïa i roto i te tuatua a te akara ra a Samuela, i roto oki i te tuatua a Natana peroveta, e i roto i te tuatua a te akara ra a Gada.” (1 Para. 29:29) Kua kite katoaia mai e na Natana i tata i ‘te tuatua a Solomona.’ (2 Para. 9:29) Te aiteanga kua tavini atu rai a Natana i roto i te paepae o te ariki i muri ake te mate anga a Davida.

Ta tatou i kite mai no runga ia Natana penei nana uaorai i tata i te reira. Maata rai ta tatou i kite mai no runga iaia noatu kare aia i tata mai i te reira. Papu e e tangata tuatua enua akaaka a Natana. Kare aia e inangaro ana kia rongonui tona ingoa. Kua karanga tetai tikitinari Pipiria e, “kare e tuatua no runga iaia e tona kopu tangata.” Kare tatou i kite i to Natana papaanga tupuna me kore tona uaorai oraanga.

AKAKEUIA KIA TIRATIRATU KIA IEHOVA

Mei ta tatou i kite mai no runga ia Natana mei te au Tuatua Tapu, taka ua ra e e tangata akaaka aia e te maroiroi i te paruru i te au akanoonooanga a te Atua. Kua oronga te Atua ko Iehova i te au apainga maata kiaia. E akamanako oonu i to Natana au tu, mei te tu tiratiratu ki te Atua e te inangaro i ta te Atua au umuumuanga. Tauta i te aru i taua au tu ra.

Papu e kare koe e kapikiia mai kia ako atu i te au ariki akaturi me kore kia arai i tetai e parani ra kia riro mai ei tutara. Inara, ka tauturu mai te Atua ia koe kia tiratiratu koe kiaia, e kia turuturu koe i tona au turanga tuatua tika. Ka rauka katoa ia koe te tu ngakau toa, te tu maru ei puapii no te tuatua mou e ei paruru i te akamorianga ma.

[Tutu i te kapi 25]

Ei paruru i te taoonga ariki, kua tuatua maru atu a Natana kia Bate-seba