Paruru i te Tu Papu o te Putuputuanga

“Ei ia kotou katoa te aroa ua o to tatou Atu ra o Iesu Mesia.”​—PHILI. 4:23.

AKAPEEA TATOU ME AKATUPU I TE TU MEITAKI I ROTO I TE PUTUPUTUANGA . . .

me kapiti ki to tatou au taeake?

me maroiroi tatou i roto i te angaanga orometua?

me akakite i te tarevake kino tei raveia?

1. Eaa ra te putuputuanga i Philipi e Tuatira i akameitakiia ai?

E ARONGA putaua te au Kerititiano i Philipi i te anere mataiti mua. Inara, e aronga oronga ua ratou e e akaari ana ratou i te aroa maata ki to ratou au taeake irinaki. (Phili. 1:3-5, 9; 4:15, 16) Te taopenga anga i tana reta akauruia kia ratou, kua tata te apotetoro ko Paulo e: “Ei ia kotou katoa te aroa ua o to tatou Atu ra o Iesu Mesia.” (Phili. 4:23) No te mea te akaari ra te au Kerititiano i Tuatira i taua tu ra, kua akakite a Iesu Karaiti kia ratou e: “Kua kite au i taau angaanga, e toou aroa, e toou takinga-meitaki, e te akarongo, e toou akakoromaki, e taau au angaanga; ko tei maata ïa i tei muatangana ra.”​—Apo. 2:19.

2. Eaa ta tatou ka rave ei akatupu i te tu papu i roto i ta tatou putuputuanga?

² Te akaari nei te au putuputuanga a te Au Kite o Iehova i teia tuatau i te tu papu me kore te tu papu kore. Te kite uaia ra tetai au putuputuanga no to ratou tu pumaana e te aroa. Tetai pae e turuturu maroiroi ana i te angaanga tutuanga i te Patireia e te akangateitei anga i te angaanga orometua tamou. Me akatupu tatou pouroa i te tu papu, ka taokotai te putuputuanga e ka meitaki atu te turanga pae vaerua. (1 Kori. 1:10) Inara, me akatupu tatou i te tu papu kore, kare tatou e maroiroi, e e mataora i te pae vaerua, e ka tupu te au angaanga tarevake i roto i te putuputuanga. (1 Kori. 5:1; Apo. 3:15, 16) Eaa te tu i roto i taau putuputuanga? Akapeea koe me akamaroiroi i te tu papu i roto i te putuputuanga?

AKAMAROIROI I TE TU PAPU

3, 4. Akapeea tatou me ‘akapaapaa ia Iehova i roto i te uipa anga maata’?

³ Kua imene te tata taramo e: “Ka akapaapaa au ia  koe [e Iehova] i roto i te uipa anga maata ra i reira; ka akapaatu au ia koe i rotopu i te au tangata.” (Sala. 35:18) Kua akapaapaa te tata taramo ia Iehova iaia e kapiti atura ki te au tavini o te Atua. E au atianga meitaki tikai te au uipaanga a te putuputuanga i te au epetoma, e te Apii Punanga Tiaki, kia akaari i to tatou tu maroiroi e te akarongo, me paupau. Penei ka ui tatou pouroa kia tatou uaorai e: ‘Te paupau putuputu ra ainei au i roto i te au uipaanga? Te akapapa meitaki ra ainei au kia oronga i tetai au pauanga meitaki? Ei upoko no te pamiri, te tauturu ra ainei au i taku tamariki kia akapapa i tetai au pauanga i mua ake i te uipaanga e kia pau ratou i roto i ta ratou uaorai tuatua?’

⁴ Kua kapiti te tata taramo ko Davida i te tu mou tikai o to tatou ngakau ki te tu e imene ana tatou. Kua na ko aia e: “Kua mou toku ngakau, e te Atua, kua mou toku ngakau; ka imene au, e e akameitaki rai au.” (Sala. 57:7) Te au imene e imeneia ana i te au uipaanga Kerititiano, e atianga meitaki no tatou ‘kia imene e kia akameitaki’ ia Iehova ma te ngakau mou tikai. Me kare tatou i matau i tetai au imene, eaa ka kore ei e apiipii i te au imene i te tuatau o te Akamorianga a te Ngutuare i te aiai? Kia tauta tatou i te ‘imene kia Iehova i roto i to tatou oraanga e kia imene akameitaki kiaia.’​—Sala. 104:33.

5, 6. Akapeea tatou me akaari i te tu takinga meitaki e te tu oronga ki tetai ke, e eaa ta teia ka akatupu i roto i te putuputuanga?

⁵ Tetai mataara ke ei akamaroiroi i te tu aroa i roto i te putuputuanga, kia akaari tatou i te tu takinga meitaki ki to tatou au taeake e te au tuaine. I te pene openga o tana reta ki to Epera, kua kapiti atu a Paulo i teia akamaroiroi anga e: “Kia vai marie mairai te aroa taeake. Auraka e akakore i te kite atu i te tangata ke ke ra.” (Ebe. 13:1, 2) Tetai mataara meitaki i te akaari i te tu takinga meitaki, kia kaikai kapiti ma te au akaaere tutaka e ta ratou au vaine me kore te au tavini tamou i roto i te putuputuanga. Akamanako katoa i te au vaine takaua, te au pamiri e tai rai metua, me kore tetai ke te ka puapingaia me kapiti mai i tetai taime no te kaikai me kore ki ta tatou akamorianga a te pamiri.

⁶ Kua akakite a Paulo kia Timoteo kia akamaroiroi i tetai ke “kia  takinga-meitaki ratou, e kia apingaia ra i te angaanga meitaki ra, kia maata atu ïa ia ratou kia oronga aere, kia tau i te uipa; I te akaputu marie anga i te meitaki tumu no ratou uaorai a muri atu, kia rave ratou i te ora mutu kore.” (1 Timo. 6:17-19) Te akamaroiroi ra a Paulo i tona au taeake akamori kia akatupu i te tu oronga. Ka rauka ia tatou i te akaari i te tu oronga me kare e meitaki ana te turanga i te pae moni. Tetai mataara meitaki i te rave i teia, e apai i te au taeake ki te angaanga orometua e ki te au uipaanga, me ka anoanoia. Akapeea te aronga e puapingaia ai mei taua au tu takinga meitaki ra? Te akatupu ra ratou i te tu papu i roto i te putuputuanga me akaari ratou i te ngakau ariki rekareka, penei na te tauturu anga i te pae o te penitini. Pera katoa, me akapou tatou i tetai taime ki te au taeake e te au tuaine pae vaerua, kare ainei e ka mataora ratou e te inangaro nei tatou ia ratou? Me rave tatou i te au mea meitaki ‘ki te ngutuare o te akarongo,’ e me papa ua i te oronga i te taime e te au apinga ei tauturu ia ratou, ka maata atu to tatou aroa no ratou e ka tupu te pumaana e te tu papu i roto i te putuputuanga.​—Gala. 6:10.

7. Akapeea te akono anga i te au tuatua muna a tetai ke me paruru i te tu meitaki o te putuputuanga?

⁷ Ka akaketaketa te tu oaoa e te tu muna i te aroa i rotopu i to tatou au taeake irinaki. (E tatau ia Maseli 18:24.) Kare te au oa mou e akakite aere ana i ta ratou au mea muna. Me akakite mai to tatou au taeake eaa to roto i to ratou manako e to ratou ngakau e kua papu e kare te katoatoa e kite i te reira, ka ketaketa atu te pirianga aroa tei tupu ke ana. E akatupu ua rai tatou i te aroa, e te tu taokotai ei pamiri i roto i te putuputuanga na te riro anga ei oa irinakiia te akono ra i te au tuatua muna.​—Mase. 20:19.

KIA MAROIROI I ROTO I TE ANGAANGA OROMETUA

8. Eaa te akoanga ki to Laodikea, e no teaa ra?

⁸ Te tuatua anga ki te putuputuanga i Laodikea, kua akakite a Iesu e: “Kua kite au i taau angaanga e kare koe i anu, kare oki i maana: naringa koe i anu, e kare ïa, kia maana, ko taku ïa e tika. E tenana no te mea te pumaana ua na koe, kare i anu, kare oki i maana, e akapuaki atu au ia koe ki vao i taku vaa.” (Apo. 3:15, 16) Kare to Laodikea e maroiroi ana i roto i te angaanga orometua Kerititiano. E kua takino teia tu i to ratou pirianga. No reira kua ako aroa atu a Iesu ia ratou e: “Ko taku katoa e akaperepere ra, ko taku ïa e ako e e pāpā oki: e tenana e akamaroiroi, e e tataraara.”​—Apo. 3:19.

9. Akapeea to tatou tu maroiroi no te angaanga orometua te akakeuanga i te putuputuanga?

⁹ Kia akatupu i te tu meitaki e te papu  i roto i te putuputuanga, e akamanako tatou i to tatou tu maroiroi no te angaanga orometua. Kua akanooia te putuputuanga kia kimi i te au tangata mei te mamoe te tu i roto i te ngai tutuanga e kia akamaroiroi ia ratou i te pae vaerua. No reira, ka anoanoia tatou kia aru ia Iesu e kia maroiroi i te akariro anga i te tangata ei pipi. (Mata. 28:19, 20; Luka 4:43) Me maata atu to tatou maroiroi no te angaanga orometua, ka maata atu to tatou tu taokotai ‘ei au oa rave angaanga na te Atua.’ (1 Kori. 3:9) Ia tatou e kite atura i tetai ke e paruru ra i to ratou akarongo i roto i te angaanga orometua e te ariki rekareka ra i te au mea pae vaerua, ka akakeuia tatou kia inangaro e kia akangateitei atu ia ratou. E ka tupu katoa te tu taokotai o te putuputuanga me tavini tatou “ma te manako okotai” i roto i te angaanga orometua.—E tatau ia Zephania 3:9.

10. Eaa te ka tupu ki tetai ke i roto i te putuputuanga me akameitaki mai tatou i te tu o ta tatou angaanga orometua?

¹⁰ Ka riro ta tatou tautaanga i te akameitaki mai i ta tatou angaanga orometua ei akakeu anga meitaki ki tetai ke. Me manako maata tatou i te au tangata ka aravei tatou, e me tauta tatou i te itae i te ngakau o te aronga e akarongo maira, ka maroiroi atu tatou i te angaanga orometua. (Mata. 9:36, 37) E ka maroiroi katoa to tatou au oa. Kare a Iesu i tono ana i tana au pipi kia tutu aere ko ratou anake, mari ra kia tataki rua ratou me aere. (Luka 10:1) Kua akamaroiroi e kua tereni teia ia ratou kia akamaata atu i to ratou maroiroi no te angaanga orometua. Kare ainei tatou e ariki rekareka ana me angaanga kapiti ki te au papuritia maroiroi o te Patireia? Ka akamaroiroi e ka akakeu to ratou tu ia tatou i roto i te angaanga tutuanga.​—Roma 1:12.

MATAKITE I TE URUTOE E TE RAVE I TE TAREVAKE

11. Eaa te tu ta tetai ngati Iseraela i to Mose tuatau i akatupu, e eaa tei tupu kia ratou?

¹¹ Tetai au epetoma i muri mai te riro anga ratou ei iti tangata ou, kua akatupu te ngati Iseraela i te tu mareka kore e te urutoe. E kua meameaau ratou ia Iehova e tana nga komono. (Exo. 16:1, 2) Tokoiti ua te ngati Iseraela tei akaruke ia Aiphiti tei ora mai, e tei tomo atu ki roto i te Enua Taputouia. No tana i tuatua i te tu kino o te putuputuanga o Iseraela, kare a Mose i akatikaia ana kia tomo atu ki taua enua ra! (Deu. 32:48-52) Eaa ta tatou ka rave i teia tuatau kia kopae atu i te tu papu kore?

12. Eaa te ka tauturu ia tatou kia kore e akatupu i te urutoe?

¹² Kia matakite tatou kia kore e akatupu i te urutoe. Ka tauturu te tu akaaka e te tu akangateitei no te aronga mana kia kopae tatou i teia tu. E kia akamanako katoa tatou i te aronga ka piri atu tatou. Ka tupu te kino me iki tatou i te tamataoraanga tau kore, e me maata to tatou taime ki te au oa angaanga e te au oa apii kare e akono ana i te au kaveinga tuatua tika. E mea meitaki kia kotinga i to tatou kapitianga ki te aronga manako papu kore e tei irinaki ia ratou uaorai.​—Mase. 13:20.

13. Ka arataki atu te urutoe anga ki teea au kino i te pae vaerua i roto i te putuputuanga?

¹³ Ka arataki atu te urutoe ki tetai atu au kino i te pae vaerua. Ei akaraanga, ka takino te urutoe i te tu au e te tu taokotai o te putuputuanga. Tei maata atu, ka mamae te au taeake irinaki me akaapaia ratou e ka akatupu katoa i te ara kino no te pikikaa e te akakino. (Levi. 19:16; 1 Kori. 5:11) Tetai aronga urutoe i roto i te putuputuanga i te anere mataiti mua kua ‘akavaavaa i te au tutara, e kua  akakino i te aronga taoonga.’ (Iuda 8, 16) Kare te Atua i mareka ana i te urutoeia anga te au tane tau i roto i te putuputuanga.

14, 15. (a) Eaa te kino ka tupu ki te putuputuanga katoa me akatikaia te tarevake kia tupu? (e) Eaa ta tatou ka rave me kite tatou e te rave poiri ra tetai taeake i te ara kino?

¹⁴ Akapeea me kite tatou e te rave poiri ra tetai taeake i te ara kino, penei kua kona i te kava, te akara ra i te ravenga ainga viivii, me kore e oraanga tau kore tona? (Ephe. 5:11, 12) Me akatika ua tatou i te ara kino e raveia ra, ka akaatea a Iehova i tona vaerua tapu e ka takinoia te au i roto i te putuputuanga. (Gala. 5:19-23) Mei te au Kerititiano mua i Korinetia tei akaatea i te au tu kino, kia akaatea katoaia te au tu kino i teia tuatau kia vai te tu meitaki e te papu i roto i te putuputuanga. Eaa taau ka rave kia vai te au i roto i te putuputuanga?

¹⁵ Mei tei taikuia i mua atu ana, e mea puapinga kia akono i te au mea muna me akakite tikai mai tetai ke eaa to roto i to ratou manako e to ratou ngakau. E tarevake tikai te akakite aere i te tuatua muna a tetai ke! Me kua raveia tetai ara kino, kia akakiteia atu te reira ki te aronga pakari o te putuputuanga. No te mea na ratou oki taua apainga ra kia akono i te manamanata. (E tatau ia Levitiku 5:1.) No reira, me kite tatou e kua rave tetai taeake me kore tuaine i te tarevake, e akamaroiroi tatou iaia kia aravei i te aronga pakari e kia pati i ta ratou tauturu. (Iako. 5:13-15) Me kare aia i akakite ake i te reira, na tatou e akakite i te tarevake.

16. Akapeea me akakite tatou i te tarevake tei raveia ei paruru i te putuputuanga?

¹⁶ E ngai tinamou pae vaerua te putuputuanga Kerititiano, e ka paruru tatou i te reira na te akakite anga i te tarevake kino tei raveia. Me tauturu te aronga pakari i tei rave i te tarevake kia tataraara e kia ariki i te akoanga, kare aia e takino i te putuputuanga. Akapeea me kare aia e tataraara e kare e ariki i te akoanga aroa a te aronga pakari? Ka akaateaia aia mei te putuputuanga e ka akakoreia te akakeuanga kino, e ka paruruia te tu meitaki o te putuputuanga. (E tatau ia 1 Korinetia 5:5.) Ae, ka umuumuia tatou tataki tai kia akakite i te tika, turuturu i te pupu aronga pakari, e kia paruru i te turanga o te au taeake irinaki e te putuputuanga.

AKAMAROIROI I “TE TAOKOTAIANGA A TE VAERUA”

17, 18. Eaa te ka tauturu ia tatou ‘kia vai rai te taokotaianga a te vaerua’?

¹⁷ Na te ‘mou piri tikai anga i ta te au aposetolo i apii,’ kua tauturu te au pipi mua a Iesu kia akatupuia te tu taokotai i roto i te putuputuanga. (Anga. 2:42) Kua akaperepere ratou i te akoanga Tuatua Tapu e te aratakianga a te aronga pakari. No te mea te aru rotai ra te aronga pakari i teia tuatau i te tavini akono meitaki e te pakari, kua akamaroiroiia e kua tauturuia te putuputuanga katoa kia vai taokotai. (1 Kori. 1:10) Me akarongo tatou ki te ikuikuanga a te Pipiria mei te akaaerenga a Iehova e me aru i te aratakianga a te aronga pakari, e akapapu anga te reira e te tauta ra tatou ‘kia vai rai te taokotaianga a te vaerua i te ruru o te au.’​—Ephe. 4:3.

¹⁸ No reira, kia tauta pakari tatou i te paruru i te tu meitaki e te papu o te putuputuanga. Me akapera tatou, e akapapuanga e ‘tei ia tatou katoa te aroa ua o to tatou Atu ra o Iesu Mesia.’​—Phili. 4:23.

[Au Uianga Apii]

[Tutu i te kapi 19]

Te akamaroiroi ra ainei koe i te tu papu na te akapapaanga i te au pauanga meitaki?

[Tutu i te kapi 20]

Akamaroiroi i te tu papu na te apiipii meitaki anga i ta tatou au imene