Akapeea Koe me Oronga i te Ako Anga?

I patiia ana ainei koe kia oronga i te ako anga ki tetai ke? Ei akaraanga, i ui mai ana ainei tetai kia koe e: ‘Eaa taku ka rave? Ka aere ainei au ki teia tamataoraanga? Ka aruaru ainei au i teia angaanga moni? Ka piri ainei au ki teia tangata no te manako kia akaipoipo?’

Penei ka pati ngakau tae mai tetai au tangata kia koe no tetai tauturu kia rave i te au ikianga—te ka akapiri vaitata atu ia ratou ki to ratou au oa, pamiri, e kia Iehova. Ka akatumu koe i taau pauanga ki runga i teaa? Eaa toou tu me oronga koe i te ako anga ki tetai ke? Noatu e puapinga me kore kare e puapinga ana te manako, “te kimi ra te ngakau o te aronga tuatua-tika ra i tana e tuatua atu,” i karanga ai a Maseli 15:28. Akamanako e akapeea te au kaveinga Pipiria e rima e aru maira me tauturu i te oronga i te ako anga.

1 Kia Marama i te Turanga Tikai.

“Ko tei tuatua vave mai e kare i akakiteia atu, e neneva tona, e ka akama ïa aia.”​—MASE. 18:13.

Me oronga i te ako anga meitaki, kia marama tatou i te au turanga e te manako o te tangata e kimi tauturu maira. Ei akatauanga: Me ringi mai tetai tangata ia koe i te ui mai e eaa te mataara meitaki kia tae ki toou kainga, eaa taau ka anoanoia kia kite kia tauturu atu iaia? Ka rauka ainei ia koe i te akakite i te mataara meitaki atu me kare koe i kite e e noo ana aia kiea? Kare! Pera katoa, me oronga koe i te aratakianga tau, ka umuumuia koe kia kite i te “ngai”​—te au turanga e te manako—​o te tangata e kimi tauturu maira. E kino ainei te turanga te ka akatupu i ta tatou tauturu anga kia ngata? Me kare tatou i kite meitaki i te turanga, penei ka oronga tatou i te akoanga kare te tangata e marama mai.​—Luka 6:39.

Akara Eaa te Maata Tana i Kimikimi Ana. E meitaki katoa kia ui ki te tangata e kimi tauturu maira i teia au uianga e: “Eaa toou manako te au kaveinga Pipiria ka tau kia aruia?” “Eaa te au mea puapinga e te au mea kare e puapinga ana taau i iki?” “Eaa te kimikimi anga taau i rave takere ana?” “Eaa te tauturu ta etai ke, mei te aronga pakari o te putuputuanga, toou nga metua, me kore toou puapii Pipiria i oronga takere mai kia koe?”

Penei ka tauturu mai te au pauanga ia tatou kia kite mei teaa te maata ta taua tangata ra i rave ana i te kimi i te pauanga. Ka akamanako katoa tatou i te ako anga ta tetai ke i akakite takere kiaia. Ka kite katoa tatou me te kimi maira te reira tangata i tetai tangata ako kia ‘akamainiini i tona taringa’ ki tana e inangaro ra i te akarongo.​—2 Timo. 4:3, NW.

  2 Kopae i te Pau Viviki.

“Kia rapurapu ua te tangata ravarai i te akarongo, kia tavarevare i te tuatua.”​—IAKO. 1:19.

Penei e akakoroanga meitaki to tatou e ka pau viviki atu tatou. Inara, e mea meitaki ainei te reira me kare tatou i kimikimi meitaki ana i te au tumu manako e uriuriia ra? Te tuatua ra a Maseli 29:20 e: “Te kite ra koe i taua tangata rapurapu ua kia tuatua ra? manakonako roa ake tei te neneva ra i tei iaia.”

Akapapu meitaki e te rotai ra taau tuatua ki te pakari o te Atua. Ui kia koe uaorai e, “Kua o mai ainei te au manako e te ‘vaerua o teianei ao’ ki roto i taku ako anga?” (1 Kori. 2:12, 13) E akamaara, kare e rava ua te au akakoroanga meitaki. Kua akakite te apotetoro ko Petero kia Iesu, i muri ake te kiteanga aia i ta Iesu ka rave e: “Kia takinga meitaki ia koe uaorai, e te Atu; auraka roa teia tu kia tupu kia koe.” Eaa ta tatou i kite mai mei ta Petero i tuatua? Me kare tetai e matakite, kare aia e turuturu “i te au manako o te Atua, kareka ra i to te tangata ra.” (Mata. 16:21-23) E puapinga tikai kia akamanako tatou i mua ake ka tuatua ai! Kare ainei e kua kotingaia to tatou uaorai kite me akaaiteia atu ki te pakari o te Atua?​—Iobu 38:1-4; Mase. 11:2.

3 Taangaanga Akaaka i te Tuatua a te Atua.

“E kare aku peu rave ua; ko ta taku Metua ra i apii mai iaku ra, ko taku ïa e tuatua nei.”​—IOA. 8:28.

Ka tuatua ainei koe e, “Naringa e ko au koe, ka rave au . . . ”? Noatu e te marama ra te tangata i te pauanga, e mea meitaki i te aru i te tu akaaka e te tu tau tei akanooia mai e Iesu. E maata atu tona pakari e te kite i to tetai ua atu tangata; inara, kua karanga aia e: “Kare oki i taku uaorai te tuatua taku i karanga atu na; na te Metua ra . . . i akaue mai iaku i te tuatua, kia tuatua au e kia apii au.” (Ioa. 12:49, 50) Kua akatumu ua rai a Iesu i tana au apiianga e te ako anga ki runga i te anoano o tona Metua.

Ei akaraanga, ka tatau tatou i roto ia Luka 22:49, e kua pati te au pipi a Iesu e me ka tau rai ratou kia tamaki atu me opuia mai a Iesu. E kua taangaanga tetai pipi i te koke i te paruru ia Iesu. Kua akakite katoa mai te tataanga i roto ia Mataio 26:52-54, e noatu i roto i taua turanga ra, kua akapou a Iesu i tetai taime i te uriuri ki tana pipi no runga i to Iehova anoano. No te mea kua kite aia i te au kaveinga i roto ia Genese 9:6 e te au totou i roto ia Salamo 22 e Isaia 53, kua oronga a Iesu i te aratakianga meitaki tei akaora i te au tangata e tei akamareka ia Iehova.

  4 Taangaanga i Taau Runanga Puka Teokaratiki.

“Koai te tavini akono meitaki e te pakari, i ta tona pu i akaaere i tona ngutuare, ei tua i te kai na ratou i te ora mou ra?”​—MATA. 24:45.

Kua iki a Iesu i tetai pupu tavini irinakiia kia tua aere i te au kai pae vaerua. Me oronga koe i te ako anga e te aratakianga no te au mea puapinga, te kimikimi meitaki ra ainei koe i roto i te au puka tei akatumuia ki runga i te Pipiria?

Maata te au akakiteanga taka meitaki e tei mama ua i te kimi atu i roto i te Watch Tower Publications Index e te Watchtower Library. * E mea meitaki no tatou kia taangaanga i teia au akakiteanga puapinga! E tauatini ua atu au tumu manako tei taikuia, e e maata te au atikara te ka tauturu i tetai tangata e kimi tauturu ra. E tu karape ainei toou i te tauturu i tetai ke i te kimi i te au kaveinga Pipiria e te uriuri manako anga no runga i te Tuatua a te Atua? Mei tetai GPS rai me kore mapu te ka tauturu i tetai tangata kia kite e teiea aia, e ka arataki atu iaia ki te ngai e akakoro ra aia, no reira ka tauturu te au puka iaia kia kite i te mataara e aru ra aia e kia kite e akapeea aia me noo tamou ki runga i te mataara ki te ora.

Maata te aronga pakari tei tereni i te au papuritia kia akara i te au atikara na te taangaanga anga i te Index me kore i te Watchtower Library, te tauturu anga i to ratou au taeake e te au tuaine kia akamanako no runga i te au Tuatua Tapu. Ka tauturu te reira i te au papuritia kia akatikatika i to ratou au manamanata i te reira taime, e kia rave ua rai i te kimikimianga e kia irinaki ki ta Iehova au tauturu i te pae vaerua. Na roto i teia tu, ka ‘kite to ratou ngakau i te meitaki e te kino.’​—Ebe. 5:14.

5 Eiaa e Rave i te Ikianga no Etai Ke.

“Ei runga iaia uaorai ta te tangata ravarai apainga.”​—GALA. 6:5.

I te openga, ka anoanoia te tangata tataki tai kia iki e ko teea ako anga me kore aratakianga tana ka aru. Kua oronga mai a Iehova i te tikaanga kia tatou pouroa kia iki me ka inangaro tatou kia akaaereia e tana au kaveinga, me kare. (Deu. 30:19, 20) I roto i tetai au turanga, ka o mai tetai atu au kaveinga Pipiria, e ka anoanoia te tangata e kimi tauturu ra kia rave i tana uaorai ikianga. No runga i te manamanata me kore te turanga pakari o te tangata e pati tauturu maira, ka tau tatou kia ui kia tatou uaorai e, ‘E tikaanga ainei toku i te pau i teia uianga?’ E mea meitaki kia akakite atu i tetai au mea ki te aronga pakari o te putuputuanga me kore me e tamariki aia, kia akakite atu ki tona nga metua.

[Tataanga Rikiriki i Raro]

[Pia/​Tutu i te kapi 8]

Kimikimianga no te Akamorianga a te Ngutuare

Ei apii na te ngutuare, kore koe e rave i te kimikimianga kia kite i te au pauanga no te au uianga tei uiia mai kia koe? Eaa te au atikara e te au kaveinga Pipiria taau ka kite mai te ka tauturu i tetai tangata tei ui i taua au uianga ra? Ei akatauanga, penei ka pati tauturu mai tetai taeake me kore tuaine no runga i te aere kapiti anga e tetai tangata no te manako kia akaipoipo. Me taangaanga i te Index me kore te Watchtower Library, akara na mua i te au manako no runga tikai i te tumu tuatua. Ei akaraanga, i roto i te Index, penei ka akara koe i te “Dating” me kore “Marriage.” E oti, akara i te au tumu manako rikiriki no te au atikara ka tau. Me akara i tetai tumu tuatua, akara me e au tumu manako rai tetai i te ngai “See also” e tou tika ra ki te tumu tuatua te tau ra ki taau e kimikimi ra.

[Pia i te kapi 9]

Kia akameitakiia a Iehova no tana au tauturu i oronga mai na roto i tana akaaerenga, e ka rauka ia tatou i te oronga e te akarongo ki te au ako anga puapinga. Te akakite ra a Koheleta 12:11 e: “E tau te tuatua a te aronga pakari ra ki te ko e mei te nairo akamou meitakiia ra e te aronga e uipa ra; kua akonoia ïa e te Tiaki okotai ra.” Mei te au “ko” rai​—e au rakau keokeo e taangaangaia ana kia arataki i te au manu​—te arataki ra te au ako anga tau i te aronga ngakau tika ki te mataara tika. E akatupu ana te au “nairo akamou meitakiia” i te au tu ngaueue kore. Pera katoa, ka akatupu te akakiteanga i te ako anga meitaki i te au tupuanga ngaueue kore. E rekareka ana te aronga pakari “e uipa ra” i te uriuri i te ‘au tuatua’ te akaari maira i te tu pakari o to ratou “Tiaki okotai,” ko Iehova.

Aru i te Tiaki me oronga mai i te ako anga. E tikaanga ngateitei to tatou i te akarongo e te oronga katoa i te ako anga tauturu! Me akatumu tikaiia te ako anga ki runga i te au kaveinga Pipiria, ka riro te reira ei mea puapinga e ka puapinga maata katoa te tangata e akarongo maira.