Akono Tamou i Toou Manako Rapurapu

“E tutu aere i te tuatua, kia rave rapurapu i te reira.”​—2 TIMO. 4:2, NW.

KA RAUKA AINEI IA KOE TE AKATAKA?

Eaa ra te au Kerititiano i te anere mataiti mua i tutu aere ei ma te tu manako rapurapu?

Akapeea tatou me akono tamou i to tatou manako rapurapu?

Eaa ra te angaanga tutuanga o te Patireia i riro ei ei mea rapurapu i teianei i to mua ana?

1, 2. Eaa te au uianga no runga i te akauenga kia ‘tutu aere ma te manako rapurapu’?

E ANGAANGA ana te aronga akaora tangata ma te manako rapurapu. Ei akaraanga, ka oro viviki te aronga angaanga tamate ai ki tetai tupuanga poitirere; e kite ra ratou e ka tupu te kino ki te au tangata.

² Ei Au Kite no Iehova, te inangaro nei tatou i te tauturu i te au tangata kia ora mai. No reira, e puapinga tikai ta tatou angaanga kia tutu i te tuatua meitaki o te Patireia. E tika, kare tatou e oro manako kore aere. Eaa i reira te aiteanga o ta Paulo akoanga e: “E tutu aere i te tuatua, kia rave rapurapu i te reira”? (2 Timo. 4:2, NW) Akapeea ra tatou me tutu aere ma te manako rapurapu? E eaa ra ta tatou angaanga i riro ei ei angaanga rapurapu?

EAA I RAPURAPUIA AI TA TATOU TUTUANGA?

3. Eaa te ka tupu me ariki me kore me patoi te au tangata i te karere o te Patireia?

³ Me kite koe e ka rauka mai te ora mei ta tatou angaanga tutuanga, penei ka manako rapurapu koe kia tuatua ki tetai ke no runga i te tuatua meitaki. (Roma 10:13, 14) Te tuatua ra te Tuatua a te Atua e: “Kia karanga atu au ki te tangata kino ra, E mate tika rai koe na; kia ariu maira aia i tona ra kino, e kia rave i te mea tau e te mea tika . . . ka ora tika rai aia, kare ïa e mate. Te au ara katoa tana i rave ra, kare ïa e taiku akaouia kiaia.” (Eze. 33:14-16) E tika, te akakite ra te Pipiria ki te aronga e tutu ra i te karere o te Patireia e: “E oraʼi koe, e te aronga katoa e akarongo mai ia koe ra.”​—1 Timo. 4:16; Eze. 3:17-21.

4. Eaa i riro ei te au apiianga apoteiti i te akatupu i te tutuanga kia rapurapuia i te anere mataiti mua?

⁴ Kia marama tatou i te tumu i akamaroiroi ei a Paulo ia Timoteo kia tutu aere ma te manako rapurapu, e kia akamanako i te katoaanga o ta tatou tumu irava. Ka tatau tatou e: “E tutu aere i te tuatua, kia rave rapurapu i te reira i te au tuatau tau, i te au tuatau manamanata, e ako  tikai, e ako ma te tuatua, kia akamaroiroi, ma te akakoromaki anga roa e te rave karape anga i te apiianga. Te vaira te tuatau e kare ratou e akarongo i te au apiianga meitaki, inara, kia tau ki to ratou uaorai au anoano, ka akamaata atu ratou i te au puapii no ratou uaorai kia akamainiini i to ratou taringa; e ka uri ke ratou i to ratou au taringa mei te tuatua mou.” (2 Timo. 4:2-4, NW) Kua totou mai a Iesu e ka tupu mai te au puapii apoteiti. (Mata. 13:24, 25, 38) E tupu maira te au puapii apoteiti, kia rapurapu a Timoteo i te “tutu aere i te tuatua,” pera katoa i roto i te putuputuanga kia kore te au Kerititiano e akavareia e te au apiianga tarevake. Tei roto te oraanga o te tangata i te kino. Akapeea ra i teia tuatau?

5, 6. Eaa te au manako matauia ta tatou ka kite mai i roto i ta tatou angaanga orometua?

⁵ Te totoa ua atura te au apiianga apoteiti no roto mai i te akamorianga mou. (2 Tesa. 2:3, 8) Eaa te au apiianga te akamainiini ra i te taringa o te au tangata i teia tuatau? Maata te au ngai te turuturu ra te au akonoanga i te apiianga no te au mea tupu ua mai. Noatu kua apiiia mai te au mea tupu ua e te apiianga taineti, kua riro ra te reira ei irinakianga na te katoatoa, tei akatarevake i te manako o te tangata no runga i te Atua e tetai ke. Tetai apiianga matauia koia oki kare te Atua e manako maira ia tatou; e kare tatou e anoanoia kia manako atu iaia. Eaa ra i rekaia ai teia nga apiianga, te akavare anga i te au mirioni tangata kia varea e te moe i te pae vaerua? Te akatupu ra teia nga apiianga i te au tangata kia manako e, ‘Ka rauka ia koe i te rave i taau ka inangaro no te mea kare koe e akaapaia.’ Kua riro teia karere ei akamainiini i te taringa o te au tangata.​—E tatau ia Salamo 10:4.

⁶ E au mataara ke atu tetai tei akamainiini i te taringa o te au tangata. E reka ana tetai pae e aere ra ki te pure me akakite mai to ratou puapii e, ‘Noatu eaa taau ka rave, te aroa maira te Atua ia koe.’ Te akamainiini ra te au orometua i te taringa o tetai pae na te akapapuanga e ka oronga mai te au oroa, au kaikaianga tamataora, e te au tiki i te akameitakianga a te Atua. Kare teia au tangata aere pure e kite ana i te kino o to ratou turanga. (Sala. 115:4-8) Inara, ka puapingaia ratou mei te Patireia o te Atua me ka rauka ia tatou i te akakeu ia ratou i te pae vaerua kia marama ratou i te au tuatua mou o te Pipiria.

EAA TE AITEANGA KIA RAVE RAPURAPU I TE TUTUANGA?

7. Akapeea tatou me akaari i to tatou tu manako rapurapu?

⁷ Ka akamou tetai taote vavai meitaki i tona manako ki runga i tana angaanga no te mea te o maira te oraanga o te au tangata. I roto i ta tatou angaanga orometua Kerititiano, ka akaari tatou i te manako rapurapu na te akamanako anga i au turanga, au uianga, me kore te au manako ka reka mai te aronga ka aravei tatou. E ka akakeu katoa te manako rapurapu ia tatou kia akatanotano i ta tatou papaanga kia rauka i te atoro i te au tangata i te tuatau ka inangaro ratou i te akarongo mai.​—Roma 1:15, 16; 1 Timo. 4:16.

8. Eaa te o maira ki te manako rapurapu?

⁸ Te o katoa maira te manako rapurapu ki te rave anga i te au mea puapinga. (E tatau ia Genese 19:15.) Ei akaraanga, akamanako ana te rauka mai anga te ripoti no toou maki, kua kapiki mai te taote kia koe kia oki mai ki tona opati e kua karanga mai e: “I! E kino tikai toou turanga. E tai rai oou marama toe i te kimi i tetai rapakauanga.” Kare koe e oro viviki ki vao i tona opati mei tetai tangata tamate ai rai e aere ra ki tetai tupuanga poitirere. Mari ra, ka akarongo meitaki koe ki tana e akakite maira, ka oki ki te kainga e ka akamanako meitaki eaa te mea puapinga noou kia rave.

9. Eaa ra tatou ka karanga ai e kua tutu aere a Paulo ma te manako rapurapu iaia i Ephesia?

⁹ Ka marama tatou i te manako rapurapu o Paulo na te akamanako anga i tana i akakite ki te aronga pakari i Ephesia no tana tutuanga i te tuatua meitaki i te tapere o Asia. (E tatau ia Angaanga 20:18-21.) I na, mei te ra mua o tona tae atu anga, e maata tana  tutuanga i te tuatua meitaki ki te au tangata mei tera are ki tera are. Kua rave putuputu katoa aia e rua mataiti i te ‘tuatua ki roto i te are apii o Turano, kare e rā i tukua.’ (Anga. 19:1, 8-10) Taka ua ra e, kua riro ta Paulo i rave i te akakeu i tona manako rapurapu. Kare te patianga e kia ‘rave rapurapu tatou i ta tatou angaanga orometua,’ e kia akariro ia tatou kia taitaia maata. Mari ra, kia akariro i te angaanga tutuanga ei mea puapinga tikai i roto i to tatou oraanga.

10. Eaa ra tatou ka mareka ai e kua manako rapurapu te au Kerititiano mei tetai 100 mataiti i topa?

¹⁰ Kua akaari mai te akaraanga o tetai pupu Aronga Apii Pipiria meangiti i mua ake i te mataiti 1914 tei tutu aere i te tuatua meitaki, i te aiteanga o te manako rapurapu. Noatu mei tetai au tauatini ia ratou e maroiroi ra, kua kite ratou i te tu rapurapu o te tuatau e kua rave maroiroi ratou i te angaanga Patireia. Kua tataia ta ratou au akoanga ki roto i te au anere nuti pepa, e kua akaari katoaia tetai au tutu karakara e te au teata tei kapikiia e ko te “Nuku Teata o te Au Mea Angaia.” Na roto i teia tu, kua taeria e ratou te mirioni ua atu tangata ma te tuatua meitaki. Naringa kare o ratou manako rapurapu, mei teaa te maata ia tatou tei rauka i te akarongo i te karere o te Patireia?​—E tatau ia Salamo 119:60.

MATAKITE KIA KORE E NGARO TOOU TU MANAKO RAPURAPU

11. Eaa te tumu i ngaro ei te manako rapurapu o tetai pae?

¹¹ Ka akatupu te au mea o teianei ao i tetai tangata kia kore e manako puapinga i te angaanga tutuanga. Kua maaniia te akaaerenga o Satani kia akapou tatou i to tatou taime i te aruaru i te au mea e inangaro ra tatou e te au mea puapinga kore. (1 Pete. 5:8; 1 Ioa. 2:15-17) Tetai pae tei tavini ana ia Iehova, kua ngaro to ratou tu manako rapurapu. Ei akatauanga, tetai Kerititiano no te anere mataiti mua, ko Dema tona ingoa, e “oa” aia no Paulo tei timataia e te akatereanga akono kore i te Atua. Kare a Dema i akaketaketa ana i tona taeake ko Paulo i te tuatau ngata, mari ra kua akaruke aia iaia.​—Phile. 23, 24; 2 Timo. 4:10.

12. Eaa te atianga ka rauka ia tatou i teianei e e tuatau ua atu?

¹² E akono tamou ei i to tatou manako rapurapu, e patoi tatou i te inangaro kia mataora i te au mea o te oraanga. Ka tauta tatou kia rauka mai “te ora mutu kore.” (1 Timo. 6:18, 19) Papu e te irinaki nei tatou e ka oronga mai te oraanga mutu kore i te enua nei i raro ake i te Patireia o te Atua i te au akameitakianga ope kore kia mataora tatou i te au angaanga meitaki. Inara e atianga meitaki to tatou i teianei i te tauturu i tetai ke kia ora mai mei ia Aramakito.

13. Kua riro mai tatou i teianei ei au Kerititiano, akapeea tatou me akono tamou i to tatou tu manako rapurapu?

¹³ I te mea e te moe ra te manganui o te tangata takapini i teianei ao i te pae vaerua, eaa te ka tauturu ia tatou kia kore e ngaro to tatou tu manako rapurapu? Ka anoanoia tatou kia akamaara e no roto ana tatou i te poiri i tetai tuatau no te rave i te ara. Inara kua akaoraia mai tatou e kua oronga mai a Karaiti i te marama kia tatou mei ta Paulo rai i taiku mai. I teianei e tikaanga ngateitei to tatou kia oronga atu i te marama o te tuatua mou ki tetai ke. (E tatau ia Ephesia 5:14.) Muri ake i te taiku anga i te reira, kua tata a Paulo e: “Kia matakite i to kotou aerenga, eiaa mei ta te kite kore, mei ta te aronga pakari ra. Ma te taporoporo marie i te tuatau, no te mea e tuatau kino teia.” (Ephe. 5:15, 16) I roto i teia ao kino, ‘ka taporoporo marie tatou i te tuatau’ no te au angaanga te ka tauturu ia tatou kia vai ara ua i te pae vaerua.

NOO NEI TATOU I TE TUATAU PUAPINGA TIKAI

14-16. Eaa te akariro ra i te angaanga tutuanga o te Patireia ei angaanga rapurapu i teianei i to mua ana?

¹⁴ Kua riro ua ana te angaanga orometua Kerititiano ei mea rapurapu, inara maata rava atu te tu rapurapu o te reira i teianei  i to mua ana. Mei te mataiti 1914 mai, taka meitaki ra te au akairo tei taikuia i roto i te Tuatua a te Atua. (Mata. 24:3-51) Te takino maataia nei te oraanga o te tangata i teia tuatau i to mua ana. Noatu te au koreromotu anga, te vai ra e 2,000 au pomu nukiria tamaki a te au mana tutara maata, kua papa ua i te pupui mai. Kua ripoti mai te aronga mana e e anere ua atu au apinga nukiria tei “ngaro.” Tei te au tangata ta tangata ainei teia au apinga? Kua karanga tetai aronga e ka rauka i tetai tamaki tei akatupuia e tetai tangata ta tangata i te takore atu i te au tangata. Inara, kare ko te tamaki ua te takino ra i te oraanga o te tangata.

¹⁵ “Ko te tauianga reva te takino anga maata o te oraanga i te ao katoa i te 21 anere mataiti,” i akakite ei tetai ripoti, The Lancet e te University College London i te mataiti 2009. Kua karanga te reira e: “Ka takino te tauianga reva i te oraanga o te maataanga o te tangata no te au mataiti ki mua e ka takino roa atu te reira i te au pirioni ua atu tangata.” Penei maata te ngai ka takoreia no te kakeanga o te tai, te reva maro, te vaipuke, te au maki mate, te au uriia, e te au tamaki. Ae, te takino ra te au tamaki e te au tumatetenga i te au tangata.

¹⁶ Kua manako tetai pae e ka taki atu te tamaki nukiria ki te akatupuanga i “te akairo.” Inara, kare te maataanga e marama ana i te aiteanga tikai o taua akairo ra. Kua kiteaia mai ana te reira no tetai au mataiti, te akaari maira e e mea tika tikai to Karaiti parutia e te vaitata maira te openga o teianei ao. (Mata. 24:3) Te kite meitakiia nei te au akairo e manganui i teianei tei kare rava i kitea ana i mua ana. Ko te taime teia no te au tangata kia ara mai mei te moe i te pae vaerua. Ka rauka ta tatou angaanga orometua i te tauturu i te akaara mai ia ratou.

17, 18. (a) Akapeea ra “te atianga” o te au ra openga te akakeu anga ia tatou? (e) Eaa te ka akakeu i te au tangata kia ariki mai i te karere o te Patireia?

¹⁷ Te poto nei to tatou tuatau i te akapapu i to tatou inangaro no Iehova e te akaoti i te angaanga tutuanga i te au ra openga. E maata atu te puapinga i teianei mei ta Paulo i akakite ki te au Kerititiano i te anere mataiti mua i Roma e: “Kua kite kotou e te au tangata ra i te atianga, no te mea kua tae takere te ora kia ara mai mei ta kotou moe, e vaitata ake oki to tatou akaora i teianei i to te tuatau te riro anga mai matou ei au tangata irinaki.”​—Roma 13:11.

¹⁸ Ka riro te au tupuanga tei totouia no te au ra openga i te tauturu i te au tangata tataki tai kia kite mai i to ratou anoano pae vaerua. Te kite ra tetai pae e te anoano ra te au tangata i te tauturu, mei ta ratou e kite ra e kare e rauka ana i te au kavamani tangata i te akakore atu i te au manamanata pae moni, te au takinoanga nukiria, te taanga kino, me kore te takino anga o te enua. Te kite ra ra tetai pae i to ratou au anoano i te pae vaerua e te au mea e tupu ra ki to ratou pamiri, mei te kino o te oraanga maki, te akatakake anga, me kore kua mate tetai tei akaperepereia. No reira me piri atu tatou ki te angaanga orometua, ka rauka ia tatou i te tauturu atu i taua au tangata ra.

AKAKEUIA E TE MANAKO RAPURAPU

19, 20. Akapeea ra te manako rapurapu i te akakeu anga i te manganui o te au Kerititiano kia taui i to ratou oraanga?

¹⁹ Kua akakeu te manako rapurapu i te maataanga o te au Kerititiano kia akamaata atu i ta ratou angaanga orometua. Ei akaraanga, kua iki tetai tokorua akaipoipo i Ekuatoa i te akamama i to raua oraanga i muri ake i to raua akarongo anga i te porokaramu o te akaputuputuanga takake i te mataiti 2006 “Kia Akono Meitaki i Toou Mata.” Kua tata raua i te au apinga kare raua e anoano, e i roto i te toru marama kua neke raua mei to raua apatimani e toru pia moe ki tetai are e tai pia moe, e kua oko atu i tetai o ta raua au apinga e te tutaki i ta raua au kaiou. Kare i roa ana kua painia tauturu raua e kua ariki i te manako o tetai akaaere kotinga e kia tavini atu raua i tetai  putuputuanga te anoano maataia ra te tauturu.

²⁰ Kua tata mai tetai taeake i Marike Tokerau e: “Te aere anga maua ko toku tokorua ki tetai akaputuputuanga i te mataiti 2006, kua papetitoia ana maua e 30 mataiti. Te oki anga maua ki te kainga i muri ake i te porokaramu, kua uriuri maua e akapeea me taangaanga i te au akoanga kia akamama mai i te oraanga. (Mata. 6:19-22) E toru o maua are, e tai potonga enua, au motoka manea, e tai poti, e te caravan. Kua manako mai maua e kua kaimoumou ana maua i to maua oraanga ei nga Kerititiano, kua iki maua i te akariro i te angaanga orometua tamou ei akakoroanga na maua. I te mataiti 2008 kua piri atu maua ki ta maua tamaine i te painia tamou. E mea mataora tikai i te angaanga kapiti anga ki te au taeake! Kua tavini maua i te ngai e anoano maataia ra te tauturu. Pera katoa, kua riro te tavini maata anga ia Iehova ei akavaitata atu ia maua kiaia. E tikaanga ngateitei tikai i te kiteanga i te au tangata e mataora ra me akarongo mai e me marama mai i te tuatua mou a te Tuatua a te Atua.”

21. Eaa ra ta tatou i kite mai tei akakeu ia tatou kia tutu ma te manako rapurapu?

²¹ Kua kite tatou e eaa te ka tupu ki teia akatereanga kino​—“te rā akavaanga, e te mate o te aronga akono kore i te Atua.” (2 Pete. 3:7) Ka akakeu to tatou kite no runga i te Tuatua a te Atua ia tatou kia akakite maroiroi i te mate maata e aere mai nei e te ao ou te ka aru mai. Kia manako rapurapu ua rai tatou i te akakite atu i te manakonakoanga tikai ki te au tangata. Na te piri anga ki teia angaanga rapurapu, te akaari ra tatou i te inangaro tikai i te Atua e i to tatou tangata tupu.

[Au Uianga Apii]