Au Uianga a te Aronga Tatau

E kino ainei no tetai Kerititiano kia akara i te au ravenga ainga viivii te ka akariro iaia kia akaateaia mei te putuputuanga Kerititiano?

▪ Ae. No reira i puapinga ai kia kopae takiri i te au ainga viivii​—me kua tataia me e tutu—​i roto i te au makatini, au teata, e te au vitio e i runga i te Initaneti.

Ka kiteaia te ravenga ainga viivii takapini i te ao katoa. Kua akaari mai te Initaneti i te au mea ainga viivii ei mea mama ua i te akara e e maata atu te au tangata tei akakeuia e teia apinga kino. Tetai au mapu e te aronga mamaata, kua kite poitirere ua atu i te au ravenga ainga viivii i runga i te Initaneti. Kua aere tika tetai pae ki reira i runga i te Initaneti, ma te kore e akama no te mea ka rauka ia ratou i te tatau me kore i te akara i te ravenga ainga viivii i tetai ngai muna​—i te kainga me kore i roto i te opati. Eaa ra te au Kerititiano ka akamanako pakari ei i teia tu?

Ka kite tatou i te tumu maata i roto i ta Iesu akamatakiteanga e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mata. 5:28) E tika, e mea meitaki e te mareka te pirianga ainga i rotopu i te nga tokorua akaipoipo. (Mase. 5:15-19; 1 Kori. 7:2-5) Inara kare te ravenga ainga viivii e akaari maira i te reira tu  manako. Mari ra, te akatupu ra te ainga viivii i te au tu manako tau kore ta Iesu i akamatakite mai kia tatou. Taka ua ra e, te tatau anga me kore te akara anga i te ravenga ainga viivii te patoi tikai ra i ta te Atua aratakianga e: ‘E tenana ka tamate i to kotou au melo i te au mea o teianei ao; te akaturi, te tu viivii, te anoano viivii ra, te inangaro tika kore, e te noinoi apinga, e akamori idolo oki te reira.’​—Kolo. 3:5.

Akapeea me akara tetai Kerititiano i te ravenga ainga viivii e tai me kore e rua taime? Penei te akaaiteia ra tona turanga ki tetai turanga kino pakari ta te tata taramo ko Asapha i kite mai: “Kareka au nei, kua vaitata toku vaevae i te paeke; me turori oki toku takainga.” Akapeea e rauka ai i tetai Kerititiano te akava ngakau ma e te tu au ki te Atua me te akara ra aia i te au tutu ainga viivii o te au tane me kore te au vaine taka ua me kore tetai tane e te vaine e akaturi ra? Ka manako aia mei ia Asapha rai tei tuatua e: “Kua tairoia ra au e po ua atu te rā, e kua pāpāia kare e popongi e vata.”​—Sala. 73:2, 14.

Kia kite mai tetai Kerititiano e akara ra i te ravenga ainga viivii e ka kino tona pirianga kia Iehova e ka anoanoia aia kia tauturuia. Tei roto i te putuputuanga taua tauturu ra: ‘Kia rokoia tetai e te apa ra, ka akaora kotou ko tei akono i ta te vaerua ra i te reira, ma te ngakau maru; ma te manako ia koe uaorai.’ (Gala. 6:1) Penei ka oronga tetai tangata pakari Kerititiano me kore e rua i te tauturu tana e anoano ra, kapiti mai te ‘pure akarongo te ka akaora mai i taua maki ra, e e akakoreia ai tana ara.’ (Iako. 5:13-15) Te aronga tei kimi tauturu i te akakore i te kino o te ravenga ainga viivii, kua kite mai e e mea meitaki no ratou kia akavaitata atu ki te Atua, mei ia Asapha rai.​—Sala. 73:28.

Inara, kua akakite te apotetoro ko Paulo e ko tetai pae tei rave i te ara, kare i tataraara ‘i te tu viivii, e te akaturi, e te kanga.’ * (2 Kori. 12:21) No runga i te tuatua Ereni “viivii,” kua tata mai tetai Poropeta ko Marvin R. Vincent no runga i te reira ei “aiteanga viivii no te tu viivii tikai.” E kino atu tetai au ravenga ainga viivii i tetai tutu takaua me kore i te akaturi a tetai tane e te vaine. Te o maira te ainga viivii kino ki te pirianga ainga o te tane ki te tane, te vaine ki te vaine, te ainga pupu, ainga ki te manu, au tutu ainga o te tamariki, tauati anga pupu, taanga i te vaine, me kore te tamamae anga kino. Tetai pae i te tuatau o Paulo tei ‘akapoiriia te manako,’ kua “oronga ia ratou uaorai i te peu kanga ra, ei rave i te au mea viivii katoa ra, ma te anoano maata.”​—Ephe. 4:18, 19.

Kua taiku katoa a Paulo i te ‘tu viivii’ i roto ia Galatia 5:19. Kua akakite tetai tangata apii i Peritane e “penei te [akatutu ra] teia i te tu inangaro tau kore tikai.” Ko teea Kerititiano kare e manako e ko te au ainga tau kore no te ravenga ainga viivii tei taikuia i runga akenei, e e “tu inangaro tau kore tikai” te reira e te viivii? Kua taopenga a Paulo i roto ia Galatia 5:19-21 e “ko te aronga e rave i te reira au peu, kare ratou e noo i te basileia o te Atua.” No reira, me akara putuputu tetai tangata i te ravenga ainga viivii, penei a tetai tuatau, kare aia e tataraara e e ariu mai, kare aia e akatikaia kia piri atu ki roto i te putuputuanga Kerititiano. Ka akaateaia aia ki vao kia vai ma ua te putuputuanga.​—1 Kori. 5:5, 11.

E mea meitaki kia kite e ko tetai pae tei akara i te au ravenga ainga viivii kino tikai kua aravei ratou i te aronga pakari e kua orongaia atu te tauturu pae vaerua kia rave i te au tauianga maata. Kua pati a Iesu ki te au Kerititiano i Saradi i taito e: “E akapakari i te au mea i toe, i vaitata i te mate ra . . . ka akamanako na i te tu o toou āriki anga ra, e te akarongo anga, e e tāpu tikai i taua tuatua ra, e e tataraara. Kia kore koe e matakite ra, . . . kare rava koe e kite i te ora e rokoiaʼi koe e au ra.” (Apo. 3:2, 3) Ka rauka i te tataraara e kia akaoraia mai mei te au ravenga ainga viivii.​—Iuda 22, 23.

E mea puapinga i reira no tatou tataki tai kia akapapu e kia kore e akavaitata atu ki taua au tu kino ra. Ae, kia tauta tatou i te kopae i te au ravenga ainga viivii!

[Tataanga Rikiriki i Raro]

[Tataanga i te kapi 30]

Kia kite mai tetai Kerititiano e akara ra i te ravenga ainga viivii e ka kino tona pirianga kia Iehova e ka anoanoia aia kia tauturuia