“Ka Tika ia Koe Kia Nenei ia Maua?”

Muri ake i te rua o te ra o te uruoaanga tapere, kua atoro atu a Josué no te Betela mai o Meiko i te oire o Querétaro. Kua pati a Javier raua ko Maru, e nga tokorua akaipoipo e turoto ra ia Koromopia, ia Josué kia nenei ia raua. No te mea kua akamanea meitaki aia e tona au oa Kite ia ratou e te aao ra i to ratou kati uruoaanga, kua ui mai te nga tokorua e me i aere ana ratou ki tetai karatuatianga me kore ki tetai akakoroanga takake. Kua akamarama atu a Josué e te aere ra ratou ki tetai uruoaanga a te Au Kite o Iehova, e kua pati ratou i te nga tokorua kia aere ki te tuanga o te Tapati.

Kua manako te nga tokorua e ka akama raua me aere raua ki reira, no te mea kare o raua kakau manea no taua atianga ra. Noatu rai, kua oronga atu a Josué i tona ingoa e te numero terepaoni o te opati manga, te ngai e angaanga ra aia.

Kua poitirere a Josué, e a marama i muri mai kua ringi mai a Javier iaia. Kua tae te nga tokorua ki te uruoaanga e i teianei ka inangaro raua i te Au Kite o Iehova i te atoro ia raua i Meiko, te ngai e noo ana raua i taua taime ra. Kare i roa ana kua apii a Javier raua ko Maru i te Pipiria, e kua aere ki te au uipaanga. E tai ngauru marama i muri mai, kua riro mai raua ei papuritia. Noatu e kua neke te nga tokorua ki Toronto, i Kanata, kua akamaata atu raua i ta raua angaanga pae vaerua e kua papetitoia.

Muri mai, kua tae mai tetai reta na Josué no ko mai ia Javier, te akamaramaanga e eaa tei akakeu iaia kia ariki i te tuatua mou. “Mua ake ka aere ei maua ko taku vaine ki te uruoaanga, kua tuatua ana maua i to maua inangaro kia aratakiia i te pae vaerua. Te kiteanga maua i to kotou tu akamanea, kua manako maua e no tetai uipaanga puapinga mai kotou. I ko i te uruoaanga, kua mareka tikai maua i te tu aroa tei akaariia mai no te kimianga i tetai ngai nooanga no maua, te tauturu tei orongaia mai kia aru i te tatau anga i te Pipiria, e te tu o te katoatoa tei tae atu. Kare ratou i manamanata ana i te tu o to maua kakau e aao ra.”

Kua riro te au tuatua a te Ariki ko Solomona ei mea tika tikai kia Josué! Kua tata a Solomona e: “Ei te popongi ka ruru ei i taau ua, e ei te aiai auraka e tāpu ua i to rima: kare oki koe i kite i te ka tupu, me ko teia, me ko tera, peneiake ko te meitaki kapipiti katoa ra.” (Kohe. 11:6) Ka rauka ainei ia koe i te tatanu i te ua na te taangaanga anga i te au atianga kia akakitekite ki te tangata no runga i tetai uruoaanga e tu mai nei me kore tetai akoanga na te katoatoa? Penei ka taangaanga a Iehova ia koe kia akaariu mai i te tangata te pongi ra e te kaki ra i te kai pae vaerua, mei ia Javier rai raua ko Maru.​—Isa. 55:1.

[Tutu i te kapi 32]

Kaui ki te katau: Alejandro Voeguelin, Maru Pineda, Alejandro Pineda, Javier Pineda, e Josué Ramírez i ko i te opati manga i Meiko