Tauturu i te au Tangata Kia ‘Ara Mai Mei te Moe’

‘Kua kite kotou e kua tae ki te ora ara anga mei ta kotou moe.’​—ROMA 13:11.

KA RAUKA AINEI IA KOE TE AKATAKA?

Eaa ra i puapinga ai e kia vai ara ua te au Kerititiano i te pae vaerua?

Eaa ra te aronga tutu aere e ara ra ka anoanoia ai kia akarongo e kia akara meitaki?

Eaa ra tatou ka akaari ei i te tu maru i roto i ta tatou angaanga orometua?

1, 2. I roto i teea tu ka anoanoia ai te au tangata kia ara mai?

TE AU mataiti ravarai, e tauatini ua atu tangata e mate ana no te varea moe me kore kua moe e akaoro ra i te motoka. Kua akamutuia mai tetai pae i te angaanga no te kare i ara vave ana kia tae ki te angaanga me kore kua varea e te moe i te ngai angaanga. Inara, e kino atu te varea moe i te pae vaerua. I roto i teia irava puapinga i tuatua ai te Pipiria e, ‘e ao to tei tapapa’ me kore tei ara ua.​—Apo. 16:14-16.

² E vaitata maira te ra maata o Iehova, te moe ra te au tangata i te pae vaerua. Kua taiku mai te au arataki o Kerititome i ta ratou au anana e e ‘aronga moe ua.’ Eaa ra te moe i te pae vaerua? Eaa ra i puapinga ai kia ara ua te au Kerititiano mou? Akapeea tatou me tauturu i tetai ke kia ara mai mei taua tu moe ra?

EAA RA TE MOE I TE PAE VAERUA?

3. Akapeea koe me akataka i tetai tangata kare e ara ana i te pae vaerua?

³ Kare te aronga e moe ana e angaanga ana. Tei tuke, e maata te angaanga a te aronga e moe ana i te pae vaerua​—kare ra no te au mea pae vaerua. Maata roa to ratou au tu apiapi no te au mea o te oraanga me kore no te au mea navenave, turanga teitei, e no te au apinga nui. No te maata o teia au angaanga, kare ratou e manako atu ana i te au anoano pae vaerua. Inara, te aronga e ara ra i te pae vaerua, te kite ra e te noo nei tatou i “te au rā openga,” no reira te rave maroiroi ra ratou i te anoano o te Atua.​—2 Pete. 3:3, 4; Luka 21:34-36.

4. Eaa te puapinga o te akoanga e: “Auraka tatou e moe, mei tetai papaki ra”?

⁴ E tatau ia 1 Tesalonia 5:4-8. Te akamaroiroi ra te apotetoro ko Paulo i te au taeake irinaki kia kore “e moe, mei tetai papaki ra.” Eaa te aiteanga o tana tuatua? Tetai mataara e “moe” ana tatou na te kore anga e aru i te au tu akono tau o Iehova. Tetai mataara ke e  “moe” ana tatou na te kore e ariki ana e te vaitata maira te tuatau ka takore a Iehova i te aronga akono kore i te Atua. Kia akapapu tatou e kare te reira au tangata e akavare ia tatou kia aru i to ratou au tu e to ratou au aerenga.

5. Eaa te au tu te akaari maira i te aronga e moe ra i te pae vaerua?

⁵ Kare tetai aronga e manako ana e e Atua tetai te ka akava mai ia ratou. (Sala. 53:1) E manako ana tetai pae e kare te Atua e manako mai ana ia tatou te au tangata, no reira kare e puapinga kia manako atu tatou iaia. Inara, te manako ra tetai pae e mei tei roto ratou i tetai akonoanga, ka riro ratou ei au oa no te Atua. Te moe ra teia au tangata ravarai i te pae vaerua. Ka anoanoia ratou kia ara mai. Akapeea tatou me tauturu ia ratou?

KIA VAI ARA UA TATOU

6. Eaa ra te au Kerititiano ka tauta ai kia vai ara ua i te pae vaerua?

⁶ E rauka ai ia tatou i te akaara atu i tetai pae, kia ara katoa tatou. Eaa te o maira ki te reira? Te o maira te “au angaanga a te poiri”​—te akatietie, te kona, te tuatua viivii, te kanga, te maro, e te vareae, mei ta te Tuatua a te Atua e akakite maira. (E tatau ia Roma 13:11-14.) E mea ngata i te kopae i taua au tu ra. No reira kia vai matakite tatou. Tetai tangata kare e manako ana e e kino te varea moe iaia e akaoro ra, ka kino tona oraanga. E puapinga tikai no tetai Kerititiano kia kite mai e ka mate tetai me varea e te moe i te pae vaerua!

7. Eaa te ka tupu me manako tarevake tatou i te au tangata?

⁷ Ei akaraanga, penei ka manako tetai Kerititiano e ka patoi mai te au tangata i te ngai tutuanga i te tuatua meitaki. (Mase. 6:10, 11) Penei ka manako aia e, ‘Me kare e tangata e akarongo mai, eaa ra au ka tauta ei i te tauturu atu i te au tangata?’ E tika, maata te moe nei i te pae vaerua, inara, e taui ana to ratou au turanga e te au tu. E ara mai ana tetai pae e e akarongo mai ana. E ka rauka ia tatou i te tauturu ia ratou me ara ua tatou, na te tamata anga i te au mataara ou i te oronga i te karere Patireia na te tu ka reka mai ratou. E rauka ai ia tatou i te ara ua, kia akamaara ua rai tatou i te puapinga o ta tatou angaanga orometua.

EAA I PUAPINGA AI TA TATOU ANGAANGA OROMETUA?

8. Eaa ra ta tatou angaanga orometua i puapinga tikai ei?

⁸ Kia maara e noatu kare tetai e ariu mai ana i te akamataanga, te akangateitei ra ta tatou tutuanga ia Iehova e e puapinga maata te reira no te akatupuanga i tona akakoroanga. Kare e roa atu ana, ka akautungaia te aronga kare e akarongo mai ki te tuatua meitaki. Te akavaia nei te tu e ariu maira te au tangata ki ta tatou tutuanga. (2 Tesa. 1:8, 9) Tei maata atu, e tarevake no tetai Kerititiano kia manako e kare e anoanoia te tutuanga maroiroi no te mea “e tuakaouanga to tei mate, te aronga tuatua-tika e te aronga tuatua-tika kore.” (Anga. 24:15) Kua marama tatou mei te Tuatua a te Atua e ko te aronga te ka akavaia ei “puaka-nio” ka o atu ratou ki te “mate mutu kore.” No reira, te akaari ra ta tatou tutuanga i to te Atua tu tangi aroa no te mea te oronga ra te reira i te atianga no te au tangata kia taui e kia rauka “te ora mutu kore.” (Mata. 25:32, 41, 46; Roma 10:13-15) Me kare tatou e tutu aere, akapeea te au tangata e akarongo ei i te karere no te ora?

9. Akapeea te tutuanga i te tuatua meitaki te akapuapinga anga ia koe e tetai ke?

⁹ Puapinga katoaia nei tatou no te tutuanga i te tuatua meitaki. (E tatau ia 1 Timoteo 4:16.) Te kite ra ainei koe e te riro ra te tuatua anga no runga ia Iehova e te manakonakoanga o te Patireia ei akaketaketa atu i toou akarongo e toou inangaro i te Atua? Kare ainei te reira i tauturu ia koe kia akameitaki mai i te au tu Kerititiano? Kare ainei te akaari anga i toou inangaro i  te Atua na te piri anga ki te angaanga orometua e akariro ra ia koe kia mataora? Kua rauka i te maataanga te tikaanga ngateitei i te apii i te tuatua mou ki tetai ke, e kua mataora i te kiteanga i te vaerua o te Atua e tauturu ra i taua aronga ra kia meitaki mai to ratou oraanga.

AKARA MEITAKI

10, 11. (a) Akapeea a Iesu e Paulo te akaari anga i te tu matakite e te akara meitaki anga? (e) Akakite mai akapeea te tu matakite e te akara meitaki anga me akameitaki atu i ta tatou angaanga orometua.

¹⁰ Ka rauka i te akaara mai i te aronga e inangaro maira i te tuatua meitaki na roto i te au mataara tukeke. No reira kia akara meitaki e kia matakite te au orometua Kerititiano. Ko Iesu to tatou akaraanga. No tona tu apa kore, kua kite atu aia i te riri akamoupuku o te au Pharisea, te tataraara ngakau tae o te vaine rave ara, e te tu oronga akaatinga o te vaine takaua. (Luka 7:37-50; 21:1-4) I rauka ai ia Iesu i te akono i te anoano pae vaerua o te au tangata tataki tai. Inara, kare te tavini o te Atua e anoanoia kia apa kore kia kite atu i te anoano o tetai ke. Kua akaari mai te apotetoro ko Paulo i taua tu ra. Kua akatanotano aia i tana tuatua kia rekaia mai e te au pupu tangata tukeke e to ratou au tu tukeke.​—Anga. 17:22, 23, 34; 1 Kori. 9:19-23.

¹¹ Me matakite e me akara meitaki tatou mei ia Iesu rai raua ko Paulo, ka kite tatou i te mataara meitaki atu i te akakeu i te inangaro o te aronga ka aravei atu tatou. Ei akaraanga, ia koe e aere ra ka tuatua ki tetai tangata, akara i tetai au akairo no tana au peu, au mea e inangaro ra, me kore te turanga o te pamiri. Penei ka kite atu koe i ta ratou e rave ra e kia tuatua meitaki atu no runga i te reira ei akamata anga i te pukapukaanga.

12. Ia tatou e piri ra ki te angaanga orometua, eaa ra tatou ka matakite ei i ta tatou pukapukaanga?

¹² Ka tauta te tangata matakite i te kopae i te au tu akavareanga. Ka riro te pukapukaanga ki toou patana ei akamaroiroianga i roto i te angaanga orometua. Inara, kia akamaara tatou e ko te akakoroanga i piri ei tatou ki roto i te anganga orometua, kia tutu atu ki tetai ke. (Kohe. 3:1, 7) No reira, kia matakite tatou e kare ta tatou au tuatua i te au ngutupa e tamanamanata ana i ta tatou angaanga orometua. E mea meitaki i te uriuri manako i ta tatou ka akakite atu ki te aronga ka akarongo mai no te akamou anga i to tatou manako ki runga i to tatou akakoroanga. Noatu e mea meitaki te terepaoni apaipai aere ei tauturu ia tatou i roto i ta tatou angaanga orometua, e akapapu ra e kare te reira e tamanamanata i ta tatou pukapukaanga ki te tangata ngutuare.

AKAARI I TE INANGARO

13, 14. (a) Akapeea tatou e kite ei eaa ta te tangata e manako ra? (e) Akapeea tatou me akakeu i te inangaro o te au tangata i te pae vaerua?

¹³ E akarongo meitaki ana te aronga tutu aere e ara ra e te matakite i te aronga e aravei ra ratou. Eaa te au uianga ka ui koe ki tetai tangata i taau ngai tutuanga kia akakite mai aia i tona manako? Te manamanata ra ainei aia i te maata o te au akonoanga, te kino e tupu ra, me kore te tu puapinga kore o te au kavamani? Ka rauka ainei ia koe i te akakeu i tona inangaro na te tuatua anga i te au mea ora tei anga umereia mai, me kore te akakite anga e e mea tau tikai te akoanga a te Pipiria? E manako ana te au tangata i roto i te au peu tukeke i te pure, pera katoa te aronga kare e irinaki ana e e Atua tetai. E maata te manako ana e me te akarongoia maira ta ratou pure. E akamanako ana tetai pae i teia nga uianga: Te akarongo maira ainei te Atua i te au pure ravarai? Me kare, eaa ta tatou ka rave e akarongo mai ei te Atua?

¹⁴ Maata ta tatou ka kite no te akamata anga i te pukapukaanga na te akara meitaki anga i te au papuritia tukatau. Akara e akapeea ratou te ui anga i te au uianga kia kore te tangata e mareka kore mai. E akapeea ta  ratou tuatua e to ratou tutu mata te akaari anga e te marama ra ratou i te au manako o te tangata ngutuare?​—Mase. 15:13.

TU MARU E TE KARAPE

15. Eaa ra tatou ka akaari ei i te tu maru me tutu aere tatou?

¹⁵ E reka ana koe me akaaraia mai koe mei taau moe tinainai? Kare tetai e rekareka ana me akaara vivikiia mai aia. E reka ake ratou me akaara marie ia ratou. Mei te reira katoa te akaara anga i te au tangata i te pae vaerua. Ei akaraanga, me riri mai tetai tangata me atoro atu koe iaia, eaa te mea meitaki atu i te rave? Akangateitei atu i tona manako, akameitaki atu iaia no te akakite tika mai i tona manako e kia akaruke ma te maru. (Mase. 15:1; 17:14; 2 Timo. 2:24) Ka akakeu toou tu maru i taua tangata ra kia ariu meitaki mai me atoro atu tetai Kite iaia.

16, 17. Akapeea tatou me taangaanga i te tu kite i roto i ta tatou angaanga orometua?

¹⁶ Tetai tua, ka rauka ia koe te pukapuka ua atu noatu ka patoiia mai koe. Penei ka patoi mai tetai e, “Kare. E akonoanga rai taku” me kore, “Kare au e inangaro” ei kotoeanga no te akamutu anga i te pukapukaanga. Inara, ma te tu maru e te karape, ka rauka ia koe i te ui atu i tetai uianga puapinga te ka akakeu i te tangata ngutuare kia manako mai i te au mea pae vaerua.​—E tatau ia Kolosa 4:6.

¹⁷ Tetai taime me aravei tatou i te au tangata kare o ratou taime i te akarongo mai, e mea meitaki kia ariki atu e kia akaruke. Inara, penei ka rauka ia koe te taiku poto atu i tetai karere puapinga. Kua rauka i tetai au taeake i te eeu i ta ratou Pipiria, tatau i tetai irava akakeu anga, e te akaruke anga i tetai uianga ki te tangata ngutuare i raro ake i te okotai miniti. Kua riro ta ratou au tuatua poto i te akakeu i te inangaro o te tangata ngutuare kia kite mai e e taime tona no tetai pukapukaanga poto ua. Eaa ka kore ei e tamata i teia me tau te turanga?

18. Eaa ta tatou ka rave kia tukatau atu i te akakitekite ua anga?

¹⁸ Me aravei tatou i te au tangata i roto i ta tatou e rave ra i te au ra, ka rauka ia tatou i te akakeu ia ratou kia inangaro i te tuatua meitaki me kua papa tatou no te akakitekite ua anga. E apai aere ana te au taeake e te au tuaine i tetai au puka i roto i to ratou pute pona me kore kete. Kua manako katoa ratou i tetai irava Pipiria no te akakite atu anga ki tetai ke, me tupu mai tetai atianga. Penei e tuatua atu ki te akaaere tavini me kore ki te au painia o taau putuputuanga akapeea me rave i te reira.

AKAKEU MARIE I TO TATOU KOPU TANGATA

19. Eaa ra tatou kare e akamutu i te tauturu i to tatou kopu tangata?

¹⁹ E tika, e inangaro ana tatou i te tauturu i to tatou kopu tangata kia ariki mai i te tuatua meitaki. (Iosu. 2:13; Anga. 10:24, 48; 16:31, 32) Me patoiia mai ta tatou tauta anga mua, kare tatou e inangaro i te tauta akaou. Penei ka manako tatou e kare e rauka ia tatou i te rave me kore i te tuatua atu i tetai mea te ka taui i to ratou tu. Inara, ka akatupu tetai tupuanga i toou kopu tangata kia taui i to ratou oraanga me kore manako. Me  kore ka anoanoia koe kia akameitaki mai i toou kite i te akamarama anga i te tuatua mou te ka akakeu ia ratou.

20. Eaa ra i puapinga ai kia tuatua maru ki toou kopu tangata?

²⁰ E akangateitei tatou i te manako o to tatou kopu tangata. (Roma 2:4) Eaa ka kore ei e tuatua maru atu kia ratou mei ta tatou e tuatua ana ki te aronga i roto i te angaanga tutuanga? E tuatua atu ma te tu maru e te akangateitei. Eiaa e tutu maata atu kia ratou, e akaari ra e akapeea te tuatua mou te akakeu anga ia koe kia meitaki mai. (Ephe. 4:23, 24) Akaari e akapeea a Iehova te akameitaki atu anga i toou oraanga na te ‘akakite anga kia koe i te au mea e puapingaʼi koe.’ (Isa. 48:17) Akaari e kia kite mai toou kopu tangata i te au tu Kerititiano i roto ia koe.

21, 22. Akakite mai e tai tupuanga tei akaari mai i te puapinga no te tautaanga i te tauturu i te kopu tangata i te pae vaerua.

²¹ Koi tata ua akenei tetai tuaine e: “E tauta ua ana au i te tutu atu ki toku au teina, tuakana e te au tungane e 13 na roto i taku tuatua e toku au tu. Kua tata ua rai au kia ratou i te au mataiti ravarai. Inara, no tetai 30 mataiti ko au anake ua te Kite i roto i te pamiri.”

²² Kua tuatua katoa mai te tuaine e: “Tetai ra, kua ringi atu au i tetai o toku tuakana e noo ana mei tetai anere maire i te mamao. Kua akakite mai aia e kua pati aia ki tetai o tona orometua kia apii i te Pipiria kiaia, kare rava aia i rave ana i te reira. Te akakite atu anga au e ka mataora au i te tauturu iaia, kua tuatua mai aia e: ‘Ae, te akakite atu nei ra au e: Kare rava au e riro mai ei Kite no Iehova.’ Te mere atu anga au i te puka Eaa Tikai ta te Pipiria e Apii Maira?, kua ringi atu au iaia i tetai au ra i muri mai. Inara, kare aia i tatau ake i te puka. I te openga ra, kua ringi atu au iaia e kua pati kiaia kia tiki i tana puka, e kua tatau e kua uriuri maua i tetai au irava i roto i te puka e 15 miniti. Muri ake i tetai au uriuri anga, kua inangaro aia i te apii tere atu i te 15 miniti. E oti kua akamata aia i te ringi mai iaku no tana apii, tetai taime i mua ake ka ara mai ei au i te popongi, e tetai taime e rua taime i te ra. Tera mai mataiti, kua papetitoia aia e te mataiti i muri mai, kua painia aia.”

23. Eaa ra tatou kare e akaroiroi i te akaara i te au tangata mei te moe i te pae vaerua?

²³ E tu karape te tauturu anga i te au tangata kia ara mai mei te moe i te pae vaerua e te anoanoia ra kia tauta ua rai. Te ariu mai nei rai te au tangata akaaka ki ta tatou tauta anga i te akaara ia ratou. Mei tetai 20,000 tuma tangata e papetitoia ra i te marama okotai ei Au Kite no Iehova. No reira kia aru tatou i ta Paulo akoanga ki te au taeake o te anere mataiti mua i Arekipo e: “Kia matakite i te angaanga i rauka ia koe i te Atu, kia oti meitaki ia koe.” (Kolo. 4:17) Ka tauturu mai te atikara ka aru mai i te katoatoa kia ariki rekareka i te aiteanga kia tutu aere ma te tu rapurapu.

[Au Uianga Apii]

[Pia i te kapi 13]

AKAPEEA TATOU ME ARA UA

▪ Rave maroiroi i te anoano o te Atua

▪ Kopae i te au angaanga a te poiri

▪ Matakite i te kino ka tupu no te varea moe i te pae vaerua

▪ Kia manako papu i te au tangata i roto i taau ngai tutuanga

▪ Tamata i tetai au mataara ou kia tutu ki tetai ke

▪ Akamaara i te puapinga o taau angaanga orometua