‘Inangaro te Tamaiti i te Akakite Mai i te Metua’

“Kare tetai i kite i te Metua, mari ra ko te Tamaiti, e te tangata ta te Tamaiti e inangaro i te akakite atu.”​—LUKA 10:22.

AKAPEEA KOE ME PAU?

Eaa ra a Iesu i tau meitaki ei i te akakite mai i tona Metua?

Akapeea a Iesu i te akakite anga i tona Metua ki tetai ke?

Na teea au mataara ka aru ei koe ia Iesu i te akakite anga mai i te Metua?

1, 2. Eaa te uianga te ngata ra i te manganui i te pau, e no teaa ra?

‘KOAI te Atua?’ E ngata i te manganui i te pau i teia uianga. Ei akatauanga, maata te karanga ra e e Kerititiano ratou, te irinaki ra e e Toru Tai te Atua, kare ra tetai pae e marama ana i teia apiianga. Kua tata tetai orometua e: “Kare tetai tangata e marama tikai ana i teia apiianga. E ngata rava no tetai manako tangata i te marama i teia.” I tetai tua, maataanga tei ariki i te apii mea tupu ua mai, te irinaki ra e kare e Atua. Kua karanga ratou e e mea tupu ua mai te au mea anga umereia. Kua ariki ra a Charles Darwin e e Atua tetai, i tuatua ai aia e: “E mea meitaki noku kia karanga e, kare e kite tangata e marama i te au mea katoa no runga i te reira.”

² Maataanga o te tangata, noatu eaa to ratou irinaki, kua ui ratou e me e Atua tetai. Inara, kua akamutu te maataanga i te kimikimi ua atu no runga i te Atua no to ratou mareka kore i te au pauanga ta ratou i kite mai. No te mea kua “akapoiriia to ratou ngakau akarongo kore” e Satani. (2 Kori. 4:4) Kare i te mea poitirere e te noo kite kore ua ra te maataanga o te tangata e te manako kononinoni ra no runga i te Metua, Tei Anga mai i te ao katoa e pini ua ake!​—Isa. 45:18.

3. (a) Naai i akakite mai kia tatou no runga i Tei Anga mai? (e) Eaa te au uianga ka akamanako tatou?

³ Inara, e puapinga tikai kia kite i te tuatua mou no runga i te Atua. No teaa ra? No te mea ko te aronga ua ‘te kapiki ra i te ingoa o Iehova’ te ka ora. (Roma 10:13) Te kapiki anga i te ingoa o te Atua te o maira i te kite tikai anga ia Iehova ei Peretana. Kua akakite a Iesu Karaiti i teia kite puapinga ki tana au pipi. Kua akakite aia kia ratou no runga i te Metua. (E tatau ia Luka 10:22.) Eaa ra i rauka ai ia Iesu i te akakite mai i te Metua e kare i rauka i tetai ke? Akapeea a Iesu i te rave  anga i te reira? E akapeea tatou me aru ia Iesu te akakite anga i te Metua ki tetai ke? Ka akamanako ana tatou i teia au uianga.

TAU MEITAKI A IESU KARAITI

4, 5. Eaa ra a Iesu i tau meitaki ei i te akakite mai i tona Metua?

⁴ Tau meitaki a Iesu i te akakite mai i tona Metua. No teaa ra? No te mea, i mua ake ka angaia mai ei tetai atu au mea ora, kua vai ke ana te mea ora vaerua tei riro mai e ko Iesu i runga i te rangi ei ‘Tamaiti anau tai na te Atua.’ (Ioa. 1:14; 3:18) E turanga ngateitei tikai te reira! Kare tetai atu au mea ora i angaia ake, kua noo mataora ana te Tamaiti ki tona Metua, e e maata ta te Tamaiti i kite no runga Iaia e Tona au tu. Kua pukapuka maata ana te Metua e te Tamaiti e kua oonu tikai to raua inangaro ia raua no tetai au tauatini ua atu mataiti. (Ioa. 5:20; 14:31) E maata ta te Tamaiti i kite mai no runga i te au tu o tona Metua!​—E tatau ia Kolosa 1:15-17.

⁵ Kua akamana te Metua i tana Tamaiti ei vaa tuatua Nona, “Ko te Logo ïa a te Atua ra.” (Apo. 19:13) No reira, tau meitaki tikai a Iesu i te akakite mai i te Metua ki tetai ke. Kua tau rai te tata Evangelia ko Ioane i te akataka mai ia Iesu e ko “te Logo,” tei noo ana “i te umauma o te Metua ra.” (Ioa. 1:1, 18) Te taiku ra a Ioane i taua tuatua ra ki tetai peu matauia i te tuatau kaikai anga i tona tuatau. Ka akanooia tetai manuiri ki mua mai i tetai, kia vaitata raua i te pukapuka meitaki anga. No reira, kua rauka i te Tamaiti tei noo ana “i te umauma” o tona metua i te pukapuka meitaki ki tona Metua.

6, 7. Akapeea te pirianga i rotopu i te Metua e te Tamaiti te tupu ua anga?

⁶ Kua tupu ua atu te pirianga o te Metua e te Tamaiti. ‘Kua mataora ua rai te Atua i te Tamaiti i te au rā katoa.’ (E tatau ia Maseli 8:22, 23, 30, 31.) Tau rai kia karangaia e kua ketaketa atu to raua pirianga ia raua e angaanga kapiti ra, e i te Tamaiti e apii ra i te aru i te au tu o tona Metua. Na te anga mai anga i te au mea ora kite, kua kite mai te Tamaiti akapeea a Iehova i te akono tataki tai anga ia ratou, e kua maata atu tona ariki rekareka i te au tu o te Atua.

⁷ Kua riro katoa mai ta Satani akaaoanga i to Iehova tikaanga kia tutara ei atianga no te Tamaiti kia kite e akapeea a Iehova te akaari anga i te aroa, tu tika, pakari, e te mana te aro atu anga Aia i tetai turanga ngata. Kare ekoko e kua papa a Iesu i te autu atu i te au turanga ngata tana ka aro atu i roto i tana angaanga orometua i te enua nei.​—Ioa. 5:19.

8. Akapeea te au tataanga Evangeria te tauturu anga ia tatou kia kite maata atu i te au tu o te Metua?

⁸ No tona pirianga vaitata kia Iehova, kua rauka i te Tamaiti i te akamarama meitaki mai i tona Metua tei kare i rauka ana i tetai ua atu tangata. Kare ainei teia i te atianga meitaki no tatou kia kite mai i te Metua na te akamanako anga i ta tana Tamaiti anau tai i apii mai e i rave? Ei akatutuanga, kare tatou e marama tikai i te aiteanga o te tuatua “aroa” me ka tatau ua tatou i te akataka anga a te tikitinari. Me akamanako ra tatou i te au tataanga taka meitaki ta te au Evangeria i tata no runga i ta Iesu angaanga orometua e tana akono anga i tetai ke, ka marama i reira tatou i te tuatua e “ko te Atua oki te aroa.” (1 Ioa. 4:8, 16) E tika katoa te reira no runga i tetai atu au tu o te Atua ta Iesu i akakite ki tana au pipi iaia i te enua nei.

AKAKITE MAI ANGA A IESU I TONA METUA

9. (a) Eaa te nga mataara i akakite mai ei a Iesu i tona Metua? (e) Akakite mai i tetai akaraanga te akakite anga a Iesu i tona Metua na roto i tana au apiianga.

⁹ Akapeea a Iesu te akakite anga i tona  Metua ki tana au pipi, e ki tetai atu o tana au pipi i muri mai? Kua rave aia i te reira e rua nga mataara: na roto i tana au apiianga e tona au tu. Ka akamanako ana tatou na mua i ta Iesu au apiianga. Ta Iesu i apii ki tana au pipi kua akaari mai aia i tona marama oonu i te manako, manako ngakau, e te au tu o tona Metua. Ei akaraanga, kua akaaite mai a Iesu i tona Metua mei tetai pu meitaki rai tei akono i tana anana e tei kimi atu i te mamoe tei aere ke. Kua akakite mai a Iesu e te kiteaia mai anga e te pu te mamoe i ngaro, kua ‘rai tona rekareka i te au mamoe e iva ngauru e iva ara tei kore i aere ke ra.’ Eaa a Iesu i taangaanga ai i teia akatutuanga? Kua akamarama mai aia e: “Koia katoa to kotou Metua i te ao ra, kare ïa i inangaro e kia mate tetai o teianei au tangata rikiriki.” (Mata. 18:12-14) Eaa ta tatou i kite mai no runga ia Iehova mei teia akatutuanga? Penei ka manako koe i tetai taime e kare oou puapinga e kare koe e manakoia mai ana. Inara, te manako tikai maira toou Metua i te rangi ko Iehova ia koe e te inangaro maira ia koe. I roto i tona nga mata, ko koe tetai “o teianei au tangata rikiriki.”

10. Akapeea a Iesu te akakite mai anga i tona Metua na roto i tona uaorai tu?

¹⁰ Te rua o te mataara te akakite mai anga a Iesu i tona Metua ki tana au pipi, na roto i tona tu. No reira te patianga te apotetoro ko Philipa kia Iesu e: “Ka akakite mai ia matou i te Metua,” kua tuatua atu a Iesu e: “Ko te akara mai iaku nei, kua akara ïa i te Metua.” (Ioa. 14:8, 9) Akamanako ana i tetai au akaraanga te akaari mai anga a Iesu i te au tu o tona Metua. Te pati anga te tangata repera kia Iesu kia akaora iaia, kua amiri atu a Iesu iaia tei ‘pini rava i te lepera’ e kua akakite kiaia e “kua tika ïa iaku: kia mā koe.” Te akaoraia anga aia, kua kite te tangata repera e na Iehova i tauturu ia Iesu kia rave i teia. (Luka 5:12, 13) Te mate katoa anga a Lazaro, kua kite mai te au pipi i te tu tangi aroa o te Metua te ‘ngunguru anga e te taitaia anga’ a Iesu e kua “aue iorā.” Noatu e kua kite a Iesu e ka akatu akaouia mai a Lazaro, kua kite aia i te mamae o te pamiri e te au oa o Lazaro. (Ioa. 11:32-35, 40-43) Kare ekoko e e tua Pipiria taau e reka ana tei tauturu ia koe kia kite mai i te tu akaaroa o te Metua tei akaariia mai e te au angaanga a Iesu.

11. (a) Te tama anga a Iesu i te iero, eaa tana e akakite maira no runga i tona Metua? (e) Eaa ra te reira i riro ei ei akapumaana anga kia tatou?

¹¹ Inara, eaa taau i kite mai mei ta Iesu tama anga i te iero? Akamanako ana eaa te tupu ra: Kua maani a Iesu i tetai taura rikiriki, e kua tuaru atu i te aronga e okooko ra i te au puakatoro e te au mamoe ki vao. Kua riringi atura aia i ta ratou moni e kua akatauri atura i ta ratou au kaingakai. (Ioa. 2:13-17) Kua maara i te au pipi te au tuatua totou a te Ariki ko Davida no taua angaanga maroiroi ra e: ‘Kua riro roa au i te maroiroi i to are ra.’ (Sala. 69:9) No tana i  rave, kua akaari a Iesu i te inangaro maata i te paruru i te akamorianga mou. Te kite ra ainei koe i te tu o te Metua i roto i taua tataanga ra? Te akamaara maira teia kia tatou e e mana maata to te Atua i te takore atu i te aronga kino i runga i te enua, e te inangaro tikai ra aia i te rave i te reira. Te akaari maira teia akatutuanga no ta Iesu patoi maroiroi anga i te kino i te manako o te Metua iaia e akara maira i te kino maata e tupu ra i te enua nei i teia tuatau. E akapumaana anga tikai teia no tatou me na roto tatou i te au tu tau kore!

12, 13. Eaa taau i kite mai no runga ia Iehova mei te tu i akono ei a Iesu i tana au pipi?

¹² Akamanako ana tatou i tetai akaraanga akaou​—te akono anga a Iesu i tana au pipi. Kua tauetono ua rai ratou e koai tei maata atu ia ratou. (Mare. 9:33-35; 10:43; Luka 9:46) Kua roa to Iesu noo anga ki tona Metua, i kite ei aia i to Iehova manako no runga i taua au tu nengonengo ra. (2 Samu. 22:28; Sala. 138:6) Tei maata atu, kua kite ana a Iesu i taua tu ra i roto ia Satani te Tiaporo. Kua maata te manako o taua angera akatietie ra i tetai turanga e te taoonga teitei. Kua mii tikai a Iesu te kite anga i taua tu manako akatietie ra i roto i tana au pipi tana i apii ana! Tei roto katoa te reira tu i te aronga tana i iki ana ei au apotetoro! Kua akaari mai ratou i te au tu manako akatietie e tae ua atu ki te ra openga o to Iesu oraanga i te enua nei. (Luka 22:24-27) Inara, kua ako ua rai a Iesu ia ratou ma te tu maru, e kua irinaki aia e kare e roa atu ka kite mai ratou i te aru i tona tu manako akaaka.​—Phili. 2:5-8.

¹³ Te kite ra ainei koe i te tu o te Metua mei ta Iesu akatikatika anga i te au manako tarevake o tana au pipi ma te akakoromaki? Te kite ra ainei koe i roto i ta Iesu au angaanga e te au tuatua i te tu o te Metua tei kare i akaruke i tona iti tangata noatu kua rave ua rai ratou i te tarevake? Me akamanako ua rai tatou i te au tu o te Atua, kare ainei tatou e akakeuia kia pure kiaia na te tataraara anga me rave tatou i te tarevake?

KUA INANGARO TE TAMAITI I TE AKAKITE MAI I TONA METUA

14. Akapeea a Iesu te akaari anga e kua inangaro aia i te akakite mai i tona Metua?

¹⁴ Maata te aronga tutara te tauta ra i te akatere i te au tangata ma te kore e akakite kia ratou i ta ratou e inangaro ra i te kite. Tuke ra a Iesu, kua inangaro aia i te akakite mai i tona Metua, na te akakite mai anga i te au mea ravarai no runga Iaia. (E tatau ia Mataio 11:27.) Kapiti mai, kua oronga a Iesu ki tana au pipi i te ‘kite kia kite ratou iaia te Atua mou ra,’ ko Iehova. (1 Ioa. 5:20) Eaa te aiteanga o te reira? Kua tauturu a Iesu i tana au pipi kia marama i tana au apiianga no runga i tona Metua. Kare aia i uuna ana i tona Metua na te apiianga e e tuanga Aia no te Toru Tai.

15. Eaa ra a Iesu kare i akakite mai i te au mea ravarai no runga i tona Metua?

¹⁵ Kua akakite mai ainei a Iesu i te au mea ravarai tana i kite no runga i tona Metua? Kare, kua akaari mai ra aia i te tu pakari na te kore anga e akakite mai i te au mea ravarai tana i kite. (E tatau ia Ioane 16:12.) No teaa ra? No te mea kare e rauka i tana au pipi kia apii i taua au mea ra. Mei ta Iesu i akamarama mai, e maata te kite te ka akakiteia mai me tae mai te “akapumaana” me kore te tauturu, koia oki te vaerua tapu, te ka arataki ia ratou “ki te tuatua-mou katoatoa.” (Ioa. 16:7, 13) Kare tetai metua pakari e akakite i te au mea ravarai ki ta ratou tamariki, kia pakarikari rava mai ratou. Kua tiaki katoa a Iesu e kia pakari mai tana au pipi e kia rauka ia ratou i te marama i te apiianga no runga i te Metua. Kua marama a Iesu e kua kotingaia to ratou kite.

 ARU IA IESU NA TE TAUTURU ANGA I TETAI KE KIA KITE IA IEHOVA

16, 17. Eaa ra ka rauka ai ia koe te akakite i te Metua ki tetai ke?

¹⁶ Me kua kite meitaki koe i tetai tangata e kua ariki rekareka i tona au tu aroa, kare ainei koe e akakeuia kia akakite iaia ki tetai ke? Iaia i te enua nei, kua tuatua a Iesu no runga i tona Metua. (Ioa. 17:25, 26) Ka rauka ainei ia tatou i te aru iaia na te akakite anga ia Iehova ki tetai ke?

¹⁷ Mei ta tatou i uriuri mai ana, e maata tikai ta Iesu i kite no runga i tona Metua tei kare tetai ke i kite. Inara, kua inangaro aia i te akakite mai i tetai au mea tana i kite, e te oronga katoaanga i te reira kite ki tana au pipi kia marama tikai ratou i te au tu o te Atua. Na roto i ta Iesu tauturu, kare ainei tatou e ariki rekareka ana i to tatou Metua na roto i te tu kare te maataanga o te tangata e ariki ana? Te rekareka nei tatou e kua akakite mai a Iesu i tona Metua kia tatou na roto i tana au apiianga e tona tu! No reira e turanga ngateitei to tatou i te kite i te Metua. (Iere. 9:24; 1 Kori. 1:31) Ia tatou e tauta ra i te akavaitata atu kia Iehova, kua akavaitata mai aia kia tatou. (Iako. 4:8) Ka rauka ia tatou i te akakite ki tetai ke i ta tatou i kite no runga ia Iehova. Akapeea tatou me rave i te reira?

18, 19. Na roto i teea au mataara e rauka ai ia tatou i te akakite i te Metua ki tetai ke? Akamarama mai.

¹⁸ Ka anoanoia tatou kia aru ia Iesu na te akakite anga i te Metua na roto i ta tatou au tuatua e te au angaanga. Kia akamaara ra e e maata ta tatou au tangata ka aravei i te ngai tutuanga kare i kite e koai te Atua. Kua akaekokoia to ratou manako e te au apiianga tarevake. Ka rauka ia tatou i te akakite kia ratou e kua kite tatou i te ingoa o te Atua, tona akakoroanga no te tangata, e tona au tu mei tei akakiteia mai i roto i te Pipiria. Ka rauka katoa ia tatou i te uriuri atu i tetai au papaanga Pipiria te akakite ra i to te Atua tu kare tatou i ariki ana i mua ana. Na roto i te reira tu, ka puapinga katoaia ratou.

¹⁹ Eaa ka kore ei e akakite atu i te Metua na roto i to tatou tu ia tatou e tauta ra i te aru ia Iesu? Me kite mai te au tangata i te aroa o Karaiti i roto i ta tatou angaanga, ka akavaitata atu ratou ki te Metua e Iesu katoa. (Ephe. 5:1, 2) Kua akamaroiroi mai te apotetoro a Paulo ia tatou kia ‘aru iaia mei iaia katoa i aru i te Mesia.’ (1 Kori. 11:1) E tikaanga meitaki to tatou i te tauturu i te au tangata kia kite ia Iehova na roto i to tatou uaorai tu! Ae, kia aru ua rai tatou ia Iesu na te akakite anga i te Metua ki tetai ke.

[Au Uianga Apii]