Maara Ainei ia Koe?

Kua tatau meitaki ainei koe i te au itiu ou o Te Punanga Tiaki? Akara ana me ka rauka ia koe i te pau i te au uianga ka aru mai:

I teea tu i riro ei a Solomona ei akaraanga akamatakiteanga no tatou?

Kua akameitaki e kua taangaanga te Atua i te Ariki ko Solomona. Inara, i te tuatau o tana tutaraanga, kua akamutu a Solomona i te aru i ta te Atua akoanga. Kua akaipoipo aia i te tamaine a Pharao, e kua rave mai i te au vaine e manganui, e kua akatika i te au vaine kia arataki atu iaia ki roto i te akamorianga pikikaa. Ka anoanoia tatou kia kore e akatupu i te au tu e te au peu tarevake. (Deu. 7:1-4; 17:17; 1 Ari. 11:4-8)​—12/15, kapi 10-12.

Ka akaruke ainei koe i toou tokorua akaipoipo me kare koe e mataora ana?

Kare te Tuatua a te Atua e akamaroiroi ana i te akatakake ei ravenga no te au manamanata i roto i te akaipoipo. Mei te mea e kua kino takiri te au turanga, ka anoanoia te Kerititiano kia akamanako marie e, me e mea tau kia akatakake e me kare.​—1/1, kapi 10.

Akapeea tetai metua tane me akapiri vaitata ua ki tana tamaiti?

E akao mai i te tamaiti ki roto i te au angaanga i te au ra. Ei akaraanga, me e au angaanga tetai ka raveia, e tuku iaia kia tauturu mai. Penei ka roa e oti ei taua angaanga ra; inara ka akaketaketaia to raua pirianga, e te apii ra te metua tane i tana tamaiti kia rave meitaki i te angaanga. Pera katoa, akataka i tetai taime kia kanga kapiti raua. I te tuatau kanga, ka rauka i te metua i te akaari i tona inangaro no tana tamaiti na roto i tana tuatua e tana au peu.​—1/1, kapi 19.

Eaa te apiianga ta te tamariki i mou mai no runga i te Atua, no tei tupu kia Eutiko?

E tai ia mea koia oki, ka rauka ia Iehova i te akaora akaou mai i tei mate, kapiti mai te tamariki. Maata atu to Iehova marama e te inangaro i te tamariki, i ta to ratou nga metua. Ia Iesu i te enua nei, kua akaari mai aia e mei teaa te tu o tona Metua, na te ikiiki anga i te tamariki meariki e te akameitakianga ia ratou.​—1/1, kapi 22-23.

Eaa te tumu ka iki ei tatou i te au oa meitaki?

E ririnui te akakeuanga a to tatou au oa ki runga i te au tu e tupu mai ana mei roto i to tatou ngakau. No reira, ka riro te au oa ta tatou ka iki ei akakeuanga pakari ki runga i te tu tangata ka riro mai tatou. Mei te tangata tata Pipiria ko Davida rai, ka inangaro tatou i te iki i te au oa te ka tauturu ia tatou kia vai tiratiratu ei tavini no te Atua.​—1/1, kapi 24.

Eaa te akakite maira e mei te anere mataiti mua e aere ua atu e ka vai rai tetai au Kerititiano mou akatainuia i te enua nei?

I roto i ta Iesu parapore no runga i “te sitona” e “te zizania,” te aiteanga o “te ua meitaki” ko “te tamariki o te basileia.” (Mata. 13:24-30, 38) Ka tupu kapipiti te titania e te titona e tae ua atu ki te kokotianga. Inara kare i papu ia tatou e koai te pupu titona, te vai ra rai tetai ia ratou e tae ua mai ki to tatou nei tuatau.​—1/15, kapi 7.

Akapeea tatou me autu i te tu vareae?

Teia te au takainga ka tauturu ia tatou: Tauta kia akatupu i te aroa e te aroa taeake, taokotai ki te iti tangata o te Atua, kia rave i te meitaki, ‘kia rekareka e te aronga e rekareka ra.’ (Roma 12:15)​—2/15, kapi 16-17.

Me oronga i te akoanga, eaa te au kaveinga ka akamaara tatou?

Kia marama i te turanga tikai. E kopae i te pau viviki. Taangaanga akaaka i te Tuatua a te Atua. Me ka rauka, taangaanga i te runanga puka teokaratiki. Eiaa e rave i te ikianga no etai ke.​—3/15, kapi 7-9.