Au Uianga a te Aronga Tatau

Akapeea te mate o te aronga tiratiratu o te Atua i riro ei ei “mea apinga maata i mua i te aroaro o Iehova”?

▪ Kua imene tetai tata taramo e: ‘E mea apinga maata i mua i te aroaro o Iehova te mate o tona ra aronga tiratiratu.’ (Sala. 116:15) E mea akaperepere tikai te oraanga o te aronga akamori mou o Iehova kiaia. Inara, kare e no runga i te mate o te tangata tataki tai te manako o te au tuatua e taikuia ra i roto ia Salamo 116.

Me orongaia tetai akoanga akamaaraanga no runga i tetai Kerititiano, kare e tau kia taangaangaia a Salamo 116:15 ki te tangata i mate, noatu kua mate aia ei tavini tiratiratu no Iehova. No teaa ra? No te mea, e aiteanga maata atu te tuatua a te tata taramo. Te aiteanga o te reira kare te Atua e akatika i te katoaanga o te pupu o tona aronga tiratiratu kia mate, no te mea te manako maira aia ia ratou ei aronga akaperepereia.​—Akara ia Salamo 72:14; 116:8.

Te akapapu maira a Salamo 116:15 kia tatou e kare te Atua e akatika i tona au tavini tiratiratu ei pupu kia takore takiriia mei te enua nei. Te akaari maira to tatou papaanga tuatua enua o teia tuatau i to tatou akakoromaki anga i te au timataanga e te takinokinoanga, te akapapu mai anga e kare rava te Atua e akatika ia tatou kia tamateia.

No tona mana ririnui e tana akakoroanga puapinga maata, kare a Iehova e akatika ia tatou kia takoreia ei pupu. Me ka akatika te Atua i te reira, akaraanga e e ririnui atu tona au enemi iaia, kare ra te reira e tupu! Kare i reira e akatupuia to Iehova akakoroanga kia tangataia teia enua e te au tangata tei tiratiratu kiaia. (Isa. 45:18; 55:10, 11) Ka ope katoa te akamorianga tapu kia Iehova me kare e tangata e toe mai i te akamori iaia i te paepae o tona iero maata i te enua nei i te pae vaerua! Kare i reira e akanooia te “enua ou”​—te iti tangata tuatua tika te ka noo ki runga i to tatou enua i raro ake i te “rangi ou.” (Apo. 21:1) Kare katoa te Tutara Anga Tauatini Mataiti o Karaiti e riro mai ei tutara anga tika tikai me kare e tangata i runga nei i te enua.​—Apo. 20:4, 5.

Ka ekokoia to te Atua turanga e tona ingoa me akatika aia i tona au enemi kia takore i te katoaanga o tona iti tangata i te enua nei. Ka takino te reira i to Iehova turanga Ngateitei i te Ao Katoa e Pini ua Ake. Pera katoa, no tona akangateitei anga iaia uaorai e tona ingoa tapu, kare rava a Iehova e akatika i tona aronga tiratiratu kia mate ei pupu. Akamanako ana i teia: I te mea e e Atua “kino kore” a Iehova, ka akaora mai aia i te pupu tangata tei tavini tiratiratu ana iaia. (Deu. 32:4; Gene. 18:25) Pera katoa, te akatikaanga kia takoreia tona au tavini ei pupu kare te reira e rotai ana ki te Tuatua a te Atua e: “No tona ra ingoa maat[a] e kore ei a Iehova e akaruke i tona iti-tangata.” (1 Samu. 12:22) Tika rai, “kare oki a Iehova e akaruke i tona au tangata, kare e kopae i tana ra tuanga.”​—Sala. 94:14.

Pumaana tikai i te kite e kare rava to Iehova iti tangata e takoreia mei te enua nei! No reira, kia tiratiratu ua rai tatou ki te Atua, te irinakianga i tana taputou e: “Te taoonga ra noou i angaiaʼi ra, kare ïa e manuia; e te au vaa katoa e patoi ia koe, i te akava anga ra, naau ïa e akaapa atu. Ko te tuanga teia o te au tavini o Iehova: e tei iaku ta ratou tuatua-tika.”​—Isa. 54:17.

[Tataanga i te kapi 22]

Kare rava te Atua e akatika i tona iti tangata kia takoreia