Manako Papu i Tetai Akaipoipo Manamanata

“E i te aronga i akaipoipoia ra, teia taku tuatua, kare ra taku, na te Atu ra.”​—1 KORI. 7:10.

KA RAUKA AINEI IA KOE TE AKATAKA?

Na roto i teea tu i topiri kapiti ei te Atua i te au tokorua akaipoipo?

Akapeea te aronga pakari te tauturu anga i te au Kerititiano te manamanata ra to ratou akaipoipo?

Eaa to tatou manako no runga i te akaipoipo?

1. Akapeea te au Kerititiano i te akamanako anga i te akaipoipo, e no teaa ra?

ME AKAIPOIPO tetai au Kerititiano, ka rave ratou i tetai tia i mua i te Atua​—e apainga puapinga kia akamanako meitakiia. (Kohe. 5:4-6) Ko Iehova Tei Akamata mai i te akaipoipo, no reira kua “topiri” kapiti aia i te au tokorua akaipoipo. (Mare. 10:9) E puapinga tikai ki te Atua teia topiri kapiti anga noatu te au ture a tetai au enua. Kia akamanako te au tavini o Iehova i te akaipoipo ei tia koreromotu noatu e aronga akamori ratou nona i te tuatau i akaipoipo ei ratou, me kare.

2. Eaa te au uianga te ka uriuriia i roto i teia atikara?

² Ka mataora tikai tetai akaipoipo puapinga. Inara eaa te ka raveia me te manamanata ra te akaipoipo? Ka rauka ainei i te akaketaketa i taua akaipoipo ra? Eaa te tauturu ka rauka mai i te au tokorua kare e au ana to ratou oraanga akaipoipo?

MATAORA AINEI ME E MAMAE NGAKAU?

3, 4. Eaa te ka tupu me rave tetai tangata i te ikianga tau kore me iki i tetai tokorua akaipoipo?

³ Ka tupu mai te rekareka me puapingaia te akaipoipo o tetai Kerititiano, e ka akangateitei te reira ia Iehova. Me kare te reira e puapingaia, e mea mamae ngakau tikai. Ko tetai Kerititiano e manako ra i te akaipoipo, ka meitaki tona akaipoipo me aru aia i ta te Atua aratakianga. Tetai tua ra, ko tetai tangata ka rave i te ikianga tau kore me iki i tetai tane me kore vaine ka kite mai i te tu mareka kore e te mii. Ei akatauanga, ka aere kapiti tetai au mapu noatu e kare ratou i papa meitaki no te au apainga o te oraanga akaipoipo. Ka kimi tetai pae i tetai tokorua no ratou i runga i te Initaneti, e ka rapurapu i te akaipoipo, e kare e mataora a muri mai. Ka rave tetai pae i te ara kino i te tuatau e akameamea  ra ratou, e me akaipoipo ratou, kare e maata to ratou akangateiteianga i tetai e tetai.

⁴ Kare tetai au Kerititiano i akaipoipo ana kia ‘tau ki te Atu’ e kua tupu mai te mamae ngakau no te mea kare to ratou tokorua i te tavini no Iehova. (1 Kori. 7:39) Me ko toou turanga te reira, e pure no ta te Atua tauturu e kia akakore mai aia i taau ara. Kare aia e akakore mai i te tarevake a tetai tangata, inara ka tauturu mai aia i te aronga tataraara kia akakoromaki ratou i te au timataanga. (Sala. 130:1-4) E tauta pakari koe kia akamareka iaia i teianei e tuatau ua atu, e ‘ka riro te rekareka no ko mai ia Iehova ei akamaroiroi’ ia koe.​—Nehe. 8:10.

ME TAKINOIA TE PIRIANGA AKAIPOIPO

5. No runga i tetai akaipoipo mataora kore, eaa te tu manako kia kopaeia?

⁵ Me kare tetai e mataora ana i to ratou akaipoipo penei ka manako ratou e: ‘E puapinga tikai ainei i te akaketaketa akaou i toku akaipoipo? Penei ka mataora atu au me akaipoipo akaou au i tetai tangata ke!’ Penei te manakonako ra ratou i te akaruke i to ratou tokorua e kua manako e: ‘Ka inangaro au kia matara akaou au! Ka rave ainei au i te kopae anga? Noatu kare e rauka iaku i te kopae kia tau ki ta te Tuatua Tapu, ka rauka ainei iaku kia tatara kia mataora akaou toku oraanga?’ Eiaa e manako akapera, e tauta ra te au Kerititiano i ta ratou ka rauka i roto i to ratou turanga kia kimi e kia aru i ta te Atua aratakianga.

6. Akamarama mai i ta Iesu i tuatua tei tataia i roto ia Mataio 19:9.

⁶ Me ka kopae tetai nga Kerititiano, penei ka rauka akaou iaia me kore kare e rauka iaia i te akaipoipo kia tau ki ta te au Tuatua Tapu. Kua tuatua a Iesu e: “Tei kopae i tana vaine, auraka ra no te akaturi, ka akaipoipo ei i tetai, kua akaturi ïa: e ko tei akaipoipo i taua vaine i kopaeia ra, kua akaturi ïa.” (Mata. 19:9) Te kapiti maira te “akaturi” i konei ki te moeaana e tetai atu au pirianga ainga viivii. E puapinga tikai kia akamanako meitaki na roto i te pure no runga i te kopaeanga me kare nga tokorua i rave i te akaturi.

7. Eaa ta te au tangata ka manako mai me kare te akaipoipo o tetai Kerititiano i puapingaia?

⁷ Me kare tetai akaipoipo i puapingaia, penei ka manako ekokoia te turanga pae vaerua o te reira tangata. Kua ui te apotetoro ko Paulo i teia uianga pakari e: “Ko te tangata oki kare i kite i te arataki i tona uaorai ngutuare, eaa e tikaʼi iaia kia tiaki i te ekalesia a te Atua?” (1 Timo. 3:5) E tika, me karanga nga tokorua akaipoipo e e Kerititiano raua inara kare to raua akaipoipo i puapingaia, penei ka manako mai te tangata e kare taua nga tokorua ra e aru ana i ta raua e tutu aere ra.​—Roma 2:21-24.

8. Eaa te mea e tarevake ra me iki te nga tokorua akaipoipo Kerititiano i te akatakake?

 ⁸ Me te parani ra tetai nga tokorua akaipoipo tei papetitoia i te tatara me kore i te kopae i tetai e tetai kare i tau ki te tuatua tapu, papu e mea tarevake tetai e tupu ra i roto i to raua oraanga i te pae vaerua. E kare tetai me kore nga tokorua e taangaanga ana i te au kaveinga Pipiria. Naringa e te ‘irinaki tikai ra raua kia Iehova ma to raua ngakau katoa,’ ka rauka ia raua i te akaketaketa i to raua akaipoipo.​—E tatau ia Maseli 3:5, 6.

9. Akapeea tetai au Kerititiano te akameitakiia anga no te noo akakoromaki ua anga ki to ratou tokorua?

⁹ E maata te au akaipoipo, akaraanga e kare e puapingaia, inara i muri mai kua riro mai ei akaipoipo puapinga tikai. Ka akameitakiia mai te au Kerititiano kare i kopae viviki i to ratou akaipoipo e manamanata ra. Akamanako ana eaa te ka tupu mai me kare te tane i roto i te tuatua mou. Kua tata te apotetoro ko Petero e: “Ko kotou oki, e te vaine tini e, e kauraro marie i ta kotou au tane ra; kare tetai pae e akarongo i te tuatua ra, kia rauka mai ratou i te akono meitaki o ta ratou au vaine, auraka atu rai te tuatua; I te akara anga mai ratou i to kotou aerenga viivii kore i kapiti katoaia i te mataku.” (1 Pete. 3:1, 2) Ae, no te tu meitaki o tona tokorua, penei ka ariki mai te tokorua akarongo kore i te tuatua mou! Te akangateitei ra taua akaipoipo ketaketa ra i te Atua, e ka riro mai te reira ei akameitakianga no te tane, te vaine, e ta raua tamariki.

10, 11. Eaa te au manamanata kare i tapapaia atu ana te ka tupu mai i roto i tetai akaipoipo, eaa ra te papu ra i tetai Kerititiano?

¹⁰ Ma te inangaro i te akamareka ia Iehova, kua iki te maataanga o te au Kerititiano kare i akaipoipo i tetai Kerititiano papetitoia ei tokorua akaipoipo no ratou. Noatu rai, penei ka taui mai te au turanga na roto i tetai tu kare ratou i tapapa atu ana. Ei akaraanga, penei ka tupu mai tetai au manamanata manako ngakau ki tetai tokorua. Me kore tetai taime i muri ake i te akaipoipo, penei ka riro mai te tokorua ei papuritia paruparu. Ei akatutuanga: Kua akakoromaki ua a Linda, * e Kerititiano maroiroi e te metua vaine aroa, te kite anga i tana tane tei papetitoia te rave tataraara kore anga i te tarevake e kua akaateaia ki vao. Eaa ta te au Kerititiano ka rave me te akaraanga puapinga kore ra to ratou akaipoipo no taua tumu ra?

¹¹ Penei ka ui koe e: ‘Ka tauta ua rai ainei au i te akaketaketa i toku akaipoipo noatu eaa te ka tupu mai?’ Naau uaorai te reira ikianga, kare na tetai tangata ke. Inara, e tumuanga tau tetai kia kore e akaruke i te akaipoipo noatu te paruparu ra. E akaperepere ana te Atua i te tane me kore te vaine akono Atua, tei akakoromaki i te au akaipoipo e manamanata ra no to ratou akava ngakau. (E tatau ia 1 Petero 2:19, 20.) Na roto i tana Tuatua e tona vaerua tapu, ka tauturu mai a Iehova i tetai Kerititiano e tauta pakari ra i te akaketaketa i tona akaipoipo e manamanata ra.

PAPA UA RATOU I TE TAUTURU

12. Akapeea te aronga pakari me manako mai ia tatou me pati tatou i ta ratou tauturu?

¹² Me te manamanata ra toou akaipoipo, auraka e taroaroa i te kimi i te tauturu a te au taeake Kerititiano pakari. Te tavini ra te aronga pakari ei tiaki no te anana e ka mataora ratou i te akaari atu i te akoanga akauruia i roto i te au Tuatua Tapu. (Anga. 20:28; Iako. 5:14, 15) Auraka e manako e kare te aronga  pakari e akangateitei mai ia koe e toou tokorua me pati korua i te tauturu e te uriuri i tetai manamanata o te akaipoipo kia ratou. Ka inangaro e ka akangateitei mai ratou ia koe me kite ratou e te inangaro tikai ra koe i te akamareka i te Atua.

13. Eaa te akoanga tei kiteaia i roto ia 1 Korinetia 7:10-16?

¹³ Me pati mai te au Kerititiano i roto i tetai ngutuare akaveeia no tetai tauturu, e taiku ua ana te aronga pakari i te akoanga a Paulo, tei tata e: “E i te aronga i akaipoipoia ra, teia taku tuatua, kare ra taku, na te Atu ra, Eiaa te vaine e akataka ke i tana tane. (Kia akataka ke ra aia, e noo ua aia auraka e akaipoipo, e kia akaongiia aia e tana tane:) e eiaa te tane e tuku ke atu i tana vaine. . . . Eaa oki koe e kite ei, e maine e, kare taau tane e ora ia koe? e eaa oki koe e kite ei, e tama e, kare taau vaine e ora ia koe?” (1 Kori. 7:10-16) E akameitakianga tikai te reira me ariki mai te tokorua kare i roto i te tuatua mou i te akamorianga mou!

14, 15. I raro ake i teea turanga ka akatakake ei tetai tokorua akaipoipo, eaa ra i puapinga ai kia pure e kia akamanako meitaki i te reira?

¹⁴ I raro ake i teea au turanga ka “akataka ke” ei tetai vaine Kerititiano? Kua iki tetai pae i te akatakake no te mea kare rava to ratou tokorua e tauturu ana ia ratou i te pae moni e te kai. Kua akatakake tetai pae no te taitaia me kore no te takinoia ra to ratou turanga pae vaerua.

¹⁵ Me ka iki tetai i te akaruke i tona tokorua me kare, nana uaorai ia ikianga. Inara, ka pure te tokorua tei papetitoia no runga i teia manamanata e ka akamanako meitaki i teia. Ei akaraanga, ko te tangata kare i roto i te tuatua mou ua ainei te takino ra i te turanga pae vaerua, me ko te Kerititiano ainei no te kore e rave ra i tana apii Pipiria, e aere putuputu ra ki te uipaanga, e te rave anga i tana angaanga orometua?

16. Eaa te ka tapu i te au Kerititiano kia kore e rapurapu i te kopae?

¹⁶ No te mea te akaperepere ra tatou i to tatou pirianga ki te Atua e te ariki rekareka ra i tana apinga aroa no te akaipoipo, auraka tatou e rapurapu i te kopae. Ei au tavini no Iehova, te manako ra tatou i te akatapuanga i tona ingoa tapu. No teia tumu nei, kare rava tatou e kimi i tetai ravenga i te akamutu i to tatou akaipoipo me te manako ra tatou i te akaipoipo i tetai tangata ke.​—Iere. 17:9; Mala. 2:13-16.

17. I raro ake i teea au turanga ka karangaia ai e kua rauka i te au Kerititiano akaipoipo i te au mei ko mai i te Atua?

¹⁷ Ka tauta pakari te Kerititiano tei akaipoipo ki tetai tangata kare i roto i te tuatua mou i te akono tamou i to raua pirianga akaipoipo. Inara, kare tetai Kerititiano e akaapa iaia me kare te tokorua kare i roto i te tuatua mou e inangaro i te noo kiaia, noatu te tauta pakari ra te Kerititiano i te akono tamou i tona pirianga akaipoipo. “Me ka inangaro tetai kare  i roto i te tuatua mou i te akaruke, e tuku iaia kia akaruke,” i tata ai a Paulo. “Kare tetai taeake me kore tetai tuaine e akatereia ra i raro ake i taua au turanga ra, inara kua rauka iaia te au mei ko mai i te Atua.”​—1 Kori. 7:15, NW. *

IRINAKI KIA IEHOVA

18. Noatu kare te akaipoipo i akaketaketaia, eaa te mea meitaki tei tupu mai no te rave anga i te au tautaanga?

¹⁸ Me manamanata te akaipoipo, e pati kia Iehova no te maroiroi e kia irinaki ua rai kiaia. (E tatau ia Salamo 27:14.) E akamanako ana ia Linda, tei taikuia ana i mua ana. Kua ope tona akaipoipo, noatu tana tautaanga i te akaketaketa i te reira no tetai au mataiti e manganui. Kua manako ainei aia e kua kaimoumou aia i tona taime? “Kare,” i tuatua ai aia. “Kua riro taku tautaanga ei akakitekite anga meitaki ki tetai ke. E akava ngakau ma toku. Te mea meitaki rava atu, kua riro taua tuatau ra i te tauturu i ta maua tamaine kia vai ketaketa i roto i te tuatua mou. Kua riro mai aia ei Kite maroiroi akatapuia no Iehova.”

19. Eaa te ka tupu mai me raveia te au tautaanga no te akaketaketa anga i te akaipoipo?

¹⁹ Kua mataora tetai vaine Kerititiano ko Marilyn tona ingoa, no te mea kua irinaki aia ki te Atua e kua tauta pakari i te akaketaketa i tona akaipoipo. “Kua timataia au kia akatakake mai mei taku tane no te mea kare rava aia e tauturu mai ana iaku i te pae moni e te kai, e te takinoia ra toku turanga pae vaerua,” i karanga ai aia. “Inara, i tavini ana taku tane ei tangata pakari i mua ake ka o atu ei aia ki roto i tetai au angaanga pitiniti tau kore. Kare aia e tae putuputu ana ki te au uipaanga, e kua akamutu maua i te komunikeiti. Kua mataku tikai au no te takino anga a te au tangata kino i roto i to matou oire, no reira kua ngata tikai iaku i te piri atu ki tetai ke. No reira kua kite mai au e kua tarevake katoa au. Kua akamata akaou maua i te komunikeiti, kua rave akaou i ta maua apii a te pamiri, e kua aere putuputu akaou ki te au uipaanga. Kua akaari mai te aronga pakari i te tu takinga meitaki e kua tauturu mai ia maua. Kua meitaki akaou to maua akaipoipo. I muri mai, kua oronga akaouia mai ki taku tane tetai au apainga i roto i te putuputuanga. E apiianga ngata tikai te reira, inara kua tupu mai te au mea mataora.”

20, 21. No runga i te akaipoipo, eaa ta tatou ka tauta i te rave?

²⁰ Me kua akaipoipo tatou me kare, kia maroiroi ua rai tatou e kia irinaki kia Iehova. Me manamanata to tatou akaipoipo, e tauta pakari tatou i te akatikatika i te reira, te akamaara anga e ‘kare te aronga akaipoipo i te toko rua, e kopapa okotai ra.’ (Mata. 19:6) E kia akamanako katoa tatou e me akakoromaki ua rai tatou i roto i tetai ngutuare akaveeia noatu te turanga ngata, ka rekareka tatou me ariki mai te tokorua i te akamorianga mou.

²¹ Noatu eaa to tatou au turanga, kia rave ua rai tatou i te au tu te oronga ra i tetai akakitekiteanga meitaki ki te aronga kare i te au mema o te putuputuanga. Me ka takinoia to tatou pirianga akaipoipo, kia pure akatenga tatou, akara meitaki eaa to tatou au akakoroanga, akamanako meitaki i te au Tuatua Tapu, e kia pati i te tauturu a te aronga pakari. Tei maata atu, kia tauta ua rai tatou i te akamareka i te Atua ko Iehova i roto i te au mea ravarai e kia ariki tikai i tana apinga aroa umere no te akaipoipo.

[Au Tataanga Rikiriki i Raro]

[Au Uianga Apii]

[Tataanga i te kapi 10]

Ka akameitakiia mai te au Kerititiano kare i kopae viviki i to ratou akaipoipo e manamanata ra

[Tataanga i te kapi 12]

Pati kia Iehova no te maroiroi e kia irinaki ua rai kiaia

[Tutu i te kapi 9]

Ka akameitaki a Iehova i te au tokorua Kerititiano e akaketaketa ra i te akaipoipo e manamanata ra

[Tutu i te kapi 11]

Ka riro te putuputuanga Kerititiano ei akapumaana e ei tauturu anga i te pae vaerua