Te Akaata Ra Ainei Koe i te Kaka o Iehova?

‘Te akaata ra tatou i te kakā o Iehova, mei te io rai.’​—2 KORI. 3:18.

AKAPEEA KOE ME PAU?

Noatu to tatou tu ara, akapeea tatou me akakaka ia Iehova?

Akapeea ta tatou au pure e ta tatou au uipaanga Kerititiano te tauturu anga ia tatou kia akaata i to te Atua kaka?

Eaa te ka tauturu ia tatou kia akakaka ua rai ia Iehova?

1, 2. Eaa ra ka rauka ai ia tatou i te aru i te au tu o Iehova?

TETAI tua, e aru ana tatou katoatoa i te tu o to tatou au metua. No reira, kare i te mea poitirere me akarongo koe i tetai e karanga ra ki tetai tamaiti e, ‘A toou papa rai koe.’ Me kore ki tetai tamaine e, ‘Me akara au ia koe e maara ana iaku toou mama.’ Ka aru te au tamariki i ta ratou e kite ra i ta to ratou au metua e rave ra. Akapeea ra tatou? Ka rauka ainei ia tatou i te aru i to tatou Metua i te rangi ko Iehova? Noatu kare tatou i kite ana iaia, ka kite tatou i tona au tu meitaki tikai na te apiianga i tana Tuatua, te akaraanga i tana au mea i anga mai, e te akamanako oonu anga i te au Tuatua Tapu, te au tuatua e te au angaanga tikai a te Tamaiti a te Atua, ko Iesu Karaiti. (Ioa. 1:18; Roma 1:20) Ka rauka ia tatou i te akaata i to Iehova kaka.

² Mua ake ka angaia mai ei a Adamu raua ko Eva, kua papu i te Atua e ka rauka i te au tangata i te rave i tona anoano, akaata i tona au tu e te akakaka anga iaia. (E tatau ia Genese 1:26, 27.) Ei au Kerititiano, ka akaari tatou i te au tu o Tei anga mai ia tatou. Me rave tatou i te reira, tei ia tatou te tikaanga ngateitei i te akaata i to te Atua kaka noatu ta tatou au peu, apiianga, me kore to tatou turanga oraanga. No teaa ra? No te mea “kare te Atua e akono i te tu o te tangata: Ko te mataku ra iaia, e ko te rave i te tuatua-tika, i te pa enua ravarai, ko tei kiteia mai ïa e ia.”​—Anga. 10:34, 35.

3. Eaa te au tu ta te au Kerititiano ka kite mai ia ratou e tavini ra ia Iehova?

³ Te akaata ra te au Kerititiano akatainuia i to Iehova kaka. Kua tata te apotetoro ko Paulo tei akatainuia e te vaerua e: “Te [akaata] katoa nei tatou i te kakā o te Atu [Iehova] ma te mata arai kore ra, mei te mea e tei roto i te io ra, te akatu keia nei tatou ei tutu okotai, mei te kakā oki e tae ua atu ki te kakā.” (2 Kori. 3:18)  Te eke mai anga te peroveta ko Mose mei runga mai i te Maunga Sinai ma te nga papa toka kua tataia te au Ture Ngauru ki runga, te kaka ra tona mata no te mea kua tuatua ana a Iehova kiaia. (Exo. 34:29, 30) Noatu e kare te au Kerititiano e kite ana i teia tu e kare to ratou mata e kaka ana, te rekareka nei ra ratou i te akakite ki tetai ke no runga ia Iehova, tona au tu, e tona akakoroanga no te tangata. Mei tetai io auri kanapanapa rai i te tuatau taito, te akaata ra te aronga akatainuia e to ratou au oa i to Iehova kaka i roto i to ratou oraanga e te angaanga orometua. (2 Kori. 4:1) Te akaata ra ainei koe i to Iehova kaka na roto i toou tu te akamareka ra iaia, e taau angaanga ei tangata tutu aere i te Patireia?

INANGARO TATOU I TE AKAATA I TO IEHOVA KAKA

4, 5. (a) Mei ia Paulo rai, eaa te mea ngata ia tatou i te rave? (e) Akapeea te ara te takino anga ia tatou?

⁴ Ei au tavini no Iehova, te inangaro nei tatou i te akangateitei e te akakaka i Tei Anga mai ia tatou i roto i te au mea ravarai e rave nei tatou. Inara, maata te taime kare tatou e rave ana i ta tatou e inangaro ra i te rave. Ko to Paulo manamanata tera. (E tatau ia Roma 7:21-25.) Te akamarama mai anga i te tumu i ngata ei ia tatou i te rave i te reira, kua tata mai a Paulo e: “Kua rave katoatoa oki i te ara, e kua ngere i te akameitaki a te Atua.” (Roma 3:23) Ae, na roto i te ara a Adamu, kua riro mai te au tangata i raro ake i te tutaraanga a te ara mei te ariki kino rai.​—Roma 5:12; 6:12.

⁵ Eaa ra te ara? E tu tei tuke ki to Iehova au tu, mataara, turanga, e te anoano. E takino ana te ara i te pirianga o tetai ki te Atua. E akakeu ana te ara ia tatou kia aere ke mei ta tatou au akakoroanga, mei te tangata ana rai te ka ana i tana kakao, kare ra e tano tana takete anga. Ka rave akakoro tatou i te ara, me kore ka rave manako kore tatou i te ara. (Nume. 15:27-31) E akakeuanga ririnui ta te ara ki runga i te tangata e ka riro ei arai anga i rotopu ia ratou e Tei Anga mai ia ratou. (Sala. 51:5; Isa. 59:2; Kolo. 1:21) No reira, kare e rotai ana te oraanga o te au tangata kia Iehova e kua ngere ratou i te tikaanga ngateitei i te akaata i to te Atua kaka. Kare ekoko e ko te ara te kino maata rava atu te takino ra i te au tangata.

6. Noatu to tatou turanga ara, akapeea tatou me akakaka i te Atua?

⁶ Noatu to tatou turanga ara, kua akapapu mai a Iehova e koia ‘te Atua te oronga maira i te manakonako anga.’ (Roma 15:13, NW) Kua oronga mai aia i te ravenga no te takoreanga i te ara​—te atinga oko o Iesu Karaiti. Na te irinakianga i taua atinga ra, kare tatou e tuikaa akaou i raro ake i te ara, e ka rauka ia tatou i te akaata i to Iehova kaka. (Roma 5:19; 6:6; Ioa. 3:16) Te akono tamou anga i teia pirianga ki te Atua, te akapapu maira i ta Iehova au akameitakianga no tatou i teianei e no te tu apa kore e te oraanga mutu kore a te tuatau ki mua. Noatu te tu ara o te au tangata, e akameitakianga tikai te reira e te manako maira te Atua i te au tangata tataki tai te akaata ra i tona kaka!

AKAATA ANGA I TE KAKA O TE ATUA

7. Eaa ta tatou ka ariki no runga ia tatou uaorai kia rauka ia tatou i te akaata i to te Atua kaka?

⁷ E rauka ai ia tatou i te akaata i te kaka o te Atua, kia ariki tatou e e au turanga ara to tatou. (2 Para. 6:36) Ka anoanoia tatou kia kite i to tatou inangaro kia rave i te ara e kia akatere i te reira kia tere tatou ki mua kia rauka ia tatou i te akakaka i te Atua. Ei akaraanga, me kua ara ana tatou no te akarakara i te au ainga viivii, kia ariki tatou e ka anoano tatou kia tauturuia mai i te pae vaerua​—e kia rave i te reira. (Iako. 5:14, 15) Ko te takainga mua teia no te aru anga i tetai oraanga te akangateitei maata ra i te Atua. Ei aronga akamori ia Iehova, ka akara ua rai tatou ia tatou uaorai me te aru nei tatou i tona au turanga tuatua tika.  (Mase. 28:18; 1 Kori. 10:12) Noatu eaa te tu o to tatou turanga ara, ka tauta ua rai tatou i te kopae i te reira kia rauka ia tatou i te akakaka i te Atua.

8. Noatu e kare tatou e apa kore ana, eaa ta tatou ka rave?

⁸ Ko Iesu anake ua te tangata tei ora ana e tei mate, e kare rava aia i akamareka kore ana i te Atua e kua akaata i Tona kaka. Noatu kare tatou e apa kore ana mei ia Iesu rai, ka rauka ia tatou i te tauta i te aru i tona akaraanga. (1 Pete. 2:21) Te kite maira a Iehova i ta tatou tauta anga kia tere ki mua, e te akameitaki maira aia i ta tatou tauta anga ngakau tae i te akakaka iaia.

9. Eaa te tuanga a te Pipiria i te tauturu anga i te au Kerititiano te inangaro ra i te aru rotai i ta te Atua e inangaro maira?

⁹ Ka rauka i te Tuatua a Iehova i te oronga mai i te marama kia tatou kia meitaki atu to tatou tu. E puapinga tikai te apii oonu i te au Tuatua Tapu e te akamanako oonu anga me tatau i te Pipiria. (Sala. 1:1-3) Ka riro te tatau anga i te au Tuatua Tapu i te au ra ravarai i te tauturu ia tatou kia meitaki atu to tatou tu. (E tatau ia Iakobo 1:22-25.) Kua akatumuia to tatou akarongo ki runga i te kite i te Pipiria, e ko te tauturu ia no te akaketaketa anga i ta tatou tauta anga kia kopae i te tu ara kino e kia akamareka ia Iehova.​—Sala. 119:11, 47, 48.

10. Akapeea te pure me tauturu ia tatou kia tavini pu tikai ia Iehova?

¹⁰ E rauka ai ia tatou i te akaata i to te Atua kaka, ka anoano katoaia tatou kia “tamou marie tikai i te pure.” (Roma 12:12) Kia pure tatou kia Iehova kia tauturu mai ia tatou kia tavini iaia na roto i te tu ka ariki mai aia. Ka rauka ia tatou i te pati meitaki kiaia no tona vaerua tapu, kia maata te akarongo, kia maroiroi i te patoi i te timataanga, e kia kite i te taangaanga ‘tikai i te tuatua-mou.’ (2 Timo. 2:15; Mata. 6:13; Luka 11:13; 17:5) Mei tetai tamaiti e irinaki ra ki tona metua tane, ka anoanoia tatou kia irinaki ki to tatou Metua i te rangi, ko Iehova. Me pati tatou kiaia kia tauturu mai ia tatou kia tavini pu tikai iaia, papu ia tatou e ka tauturu mai aia ia tatou. Auraka rava tatou e manako e te tamanamanata ra tatou iaia! Mari ra kia akapaapaa, kia akameitaki e kia pati i tana aratakianga me tei roto tatou i te au turanga ngata. E pati katoa tatou kiaia kia tauturu mai ia tatou na roto i te au tu te akakaka ra i tona ingoa tapu.​—Sala. 86:12; Iako. 1:5-7.

11. Akapeea te au uipaanga a te putupututanga te tauturu anga ia tatou kia akaata i to te Atua kaka?

¹¹ Kua oronga te Atua i te tikaanga ki te “tavini akono meitaki e te pakari” kia akono i tana au mamoe akaperepere. (Mata. 24:45-47; Sala. 100:3) Te manako tikai maira te pupu tavini e akapeea te au taeake irinaki e akaata ra i to Iehova kaka. E akatanotanoia mai ana to tatou tu ei au orometua Kerititiano i te au uipaanga, mei tetai tangata tui kakau rai ka akatanotano mai i to tatou kakau kia akaraanga manea tatou. (Ebe. 10:24, 25) No reira kia tae vave tatou ki te au uipaanga, me e angaanga matau na tatou i te aere reiti ki te au uipaanga, kare tatou e puapingaia mei te au ‘akatanotanoanga’ kia akameitaki mai i to tatou tu ei au tavini no Iehova.

ARU TATOU I TE ATUA

12. Akapeea tatou me aru i te Atua?

¹² Me ka akaata tatou i to Iehova kaka, kia ‘aru tatou i te Atua.’ (Ephe. 5:1) E tai mataara kia aru ia Iehova na te aru anga i tona manako. Te aru anga i tetai atu tu, kare te reira e akangateitei ra iaia e ka takino te reira ia tatou. I te mea e tei raro ake teia ao takapini ia tatou i te mana o te vaerua kino, te Tiaporo ko Satani, kia rikarika tatou i ta Iehova e rikarika ra e kia inangaro i tana e inangaro ra. (Sala. 97:10; 1 Ioa. 5:19) Kia papu ia tatou e ko te mataara meitaki ua i te tavini i te Atua, kia rave i te au mea ravarai ei akakaka anga iaia.​—E tatau ia 1 Korinetia 10:31.

13. Eaa ra te tumu ka rikarika ai tatou i te ara, e eaa ta teia ka akakeu ia tatou kia rave?

 ¹³ E mea rikarika na Iehova te ara, e kia rikarika katoa tatou i te reira. Kia akaatea mamao mai tatou mei te rave anga i te tarevake, e auraka e manako e me akavaitata atu tatou ki te reira kare tatou e rave i te ara. Ei akatauanga, kia matakite tatou e kia kore e aru atu i te apiianga apoteiti, e ara te ka akariro ia tatou kia kore e tau i te akakaka i te Atua. (Deu. 13:6-9) No reira e kopae takiri tatou i te aronga apoteiti me kore tetai e karanga ra e e taeake aia kare ra e akangateitei ana i te Atua. E noatu me e mema aia no te pamiri. (1 Kori. 5:11) Kare tatou e puapingaia me tauta tatou i te patoi atu i te taumaroanga a te aronga apoteiti me kore te aronga e akakino maira i te akaaerenga a Iehova. Te tikaanga, e mea kino e te tau kore i te pae vaerua kia tatau i to ratou manako i roto i te puka me kore i runga i te Initaneti.​—E tatau ia Isaia 5:20; Mataio 7:6.

14. Me te tauta ra tatou i te akaata i to te Atua kaka, eaa te tu ka akaari tatou, e no teaa ra?

¹⁴ Te akaari anga i te aroa ko te mataara meitaki rava atuia no tatou kia aru i to tatou Metua i te rangi. Ae, kia aru tatou i tona tu aroa. (1 Ioa. 4:16-19) Te tikaanga, ko te aroa e tupu ra i rotopu ia tatou uaorai, te akataka maira ia tatou ei au pipi na Iesu e ei au tavini no Iehova. (Ioa. 13:34, 35) No to tatou tu ara e ngata ana ia tatou i tetai taime i te akaari i te aroa, inara e akaari ua rai tatou i te aroa i te au taime ravarai. Te akatupuanga i te aroa e tetai atu au tu o te Atua ka tauturu ia tatou kia kore tatou e rave i te au mea tau kore e te ara.​—2 Pete. 1:5-7.

15. Me e aroa to tatou i tetai ke, akapeea tatou me akono atu ia ratou?

¹⁵ Ka akakeu te aroa ia tatou kia rave i te mea meitaki no tetai ke. (Roma 13:8-10) Ei akaraanga, me e inangaro to tatou i to tatou tokorua akaipoipo, kare tatou e tiratiratu kore ki tetai e tetai. Me e aroa to tatou i te aronga pakari e te akangateitei ra i ta ratou angaanga, ka tauturu te reira ia tatou kia akarongo e kia aru i ta ratou aratakianga. Te au tamariki e inangaro ra i to ratou metua ka akarongo e ka akangateitei ia ratou e kare e tuatua kino atu ia ratou. Me e aroa to tatou i to tatou au taeake, kare tatou e manako e kare ratou e puapinga ana, me kore e tuatua ngateitei kore ia ratou. (Iako. 3:9) Te aronga pakari te inangaro ra i te au mamoe a te Atua, ka akono maru atu ratou i te mamoe.​—Anga. 20:28, 29.

16. Akapeea te akaari anga i te aroa te tauturu anga ia tatou i te ngai tutuanga?

¹⁶ Kia akaari katoa i te tu aroa i roto i ta tatou angaanga orometua. No to tatou inangaro maata ia Iehova, kare tatou e tuku i te au me kare te au tangata ngutuare e akarongo me kore e inangaro mai. Mari ra, ka tutu ua atu rai tatou i te tuatua meitaki. Ka akakeu te aroa ia tatou kia tauta kia tukatau i roto i te angaanga orometua. Me e inangaro tika tikai to tatou i te Atua e to tatou tangata tupu, kare tatou e manako i te angaanga tutuanga o te Patireia ei apainga teiaa. Mari ra, kia akamanako tatou i te reira ei tikaanga ngateitei e kia rave i te reira ma te mataora tikai.​—Mata. 10:7.

AKAKAKA UA RAI IA IEHOVA

17. Eaa ra tatou ka puapingaia ai me ariki e kua ngere tatou i te akameitaki anga a te Atua?

¹⁷ Kare te au tangata o teianei ao e kite ra i te kino tikai o te ara, kua kite ra tatou. Te tauturu nei teia ia tatou kia kite e ka anoanoia tatou kia patoi atu i te inangaro kia rave i te ara. Ka riro te ariki anga i to tatou tu ara ei tereni i to tatou akava ngakau kia angaanga meitaki me tupu mai te inangaro i te rave i te ara i roto i to tatou manako e te ngakau. (Roma 7:22, 23) E tika, e tu paruparu to tatou, ka rauka ra i te Atua i te akamaroiroi mai ia tatou kia rave i te mea tika i roto i tetai ua atu turanga.​—2 Kori. 12:10.

18, 19. (a) Eaa te ka tauturu ia tatou kia puapingaia i te patoi pakari atu i te au mana vaerua kino? (e) Eaa ta tatou ka tauta i te rave?

 ¹⁸ Me ka akakaka tatou ia Iehova, ka patoi pakari katoa tatou i te au mana vaerua kino. Ka tauturu mai te rakei pae vaerua ta te Atua i oronga mai kia tatou kia autu atu i te reira. (Ephe. 6:11-13) Ka tauta ua rai a Satani i te apai ke i to Iehova kaka tei tau anake Kiaia. Ka tauta katoa te Tiaporo i te takore i to tatou pirianga kia Iehova. Inara, kare ta Satani tauta anga e puapingaia no te mea e mirioni ua atu au tane, vaine e te tamariki apa, e tatou katoa, ka vai tiratiratu ua rai e te akakaka anga i te Atua! No reira, kia akapaapaa ua atu rai tatou ia Iehova, mei te au mea ora o te rangi te tuatua anga e: “E tau te kakā ia koe, e te Atu [Iehova], e te akangateitei, e te mana: naau oki i anga i te au mea ravarai nei, e no toou inangaro i mou ei e i angaiaʼi ratou.”​—Apo. 4:11.

¹⁹ Kia tauta ua rai tatou i te akakaka ia Iehova noatu eaa te ka tupu. Ka rekareka tikai aia e e maata tikai te au tangata tiratiratu te tauta pakari nei i te aru iaia e te akaata i tona kaka. (Mase. 27:11) Kia aru tatou i te tu o Davida tei imene e: “Ka akameitaki rai au ia koe, e te Atu [Iehova] ra, e taku Atua, ma toku ngakau katoa ra; e akakakā rai au i to ingoa e tuatau ua atu.” (Sala. 86:12) Te tapapa atu nei tatou i te tuatau e akaata apa kore ei tatou i te kaka o Iehova e kia akapaapaa iaia e tuatau ua atu! Ka kite mai te au tangata akarongo i teia tupuanga mataora. Te akaata ra ainei koe i te kaka o te Atua ko Iehova i teianei, ma te manakonakoanga i te rave anga i te reira e tuatau ua atu?

[Au Uianga Apii]

[Au Tutu i te kapi 27]

Te akaata ra ainei koe i to Iehova kaka na roto i teia au mataara?