Au Uianga a te Aronga Tatau
Au Uianga a te Aronga Tatau
I naea te Mana Tutara o Peritane e Marike i riro ei ko te itu o te mana tutara o te totou Pipiria?
▪ Kare te tiki maatamaata ta te Ariki ko Nebukanesa i kite ana e akatutu maira i te au mana tutara katoatoa o te ao. (Dani. 2:31-45) Te akataka maira te reira e e rima tei tutara ana i te tuatau o Daniela e i muri mai, tei takinokino i te iti tangata o te Atua.
Te akakite maira ta Daniela akatakaanga i te tiki auri e ka tu mai te Mana Tutara o Peritane e Marike mei roto mai ia Roma, kare ra aia e autu ia Roma. Kua kite atu a Daniela i te auri i roto i te nga vaevae o te tiki e tae ua atu ki te tapuae e te au mangamanga vaevae. (I roto i te tapuae e te au mangamanga vaevae, kua kairoia te auri ki te karakaraea.) * Te akakite maira teia akatakaanga e ka tu mai te Mana Tutara o Peritane e Marike mei roto mai i te nga vaevae auri. Te turuturu ra te tuatua enua i te tikaanga o teia akatakaanga. Kua ririnui atu a Peritane, tetai tuanga mua o te Patireia o Roma, i te pae openga o te 18 anere mataiti. I muri mai, kua riro mai a Marike ei enua puapinga. Inara, kare te itu o te mana tutara o te totou Pipiria i akatupuia ake. No teaa ra? No te mea kare a Peritane e Marike i angaanga kapiti ake. Kua tupu mai teia i te tuatau o te Tamaki I o te Ao.
Tae anga ki te reira tuatau, te angaanga maata ra “te tamariki o te basileia” i Marike, e to ratou opati maata o teianei ao tei Brooklyn, New York. (Mata. 13:36-43) Te tutu maroiroi ra te au mema o te pupu akatainuia i roto i te au enua te tutaraia ra e te Patireia o Peritane. I te tuatau o te Tamaki I o te Ao, kua kapiti te nga mana tutara o Peritane e Marike i te tamaki atu i to raua au enemi. I roto i te tu akaepaepaanga enua tei akatupuia e te tamaki, kua makitakita katoa taua nga tutara ra i te au tangata e tuanga ratou no te uanga a te “vaine” a te Atua, na te arai anga i te au puka ta ratou i nenei e te pei anga i te aronga e arataki ra i te angaanga tutuanga ki roto i te are auri.—Apo. 12:17.
Mei te akamaramaanga a te totou Pipiria, kare te itu o te mana tutara i akanooia i te pae openga o te 18 anere mataiti, te tuatau i ririnui mai ei a Peritane. Mari ra, kua riro mai te reira ei mana tutara i te akamataanga o te ra o te Atu. *
[Au Tataanga Rikiriki i Raro]
^ para. 4 Te akatutu maira te karakaraea tei kairoia ki te auri i te au tangata i roto i te au ngai e tutara ketaketa ra te Mana Tutara o Peritane e Marike mei te auri rai te tu. Te au tuatau i aereia, kua akatupu teia karakaraea i taua mana tutara ra kia kore e ketaketa mei ta te reira rai e inangaro ra.
^ para. 6 E akamaramaanga ou teia i te au manako tei uriuriia i te kapi 57, parakarapa 24, o te puka Daniel’s Prophecy e tei akaariia mai i roto i te tiati i te kapi 56 e te 139.
[Tutu i te kapi 19]
E varu au taeake mei te opati maata o te Watchtower tei peiia ki roto i te are auri i roto ia Tiunu, mataiti 1918
