Eaa ka Tuku ei i ta Iehova Angaanga na Mua?

“Na toku vaa e akakite i te tuatua-tika naau, te ora naau, e po ua atu te rā.”​—SALA. 71:15.

AKAPEEA KOE ME PAU?

Eaa te au mea puapinga i roto i te oraanga o Noa, Mose, Ieremia e Paulo?

Eaa te ka tauturu ia koe kia iki e akapeea koe me taangaanga i toou oraanga?

Eaa ra koe ka tauta ai i te tuku i ta Iehova angaanga na mua?

1, 2. (a) Eaa te akaariia maira mei te akatapu anga a tetai tangata iaia uaorai kia Iehova? (e) Akapeea tatou e puapingaia ai me akamanako i te au ikianga ta Noa, Mose, Ieremia, e Paulo i rave ana?

ME RIRO mai koe ei pipi akatapuia na Iesu e kua papetitoia, te rave ra koe i tetai takainga puapinga tikai. E ikianga puapinga maata taau e rave ra i te akatapuanga ia koe ki te Atua. Mei te mea rai e te karanga ra koe e: ‘E Iehova, inangaro au ia koe kia riro mai ei Pu noku i roto i toku oraanga. E tavini au noou. Inangaro au kia akakite mai koe akapeea au me akapou i toku taime, eaa te au mea puapinga taku ka rave, e akapeea au me taangaanga i taku au apinga e toku au tareni.’

² Me e Kerititiano akatapuia koe, ko teia taau i taputou kia Iehova. Kia akameitakiia koe no taau ikianga; ko te mea tika teia e te mea tau i te rave. Toou arikianga ia Iehova ei Pu noou, te akapeea ra koe i te taangaanga anga i toou taime? Ka rauka te au akaraanga o Noa, Mose, Ieremia, e te apotetoro ko Paulo i te tauturu mai ia tatou kia akamanako meitaki i taua uianga ra. E au tavini ngakau tae ratou no Iehova. Aiteite ua to tatou turanga ki to ratou. Te akamaroiroi maira ta ratou au ikianga no runga i ta ratou e aruaru maata ra ia tatou, kia akamanako meitaki e te akapeea ra tatou i te taangaanga anga i to tatou taime.​—Mata. 28:19, 20; 2 Timo. 3:1.

MUA AKE I TE VAIPUKE

3. Teea tu i aite ei to tatou tuatau ki to Noa?

³ Kua akakite mai a Iesu i te tu aiteite i rotopu i to Noa tuatau e to tatou tuatau. “E mei te tuatau ia Noa ra, koia katoa te aerenga mai o te Tamaiti a te tangata nei,” i nana ai. “Te kaikai ra [te au tangata] e te inu ra, te akaipoipo ra, e te orongaia ra kia akaipoipoia, e tae rava atu  ki te rā i tomo ei a Noa ki roto i te araka, Kare rava i kite, e rokoia iora ratou e te diluvi, e ope takiri akera ratou i te mate.” (Mata. 24:37-39) Maataanga o te tangata i teia tuatau kare e manako ana i te tu rapurapu o to tatou tuatau. Kare ratou e akarongo mai ana ki te au akamatakiteanga ta te au tavini o te Atua e akakitekite ra. Maata katoa tei aviri i te manako e ka taui te Atua i te au angaanga a te tangata​—mei te au tangata rai i to Noa tuatau. (2 Pete. 3:3-7) I roto i taua turanga kino ra, akapeea a Noa te taangaanga anga i tona taime?

4. Akapeea a Noa te taangaanga anga i tona taime te oronga mai anga a Iehova i tana angaanga, e no teaa ra?

⁴ Muri ake te akakiteia mai anga to te Atua akakoroanga e te orongaia mai anga tana angaanga, kua maani a Noa i tetai araka ei akaora i te tangata e te au animara. (Gene. 6:13, 14, 22) Kua akakite katoa a Noa i ta Iehova ka rave. Kua kapiki te apotetoro ko Petero iaia e e “tangata i ako i te tuatua-tika,” te akaari mai anga e kua tauta pakari a Noa i te tauturu i tona au tangata tupu kia marama i te kino tikai o to ratou turanga. (E tatau ia 2 Petero 2:5.) Toou manako ka tau ainei a Noa e tona pamiri kia akapou i to ratou taime ki runga i tetai pitiniti, kia puapinga atu ratou i tetai ke, me kore kia akanoo i tetai oraanga meitaki? Kare! Te kite anga ratou eaa te ka tupu a te tuatau ki mua, kua kopae ratou i taua au tu tavarenga anga.

TE AU IKIANGA A TETAI TAMAITI ARIKI AIPHITI

5, 6. (a) Te apiianga tei rauka mai ia Mose te akapapa ra iaia no teaa? (e) Eaa ra a Mose i kopae ei i te au mea tei orongaia kiaia i Aiphiti?

⁵ I teianei, ka akara tatou i te akaraanga o Mose. Kua utuutuia aia i roto i te are ariki o Aiphiti ei tamaiti angai na te tamaine a Pharao. Ei tamaiti ariki mapu, kua apiiia aia “i te au tuatua pakari a to Aiphiti.” (Anga. 7:22; Exo. 2:9, 10) Penei kua akakoroia teia apiianga ei akapapa iaia no tetai angaanga i roto i te paepae ariki o Pharao. Penei ka riro mai aia ei tangata puapinga maata i roto i tetai kavamani ririnui o taua tuatau ra, te tu anga i te au apinga mekameka, au turanga ngateitei, e te au mea navenave ka rauka mai mei taua taoonga ra. Inara, ko to Mose akakoroanga ainei kia mataora aia i teia au mea nei?

⁶ No tana i apiiia mai e tona nga metua mei tona tamarikianga, papu e kua kite a Mose i ta Iehova i taputou ki tona ui tupuna ko Aberahama, Isaaka, e Iakoba. Kua irinaki a Mose i taua au taputou ra. Papu e kua akamanako oonu ana aia no runga i tona oraanga ki mua e tona tu tiratiratu kia Iehova. No reira, tae anga ki te tuatau no te ikianga me ka riro mai aia ei tamaiti ariki no Aiphiti me kore ei tavini ngati Iseraela, eaa tana i iki? Kua iki a Mose i ‘te rave i te mate i te kapiti anga ki te au tangata o te Atua, i to te rave i te navenave poto ua o te tuatua kino ra me kore ara.’ (E tatau ia Ebera 11:24-26.) Muri mai, kua taangaanga aia i tona oraanga na te aru anga i ta Iehova aratakianga. (Exo. 3:2, 6-10) Eaa ra a Mose i rave ei i te reira?  No te mea kua irinaki aia i ta te Atua au taputou. Kua kite aia e kare ona puapinga e rauka mai mei Aiphiti mai. Tika rai, kare i roa ana i muri mai, kua tuku mai te Atua i te mate ngauru ei akautunga i taua iti tangata ra. Te kite ra ainei koe i te apiianga i konei no te aronga tei akatapuia kia Iehova i teia tuatau? Kare tatou e akamou i te manako ki runga i te angaanga me kore te au mea navenave o teia akatereanga o te au mea nei, e akamou ra tatou i te manako ki runga ia Iehova e tana angaanga.

KITE A IEREMIA EAA TE KA TUPU MAI

7. Akapeea to Ieremia turanga i aite ei ki to tatou?

⁷ Ko te peroveta ko Ieremia tetai tangata tei tuku i ta Iehova angaanga na mua. Kua akaue a Iehova ia Ieremia ei peroveta nana kia tutu aere i tetai karere akavaanga kia Ierusalema e Iuda no te akamori i te au atua pikikaa. Ei akapapu anga, kua ora ana a Ieremia i “te au rā openga.” (Iere. 23:19, 20) Papu tikai iaia e kare e roa atu ka takoreia taua akatereanga ra.

8, 9. (a) Eaa i anoanoia ai kia akatikatikaia to Baruka manako? (e) Eaa ta tatou ka akamanako me rave tatou i te au parani?

⁸ Eaa ta Ieremia kare i rave no tana i irinaki? Kare aia i tauta ana i te akapuapinga i tona oraanga i roto i taua akatereanga te ka takoreia. Eaa te puapinga ka rauka mai no te rave anga i te reira? Kare te tekeretere o Ieremia, ko Baruka, i marama tikai ana i te reira. No reira, kua akauru te Atua ia Ieremia kia akakite ki tona tekeretere e: “I na, ko taku i patu ra, ko taku ïa e vavaʼi ki raro, e ko taku i tanu ra, ko taku ïa e kiriti, koia te enua katoa nei. Te kimi ra ainei koe i te meitaki maata noou uaorai? Auraka e kimiia: i na oki, te apai mai nei au i te kino ki runga i te tangata katoa ra, . . . e oronga atura au i te ora noou ei apinga, i te au ngai katoa taau e aere na.”​—Iere. 45:4, 5.

⁹ Kare i papu ia tatou e eaa ‘te au mea meitaki maata’ ta Baruka e kimi ra nona uaorai. * Kua kite ra tatou e e au mea te reira kare e puapingaia no te tuatau ki mua, e au mea te ka takoreia te autu anga a Babulonia ia Ierusalema i te mataiti 607 M.T.N. Te kite ra ainei koe i te apiianga no tatou i konei? Ka anoanoia tatou kia rave i tetai au parani kia rauka mai te au mea no te oraanga no te tuatau ki mua. (Mase. 6:6-11) Inara e meitaki ainei no tatou kia akapou i to tatou taime e te maroiroi i te aruaru i taua au mea puapinga kore ra? E tika e rave ua ana to Iehova akaaerenga i te au parani no te au Are Uipaanga Patireia e te au opati manga ou, e no tetai atu au angaanga teokaratiki. Inara, e puapinga tikai teia au parani no te tuatau ki mua, no te mea te turuturu nei teia au mea i te Patireia. E mea tau no te au tangata akatapuia o Iehova kia akanoo i te au mea puapinga me rave ratou i te au parani. Papu tikai ra ainei ia koe e ‘te kimi ra koe na mua i te basileia o Iehova e tana tuatua tika ra’?​—Mata. 6:33.

“KUA RIRO ÏA EI TEITA IAKU”

10, 11. (a) Eaa te mea puapinga kia Paulo i mua ake ka riro mai ei aia ei Kerititiano? (e) Eaa ra to Paulo manako i taui takiri ei?

¹⁰ Ka akamanako tatou i teianei i te akaraanga o Paulo. Mua ake ka riro ei aia ei Kerititiano, i te akaraanga e oraanga puapinga tikai tona. Kua apii ana aia i te ture ngati Iuda ma tetai au puapii rongonui rava atu i tona tuatau. Kua oronga mai te taunga maata o te ngati Iuda i tetai mana taoonga kiaia. E te puapinga maata atura aia i roto i te akonoanga ngati Iuda i tona au oa. (Anga. 9:1, 2; 22:3; 26:10; Gala. 1:13, 14) Inara, kua taui takiri te reira te kite anga a Paulo e kare a Iehova e akameitaki akaou ana i te ngati Iuda ei iti tangata.

¹¹ Kua kite a Paulo e ko tetai angaanga i roto i te akatereanga ngati Iuda kare e puapinga ana kia Iehova; e kare e puapingaia  no te tuatau ki mua. (Mata. 24:2) Kua tuatua teia Pharisea o mua ana e me akaaiteia atu tona marama ou no runga i te au akakoroanga o te Atua e te tikaanga ngateitei o te angaanga tutuanga ki tana i manako ana i mua ana ei mea puapinga, te manako ra aia i reira i teianei “ei teita.” Kua akaruke a Paulo i te akonoanga ngati Iuda e kua taangaanga i te toenga o tona oraanga i te enua nei i te tutu aere i te tuatua meitaki.​—E tatau ia Philipi 3:4-8, 15; Anga. 9:15.

AKARA MEITAKI I TE AU MEA PUAPINGA

12. Kua akamou a Iesu i tona manako ki runga i teaa i muri ake i tona papetitoanga?

¹² Kua akapou a Noa, Mose, Ieremia, Paulo, e tetai aronga i te maataanga o to ratou taime e te maroiroi ki runga i te au angaanga teokaratiki. Kua akanoo ratou i te au akaraanga meitaki no tatou. Tika rai, ko Iesu te tavini maata rava atu i roto i to Iehova au tavini akatapuia. (1 Pete. 2:21) Muri ake tona papetitoia anga, kua akapou a Iesu i te toenga o tona oraanga i te enua nei i te tutu aere i te tuatua meitaki e te akangateitei anga ia Iehova. Te taka meitaki ra te manako o tetai Kerititiano tei akatika ia Iehova ei Pu nona, e ko te tavini anga Iaia te mea puapinga rava atu i roto i tona oraanga. Ko te reira ainei toou manako? Akapeea e rauka ai ia tatou i te rave maata atu i ta Iehova au angaanga, e i taua taime rai te rave ra i tetai atu au apainga ke?​—E tatau ia Salamo 71:15; 145:2.

13, 14. (a) Te akamaroiroiia ra te au Kerititiano akatapuia kia akamanako no runga i teaa? (e) Eaa te tu mataora ka rauka mai i te iti tangata o te Atua?

¹³ No tetai au mataiti, kua akamaroiroi ua rai ta Iehova akaaerenga i te au Kerititiano kia akamanako i te angaanga painia na roto i te pure. No te au turanga tukeke, kare tetai pae tavini akarongo mou o Iehova e rauka i te tutu aere e 70 ora i te au marama. Auraka ra ratou e manako maromaroa. (1 Timo. 5:8) Akapeea ra koe? Ka rauka ainei ia koe i te painia?

¹⁴ Akamanako ana i te mataora tei tupu ki te maataanga o te iti tangata o te Atua i te tuatau o te Akamaaraanga i teia mataiti. I te marama o Mati, kua orongaia mai tetai atianga takake no te au painia tauturu kia iki i te akapou e 30 me kore e 50 ora ki te tutuanga. (Sala. 110:3) Mirioni ua atu tei piri atu ki te angaanga painia tauturu, e kua maata tikai te mataora i roto i te au putuputuanga. Ka rauka ainei ia koe i te akatanotano i taau angaanga kia rauka ia koe i te painia putuputu? I te openga o te au ra tataki tai, e mataora tikai ana tetai Kerititiano akatapuia e ka tuatua e, “E Iehova, kua rave au i taku i rauka i roto i taau angaanga.”

15. Eaa te akakoroanga a tetai mapu Kerititiano no te apiianga a teianei ao?

¹⁵ Me te vaitata ra koe ki te openga o taau apii, penei te kite ra koe e e meitaki toou oraanga kopapa e ka iti mai taau au apainga. Te manako ra ainei koe i te painia tamou? Kare ekoko e te irinaki ra te aronga tauturu o te apii e e mea meitaki noou kia aruaru i tetai apii teitei e tetai angaanga moni meitaki. Inara, te irinaki ra ratou i te akaaereanga a te tangata e te puapinga i te pae moni, kare ra e puapingaia teia no te tuatau ki mua. Tetai tua ra, me aruaru koe i te au angaanga teokaratiki, te aruaru ra koe te au mea puapinga tikai e te au akakoroanga ka roa te tuatau. E te aru ra koe i te akaraanga apa kore o Iesu. Ka mataora koe i taua ikianga meitaki ra. Ka paruru te reira ia koe. Ka akaari mai te reira kia koe e te tauta ra koe i te rave i taau akatapu anga kia Iehova.​—Mata. 6:19-21; 1 Timo. 6:9-12.

16, 17. Eaa te au uianga e uiia ra no runga i te au angaanga moni e tetai atu au angaanga?

¹⁶ Maata te au ora e angaanga ra te maataanga o te au tavini o te Atua i teia tuatau, kia rauka mai te au mea e anoanoia ra no te pamiri. Inara, te maata ra te ora e angaanga ra tetai pae, kare ra e anoanoia ra. (1 Timo. 6:8) Te tauta ra teianei ao ia tatou kia oko mai i te au mea ou no te  mea te inangaro ra ratou kia irinaki tatou e kare tatou e puapingaia me kare tatou e tu i teia au apinga. Kare ra te au Kerititiano mou e inangaro i te ao o Satani kia iki eaa te mea puapinga kia ratou. (1 Ioa. 2:15-17) Te aronga tei akaoti mai i te angaanga moni, kare ainei teia i te atianga meitaki kia taangaanga ratou i to ratou tuatau i te angaanga painia, te tuku anga i ta Iehova angaanga na mua?

¹⁷ Ka tau te au tavini akatapuia o Iehova kia ui kia ratou uaorai e: Eaa te mea puapinga atu kiaku i roto i toku oraanga? Te tuku ra ainei au i te au mea o te Patireia na mua? Te aru ra ainei au i te tu akaatinga o Iesu? Te akarongo ra ainei au ki ta Iesu akoanga kia aru ua rai iaia? Ka rauka ainei iaku kia akatanotano i taku angaanga kia rauka iaku i te akapou i te taime ki te tutuanga i te Patireia me kore ki tetai atu au angaanga teokaratiki? Noatu e kare toku au turanga e akatika ana iaku i teia taime kia akamaata atu i taku tutuanga, te taangaanga ra ainei au i toku taime e te maroiroi ki ta Iehova angaanga?

‘KIA INANGARO E KIA RAVE’

18, 19. Eaa taau ka pure, e eaa ra ka akarekareka ai taua patianga ra ia Iehova?

¹⁸ E mea mataora tikai te kite anga i te tu maroiroi o te iti tangata o te Atua. Inara kare tetai pae e inangaro ana i te painia me kore i tau no te painia​—noatu e te akatika ra to ratou au turanga ia ratou. (Exo. 4:10; Iere. 1:6) Akapeea me te manako akapera ra koe? Kare ainei teia i te tumu tau noou kia pure? Ae. Kua akakite a Paulo ki te au taeake irinaki e ko Iehova ‘te angaanga ra ki roto ia kotou, kia inangaro e kia rave kotou i tana e anoano ra.’ (Phili. 2:13) Me kare koe e akakeuia ana kia akamaata atu i taau angaanga orometua, e pati koe kia Iehova kia oronga mai i te inangaro e te tu karape kia rave i te reira.​—2 Pete. 3:9, 11.

¹⁹ E au tangata akarongo mou a Noa, Mose, Ieremia, Paulo e Iesu. Kua taangaanga ratou i to ratou taime e te maroiroi i te akakitekite i te karere akamatakiteanga a Iehova. Kare ratou i akatika ana ia ratou kia tavarengaia mei ta ratou tutuanga. Te vaitata mai nei te openga o teia akatereanga; kia akapapu tatou pouroa tei akatapu i to tatou oraanga ki te Atua e te tauta ra tatou i te aru i teia au akaraanga meitaki i roto i te au Tuatua Tapu. (Mata. 24:42; 2 Timo. 2:15) Me rave tatou i teia, ka akarekareka tatou ia Iehova e ka akameitaki maata mai aia ia tatou.​—E tatau ia Malaki 3:10.

[Tataanga Rikiriki i Raro]

[Au Uianga Apii]

[Tutu i te kapi 21]

Kare te au tangata i akarongo ana ki ta Noa akamatakiteanga

[Tutu i te kapi 24]

Te manako ra ainei koe kia piri atu ki roto i te pupu painia tamou?