Ka Ngaro te Riri no te tu Takinga Meitaki

KARE tetai vaine pakarikari i reka mai ana ia George raua ko Manon, tetai nga Kite i Neterani, te oronga anga raua i te tuatua meitaki o te Patireia kiaia. Kua kite raua e kua mate tana nga tane e rua e tana tamaiti, e e mamae ana tona au paupau anga ivi. Noatu kua maru mai aia i roto i te pukapuka anga, kare rai aia i oaoa mai ana.

Inara, kua akakite atu a George kia Manon e ka oki raua ka apai i tetai kou tiare na taua vaine ra no te mea akaraanga maromaroa ia ai aia e te riri. To raua oki atu anga, kua poitirere tikai a Rie. Inara kare e tano ana taua taime ra kiaia, no reira kua akanoo ratou i tetai ra kia oki akaou atu raua. Te oki atu anga a George raua ko Manon i te taime i akanoo ei ratou, kare aia i aere mai ana ki te ngutupa. Noatu kua oki raua i tetai taime ke mai, kare aia i te kainga. Kua manako raua e kare aia e inangaro ana i te aravei ia raua.

I tetai ra, kua aravei a George ia Rie i te kainga. Kua tataraara mai aia no te kare aia i akono ana i ta ratou i akanoo e kua akamarama mai aia e no roto mai aia i te are maki. “Inara kare ra koe i kite ana eaa taku i rave i muri ake to korua akaruke anga,” i karanga ai aia. “Kua akamata au i te tatau i te Pipiria!” Kua pukapuka ratou e kua akamata i tetai apii Pipiria.

Ia Rie e apii ra i te Pipiria, kua taui mai tona tu riri ki te tu mataora e te tu maru. Noatu e ka noo ua aia ki te kainga, kua akamata aia i te akakite aere i tona irinakianga ou ki tetai au tangata tei atoro mai iaia. No tona maki, kare aia e rauka i te aere putuputu ki te au uipaanga a te putuputuanga, inara kua mataora aia me atoro mai te au taeake e te au tuaine iaia. I te ra i tae ei tona mataiti ki te 82, kua aere aia ki tetai akaputuputuanga kotinga e kua papetitoia aia no tana akatapuanga ki te Atua.

Muri ake tona mate anga, kua kiteaia mai tetai pee tana i tata ana. Kua akataka mai aia i tona tu maromaroa no te pakarikari e kua akakite mai aia i te puapinga o te tu takinga meitaki. “Kua tukia toku ngakau te tatau anga i taua pee ra,” i karanga ai a Manon, “e kua mataora tikai au e kua tauturu mai a Iehova ia maua kia akaari i te tu takinga meitaki kiaia.”

Ae, te akakeu ra te akaraanga o Iehova ia tatou kia akaari i te aroa e te tu takinga meitaki. (Ephe. 5:1, 2) Ka uua mai ta tatou angaanga orometua me ‘akakite ua rai tatou ia tatou uaorai ei aronga rave angaanga na te Atua ma te takinga-meitaki.’​—2 Kori. 6:4, 6.