Kia Pakari​—Kimi Kia ‘Kite Tikai i te Arataki’

Kua akaaiteia te oraanga ki tetai teretere anga. Inara, kua kotingaia te tu pakari o te tangata i te tauturu i tetai ua atu tangata kia puapingaia i roto i te oraanga. Maata tei kite mai i te au turanga ngata i roto i te oraanga mei tetai pai rai i roto i te tai uriia. (Sala. 107:23, 27) Eaa ra i tau ei teia akatutuanga?

I te tuatau taito, e mea ngata tikai te teretere anga na te moana e ka anoanoia te kite karape. E angaanga karape teia tei apiiia e te aronga mataro, penei e rangatira no te pai. (Anga. 27:9-11) Maata te au tutu taito te akaari maira i te puapinga o te angaanga a te rangatira, tei akaari mai e e maata atu aia i te aronga e angaanga ra i runga i te pai. Te teretere anga na te moana, kua apii te aronga angaanga o te pai no runga i te au etu, te matangi, e tetai atu au apinga ke. Te akataka maira te Pipiria i teia au tangata ei aronga “pakari.”​—Eze. 27:8.

Akaraanga ngata i te akatikatika anga i te au manamanata o te oraanga o teia tuatau mei te teretere anga rai i te moana i te tuatau taito. Eaa te ka tauturu mai ia tatou?

AKAPEEA E RAUKA AI IA TATOU KIA ‘KITE TIKAI I TE ARATAKI’?

Te akamanako anga i te oraanga mei tetai teretere anga rai, akamanako ana i teia tuatua mou Pipiria: ‘E riro te tangata pakari i te akarongo, e e tupu te kite, e rauka ai kia kite tikai te tangata akono meitaki i te arataki.’ (Mase. 1:5, 6) Te kupu tuatua Epera no te ‘kite tikai i te arataki,’ te akataka maira i te au angaanga a te rangatira o tetai pai taito. Te akaari maira te reira i te tu karape no te kite i te arataki.

Noatu ka anoanoia te tautaanga, ka rauka ia tatou te ‘kite tikai i te arataki’ e kia apii meitaki i te ‘teretere’ na roto i te oraanga. Mei ta Maseli e akakite maira, kia taangaanga kapiti tatou i te “pakari,” te “kite,” e te ‘marama.’ (Mase. 1:2-6; 2:1-9) E kia kimi tatou i te aratakianga a te Atua, no te mea kua kite katoa te aronga kino i te ‘kimi’ i te au tupuanga tau kore.​—Mase. 12:5.

E mea puapinga i reira, kia riro mai tatou ei aronga apii maroiroi i te Tuatua a te Atua. Na roto i taua apiianga ra, ka kite mai tatou i te au manako puapinga tikai no runga ia Iehova e tei akaata meitaki mai Iaia, ko Iesu Karaiti. (Ioa. 14:9) Ka rauka mai ia tatou te au akoanga meitaki mei te au uipaanga Kerititiano. E ka kite katoa mai tatou i te au tupuanga o tetai ke, e to tatou au metua.​—Mase. 23:22.

AKAMANAKO E KIA PARANI MEITAKI

E mea puapinga kia ‘kite tikai i te aratakianga’ me kua o tatou ki roto i te au manamanata. Penei ka riro te manako ekoko no runga i ta tatou ka rave i te tapu ia tatou, e ka tupu mai te kino.​—Iako. 1:5, 6.

 Te mea umere, te taangaanga katoaia ra te kupu tuatua kia ‘kite tikai i te arataki’ ki te tamaki anga. Ka tatau tatou e: ‘Kia rai te kimi anga i te kite tikai i te arataki, ka rave ei koe i te tamaki: tei te maata i te kimi i te tuatua ra te ora.’​—Mase. 20:18; 24:6.

Mei tetai tangata karape rai e parani ra no tetai tamaki, e mea meitaki kia akamanako atu tatou i te au kino ka tupu mai ki to tatou pirianga kia Iehova. (Mase. 22:3) Ei akaraanga, penei ka iki koe i te ariki i tetai angaanga ou me kore tetai turanga teitei i te angaanga. Ka akamanako meitaki koe i te moni, te taime ka pou no te aere anga e te oki anga mei te angaanga, e tetai atu au mea ke. Inara, e au manako ke atu tetai ka akamanako tatou: Ka tau ainei teia angaanga ki te au kaveinga Pipiria? Eaa ta te au angaanga tukeke te ora ka akatupu ki taku angaanga Kerititiano?​—Luka 14:28-30.

E angaanga meitaki ta Loretta, tetai o te Au Kite o Iehova, i ko i tetai kamupani akapapa kai. Te neke anga te kamupani ki tetai ngai ke, kua orongaia kia Loretta tetai turanga teitei i ko i te ngai ou: “E atianga meitaki tikai teia noou,” i karanga ai te au akaaere o te kamupani kiaia. “Kua kite matou e e Are Uipaanga Patireia tetai i te reira ngai.” Inara kua inangaro a Loretta i te akamama mai i tona oraanga i te tavini pu tikai i Tei Anga mai iaia. Kua kite aia e kare te ngai angaanga ou e oronga mai i te taime no te au angaanga Kerititiano. No reira, kua akaruke aia i taua angaanga ra, noatu kua akakite te akaaere kiaia e koia ua te tangata angaanga ta ratou i inangaro kia noo mai. Kua papu ia Loretta, tei painia ana mei tetai 20 mataiti i teianei, e ko te au tupuanga meitaki tei rauka mai iaia no tana i parani ana ma te ‘kite tikai i te arataki,’ tei rotai ki te akoanga i roto i te Tuatua a te Atua. Kua akaketaketa aia i tona pirianga kia Iehova e kua kite aia i te akameitakianga no te tauturu anga i tetai au tangata kia ariki i te tuatua mou Pipiria.

Ka anoanoia te ‘kite tikai i te arataki’ i roto i te ngutuare. E roa te tuatau no te utuutu anga i te tamariki, e ka riro te au ikianga a te au metua i te pae vaerua e i te pae materia i te tauturu i te katoatoa i roto i te ngutuare no te tuatau ki mua. (Mase. 22:6) Penei ka ui te au metua Kerititiano kia ratou uaorai e: ‘Na roto i ta matou pukapukaanga e te au akaraanga, te apii ra ainei matou i ta matou tamariki kia piri vaitata kia Iehova ei tauturu ia ratou kia akakoromaki i te oraanga ei aronga mamaata? Te tauturu ra ainei to matou tu oraanga ia ratou kia marama e akapeea ratou e mareka ai i te oraanga mama ua e kia akamou i to ratou manako ki runga i ta ratou angaanga Kerititiano?’​—1 Timo. 6:6-10, 18, 19.

Kare te au akakoroanga pae materia me kore te turanga o te oraanga ta te aronga o teianei ao e aruaru ra, e oronga mai i te puapinga tika tikai. Kua marama te Ariki ko Solomona i teia. Kua akauruia aia kia tata e: “E meitaki to te aronga i mataku i te Atua, tei mataku ki mua i tona aroaro.” (Kohe. 8:12) Te akapapu maira te reira i te pakari no te kimi anga kia ‘kite tikai i te arataki’ tei akatumuia e tei rotai ki te Tuatua a te Atua.​—2 Timo. 3:16, 17.

[Tutu i te kapi 30]

Akataka anga i ta ratou angaanga, kua akaariia mai e e maata atu te au rangatira i te au mataro

[Akameitakianga]

Su concessione del Ministero per i Beni e le Attività Culturali. Kare e akatikaia kia neneiia me kore kia kopiia teia tutu na roto i tetai ua atu tu me kore ravenga.