Kua Oronga Puareinga Ratou Ia Ratou Uaorai​—I Ekuatoa

TE TAITAIA ra tetai taeake mapu i Itaria. Koi akaoti ua maira aia i te apii tua rua e koia tetai tamaiti kite roa atu i roto i tona pupu apii, e i teianei te raurau maira te kopu tangata e te au puapii kia aere aia ki te apii teitei. Inara, tetai au mataiti i muri mai, kua akatapu a Bruno i tona oraanga kia Iehova, te taputou anga i te tuku i to te Atua anoano ei mea mua i roto i tona oraanga. Eaa tana i iki? Kua akamarama mai aia e: “Kua akakite au kia Iehova na roto i te pure e ka akono au i taku akatapuanga e ka tuku au iaia ei mea mua i roto i toku oraanga. E kua akakite katoa au kiaia i roto i taku pure e ka inangaro au i tetai oraanga ki i te au angaanga tukeke, kare e maromaroa ana.”

 Tetai au mataiti i muri mai, tei roto a Bruno i Ekuatoa, i Marike Apatonga. Kua akakite mai aia e: “Kua pau mai a Iehova i taku pure tei kare rava au i tapapa atu ana.” Tona tae anga ki Ekuatoa, kua poitirere aia i te aravei anga i te au mapu tei neke katoa atu ki reira i te tavini maata atu ia Iehova.

AU MAPU TEI ‘TIMATA IA IEHOVA’

Kua ariki a Bruno, mei ta te au tauatini ua atu au mapu takapini i te ao nei i ta Iehova patianga e: ‘E timata mai iaku nei me ka kiriti atu rai au i te au māramārama o te rangi ra, e ka riringi atu ei i te apinga maata ua atu.’ (Mala. 3:10) No tei akakeuia e te aroa no te Atua, kua iki ratou kia ‘timata ia Iehova’ na te oronga puareinga anga i to ratou taime, maroiroi, e te au apinga i te turuturu i tona au anoano i roto i tetai enua te anoano maataia ra te aronga akakitekite i te Patireia.

Muri ake te tae anga teia aronga ki ta ratou ngai tutuanga ou, kua kite mata atu ratou e “te maata ua nei te mou, te iti nei ra te aronga e kokoti” ra. (Mata. 9:37) Ei akaraanga, kua tata atu a Jaqueline no Tiamani mai ma te mataora ki te opati manga o Ekuatoa e: “Teianei, te tavini nei au i Ekuatoa tere atu i te rua mataiti, e e 13 aku apii Pipiria, e e 4 ia ratou te aere putuputu maira ki te au uipaanga. Kare ainei teia i te mea mataora?” Kua akakite mai a Chantal no Kanata mai e: “I te mataiti 2008, kua neke atu au ki tetai ngai i te pae taatai i Ekuatoa, e tai ua rai putuputuanga i reira. I teianei e toru putuputuanga  i reira e e tere atu i te 30 painia i taua ngai ra. E mea mataora tikai te kite atu anga e e maata te aronga ou e tere ra ki mua!” Kua karanga katoa aia e: “Koi neke ua ake ra au ki tetai oire e 2,743 mita te teitei i runga i te Maunga Andes. Tere atu i te 75,000 tangata e noo ra i roto i teia oire, inara e tai rai putuputuanga i reira. E meitaki tikai teia ngai tutuanga! Te mataora tikai nei au i taku angaanga orometua.”

AU AKAAOANGA TEI O MAI

Ae, e tupu mai ana te au akaaoanga i te tavini i roto i tetai enua ke. E tika, e aro atu ana tetai au mapu i te au akaaoanga i mua ake ka aere ei ratou ki te reira ngai. Kua akakite mai a Kayla no Marike mai e: “Kua riro te au tuatua papu kore a tetai au taeake i to matou oire ei akamaroiroi anga kore. Kare ratou i marama ana i te tumu i inangaro ei au i te neke atu ki tetai enua ke no te painia. Tetai au taime, e akamanako ana au e, ‘Te rave ra ainei au i te ikianga meitaki?’” Noatu rai, kua neke atu a Kayla ki reira. Kua akamarama mai aia e: “Na te pure maata anga kia Iehova e te pukapuka anga ki te au taeake e te au tuaine maroiroi i kite mai ei au e te akameitaki maira a Iehova i te tu ngakau puareinga.”

E ngata tikai no te maataanga o te au tangata i te apii i tetai reo ou. Kua maara ia Siobhan no Airerani mai e: “E mea ngata tikai iaku i te akakite i toku manako. E tauta ua ana au i te akakoromaki, te apii meitaki i te reo, e kia kata me tarevake taku tuatua anga i te reo.” Kua karanga a Anna no Etonia mai e: “Mama ake i te akamatau anga ki te turanga vera, te one pueu, e te rava kore o te vai vera no te pai anga, i to te apiianga i te reo Paniora. Tetai au taime, e inangaro ana au i te akaruke. Te anoanoia ra au kia akamanako i te au mea meitaki, kare i toku au tarevake.”

Tetai akaaoanga ko te maaraaraanga i te pamiri. Kua akakite mai a Jonathan no Marike mai e: “Muri poto ake toku tae atu anga, kua maromaroa au no te akaruke anga i toku au oa e te pamiri. Inara, kua rauka iaku i te autu atu i taua au manako ra na te akamanako anga i taku uaorai apii Pipiria e te angaanga orometua. Kare i roa ana, kua mataora akaou mai au no te au tupuanga meitaki taku i kite i roto i te angaanga orometua e no te au oa ou i roto i te putuputuanga.”

Tetai akaaoanga ko te turanga o te oraanga. Papu e, kare te reira mei taau rai i matau ana. Kua akakite  mai a Beau no Kanata mai e: “I roto i toou enua anau, ka rauka ua ia koe i te taangaanga i te au mea mei te uira ai e te vai. I konei ra, kare e rauka ia koe i te taangaanga ua i teia au mea.” Ka kite ua atu koe i te putaua, kare e meitaki ana te au apinga akaoro, kare te tangata e kite ana i te tatau e te tata mei tei matauia i te au enua putaua. E akakoromaki ana a Ines, no Auteria mai i taua au turanga ra na te akamanako meitaki anga i te au tu meitaki o te au tangata i te reira ngai. “E aronga oaoa ratou, maru, meitaki, e te akaaka,” i karanga ai aia. “Tei maata atu, inangaro tikai ratou i te apii maata atu no runga i te Atua.”

“TE APINGA MAATA UA ATU, KARE E NGAI E O EI”

Noatu kua inangaro puareinga ua teia au mapu i te tavini i Ekuatoa, kua kite mai ratou e ‘kua oronga maata mai a Iehova i te au mea katoa’ tei kare rava ratou i tapapa atu ana. (Ephe. 3:20) Ae, kua kite mai ratou e kua rauka mai ia ratou “te apinga maata ua atu, kare e ngai e o ei.” (Mala. 3:10) Teia to ratou manako no runga i te angaanga orometua:

Bruno: “Kua akamata au i taku angaanga tutuanga i Ekuatoa i roto i tetai ngai umere roa atu o te Amazon. Muri mai, kua tauturu au i te akamaata atu i te opati manga i Ekuatoa. Teianei, te tavini nei au i ko i te Betela. I te tuatau iaku i Itaria, kua iki au i te tuku ia Iehova na mua, e te akatupu nei aia i toku au anoano kia mataora tikai au i roto i tana angaanga tukeke.”

Beau: “Kua akavaitata roa atu au kia Iehova no te mea kua rauka iaku i te akapou i toku au taime ki te au angaanga pae vaerua i Ekuatoa. Taua taime rai, kua rauka iaku i te teretere atu ki te au ngai manea tikai—tei inangaro ua ana au i te rave.”

Anna: “Manako ana au e kare e rauka iaku, ei tuaine kare i akaipoipo, tetai oraanga mataora ei mitinari. Inara i teianei, kua kite au e ka rauka iaku. Kia akameitakiia a Iehova, e te mataora nei au i te akariro i te au tangata ei au pipi, te o anga ki te patu anga i te au Are Uipaanga Patireia, e te akatupu anga i tetai au oa ou.”

Elke: “I toku enua anau i Auteria, e pure putuputu ua ana au kia Iehova no tetai apii Pipiria. E 15 aku apii Pipiria i konei! E rekareka ana au me kite atu au e te mataora ra te aronga apii e tere ra ki mua.”

Joel: “E tupuanga mataora tikai me tae koe ki tetai ngai kare koe i matau i te tavini ia Iehova. Ka kite mai koe i te irinaki tikai kiaia, e e mea mataora tikai me kite koe i tana akameitakianga no taau au tautaanga! I toku mataiti mua i konei, toku tae mai anga no Marike mai, kua maata mai te pupu taku e tauturu ra mei te 6 ki te 21 papuritia. E 110 tangata tei aere mai ki ta matou Akamaaraanga.”

AKAPEEA RA KOE?

E te au taeake e te au tuaine mapu, te tau ra ainei to kotou au turanga kia tavini i roto i tetai enua te anoano maataia ra te aronga akakitekite o te Patireia? E tika, ka anoanoia tetai parani meitaki anga no te rave anga i tetai ikianga maata mei tera rai. Tei maata atu, ka anoanoia te inangaro ngaueue kore no Iehova e no te au tangata tupu no taua ikianga ra. Me ko toou inangaro tera e kua tau toou turanga, e pure akatenga kia Iehova no te tavini anga i tetai enua ke. Pera katoa, tuatua ki toou metua Kerititiano e te aronga pakari i roto i toou putuputuanga no runga i toou inangaro. Penei ka rauka ia koe i te iki e kia piri atu ki roto i teia angaanga tavinianga tapu e te mataora.

[Tataanga i te kapi 3]

“Na te pure maata anga kia Iehova e te pukapuka anga ki te au taeake e te au tuaine maroiroi i kite mai ei au e te akameitaki maira a Iehova i te ngakau puareinga.”​—Kayla no Marike mai

[Pia/​Tutu i te kapi 6]

Me akapapa no te tavini anga i tetai enua ke

• Rave putuputu i taau uaorai apii

• Uriuri i Ta Tatou Angaanga Patireia, o Aukute 2011, kapi 4, 7, 8

• Tuatua ki tetai tei tavini ana i tetai enua ke

• Kimikimi no runga i te au peu e te turanga oraanga o taua enua ra

• Apii i te reo

[Pia/​Tutu i te kapi 6]

Akono tetai pae ia ratou uaorai i te pae moni na te . . .

• angaanga anga no tetai au marama i te au mataiti i to ratou enua

• tarau anga i to ratou are, apatimani, me kore pitiniti

• angaanga anga na runga i te Initaneti

[Au Tutu i te kapi 4, 5]

1 Jaqueline no Tiamani mai

2 Bruno no Itaria mai

3 Beau no Kanata mai

4 Siobhan no Airerani mai

5 Joel no Marike mai

6 Jonathan no Marike mai

7 Anna no Etonia mai

8 Elke no Auteria mai

9 Chantal no Kanata mai

10 Ines no Auteria mai