“Kua Tupu Taku Moemoea”

Kua painia tamou ana a Emilia e 15 mataiti i topa. Inara, kua akaoti aia i tana painia tamou. Te au mataiti i aereia, e akamanako ana aia i te reira tuatau mataora o tona oraanga, e kua inangaro akaou aia i te akamaata atu i tana angaanga orometua.

Inara, kua maata rava to Emilia taime ki tana ngai angaanga, e kare aia e mataora ana. Tetai ra, i mua i tona au oa angaanga, kua tuatua aia e: “Inangaro ua atu au e kia akaitiia mai toku ora angaanga!” Kua akarongo mai tona pu angaanga e kua ui kiaia e me ko tana tikai te reira e inangaro ra. Kua akapapu atu a Emilia kiaia e e tika rai te reira. Inara, e akatikaia ai te reira ka anoanoia tona manitia kia ariki i te reira no te mea te umuumu ra te kamupani i te aronga angaanga pouroa kia akapou i to ratou taime ki te angaanga. Kua akapapa to tatou tuaine i tetai uipaanga ki te manitia, e kua pure aia no te au e te tu mataku kore.

I te tuatau o taua uipaanga ra, kua pati maru a Emilia kia akaitiia mai te ora e angaanga ra aia. Kua akamarama aia e e tauturu ana aia i tetai ke i te tuatau kare aia e angaanga ana: “Ko au tetai o te Au Kite o Iehova, e e tauturu ana au i te au tangata i te pae vaerua. Te taui nei te tu o te au tangata i teia tuatau. Te anoanoia ra kia akaariia kia ratou te au turanga taka meitaki, e e mea puapinga te tu pakari taku ka akakite atu kia ratou no roto mai i te Pipiria. Kare au e inangaro i taku au angaanga i muri ake i te au ora angaanga kia akaiti mai i te tu meitaki o taku angaanga i konei, inara ka inangaro au kia maata atu toku taime i te tauturu i te au tangata. Ko te tumu te reira e inangaro nei au kia akaitiia mai toku au ora angaanga.”

Kua akarongo meitaki mai te manitia e kua karanga mai e i akamanako ana aia i te rave i te angaanga tauturu i mua ana. E oti kua karanga aia e: “No te au tumu taau i akamarama mai, ka akatika atu au i taau patianga. Inara kua kite ainei koe e kare e maata taau moni ka rauka mai?” Kua karanga a Emilia e kua kite aia i te reira e me ka tupu te reira, ka akamama mai aia i tona oraanga. Kua karanga katoa aia e: “Toku akakoroanga puapinga rava atu, ko te rave anga i tetai angaanga puapinga tikai no te au tangata.” Kua akakite mai te manitia kiaia e: “E akangateitei ana au i te aronga te oronga puareinga ua ra i to ratou taime no tetai ke.”

Kare rava e tangata i roto i taua kamupani ra i orongaia ana tetai tikaanga ngateitei i mua ana. I teianei kua akatikaia a Emilia kia angaanga e a ra i te epetoma. Kua poitirere aia, kua kake tana moni angaanga, e e maata atu tana moni i rauka mai i to mua ana! Kua karanga aia e: “Kua tupu taku moemoea, e ka rauka iaku i te painia akaou!”

I manako ana ainei koe i te akatanotano i toou au turanga kia painia me kore kia painia akaou?

[Tataanga i te kapi 32]

Kua akakite mai te manitia kiaia e: “E akangateitei ana au i te aronga te oronga puareinga ua ra i to ratou taime no tetai ke”