“Okotai Iehova” Tei Tavaitai Mai i Tona Pamiri

‘Te ako atu nei au ia kotou, kia vai ua rai te tu taokotaianga a te vaerua.’​—EPHE. 4:1, 3.

AKAPEEA KOE ME AKATAKA?

Eaa ra te akakoroanga o ta te Atua akaaerenga?

Akapeea e ‘vai ua rai ei to tatou tu taokotaianga a te vaerua’?

Eaa te ka tauturu ia tatou ‘kia takinga-meitaki i tetai e tetai’?

1, 2. Eaa ta Iehova i akakoro no te enua e te au tangata?

PAMIRI. Eaa taau e manako ra me akarongo koe i taua tuatua ra? Te manako ra ainei koe i te aroa? Te mataora? Te angaanga taokotai anga ei akatupu i tetai akakoroanga? E ngai meitaki ainei no te tupu mai anga, te apiianga, e te uriuri manako anga? Penei ko taau te reira e manako ra me ko koe tetai i roto i tetai pamiri aroa. Ko Iehova uaorai Tei Akamata mai i te pamiri. (Ephe. 3:14, 15) Kua akakoro aia i te katoatoa o tana au mea ora i te rangi e te enua nei kia akamanako ma te mataora i te tu tinamou, kia irinaki i tetai e tetai, e kia taokotai mai.

² Muri ake i to raua ara anga, kare te tangata i riro akaou ei tuanga no te pamiri o te Atua, inara kare ta Iehova akakoroanga i taui ana. Ka akapapu rai aia e kia akakiia te enua Parataito ki te uanga a Adamu raua ko Eva. (Gene. 1:28; Isa. 45:18) Kua rave aia i te au akanoonooanga kia akatupuia teia akakoroanga. Kua akakiteia mai te maataanga o teia au akanoonooanga kia tatou i roto i te puka Pipiria o Ephesia, te tumu manako no runga i te tu taokotaianga. Ka uriuri manako tatou i tetai au irava mei taua puka ra, e kia kite e akapeea tatou me turuturu i to Iehova akakoroanga kia taokotai mai i tana au mea angaia.

TE AKAAERENGA E TANA ANGAANGA

3. Eaa te akaaerenga a te Atua e tuatuaia ra i roto ia Ephesia 1:10, e i naea te tuanga mua o teia angaanga i akamata ai?

³ Kua akakite a Mose ki te ngati Iseraela e: “Ko Iehova to tatou Atua, okotai Iehova.” (Deu. 6:4) Te rotai ra ta Iehova au angaanga e te akakoroanga. No reira, “i te openga tikai o te au tuatau ra” kua taangaanga te Atua i tetai “akaaerenga”​—koia oki, tetai akanoonooanga no te taokotai pouroa mai anga i tana au mea ora kite. (E tatau ia Ephesia 1:8-10.) E rua tuanga ta teia akaaerenga ka  rave kia akatupuia to te reira akakoroanga. Te akapapa ra te tuanga mua i te putuputuanga o te aronga akatainuia kia noo i te rangi i raro ake ia Iesu Karaiti ei Upoko no ratou i te pae vaerua. Kua akamata teia tuanga i te Penetekote 33 T.N. te tavaitai anga a Iehova i te aronga te ka tutara i te rangi e Karaiti. (Anga. 2:1-4) I te mea e kua akatikaia te aronga tei akatainuia ei aronga tuatua tika tei tau kia ora na roto i te atinga oko o Karaiti, kua ariki iora ratou e e ‘tamariki ratou na te Atua.’​—Roma 3:23, 24; 5:1; 8:15-17.

4, 5. Eaa te tuanga rua ta te akaaerenga e taangaanga ra?

⁴ Te akapapa ra te tuanga rua i te aronga te ka noo i roto i te Parataito i te enua nei i raro ake i te Patireia Mesia o Karaiti. Ko te “aronga maata rava” te aronga mua o teia pupu. (Apo. 7:9, 13-17; 21:1-5) I te tuatau o te Tutara Anga Tauatini Mataiti, ka kapitiia mai kia ratou te au pirioni ua atu tangata tei akatuakaouia mai. (Apo. 20:12, 13) E akamanako ana i ta te tuakaouanga ka akaari mai no to tatou tu taokotaianga! I te openga o te tauatini mataiti, ka timata akaouia te ‘au mea o te enua’ nei. Ka riro te aronga tei tiratiratu ana ei ‘tamariki na te Atua’ i te enua nei.​—Roma 8:21; Apo. 20:7, 8.

⁵ Te tupu nei nga tuanga o ta te Atua akaaerenga i teia tuatau​—to te rangi e to te enua nei. Inara akapeea tatou tataki tai te turuturu anga i ta te Atua akaaerenga i teianei?

‘KIA VAI UA RAI TE TU TAOKOTAIANGA A TE VAERUA’

6. Akapeea te au Tuatua Tapu te akakite mai anga e ka uipa taokotai mai te au Kerititiano?

⁶ Te akakite maira te au Tuatua Tapu e ka uipa taokotai mai te au Kerititiano. (1 Kori. 14:23; Ebe. 10:24, 25) E maata atu te o maira i to te uipa taokotai ua anga i te ngai okotai, mei te au tangata rai e aere ra ki tetai makete me kore ki tetai au ngai tipoti. Meitaki rava atu te turanga o te taokotaianga tika tikai. Ka rauka ia tatou taua tu taokotaianga ra me taangaanga tatou i ta Iehova ikuikuanga e kia tuku i te vaerua tapu o te Atua kia taui i to tatou tu.

7. Eaa ra te aiteanga e ‘kia vai ua rai te tu taokotaianga a te vaerua ra’?

⁷ Noatu e kua akatika a Iehova i tona aronga tuatua tika tei akatainuia ei tamariki nana, e te au mamoe tuatua tika ei au oa no ratou tei akatumuia ki runga i te atinga oko o Karaiti, ka tupu ua rai te au manamanata i rotopu ia tatou e tetai ke, ia tatou e noo ra i roto i teia akatereanga o te au mea nei. (Roma 5:9; Iako. 2:23) Naringa kare, kare i reira e anoanoia te akoanga akauruia kia ‘tauturu atu i tetai e tetai ma te aroa.’ Akapeea e rauka ai i te au taeake irinaki te tu taokotaianga? Te anoanoia ra kia akatupu tatou i “te ngakau akaaka roa e te maru.” Pera katoa, te raurau maira a Paulo e kia tauta pakari tatou ‘kia vai ua rai te tu taokotaianga a te vaerua ra i te ruru o te au.’ (E tatau ia Ephesia 4:1-3.) Na te aru anga i teia akoanga te o maira te tuku anga kia akakeuia e te vaerua o te Atua e kia akatika i te reira kia akatupu i ta te reira au ua ki roto ia tatou. Te akatikatika ra taua au ua ra i te au manamanata i rotopu i tetai e tetai, kare ra mei te au angaanga rai a te kopapa, te akatakake ra ia tatou.

8. Akapeea te au angaanga o te kopapa te akatakake anga i te tangata?

⁸ Akara ana e akapeea “te au angaanga a te kopapa” te akatupu anga i te tu taokotai kore. (E tatau ia Galatia 5:19-21.) E akatakake ana te moeaana i te tangata e rave ra i te reira mei ia Iehova e te putuputuanga, e e akatakake ana te akaturi i te tamariki mei te au metua, e te au tokorua kare i apa mei to ratou tokorua akaipoipo. Ka riro te tu viivii ei akakino i te tu taokotaianga o tetai tangata ki te Atua e te aronga te inangaro ra iaia. Te kite ra te tangata ka tapiripiri i tetai nga apinga e ka anoanoia kia ma meitaki te nga apinga i mua ake ka tapiri ei aia i te reira. Te rave anga i tetai tu viivii ma te akama kore te  akaari maira e kare aia e akarongo ana ki ta te Atua ture tuatua tika. Te akatakake ra te au angaanga tataki tai o te kopapa i te au tangata mei tetai e tetai e mei te Atua katoa. Kare taua tu e rotai ana ki to Iehova tu.

9. Eaa te au uianga ka ui tatou kia tatou uaorai me te tauta pakari ra tatou ‘kia vai ua rai te tu taokotaianga a te vaerua’?

⁹ No reira, te anoanoia ra tatou tataki tai kia ui kiaia uaorai e: ‘Mei teaa rai te pakari o taku tauta anga “kia vai ua rai te tu taokotaianga a te vaerua ra i te ruru o te au ra”? Eaa taku ka rave me tupu mai te au manamanata? Ka akakite ainei au ki toku au oa i toku manamanata, te inangaro anga kia turuturu mai toku au oa iaku? Ka irinaki ainei au ki te aronga pakari kia akatikatika i toku manamanata ma te kore e tauta i te akatupu i te pirianga au ki te reira tangata? E me kite mai au e te akaapaapa ra tetai tangata iaku, ka kopae ainei au iaia kia kore maua e uriuri i te manamanata?’ Te akaari ra ainei taua au manako ra e te aru rotai ra tatou i to Iehova akakoroanga kia tavaitai akaou mai i te au mea ravarai ki roto i te Karaiti?

10, 11. (a) Mei teaa ra te puapinga kia akatupu tatou i te au ki to tatou au taeake? (e) Eaa ta tatou ka rave ei akatupu i te au?

¹⁰ Kua akakite mai a Iesu e: “E teianei, kia apai koe i taau apinga oronga ua ki te atarau, e kua manako iora koe i reira e, e ara ta to taeake ia koe na: Vaio atu i to apinga i mua i te atarau, e akamata i te aere e ongi i to taeake, ka aere ei ka apai i taau apinga. Kia rapurapu koe i te akatika taau tuatua.” (Mata. 5:23-25) Kua tata mai a Iakobo e “e ruruia oki te tuatua-tika ma te au na te aronga e akatupu i te tuatua au ra.” (Iako. 3:17, 18) No reira, kare e rauka ia tatou i te rave ua rai i te mea tika me kare tatou e au ana.

¹¹ Ei akatutuanga, kua akakiteia mai e i roto i te au enua kua tupu ana te tamaki, tere atu e 35 patene o te enua te ka rauka i te tanutanuia naringa kare te au tangata e manamanata ana no te au ngai kua tanuia ki te au pomu. Me aruru tetai pomu, kare te aronga tanutanu e tanu ki reira, kare a te au tangata o te oire angaanga, e kare a ratou kai ei apai ki te au oire mamaata. Mei te reira rai, ka arairaiia to tatou tupuanga i te pae vaerua me kare to tatou tu e akatupu ana i te au ki to tatou au taeake. Inara me akakore viviki tatou i te ara a tetai ke e te rave anga i te au mea meitaki no ratou, ka rauka ia tatou i te akatupu i te au.

12. Akapeea te aronga pakari me tauturu mai ia tatou no te tu taokotaianga?

¹² Pera katoa, ka riro te aronga pakari Kerititiano ei akakeuanga maata no te tu taokotaianga. Kua orongaia mai ratou ei tauturu ia tatou kia rauka “te akarongo okotai.” (Ephe. 4:8, 13) Me angaanga te aronga pakari i te pae ia tatou i roto i te angaanga tapu e me oronga mai ratou i te au akoanga tau tei  akatumuia ki runga i te Tuatua a te Atua, te tauturu ra ratou ia tatou kia akameitaki mai i to tatou tu. (Ephe. 4:22-24) Te kite ra ainei koe i roto i ta ratou akoanga i ta Iehova tautaanga i te akapapa ia koe no te ora i roto i te ao ou i raro ake i te tutaraanga a tana Tamaiti? E te aronga pakari e, te tauta ra ainei kotou i te akatikatika i tetai ke ma te akamanako anga i taua akakoroanga ra?​—Gala. 6:1.

“KIA TAKINGA-MEITAKI KOTOU IA KOTOU UAORAI”

13. Eaa te ka tupu mai me kare tatou e akarongo ana ki te akoanga i roto ia Ephesia 4:25-32?

¹³ Te akakite maira a Ephesia 4:25-29 i tetai au tu kia kopae tatou. Te kapiti maira teia i te tuatua pikikaa, te riri me kore te kope, e te tuatua viivii. Inara, kia tuatua tatou i te au tuatua meitaki e te au tuatua akamaroiroi. Me kare te reira tangata e akarongo i teia akoanga, te akariri ra aia i te vaerua o te Atua, no te mea e mana ririnui te vaerua tapu te akatupu ra i te tu taokotaianga. (Ephe. 4:30) Puapinga katoa i te taangaanga i ta Paulo i tata i muri mai no te au e te tu taokotaianga: “Kia kopae ravaia oki te maru kore, e te rotoriri, e te makitakita, e te taumāro ra, e te tuatua akakino, e te vareae, auraka takiri ïa: Kia takinga-meitaki kotou ia kotou uaorai, ma te ngakau maru aroa ua ra, ma te akakore oki i te ara tetai e tetai, mei ta te Atua i akakore mai i ta kotou i te Mesia ra.”​—Ephe. 4:31, 32.

14. (a) Eaa te akakiteia maira e te kupu tuatua “kia takinga-meitaki”? (e) Eaa te ka tauturu ia tatou kia takinga meitaki i tetai ke?

¹⁴ Te akakite maira te kupu tuatua “kia takinga-meitaki” e kare tatou e akaari ua i te tu takinga meitaki mari ra ka anoanoia tatou kia akameitaki mai i te reira tu. E mea tau i reira kia tereni tatou ia tatou uaorai kia manako atu i te au manako o tetai ke na mua ake i to tatou! (Phili. 2:4) E tu takinga meitaki ainei i te tuatua i tetai apinga kia akakata i tetai ke me kore te ka akariro ia tatou ei tangata kite atu i tetai ke? Na te akamanako anga i teia ka riro ei tauturu ia tatou “kia takinga-meitaki” atu i tetai ke.

APII I TE AROA E TE AKANGATEITEI I ROTO I TE PAMIRI

15. Eaa te tu o ta Karaiti akonoanga i te putuputuanga ta Paulo e akakite maira i roto ia Ephesia 5:28?

¹⁵ Kua akaaite te Pipiria i to Karaiti pirianga ki te putuputuanga ki te pirianga o tetai tane ki tana vaine. Ka tauturu mai teia akaraanga ia tatou kia marama i te arataki anga ta te tane ka rave, te aroa e te takinga meitaki ka anoanoia aia kia akaari​—pera katoa te tu kauraro ta te vaine ka akaari—​i roto i te pirianga akaipoipo. (Ephe. 5:22-33) Kua tata a Paulo e: “E aroa katoa te au tane i ta ratou uaorai au vaine e tikaʼi, mei to ratou uaorai kopapa.” Eaa te aiteanga o ta Paulo e tuatua ra? (Ephe. 5:28) Te akaari maira tana au tuatua i runga akenei i to ‘te Mesia katoa aroa i te ekalesia, kua oronga iaia uaorai ei oko e kia orei i te orei anga vai na roto i te tuatua.’ Tika rai, kia rotai ua rai ki ta Iehova akakoroanga no te tavaitai akaou mai anga i te au mea ravarai ki roto i te Karaiti, kia papa ua tetai tane i te utuutu i tona pamiri i te pae vaerua.

16. Eaa te ka tupu mai me rave te au metua i ta ratou au apainga Tuatua Tapu i te kainga?

¹⁶ E mea meitaki no te au metua kia akamaara e te rave nei ratou i tetai apainga no ko mai ia Iehova. Mea tangi ra, maata i roto i teianei ao i teia tuatau e tu “aroa kore” to ratou. (2 Timo. 3:1, 3) E maata te au metua tane kare e rave ana i ta ratou au apainga​—te akatupu ra i te tu kino e te maroaroa ki ta ratou tamariki. Inara, kua ako a Paulo i te au metua tane Kerititiano e: “Auraka e akariri atu i ta kotou au tamariki ra: e apii ra ia ratou kia pakari ma te ako a te Atu [Iehova] ra.” (Ephe. 6:4) Kare e ngai ke atu mari ra i roto i te pamiri e kite ei te tamariki i te aroa e te akangateitei i te mana akaaere. Te au metua tei apii meitaki i taua au apiinga ra te aru  rotai ra ratou ki ta Iehova akaaerenga. Na te akariro anga i to tatou au kainga ei au ngai meitaki kare e tupu ana te riri, te kino e te tuatua viivii, te apii ra tatou i ta tatou tamariki i te au apiianga puapinga kia aroa e kia akangateitei i te mana akaaere. Te akapapa ra teia ia ratou kia ora mai i roto i te ao ou o te Atua.

17. Eaa te anoanoia no tatou kia patoi atu i te Tiaporo?

¹⁷ Te anoanoia ra tatou kia kite e ka patoi pakari ua mai rai te Tiaporo, tei tamanamanata mua ana i te au i te ao katoa e pini ua ake, i ta tatou au tautaanga i te rave i to te Atua anoano. Kare ekoko e kua akatupuia to Satani au akakoroanga no te mea te maata ua atura te kopaeanga, te noo kapitianga kare e akaipoipo, e te ariki anga i te au akaipoipo i rotopu i te tane e te tane. Kare tatou e aru i te tu e arikiia ra e teianei ao i teia tuatau. Ka aru ra tatou i to Karaiti akaraanga. (Ephe. 4:17-21) No reira, te akoia maira tatou kia “kakau i te rakei katoa a te Atua ra” kia patoi atu i te Tiaporo e tana au temoni.​—E tatau ia Ephesia 6:10-13.

“EI AERENGA AROA TO KOTOU”

18. Eaa ra te taviri no to tatou tu taokotaianga Kerititiano?

¹⁸ Te taviri puapinga tikai ki to tatou taokotaianga Kerititiano, ko te aroa. No te mea kua ki to tatou ngakau i te aroa no to tatou ‘okotai Atu,’ no to tatou ‘okotai Atua,’ e no tetai e tetai, ka tauta pakari ua rai tatou ‘kia vai ua rai te tu taokotaianga a te vaerua i te ruru o te au ra.’ (Ephe. 4:3-6) Kua pure a Iesu no runga i taua aroa ra e: “Kare oki au i pure ia ratou anake ua, i te aronga katoa ra te ka akarongo mai iaku i ta ratou apii anga; Kia riro ratou katoa ei okotai; mei ia koe, e taku Metua, i roto iaku nei, e mei iaku oki i roto ia koe na, kia okotai katoa ratou ki roto ia taua. . . . E kua akakite atu oki au kia ratou, e e akakite atu rai au, i toou ingoa: e ei roto ia ratou te akaperepere taau i akaperepere mai iaku ra, e ei roto au ia ratou.”​—Ioa. 17:20, 21, 26.

19. Eaa taau ka tauta i te rave?

¹⁹ Me kite mai tatou e e mea ngata tikai i te taui i to tatou tu no to tatou tu apa, kia akakeuia tatou e te aroa kia pure, mei te tata taramo rai e: “Kia tavaitai toku ngakau i te mataku anga i to ingoa.” (Sala. 86:11) E tauta ua rai tatou i te patoi atu i ta te Tiaporo tautaanga i te akatakake ia tatou mei to tatou Metua aroa e te aronga tana e akaperepere ra. Kia angaanga pakari tatou kia ‘aru i te Atua, mei te tamariki akaperepere ra; ei aerenga aroa ra’​—i roto i te pamiri, ta tatou angaanga orometua, e i roto i te putuputuanga.​—Ephe. 5:1, 2.

[Au Uianga Apii]

[Tutu i te kapi 29]

Akaruke anga i tana apinga oronga ki te atarau, kua aere aia i te akaau ki tona taeake

[Tutu i te kapi 31]

E te au metua, apii i ta kotou tamariki kia akaari i te tu akangateitei