“Ka Tutakiia Oki ta Kotou Angaanga”

TEI mua te Ariki ko Asa i tona nuku vaeau e akaoro viviki atura ki raro i te o mei te ngai teitei mai o Iudea ki te pae taatai. I te ngai atea o taua o ra, kua tapu a Asa e kua akaea poitirere ua. Te kite atura aia i raro i te o tetai puakapa vaeau maatamaata o tona au enemi! Mei tetai tai mirioni au vaeau o te enemi, inara mei tetai 580,000 ua rai vaeau o Asa.

I mua ake ka tupu ei te tamaki, eaa ta Asa e manako maata ra? Ko te akaueanga ainei i tona au tianara vaeau? Te akamaroiroianga ainei i tona nuku vaeau? Te tataanga ainei i te au reta ki tona pamiri? Kare! Noatu te kino tana e aro atura, kua pure a Asa.

Mua ake ka akara ai tatou i taua pure ra e ka akamanako eaa tei tupu mai i taua atianga ra, akamanako ana i te tu o Asa. Eaa tei akakeu iaia kia rave i tana i rave? Ka tau ainei aia kia kimi i ta te Atua tauturu? Eaa ta te papaanga o Asa e akakite maira kia tatou no ta Iehova akameitaki anga i te au angaanga a Tona au tavini?

TA ASA I RAVE

I te 20 mataiti i muri ake i te akatakakeia anga a Iseraela ki roto i nga patireia e rua, kua kino takiri a Iuda no te au angaanga peikani. Te riro anga a Asa ei ariki i te mataiti 977 M.T.N., kua takino katoaia te paepae ariki no te akamorianga i te au atua pikikaa o Kanaana. Inara te karanga ra te papaanga akauruia no te tutara anga a Asa e kua ‘rave aturā aia i te meitaki e te tika i mua i te aroaro o tona ra Atua ko Iehova.’ “Kua apai ke atura [a Asa] i te au atarau no te au atua ke ra, e te au ngai teitei, e kua vavaʼi i te au tiki, e kua tipu i te au Asetoreta.” (2 Para. 14:2, 3) Kua akaatea katoa a Asa i ‘te au tane sodoma o te iero’ mei te patireia o Iuda. Kare a Asa i akapou ua i tona maroiroi i te akaatea anga i teia au mea kino. Kua raurau katoa aia i te au tangata kia ‘kimi i te Atua o to ratou ai metua ko Iehova’ e kia aru i “te ture e te akauenga” a te Atua.​—1 Ari. 15:12, 13; 2 Para. 14:4.

No te mea kua mareka a Iehova i to Asa tu maroiroi no te akamorianga mou, kua oronga a Iehova i te au mataiti au kiaia. I rauka ai i te ariki i te tuatua e: “Kua kimi tatou i to tatou Atua ia Iehova, kua kimi tatou iaia, i oronga mai ei aia i te au no tatou e pini ua ake.” Kua taangaanga te au tangata i teia atianga na te akaketaketa anga i te au oire o te patireia o Iuda. “Kua patu iora oki ratou, e kua manuia oki,” i karanga ai te papaanga Pipiria.​—2 Para. 14:1, 6, 7.

NGAI TAMAKI

Te akara anga i ta Asa i rave, kare tatou e poitirere e kua pure ana aia te tamaki mai anga te nuku vaeau maatamaata tei taikuia i roto i te au Tuatua Tapu. Kua kite a Asa e ka tutaki mai te Atua i te au angaanga tei raveia ma te akarongo. I roto i tana pure, kua pati te ariki i ta Iehova tauturu. Kua kite a Asa e me irinaki aia ki te Atua e tana tauturu anga, kare i te mea puapinga me e maata atu me kore e ririnui atu te nuku vaeau enemi. Kua o mai to Iehova ingoa ki roto i teia tamaki anga, no reira a Asa i pure ei ki te Atua. Kua pure te ariki e: “E tauturu mai ia matou, e to matou Atua, e Iehova e; te irinaki nei oki matou ki runga ia koe, e no toou ingoa e aere atu ei matou e tamaki i teianei aronga maata. Ko koe to matou Atua, e Iehova; auraka ta te tangata kia tupu i taau ra.” (2 Para. 14:11) Mei te mea rai e te tuatua ra e: ‘Te tamaki ra te nuku vaeau Etiopia ia koe e Iehova. Auraka e akatika i toou ingoa kia akangateitei koreia na te akatikaanga i te au tangata paruparu kia takinokino i te aronga e apai ra i toou ingoa.’ No reira, kua “mate iora to Kusa [Etiopia] ia Iehova i mua i te aroaro  o Asa, e i mua i te aroaro o Iuda; ati atura to Kusa.”​—2 Para. 14:12.

I teia tuatau, e aro atu ana te iti tangata o Iehova i te aronga patoi ririnui e manganui. Kare tatou e aere ki tetai ngai tamakianga i te tamaki atu ia ratou ma te au apinga tamaki. Inara, papu ia tatou e ka oronga mai a Iehova i te upokotu anga ki te aronga akarongo mou katoatoa te tamaki ra i te pae vaerua i roto i tona ingoa. Penei ka o mai ki ta tatou uaorai tamaki anga te tauta anga i te patoi i te tu akono tau kore, te patoi anga i to tatou au tu paruparu, me kore te paruruanga i to tatou pamiri mei te au akakeuanga kino. Noatu eaa te kino ta tatou ka aro atu, ka akamaroiroi mai te pure a Asa ia tatou. Na roto ia Iehova i autu ei aia. Te akaari maira te reira eaa te ka tupu mai me irinaki te katoatoa ki runga i te Atua. Kare e rauka i te mana o te tangata i te tamaki atu ia Iehova.

AKAMAROIROIANGA E TE AKAMATAKITEANGA

Tona oki mai anga mei te tamakianga, kua aravei atu a Asa ia Azaria. Kua oronga teia peroveta i te akamaroiroianga e te akamatakiteanga: “E akarongo mai ana iaku, e Asa, e Iuda ravarai ma Beniamina: Tei ia kotou a Iehova, ko kotou i piri mai kiaia ra; kia kimi kotou iaia, ka kitea aia e kotou; kia akaruke ra kotou iaia, ka akaruke aia ia kotou. . . . E akamaroiroi ra kotou, auraka kia parukaua to kotou rima; ka tutakiia oki ta kotou angaanga.”​—2 Para. 15:1, 2, 7.

Ka akaketaketa teia au tuatua i to tatou akarongo. Te akaari maira te reira e ka tauturu mai a Iehova ia tatou me tavini akarongo mou tatou iaia. Me pati tauturu tatou kiaia, papu ia tatou e ka akarongo mai aia ia tatou. “E akamaroiroi ra,” i tuatua ai a Azaria. Te anoano maataia ra te tu mataku kore i te rave i te mea tika, inara kua kite tatou e ka rauka ia tatou te reira ma te tauturu anga a Iehova.

No te mea na te mama ruau o Asa ko Maaka i maani i “tetai tiki no Asetoreta,” i ngata ai ia Asa i te akaatea iaia mei tona taoonga ariki “vaine.” Kua akaatea a Asa iaia e kua tau atu i tona itoro ki te ai. (1 Ari. 15:13) Kua akameitakiia a Asa no tana i rave e no tona tu mataku kore. Te anoano katoaia ra tatou kia aru tamou ia Iehova e tana au turanga tuatua tika me te tiratiratu ra to tatou kopu tangata ki te Atua me kare. Me rave tatou i te reira, ka tutaki mai a Iehova ia tatou no to tatou tu akarongo mou.

Tetai tuanga o ta Asa akameitakianga, te kite anga aia i te maata o te ngati Iseraela no roto mai i te patireia apoteiti apatokerau te kapiti anga kia Iuda i to ratou kite anga e te tauturu ra a Iehova ia Asa. Kua ariki rekareka ratou i te akamorianga ma e kua iki i te akaruke i to ratou kainga kia noo kapiti atu ki te au tavini o Iehova. Kua mataora a Asa e te ngati Iuda katoatoa te piri atu anga ki roto i ‘tetai koreromotu i te kimi ia Iehova ma to ratou ngakau katoa, e to ratou vaerua katoa.’ Eaa tei tupu mai? ‘Kua tuku te Atua kia kiteaia mai aia e ratou: e kua oronga a Iehova i te au kia ratou e pini ua ake.’ (2 Para. 15:9-15) Mataora tikai tatou me ariki te aronga te inangaro ra i te tuatua tika i ta Iehova akamorianga ma!

Inara, e akamatakiteanga tetai no te au tuatua a te peroveta ko Azaria. Kua akamatakite mai aia e: “Kia akaruke ra kotou [ia Iehova], ka akaruke aia ia kotou.” Auraka te reira e tupu kia tatou, no te mea ka tupu mai te kino! (2 Pete. 2:20-22) Kare te au Tuatua Tapu i akakite mai ana i te tumu i tuku ei a Iehova i teia akamatakite kia Asa, kare ra te ariki i akarongo ana ki te reira.

 “E RAVENGA NENEVA TAAU I TENANA”

I te 36 mataiti o to Asa tutaraanga, kua takino te Ariki ko Baasa o Iseraela ia Iuda. Kia kore tona au tangata e akaari i te tu tiratiratu kia Asa e te akamorianga ma, kua akaketaketa a Baasa i tona tuanga o te oire o Rama, e 8 kiro mita i te tua apatokerau o Ierusalema. Kare aia i kimi ana i ta te Atua tauturu mei tana rai i rave ana i tona tamaki anga i te nuku vaeau o Etiopia, kua kimi ra a Asa i te tauturu a te au tangata. Kua tuku atu aia i tetai apinga aroa na te ariki o Arama, te pati anga iaia kia tamaki atu i te patireia apatokerau o Iseraela. Te tamaki atu anga te iti tangata o Arama, kua akaruke a Baasa ia Rama.​—2 Para. 16:1-5.

Kare a Iehova i mareka ana ia Asa e kua tono atu aia i te peroveta ko Hanani kia akakite atu i te reira kiaia. Kua kite a Asa i ta te Atua i rave ki te iti tangata Etiopia, tano tikai ka kite mai aia e “te akara nei nga mata o Iehova e pini ua ake te ao katoa nei, kia oronga mai aia i te maroiroi ki te aronga i tika te ngakau iaia.” Penei kua orongaia tetai manako tarevake kia Asa me kore kare aia i manako ana e ka riro mai a Baasa e tona nuku vaeau ei takinoanga kiaia e kua manako aia e ka rauka iaia i te akono uaorai i te au mea. Noatu eaa te turanga, kua iki a Asa i te manako o te au tangata e kare i irinaki ana kia Iehova. “E ravenga neneva taau i tenana: e teianei e tamaki rai taau,” i tuatua ai a Hanani.​—2 Para. 16:7-9.

Kua riri a Asa e kua tuku atura i te peroveta ko Hanani ki roto i te are tapekaanga. (2 Para. 16:10) Kua manako ainei a Asa e, ‘E mea tau ainei kia akoia mai au, ina kua vai akarongo mou ana au no tetai au mataiti?’ Te pakarikari atura aia i teianei, e kua ngaro ainei tona tu manako tau? Kare te Pipiria i akakite mai ana.

I roto i te 39 mataiti o tona tutaraanga, kua makiia to Asa vaevae e kua kino atu tona maki. ‘Kare ra aia i kimi ana ia Iehova no taua maki ra, kua kimi ra aia i te aronga rapakau maki,’ i akakite ei taua papaanga ra. I te reira taime, akaraanga e kua ngaropoina ia Asa tona turanga pae vaerua. I roto i taua turanga ra, kua mate atura aia i te 41 mataiti o tona tutaraanga.​—2 Para. 16:12-14.

Noatu ra, te akaraanga e maata atu to Asa au tu meitaki e te maroiroi no te akamorianga ma i tana au tarevake i rave. Kare rava aia i akamutu ana i te tavini ia Iehova. (1 Ari. 15:14) No reira, eaa ta tona tua oraanga e apii maira kia tatou? Ka tauturu te reira ia tatou kia akamanako i ta Iehova tauturuanga ia tatou i te tuatau i topa, no te mea ka akakeu te reira au manako akaperepere ia tatou kia pure no tana tauturu me aro atu tatou i te au timataanga ou. Inara, auraka tatou e manako e kare tatou e anoano i te ako anga Tuatua Tapu no te mea kua tavini akarongo mou ana tatou i te Atua no tetai au mataiti. Noatu eaa ta tatou i rave ana, ka ako mai a Iehova ia tatou me tarevake tatou. No reira kia ariki tatou i taua au akatikatika anga ra kia puapingaia tatou. Tei puapinga rava atu, ka tauturu mai to tatou Metua i te rangi ia tatou me aru ua rai tatou iaia. Te akara matatio maira te nga mata o Iehova i te enua katoa no te aronga e vai tiratiratu ra kiaia. Ka akameitaki mai aia ia ratou na te taangaanga anga i tona mana i te tauturu ia ratou. Kua rave a Iehova i te reira no Asa, e ka rave katoa mai Aia i te reira no tatou.

[Tataanga i te kapi 9]

Ka tutaki mai a Iehova i te aronga akarongo mou e tamaki ra i te pae vaerua

[Tataanga i te kapi 10]

Anoanoia te tu mataku kore kia rave i te mea tika i roto i nga mata o Iehova