Kia Tau ei au Tangata no te Patireia!

“Kia tau ua ra ta kotou akonoanga i te evangelia.”​—PHILI. 1:27.

AKAPEEA KOE ME PAU?

Koai ma ka tau ei au tangata no te Patireia?

Eaa ta tatou ka rave no runga i te reo, tuatua enua, e te au ture o te Patireia?

Akapeea te au tangata o te Patireia me akaari e te inangaro ra ratou i ta te Atua ture?

1, 2. Eaa ra i puapinga ai te akoanga a Paulo ki te putuputuanga i Philipi?

KUA akamaroiroi te apotetoro a Paulo i te putuputuanga i Philipi “kia tau ua ra ta kotou akonoanga i te evangelia.” (E tatau ia Philipi 1:27.) Te aiteanga o te tuatua Ereni “kia tau” ta Paulo i taangaanga i roto i teia irava ka rauka katoa kia uriia e kia tau ei au tangata no te enua. E puapinga tikai taua nga tuatua ra no te putuputuanga i Philipi. No teaa ra? No te mea, akaraanga e ko te oire o Philipi tetai i roto i te au oire tei ikiia kia riro mai tona iti tangata ei au tangata Roma. Kua akaparau te au tangata Roma i Philipi e i roto katoa i te Patireia o Roma i to ratou au turanga e kua mataora ratou i te paruruanga a te ture a Roma.

² E tumuanga meitaki kia akaparau te au mema o te putuputuanga i Philipi. Kua akamaara atu a Paulo kia ratou e ei au Kerititiano akatainuia, e au tangata ratou “no te rangi.” (Phili. 3:20, NW) E au tangata ratou no te Patireia o te Atua, kare no tetai patireia o te tangata. No reira, kua mataora ratou i te au paruruanga meitaki e te au akameitakianga.​—Ephe. 2:19-22.

3. (a) Koai ma te ka riro mai ei au tangata no te Patireia o te Atua? (e) Eaa ta tatou ka uriuri i roto i teia atikara?

³ Ta Paulo tuatua e kia tau ei au tangata no te enua, te tano ra ki te aronga te ka tutara kapiti kia Karaiti i runga i te rangi. (Phili. 3:20, NW) Te tau katoa ra te reira ki te aronga i te enua nei te ka riro mai ei au tangata no te Patireia o te Atua. No teaa ra? No te mea te tavini ra te au Kerititiano akatapuia e tai Ariki ko Iehova, e ka aru ratou e tai ture. (Ephe. 4:4-6) E angaanga pakari ana te au tangata i teia tuatau kia tau ratou ei au tangata no tetai enua puapinga. E puapinga tikai kia akaperepere tatou i te tikaanga kia riro mai ei au tangata no te Patireia! E marama ai tatou i taua turanga ngateitei ra, ka akaaite tatou i tetai au umuumuanga e riro mai ei ei au  tangata no tetai kavamani, e ei au tangata no te Patireia o te Atua. Akara ana tatou e toru au mea ta tatou ka rave kia rauka mai te tikaanga ngateitei ei au tangata no te Patireia o te Atua.

AU UMUUMUANGA KIA RIRO MAI EI AU TANGATA NO TE ENUA

4. Eaa ra te reo ma, e akapeea tatou me “tuatua” i te reira?

⁴ Apii i te reo. Te umuumu ra tetai au kavamani i te aronga e inangaro ra kia riro mai ei au tangata no te enua kia tuatua i te reo o te enua. Noatu e kua akatikaia tetai aronga kia riro mai ei au tangata no te enua, ka tauta rai ratou kia kite i te tuatua i te reo ou no tetai au mataiti. Penei ka viviki ratou i te kite i te au karama, inara ka pou rai tetai au tuatau e kite ei ratou i te tuatua meitaki i te au tuatua. Te umuumu katoa maira te Patireia o te Atua e kia apii tona au tangata i ta te Pipiria e tuatua ra e ko te “vaa viivii kore,” me kare te reo ma. (E tatau ia Zephania 3:9.) Eaa ra te reira reo? Ko te tuatua mou no runga i te Atua e tona akakoroanga tei kiteaia i roto i te Pipiria. Ka “tuatua” tatou i te reo ma me te aru rotai ra to tatou tu ki te au ture e te au kaveinga a te Atua. Ka apii viviki te au tangata o te Patireia o te Atua i te au apiianga puapinga o te Pipiria e kia papetitoia. Ka tauta katoa ratou i te akameitaki atu i ta ratou “tuatua” anga i te reo ma i muri ake i to ratou papetitoanga. Na roto ra i teea tu? Na te taangaanga ua anga i ta tatou i kite mai mei te au kaveinga Pipiria e ta tatou ka rave.

5. Eaa ra tatou ka apii maata ai no runga i te tuatua enua o ta Iehova akaaerenga?

⁵ Apii i te tuatua enua. Tetai tangata ka inangaro kia riro mai ei tangata no tetai enua, ka apii aia i te au mea no runga i te tuatua enua o te kavamani. Ka apii katoa te aronga e inangaro ra kia riro mai ei au tangata no te Patireia i tana ka rauka no runga i te Patireia o te Atua. Akamanako ana i te akaraanga o te au tamariki tamaroa a Kora, tei tavini ana i Iseraela taito. Kua inangaro tikai ratou ia Ierusalema e tona ngai akamorianga e e reka ana ratou i te tuatua no runga i te tuatua enua o taua oire ra, kare ra no tona tu manea, mari ra no te mea ko ‘te oire ia o te ariki maata’ ko Iehova. Ko taua ngai akamorianga i Ierusalema te ngai ia e apii ana te tangata i te Ture a Iehova e te akamorianga iaia. Ko te aronga tei akaaereia e te Ariki o Ierusalema, ko ratou tei arikiia e tei akaperepereia e Iehova. (E tatau ia Salamo 48:1, 2, 9, 12, 13.) Te inangaro ra ainei koe mei ia ratou rai, i te apii e te tatau i te tuatua enua o ta Iehova akaaerenga i te enua nei? Te maata atu taau ka apii no runga i te akaaerenga a te Atua, e ta Iehova turuturuanga i tona iti tangata, ka riro te Patireia o te Atua ei mea tika tikai kia koe. E ka maata atu toou inangaro i te tutu aere i te tuatua meitaki o te Patireia.​—Iere. 9:24; Luka 4:43.

6. Eaa ra i tau ei e kia umuumu mai a Iehova ia tatou kia apii e kia aru i te au ture e te au kaveinga o te Patireia?

 ⁶ Kia kite i te au ture. Te umuumu maira te au kavamani i tona au tangata kia apii e kia aru i te au ture a te enua. E tau rai i reira e ka umuumu mai a Iehova ia tatou kia apii e kia aru i tana au ture e te au kaveinga te akaaere ra i te au tangata o te Patireia. (Isa. 2:3; Ioa. 15:10; 1 Ioa. 5:3) Maata te taime e tarevake ana te au ture a te tangata e kare e tau ana. E tuke ra “te ture a Iehova kare e apa.” (Sala. 19:7) Te mataora ra ainei tatou i te ture a te Atua e te tatau anga i tana Tuatua i te au ra ravarai? (Sala. 1:1, 2) Te mataara anake ua e kite ei tatou i te ture a te Atua na te apii uaorai anga i te reira. Kare e rauka i tetai ke kia rave i te reira no tatou.

INANGARO TE AU TANGATA O TE PATIREIA I TE TURE A TE ATUA

7. Ka aru te au tangata o te Patireia i taai ture?

⁷ Kia riro ua rai ei au tangata no te Patireia, kia kite tatou i te au ture a te Atua e kia inangaro katoa i te reira. Maata te au tangata o te au kavamani tei tuatua e kua ariki ratou i te au ture o te enua i te ngai e noo ra ratou. Inara, me kite ratou e kare te ture e tau ana kia ratou e kare e tangata e akara mai ana, ka aati ratou i te ture. Maataanga o te taime e aronga “tarekareka tangata” ua ratou. (Kolo. 3:22) Ka aru te au tangata o te Patireia i te ture a te Atua. Te mataora nei tatou i te aru i ta te Atua au ture, noatu kare e tangata e akara mai ana. No teaa ra? No te mea e inangaro to tatou i Tei Maani mai i te Ture.​—Isa. 33:22; e tatau ia Luka 10:27.

8, 9. Akapeea koe e kite ei e te inangaro tikai ra koe i ta te Atua au ture?

⁸ Akapeea koe e kite ei me e inangaro tikai toou i ta te Atua au ture? Akara ana eaa toou tu me akoia mai koe no runga i taau e inangaro ra​—ei akaraanga, no runga i te kakau e te akamaneaanga. Mua ake ka riro mai ei koe ei tangata no te Patireia, penei e reka ana koe i te aao kakau tau kore me kore akaariari anga kopapa. E maata maira toou inangaro i te Atua, kua aao koe i te kakau te akangateitei ra iaia. (1 Timo. 2:9, 10; 1 Pete. 3:3, 4) Kua kite mai koe i teia taime e ka anoanoia koe kia aao i te au kakau tau. Inara, akapeea me akakite mai tetai tangata pakari kia koe e e maata te au papuritia i roto i te putuputuanga te manako ra e kare e tau ana toou kakau? Ka akapeea koe? Ka patoi, ka riri, me kore ka marokiakia atu ainei koe? Tetai ture puapinga a te Patireia o te Atua koia oki kia aru te au tangata ravarai ia Karaiti. (1 Pete. 2:21) No runga i to Iesu akaraanga, kua tata te apotetoro ko Paulo e: “E akarekareka tatou katoa nei i tetai ke, kia meitaki aia, kia maroiroi. Kare katoa oki te Mesia i akarekareka iaia uaorai.” (Roma 15:2, 3) Ei akatupuanga i te au i roto i te putuputuanga, ka ariki puareinga ua tetai Kerititiano manako tau e kare aia e takino atu i te akava ngakau o tetai ke.​—Roma 14:19-21.

⁹ Akamanako ana e rua akaou mai tumu manako puapinga: to tatou tu no runga i te pirianga ainga e te akaipoipo. Penei ka manako tetai aronga kare i riro ake ei au tangata no te Patireia o te Atua e kare e kino ana te pirianga ki te tane e te tane, te akara anga i te au ainga viivii, te akaturi me kore te kopaeanga. Ka kopae te au tangata o te Patireia i taua au tu manako tau kore ra e te manako iaia uaorai. Noatu e maata te au Kerititiano i rave ana i te au mea tau kore i mua ana, te manako ra ratou i te pirianga ainga e te akaipoipo i teianei ei apinga aroa no ko mai i te Atua. Te akaperepere ra ratou i to Iehova au turanga teitei e kua ariki ngakau tae ratou e kare te aronga e piri ainga tau kore ra e tau ei au tangata no te Patireia. (1 Kori. 6:9-11) E kua kite katoa ratou e e pikikaa te ngakau. (Iere. 17:9) No reira ratou i ariki ei i te au akamatakiteanga taka meitaki ei tauturu ia ratou kia akono tamou i te au turanga teitei no te akono tau.

 ARIKI TE AU TANGATA O TE PATIREIA I TE AKAMATAKITEANGA

10, 11. Eaa te au akamatakiteanga tau ta te Patireia o te Atua i oronga mai, e eaa toou manako no runga i te reira?

¹⁰ Penei ka akamatakite mai te au kavamani no runga i te au kai e te au vairakau. E tika kare te au kai e te au vairakau ravarai e kino ana. Inara, me ka takino tetai apinga i te oraanga, ka akamatakite mai te kavamani i te kino o te reira kia paruruia tona au tangata. Me kare te kavamani e rave i te reira, ka apa aia no te tu manako kore. Te oronga katoa maira te Patireia o te Atua i te akamatakiteanga tau no te au tu kino i te pae akono tau e te pae vaerua. Ei akatauanga, kua riro te Initaneti ei ravenga meitaki no te komunikeitianga, apiianga, e te tamataoraanga. Te taangaanga meitaki ra te akaaerenga a te Atua i te Initaneti e e maata te au mea meitaki e rauka maira mei te reira. Inara, maata te au ngai kino i runga i te Initaneti te ka takino i to tatou tu akono tau e te pae vaerua. Te riro ra te au ainga viivii i tetai au ngai o te Initaneti i te takino i te oraanga meitaki o te au tangata o te Patireia i te pae vaerua. Manganui te au mataiti, kua akamatakite mai te pupu tavini akono meitaki ia tatou no runga i teia au ngai. E te ariki rekareka nei tatou i teia au akamatakiteanga!

¹¹ Te au mataiti i topa akenei, kua rauka mai tetai ngai i runga i te Initaneti e rekaia ana e te maataanga o te tangata​—e ngai puapinga me taangaanga meitakiia. Inara, ka rauka katoa i teia au ngai, mei te ngai komunikeiti anga i runga i te Initaneti, ei ngai kino. E ka o atu tetai tangata ki roto i tetai pirianga oa kino. (1 Kori. 15:33) No reira rai ta te Atua akaaerenga i akamatakite mai ei i te taangaanga anga i taua au ngai ra. Kua tatau ainei koe i te au makatini ou tei neneiia e te tavini akono meitaki no te taangaanga anga i teia au ngai ei komunikeiti anga i runga i te Initaneti? E mea kino tikai i te taangaanga i taua au ngai ra me kare koe i tatau ana i taua au makatini ra! * Mei te mea rai e kua inu koe i tetai vairakau pakari e kare koe i tatau ana i te akamatakiteanga i runga i te moina.

12. Eaa ra i riro ei ei mea neneva i te akarongo kore ki te au akamatakiteanga?

¹² Te aronga kare e akarongo ana ki te au akamatakiteanga no ko mai i te tavini akono meitaki, te takino ra ratou ia ratou uaorai e to ratou au akaperepere. Kua maata rava te inangaro o tetai pae i te akara i te au ainga viivii me kore kua rave i te akaturi e kua manako e kare a Iehova e kite maira i ta ratou e rave ra. E neneva tikai i te irinaki anga e ka rauka ia tatou i te uuna i ta tatou e rave ra mei ia Iehova! (Mase. 15:3; e tatau ia Ebera 4:13.) Te inangaro maira te Atua i te tauturu i taua aronga ra e te akamaroiroi maira i tona au komono kia tauturu atu ia ratou. (Gala. 6:1) Ka rauka i te au kavamani i te akakore i te tikaanga o tetai kia riro mai ei tangata no te enua me rave aia i te kino, ka rauka katoa ia Iehova i te rave i te reira ki te aronga te aati tataraara kore ra i tana au ture. * (1 Kori. 5:11-13) Noatu ra, e tu takinga aroa tona. Ka rauka i te aronga tei tataraara e tei taui i to ratou au tu tetai pirianga meitaki kia Iehova, e ka vai ua rai ratou ei au tangata no te Patireia. (2 Kori. 2:5-8) E tu akangateitei anga tikai no tatou kia tavini i teia Ariki aroa!

 AKAPEREPERE TE AU TANGATA O TE PATIREIA I TE APII

13. Akapeea te au tangata o te Patireia te akaari anga e te akaperepere ra ratou i te apiianga?

¹³ Maata te au kavamani te angaanga pakari ra i te apii i to ratou au tangata. Kua akanoo ratou i te au apii no te apiianga i te tata e te tatau e kua apii i te au tu kite karape no te angaanga. Te ariki rekareka nei teia au tangata o te Patireia i teia au apii e te apii maroiroi nei ratou i te tatau, tata, e te turuturu anga ia ratou uaorai i te pae moni. Te akaperepere maata katoa ra ratou i te au apii te rauka maira ia ratou ei au tangata no te Patireia o te Atua. Te akamaroiroi ra a Iehova e kia raveia tetai apiiaanga no runga i te tataanga e te tatau i roto i te au putuputuanga Kerititiano. Te akamaroiroiia ra te au metua kia tatau ki ta ratou au tamariki. I roto i te toru marama, e nenei ana te tavini akono meitaki e 160 kapi o Te Punanga Tiaki e te makatini E Ara! tei akatumuia ki runga i te Pipiria i roto i te reo Rarotonga. Me tatau koe e rua kapi i te ra, ka puapinga maataia ia koe mei te apiianga a te Patireia.

14. (a) Eaa te terenianga e rauka maira ia tatou? (e) Eaa te au manako no runga i te Akamorianga a te Ngutuare i te aiai taau i mataora ana i te taangaanga?

¹⁴ I te au epetoma ravarai, e tereniia ana te au tangata o te Patireia i ko i te au uipaanga a te putuputuanga. Ei akaraanga, tere atu i te 60 mataiti te tauturu anga te Apii Orometua Teokaratiki i te aronga apii kia riro mai ei au puapii tukatau no te Tuatua a te Atua. Kua o ainei koe ki roto i teia apii? I te au mataiti i topa akenei, kua akamaroiroi mai te tavini akono meitaki e kia raveia te Akamorianga a te Ngutuare i te aiai. Kua riro teia akanoonooanga ei akaketaketaanga i te tu taokotai o te pamiri. Kua taangaanga ainei koe i teia au manako tei neneiia i roto i ta tatou au atikara? *

15. Eaa tetai tikaanga ngateitei tei rauka mai ia tatou?

¹⁵ E akamaroiroi ana te au tangata o te kavamani i tetai aronga turuturu no te pupu poritiki, te aere katoa anga mei tera are ki tera are. I roto i tetai tuanga maata, e turuturu maroiroi ana te au tangata o te Patireia i to te Atua Patireia i te pae mataara e mei tera are ki tera are. Mei tei taikuia i te atikara apii mua, ko Te Punanga Tiaki te tianara e tua maataia ra i te enua nei, te akakitekite anga i to Iehova Patireia! E tikaanga ngateitei teia no tatou i te akakitekite aere i te Patireia o te Atua ki tetai ke. Te piri maroiroi ra ainei koe ki teia angaanga tutuanga?​—Mata. 28:19, 20.

16. Akapeea koe me akapapu e e tangata meitaki koe no te Patireia o te Atua?

¹⁶ Kare e roa atu ko te Patireia anake ua o te Atua te ka tutara i te enua nei. Ka akaaere te reira i te au tuanga ravarai o te oraanga i te pae vaerua e te pae kopapa. Ka riro ainei koe ei tangata meitaki no te Patireia o te Atua a te reira tuatau? No reira ko toou taime teia i te akapapu e ka rave koe i te reira. I roto i taau au ikianga ravarai i te au ra, e rave i te au mea ravarai ei akakaka anga ia Iehova, e kia akapapu e ka tau ua rai koe ei tangata meitaki no te Patireia o te Atua.​—1 Kori. 10:31.

[Au Tataanga Rikiriki i Raro]

[Au Uianga Apii]

[Tataanga i te kapi 14]

Akarongo ra ainei koe i te au akamatakiteanga Pipiria no runga i te Initaneti?

[Tutu i te kapi 12]

Mataora ra ainei koe i te akamorianga mou e tona tuatua enua, mei ta Kora au tamariki tamaroa rai?

[Tutu i te kapi 15]

Ka tauturu te Akamorianga a te Ngutuare i te aiai ia koe e toou pamiri kia riro mai ei au tangata meitaki no te Patireia