Patoi e e Kopae i te au Ereere a Satani!

“Patoi i te ravenga pakari a te diabolo.”​—EPHE. 6:11.

AKAPEEA KOE ME PAU?

Eaa ta tetai tavini o Iehova ka rave kia kore e opuia e te ereere o te au apinga nui?

Eaa te ka tauturu i tetai Kerititiano akaipoipo kia kore e topa ki roto i te ereere o te akaturi?

Eaa koe ka irinaki ei e e puapinga i te patoi atu i te au apinga nui e te pirianga ainga tau kore?

1, 2. (a) Eaa ra a Satani kare e tangi ana i te aronga akatainuia e te “mamoe ke atu”? (e) Eaa te au ereere a Satani ta tatou ka uriuri i roto i teia atikara?

KARE te Tiaporo a Satani e tangi ana i te au tangata, te aronga tikai e tavini ra ia Iehova. Te tikaanga, te tamaki ra a Satani i te toenga o te aronga akatainuia. (Apo. 12:17) Te arataki maroiroi ra taua au Kerititiano tiratiratu ra i te angaanga tutuanga o te Patireia i teia tuatau, e kua akakite ratou e ko Satani te tutara o teianei ao. Kare te Tiaporo e inangaro katoa ana i te “mamoe ke atu,” te turuturu ra i te aronga akatainuia e tei tau no te oraanga mutu kore​—e manakonakoanga tei kare e rauka akaou ia Satani. (Ioa. 10:16) No reira aia i riri maata ai! Noatu e manakonakoanga to tatou no te rangi me kore no te enua, kare a Satani e manako mai ana i to tatou oraanga. Tona akakoroanga kia takore ia tatou.​—1 Pete. 5:8.

² E rauka ai iaia i te akatupu i tona akakoroanga, kua akanoo a Satani i tetai au ereere me kore au marei. I te mea e kua ‘akapoiri aia i te au manako’ o te aronga akarongo kore, kare ratou e ariki ana i te tuatua meitaki e kare katoa e kite ana i teia au ereere. Inara, te marie katoa ra te Tiaporo i tetai aronga kare e ariki ana i te karere o te Patireia. (2 Kori. 4:3, 4) Te akaari maira te atikara i mua ana e akapeea tatou me kopae i ta Satani au ereere e toru: (1) te tuatua akatere koreia, (2) te mataku e te taomianga, e te (3) maata te manako akaapa. Ka akamanako ana tatou akapeea me patoi atu i tetai nga ereere a Satani​—te au apinga nui e te timataanga kia rave i te akaturi.

AU APINGA NUI​—E EREERE TE KA AKAPOKIA

3, 4. Akapeea te au anoano maata o teianei ao te taki atu anga ki te au apinga nui?

³ I roto i tetai o tana akatutuanga, kua taiku mai a Iesu i tetai ua tei ruruia ki roto i te au rakau taratara.  Kua akakite mai aia e ka akarongo tetai tangata i te tuatua, inara ka ‘pokia atura te tuatua no te anoano maata i teianei ao, e te pikikaa o te apinga nui, e kare atura i ua mai.’ (Mata. 13:22) Ae, ko te au apinga nui tetai ereere ta to tatou enemi ko Satani e taangaanga nei.

⁴ Me kapitiia teia nga akakeuanga, ka akapokia te reira i te tuatua. Tetai o te reira ko “te anoano maata i to teianei ao.” I roto i teia nga turanga “kino maata,” e maata te au mea te ka akataitaia ia koe. (2 Tim. 3:1) Penei no te oko maata o te au apinga e kare e maata ana te angaanga moni, ka kite mai koe e e ngata tikai e rauka mai ei te au mea o te oranga. Penei ka manamanata koe no te tuatau ki mua e ka manako e, ‘Ka rava ainei taku moni i muri ake ka ritaea mai ei au?’ No taua au manako taitaia ra, kua aruaru tetai pae i te au apinga nui, te manako anga e ka oronga mai te moni i tetai oraanga tinamou.

5. Na teea au mataara e riro ana ‘te pikikaa o te au apinga nui’ ei akavare anga?

⁵ Kua tuatua mai a Iesu i tetai atu akakeuanga​—koia oki ‘te pikikaa o te apinga nui.’ Me kapiti mai taua akakeuanga ra ki te taitaia, ka akapokia te reira i te tuatua. Kua akakite mai te Pipiria e “e akapuanga tei te moni.” (Kohe. 7:12) Inara, kare i te mea meitaki i te aruaru i te au apinga nui. Maata tei kite mai e ko te maata atu i ta ratou tauta anga kia rauka mai te au apinga nui, maata atu ta te reira e marei ana ia ratou. Kua riro tetai au tangata ei tuikaa no te au apinga nui.​—Mata. 6:24.

6, 7. (a) Akapeea te au apinga nui te riro anga ei mea kino i te ngai angaanga moni? (e) Eaa te au mea kia akamanako tetai Kerititiano me ka patiia mai aia kia angaanga maata atu?

⁶ I te akamataanga, kare e kino ana i te inangaro atu i te au apinga nui. Ei akaraanga, akamanako ana i teia akatutuanga. Kua aravei mai toou pu ia koe e kua tuatua mai e: “E nuti meitaki taku! Kua orongaia mai tetai angaanga maata na te kamupani. Tera te aiteanga ka angaanga maata atu koe no tetai au marama. Inara te akapapu atu nei au e ka tutaki meitakiia koe no taau angaanga pakari.” Akapeea koe me ariu atu ki te reira? E tika e mea puapinga i te akono i te turanga pae materia o toou pamiri, inara kare ko te reira ua taau apainga. (1 Timo. 5:8) E au apainga ke atu tetai taau ka akamanako. Eaa te maata o te ora taau ka angaanga? Ka tamanamanata ainei taau angaanga moni i taau au angaanga pae vaerua, kapiti mai i te au uipaanga e taau Akamorianga a te Ngutuare i te aiai?

⁷ Na te akamanako meitaki anga i taau ikianga, eaa taau ka akamanako e ko te mea puapinga atu​—ko te angaanga maata anga ainei kia maata atu taau moni i roto i te pangika, me kore ko toou turanga pae vaerua ainei? Ka akamutu ainei koe i te tuku i te anoano o te Patireia na mua no toou inangaro  kia maata atu taau moni? Te kite ra ainei koe e eaa ta te au apinga nui ka akatupu kia koe me kare koe e akono i toou turanga pae vaerua e to te pamiri? Me te tupu ra te reira kia koe i teianei, akapeea koe i te patoi anga e te kopae anga kia kore koe e akapokiaia e te au apinga nui?​—E tatau ia 1 Timo. 6:9, 10.

8. Eaa te au akaraanga Tuatua Tapu te ka tauturu ia tatou kia akara meitaki i ta tatou e rave ra?

⁸ Me kare tatou e inangaro kia akapokiaia e te au apinga nui, e akara meitaki i ta tatou e rave ra i tetai au taime. Kare rava koe e inangaro kia aite koe mei ia Esau rai, tei akaari mai e kua akavaavaa aia i te au apinga pae vaerua! (Gene. 25:34; Ebe. 12:16) Papu e kare koe e inangaro ana kia aite mai mei te tangata apinga nui rai ta Iesu i pati kia oko i tana au apinga e kia oronga atu ki te aronga putaua e kia aru iaia. Kare te tangata i rave ana i te reira, mari ra kua ‘aere ke atura aia ma te aue no tona apinga maata.’ (Mata. 19:21, 22) No tei ereereia e te au apinga nui, kua ngere taua tangata ra i te tikaanga ngateitei maata​—kia aru i te tangata maata rava atu tei ora ana! No reira, kia matakite e kia kore e ngaro to tatou tikaanga ngateitei ei au pipi na Iesu Karaiti.

9, 10. Eaa taau ka tuatua no runga i te manako o te au Tuatua Tapu no runga i te au apinga nui?

⁹ Ei akakore atu i te au manamanata puapinga kore no runga i te au apinga nui, e aru i ta Iesu akoanga: “E teianei, auraka kotou e apiapi ua, ka na ko ei ra, Eaa ua ta matou kia kai? e, Eaa oki ta matou kia inu? e, Eaa to matou kakau kia kakau? (Te kimi ra oki te au etene i taua au mea katoa ra:) kua kite oki to kotou Metua i te ao ra e, kia rauka taua au mea katoa ra ia kotou e tikaʼi.”​—Mata. 6:31, 32; Luka 21:34, 35.

¹⁰ Kia kore e pikikaaia e te au apinga nui, tauta i te aru i te tu manako o te tangata tata Pipiria ko Agura, tei tuatua e: “Auraka e tuku iaku kia putaua me kore kia apinga nui. E oronga ua mai ra i taku e anoano ra.” (Mase. 30:8, Contemporary English Version) Taka ua ra e kua marama a Agura e e puapinga te moni ei akapuanga e te tu pikikaa katoa o te au apinga nui. No reira, kia marama e ka takino te anoano maata o teianei ao e te tu pikikaa o te au apinga nui i to tatou turanga pae vaerua. Ka pou to tatou taime i te manamanata puapinga kore i te au apinga nui, e to tatou maroiroi, e kare tatou e aruaru i te au anoano o te Patireia. No reira, kia matakite kia kore koe e opuia e ta Satani au ereere o te au apinga nui!​—E tatau ia Ebera 13:5.

AKATURI​—MEI TE VAARUA UUNA KARAPEIA

11, 12. Akapeea tetai Kerititiano me topa ki roto i te ereere o te akaturi i te ngai angaanga?

¹¹ E ko ana tetai tangata opu manu i tetai vaarua i te ngai e aere putuputu ana te manu ei opu anga i te reira. E uuna ia ana te vaarua na te tapoki anga i te reira ki tetai au rakau e te one. Te aiteite ra tetai o ta Satani timataanga kino roa atu ki taua tu ereere ra. Koia oki, te ara kia rave i te ainga tau kore. (Mase. 22:14; 23:27) Maata te au Kerititiano kua topa ki roto i taua ereere ra na te tuku anga ia ratou ki roto i te au turanga mama ua i te akatupu i te ainga tau kore. Kua akaturi tetai au Kerititiano akaipoipo i muri ake i te akatupuanga i tetai akainangaro anga tau kore ki tetai ke.

¹² Ka tupu mai tetai akainangaro anga tau kore i ko i taau ngai angaanga. E tika, kua akaari mai tetai kimikimianga e e maata atu i te apa o te au vaine e te maataanga o te au tane tei rave i te ainga tau kore ki tetai oa angaanga. Te umuumu maira ainei taau angaanga e kia kapiti atu koe ki te au mema tane me kore vaine? Me koiaia, eaa te turanga o toou pirianga kia ratou? E kotinga ana ainei koe i toou pirianga kia kore e riro mai ei pirianga akainangaro? Ei akaraanga, i muri ake te pukapuka putuputuanga tetai tuaine Kerititiano ki tetai tangata angaanga,  penei ka riro mai raua ei oa piri vaitata, e ka akakite atu te tuaine i tona au manamanata akaipoipo kiaia. I roto i tetai atu turanga, kua akaari tetai taeake i te tu oaoa ki tetai vaine i te angaanga, penei ka manako aia e: “E ariki mai ana aia i toku au manako e e akarongo mai ana aia me tuatua atu au kiaia. E te akangateitei maira aia iaku. Manako ua atu ana au e kia akapera mai taku vaine iaku i te kainga!” Te kite ra ainei koe e akapeea taua au turanga ra te akavare anga i te au Kerititiano kia rave i te akaturi?

13. Akapeea tetai tu akainangaro anga tau kore e tupu ei i roto i te putuputuanga?

¹³ Ka tupu mai te tu akainangaro anga tau kore i roto i te putuputuanga. Akara ana i tetai akaraanga tika tikai. E nga painia tamou a Daniel raua ko tana vaine ko Sarah. * Kua akakite mai a Daniel e, “e tangata pakari aia kare e rauka iaia i te karanga e kare.” E ariki rekareka ua ana aia i te au apainga te ka orongaia mai kiaia. Ei tuanga no tana angaanga orometua, kua apii a Daniel i te Pipiria ki tetai au mapu tane e rima​—e toru ia ratou kua papetitoia. Te anoano ra teia au taeake ou tei papetitoia tetai tauturu. E tauturu mai ana a Sarah me maata te au angaanga teokaratiki a Daniel. Kua riro teia ei angaanga matauia: Te anoano ra te aronga apii Pipiria mua a Daniel i tetai tauturu i te pae manako, e kua oronga atu a Sarah i te reira. Te anoano katoa ra a Sarah i tetai turuturu anga, e kua oronga atu te aronga apii Pipiria a Daniel i te reira kiaia. Kua riro te reira ei turanga kino. “Kua pou te maroiroi o taku vaine i te pae vaerua e te pae manako no te turuturu anga i tetai ke no tetai au marama,” i karanga ai a Daniel. “Kapiti mai, kare au i akono ana iaia, e kua taki atu te reira ki tetai tupuanga kino. Kua akaturi taku vaine ki tetai o te tangata i apii ana au i mua ana. Kua paruparu aia i te pae vaerua e kare rava au i kite atu ana, kua maata rava toku manako ki runga i taku au apainga.” Akapeea koe me kopae i taua tu kino ra?

14, 15. Eaa te au mea te ka tauturu i te au Kerititiano akaipoipo kia kopae i te ereere o te akaturi?

¹⁴ Kia rauka i te kopae i te ereere o te akaturi, akamanako i te aiteanga o te koreromotu akaipoipo. Kua tuatua a Iesu e: “Ta te Atua i topiri ra, auraka te tangata e akataka ke atu.” (Mata. 19:6) Auraka rava e manako e e puapinga atu taau au apainga teokaratiki i toou tokorua. Mari ra, kia akamaara e me akapou koe i toou taime ki te au angaanga puapinga kore e kare ki toou tokorua, te akaari maira e te paruparu ra toou akaipoipo e ka timataia koe kia rave i te akaturi.

¹⁵ Me e tangata pakari koe, akapeea ra te au anana? Kua tata mai te apotetoro ko Petero e: “Ka angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau.” (1 Pete. 5:2) E akono i te au mema o te putuputuanga e tiaki ra koe. Inara, eiaa e akapou ua i te taime ki taau angaanga tiaki e kia akangaropoina i taau apainga ei tane akaipoipo. E mea puapinga kore​—e te kino katoa—​kia akamou ua i toou manako i te angai i te putuputuanga inara te “matepongi” ra toou tokorua i te kainga. Kua akakite mai a Daniel e, “Eiaa rava koe e akapou ua i toou taime ki runga i taau au apainga e kia akangaropoina i toou pamiri.”

16, 17. (a) Eaa ta te au Kerititiano akaipoipo ka rave i te ngai angaanga kia kite mai tetai ke e kare ratou e inangaro ana i tetai pirianga akainangaro? (e) Oronga mai i tetai akaraanga o tetai nga makatini tei neneiia te ka tauturu i te au Kerititiano kia kopae i te akaturi.

¹⁶ Maata te au akoanga meitaki i roto i Te Punanga Tiaki e te makatini E Ara! ei tauturu i te au Kerititiano akaipoipo kia kore e topa ki roto i te ereere o te akaturi. Ei akatauanga, te oronga maira Te Punanga Tiaki o Tepetema 15, 2006, i teia akoanga e: “I roto i te ngai angaanga, e i tetai ngai ke atu, e matakite i te au turanga penei ka akatupu i  tetai pirianga. Ei akaraanga, te noo roa anga e te angaanga kapiti anga ki tetai tane me kore ki tetai vaine, ko te akamataanga te reira no tetai timataanga. Ei tane me kore ei vaine akaipoipo, ka tau koe kia akataka meitaki na roto i taau tuatua e toou tu e kare oou inangaro i roto i tetai ke. Ei tangata e aruaru ra i te akamorianga tau i te Atua, kare rava koe e inangaro i te akakeu i te inangaro na te akameameaanga me kore na te tu tau kore o toou kakau e toou akamanea anga. . . . Te tukuanga i te au tutu o toou tokorua akaipoipo e taau tamariki i roto aere i te ngai angaanga ka riro ei akamaaraanga tikai kia koe e ki tetai ke e e puapinga maata toou pamiri kia koe. E tauta e auraka rava e akamaroiroi atu​—me kore e akatika ua atu—​te au akavareanga akainangaro mei tetai ke.”

¹⁷ Te akamatakite maira te atikara “Akaipoipo Tiratiratu​—Eaa Tikai te Aiteanga? i roto i te makatini E Ara! o Aperira 2009 no runga i te manako pirianga ainga ki tetai tangata ke kare i te tokorua akaipoipo noou. Te akakite maira te atikara e ka riro te manako pirianga ainga ei akakeu i tetai kia rave i te akaturi. (Iako. 1:14, 15) Me kua akaipoipo koe, e mea meitaki kia akara akaou korua ko toou tokorua i taua au manako ra i tetai au taime. E mea tapu tikai te akaipoipo tei akanooia mai e Iehova. E mea meitaki kia tuku i tetai taime kia pukapuka kapiti e toou tokorua no runga i te akaipoipo, kia akaari e te akaperepere ra korua i te au mea tapu.​—Gene. 2:21-24.

18, 19. (a) Eaa te au tupu anga kino no te akaturi? (e) Eaa te au mea puapinga ka rauka mai me tiratiratu tatou ki te akaipoipo?

¹⁸ Me kite mai koe e te tupu maira tetai tu akainangaro anga tau kore, akamanako meitaki i te au kino ka tupu mai no te rave anga i te moeaana e te akaturi. (Mase. 7:22, 23; Gal. 6:7) Kua akamareka kore te aronga tei rave i te ainga tau kore ia Iehova e kua tamamae i to ratou tokorua e ia ratou uaorai. (E tatau ia Malaki 2:13, 14.) No reira e akamanako i te au mea puapinga ka rauka mai i te aronga tei akono tamou i te tu tiratiratu. Ka rauka ia ratou te manakonakoanga no te oraanga mutu kore e ka mataora katoa ratou i tetai oraanga meitaki atu i teianei, e tetai akava ngakau ma.​—E tatau ia Maseli 3:1, 2.

¹⁹ Kua imene te tata taramo e: “E au maata to te aronga i inangaro i taau [Atua] ture; kare o ratou e turorianga.” (Sala. 119:165) No reira kia inangaro i te tuatua mou, e “kia matakite i to kotou aerenga, eiaa mei ta te kite kore, mei ta te aronga pakari ra” i teia tuatau kino. (Ephe. 5:15, 16) Kua ki te mataara ta tatou e aru nei i te au ereere tei akanooia e Satani ei opu anga i te aronga akamori mou. Inara, kua papa meitaki tatou no te paruru anga ia tatou. Kua oronga mai a Iehova i ta tatou e anoano ra kia “patoi” e kia ‘tamate i te au tao ai ravarai a te vaerua kino ra’!​—Ephe. 6:11, 16.

[Tataanga Rikiriki i Raro]

[Au Uianga Apii]

[Tutu i te kapi 26]

Ka akapokia te au apinga nui i tetai tangata i te pae vaerua. Auraka rava e akatika i te reira kia tupu kia koe

[Tutu i te kapi 29]

Ka taki atu te akameameaanga​—me kore te ariu atu anga ki te reira—​i tetai kia rave i te akaturi